1. So vakerela o lil Otkrovenie bašo e Devleskoro narodo ki phuv?

 KO LIL Otkrovenie doznajnaja kaj e Devleskoro Carstvo vladinela hem kaj o Satana sine frdimo taro nebo (Otk. 12:1-9). Adava značingja mir okolenge soj ko nebo, ama angja problemija amenge so siem akate ki phuv. Soske? Adaleske so o Satana tano holjamo hem napadinela e Jehovaskere slugen akate ki phuv (Otk. 12:12, 15, 17).

2. So ka pomožinel amenge te ačhova verna?

² Sar šaj te ačhova verna iako o Satana napadinela amen? (Otk. 13:10). Jekh buti so ka pomožinel amenge tani ako džanaja so ka slučinel pe ki idnina. Na primer, ko Otkrovenie o apostol Jovan opišinela nesave taro bereketija kolende so panda hari ka uživina. Jekh taro adala bereketija tano kaj e Devleskere dušmanja ka oven uništime. Te dikha akana sar o Otkrovenie opišinela akale dušmanen hem so ka slučinel pe lencar.

3. Kola tane nesave taro znakija soj spomnime ko lil Otkrovenie?

³ Panda taro prvo stiho o lil Otkrovenie vakerela amenge kaj o informacie so ka čitina len tane dende „ko znakija“, javere lafencar ki simbolično čhib (Otk. 1:1). E Devleskere dušmanja tane simbolično opišime, sar nekobor diva zverija. Na primer, isi jekh „zvero kova so ikljola taro more“ le isi le „deš šinga hem efta šere“ (Otk. 13:1). Pali leste isi panda jekh javer „zvero kova  so ikljola tari phuv“. Akava zvero kerela lafi sar zmej hem „mukhela jag taro nebo“ (Otk. 13:11-13). Palo adava dikhaja jekh javer „lolo zvero“ upri koleste so bešela jekh bludnica. Akala trin zverija pretstavinena e dušmanen kola so vekoncar borinena pe protiv o Jehova hem leskoro Carstvo. Adaleske tano but važno te džana koj tane ola (Otk. 17:1, 3).

4-5. Sar adava soj pišimo ko Daniel 7:15-17, pomožinela amenge te haljova so značinena akala simbolija?

⁴ Te šaj te doznajna koj tane akala dušmanja valjani te haljova kas pretstavinena o zverija hem i bludnica. Najšukar način sar šaj te otkrina adava tano te dozvolina i Biblija te objasninel amenge. But taro simbolija so arakhljovena ko Otkrovenie tane objasnime ko javera lila tari Biblija. Na primer, o proroko o Daniel dikhlja ko suno „štar bare zverija sar ikljona taro more“ (Dan. 7:1-3). O Daniel vakerela amenge so pretstavinena ola. Akala bare zverija pretstavinena štare „caren“ ili vladen. (Čitin Daniel 7:15-17.) Akava objasnuvanje pomožinela amenge te haljova kaj hem o zverija soj opišime ko Otkrovenie isto agjaar pretstavinena vladen.

⁵ Te dikha akana nesave taro simbolija soj opišime ko Otkrovenie. Džikote keraja adava ka dikha sar i Biblija pomožinela amenge te haljova so značinena akala simbolija. Ka počmina e zveroncar hem ka dikha kas pretstavinena ola. Palo adava, ka dikha so ka slučinel pe akale zveroncar. Ko krajo ka kera lafi bašo adava so značinena akala nastanija amenge.

6. Kas pretstavinela o zvero e efta šerencar kova soj spomnimo ko Otkrovenie 13:1-4?

⁶ Kas pretstavinela o zvero efta šerencar? (Čitin Otkrovenie 13:1-4.) Akate primetinaja kaj akava zvero ličinela sar leopardi ama isi le sar mečkakere pre, sar laveskoro muj hem isi le deš šinga. O štar zverija soj tane spomnime ko eftato poglavje taro lil Daniel, isto agjaar isi len akala karakteristike. Ama, ko lil Otkrovenie akala karakteristike arakhljona ko jekh zvero, a na ko štar posebna zverija. Akava zvero na pretstavinela samo jekhe vlada ili svetsko sila. Baši leste tano vakerdo kaj vladinela upro „sekova pleme hem narodo hem čhib hem nacija“. Znači ov mora te pretstavinel nešto pobaro tari bilo koja javer posebno vlada (Otk. 13:7). Akava zvero sigurno pretstavinela sa e politička silen kola so vladingje e manušencar ki celo istorija dži akana * (Prop. 8:9).

7. So pretstavinela sekova jekh taro efta šere?

⁷ So pretstavinela sekova jekh taro efta šere akale zveroskere? O 17 poglavje taro Otkrovenie pomožinela amenge te otkrina o odgovor soske ki leste tano opišimo o kipi e zveroskoro kova soj spomnimo ko 13 poglavje. Ko Otkrovenie 17:10 čitinaja: „Ola tane efta carija: pandž lendar pele, jekh vladinela, a o javer panda na alo, ama keda ka avel ka ačhovel samo kratko vreme“. Taro sa o politička sile kolen so o Satana koristingja, efta lendar tane sporedime „šerencar“ soske isi len bari mokj. Akala tane o svetska sile kolen so sine len baro vlijanie upro e Devleskoro narodo. Dži ko vreme e apostol Jovaneskoro, pandž lendar više vladingje: O Egipet, i Asirija, o Vavilon, i Medo-Persija hem  i Grcija. I šovto svetsko sila o Rim panda vladinela sine džikote o Jovan dobingja o vizie taro Otkrovenie. Koja vlada valjani sine te ovel o eftato šero, javere lafencar i posledno svetsko sila?

8. Kas pretstavinela o eftato šero taro zvero?

⁸ Sar so ka dikha, o proroštvija taro Daniel pomožinena amenge te otkrina koj tano o eftato ili o posledno šero taro zvero. Koja svetsko sila vladinela ko posledna dive, javere lafencar ko e „Gospodareskoro dive“? (Otk. 1:10). I Anglo–Amerikansko svetsko sila. Ki akaja svetsko sila sorabotinena duj mokjna vlade, i Velika Britanija hem o Soedinetite Amerikanski Državi. Adaleske šaj te vakera kaj oj tani o eftato šero taro zvero soj spomnimo ko Otkrovenie 13:1-4.

9. Kas pretstavinela o zvero kole so isi sar „duj bakhreskere šinga“?

⁹ O 13 poglavje taro lil Otkrovenie ponadari vakerela amenge kaj adava eftato šero, i Anglo–Amerikansko svetsko sila, isto agjaar tano sar jekh zvero kole so isi sar duj bakhreskere šinga, ama kerela lafi sar zmej. Akava zvero kerela sine „bare čudija, čak mukhela sine jag taro nebo ki phuv anglo e manušengere jakhja“ (Otk. 13:11-15). O 16 hem o 19 poglavje taro lil Otkrovenie opišinela akale zvero sar „hovavno proroko“ (Otk. 16:13; 19:20). O Daniel spomninela nešto slično, kaj i Anglo–Amerikansko svetsko sila ka anel baro uništibe (Dan. 8:19, 23, 24). Baš akava slučingja pe ki dujto svetsko vojna. O duj atomska bombe kola so angje krajo e vojnake, sine kerde taro britanska hem taro amerikanska naučnikija. Adalea so kergje akala bombe, i Anglo–Amerikansko svetsko sila ustvari „mukhle jag taro nebo ki phuv“.

10. Kas pretstavinela „o kipi e zveroskoro“? (Otkrovenie 13:14, 15; 17:3, 8, 11)

¹⁰ Palo adava dikhaja jekh javer zvero. Akava zvero ličinela skoro slično sar o zvero e efta šerencar, samo so akava tano lolo. Ov tano vikimo „o kipi e zveroskoro“ hem tano opišimo sar „o oftoto cari“. * (Čitin Otkrovenie 13:14, 15; 17:3, 8, 11.) Bašo akava cari vakerela pe kaj pojavingja pe, palo adava našavdilo hem pokasno palem pojavingja pe. Akava but šukar opišinela e organizacija taro Obedineta nacie kola so poddržinena e svetsko političko sisteme. Ko početok akaja organizacija vikinela pe sine Liga e narodongiri. Palo adava džikote trajnela sine i dujto svetsko vojna oj našavdili. Pokasno oj palem pojavingja pe ama akava puti sar Obedineta nacie.

11. Ko so pottikninena o zverija, hem soske na valjani te dara lendar?

¹¹ Preku pli propaganda, o zverija ili o vlade, pottikninena e manušen te protivinen pe e Jehovaske hem leskere narodoske. Ko simbolično način, ola khedena e caren taro celo sveto ki vojna Armagedon, javere lafencar bašo „baro dive e Semokjno Devleskoro“ (Otk. 16:13, 14, 16). Ama amen nane soske te dara. Amaro Devel, o Jehova, sigate ka reagirinel te šaj te spasinel sa okolen so poddržinena leskere vlada (Ezek. 38:21-23).

12. So ka slučinel pe sa e zveroncar?

¹² So ka slučinel pe sa e zveroncar? Ko Otkrovenie 19:20 arakhaja o odgovor: „Sine astardo o zvero, a lea hem o hovavno proroko  kova so angli leste kerela sine znakija kolencar so hovavgja okolen so primingje o belego e zveroskoro hem okolen so pokloninena pe leskere kipeske. O solduj sine frdime džikote panda sine dživde ko jekh ezero tari jag so thabljola sulfurea“. Znači, akala vlade soj tane dušmanja e Devleskere, ka oven uništime džikote panda vladinena.

13. Save problemija kerena nesave vlade sa e Devleskere slugenge?

¹³ So značinela akava amenge? Adaleske so siem hristijanja mora te ačhova verna e Devleske hem leskere Carstvoske (Jovan 18:36). Mora te ačhova neutralna hem te na birina nisavi strana ki politika. Ama te ačhovel pe neutralno šaj te ovel but pharo soske o svetska vlade rodena celosno te poddržina len amare lafencar hem postapkencar. Okola so perena ko pritisok akale vladengoro dobinena o belego taro divo zvero (Otk. 13:16, 17). A sarine okola so dobinena adava belego nane te oven prifatime taro Jehova hem nane te dobinen večno životo (Otk. 14:9, 10; 20:4). Adaleske but tano važno te ačhova celosno neutralna, bizi razlika kobor baro pritisok kerena amenge o vlade!

14. Sar soj pišimo ko Otkrovenie 17:3-5, so javer dikhlja o apostol Jovan?

¹⁴ O apostol Jovan spomninela kaj sine „but iznenadimo“ taro nešto javer so dikhlja. So sine adava? Ov dikhlja sar jekh džuvli bešela upro jekh taro akala opasna zverija (Otk. 17:1, 2, 6). Oj ličinela sar jekh „bari bludnica“ hem lakoro anav tano „o Baro Vavilon“. Oj kerela „blud e carencar tari phuv“. (Čitin Otkrovenie 17:3-5.)

15-16. Soj tano o „Baro Vavilon“ hem kotar džanaja adava?

¹⁵ Kas pretstavinela o „Baro Vavilon“? Akaja džuvli našti te pretstavinel e političko organizacija soske baši late vakerela pe kaj kerela blud e svetsko političko vodačencar (Otk. 18:9). Ustvari, adava soj tani upro o zvero sikavela kaj mangela te kontrolirinel akale vladetelen. Isto agjaar, oj našti te pretstavinel o alčno trgovsko sistem taro e Satanaskoro sveto. Ola tane spomnime ko javer than ko Otkrovenie hem tane vikime „o trgovcija e phuvjakere“ (Otk. 18:11, 15, 16).

¹⁶ Ki Biblija o lafi „bludnica“ ponekogaš koristinela pe okolenge so vakerena kaj služinena e Devleske ama ko nesavo način kerena idolopoklonstvo, ili ko javera načinija ovena amala e svetoja (1. Let. 5:25; Jak. 4:4). But pojaver lendar, okolenge so obožavinena e Jehova vakerela pe kaj tane „čista“ hem tane vikime „device“ (2. Kor. 11:2; Otk. 14:4). O purano Vavilon sine centar bašo hovavno obožavibe. Znači, o Baro Vavilon sigurno pretstavinela sa o vrste hovavno obožavibe. Ustvari, oj tani i svetsko sila tari hovavni religija. (Otk. 17:5, 18; dikh i statija „Što e Golemiot Vavilon?“ ki amari internet-stranica.)

17. So ka slučinel pe e Bare Vavilonea?

¹⁷ So ka slučinel pe e Bare Vavilonea? Ko Otkrovenie 17:16, 17 arakhaja o odgovor: „A o deš šinga so dikhljan len hem o zvero ka mrzinen e bludnica, ka uništinen la hem ka huljaven la nangi, hem ka han lakoro mas hem ka tharen la ki jag. Soske o Devel čhivgja lenge ko vilo te keren adava so ov mangela“. Oja, o Jehova ka pottikninel e nacien te koristinen e lole zvero, javere lafencar o Obedineta nacie, te  napadinen e hovavne religien hem celosno te uništinen le (Otk. 18:21-24).

18. Sar šaj te sikava kaj ko nisavo način na poddržinaja e Bare Vavilone?

¹⁸ So značinela akava amenge? Valjani te ikera amaro obožavibe čisto hem sveto anglo amaro Devel (Jak. 1:27). Nikogaš na valjani te dozvolina te vlijajnen upri amende o hovavne sikljojba, o spiritizam, o paganska praznikija hem o slaba moralna merilija taro Baro Vavilon! Amen ponadari da predupredinaja e manušen te ikljoven lestar te šaj te na oven kriva bašo leskere grevija (Otk. 18:4).

19. Koj tano o „baro zmej jagale bojakoro“?

¹⁹ O lil Otkrovenie isto agjaar kerela lafi bašo jekh „baro zmej jagale bojakoro“ (Otk. 12:3). Akava zmej borinela pe protiv o Isus hem leskere angelija (Otk. 12:7-9). Ov napadinela e Devleskere narodo hem dela mokj e zveronge, javere lafencar e manušikane vladenge (Otk. 12:17; 13:4). Koj tano akava zmej? Adava tano o „najpurano sap, kova so vikinela pe Beng hem Satana“ (Otk. 12:9; 20:2). Ov kontrolirinela sa e Jehovaskere dušmanen.

20. So ka slučinel pe e zmeeja?

²⁰ So ka slučinel pe e zmeeja? Ko Otkrovenie 20:1-3 pišinela kaj jekh angeli ka frdel e Satana ki bezdna, adava ka ovel leske sar zatvor. Keda ka ovel ki adaja bezdna, o Satana nane „te hovavel više e narodo džikote na nakhena 1.000 berša“. Ko krajo, o Satana hem leskere demonija ka oven frdime ko ezero „kote so isi jag hem sulfur“ (Otk. 20:10). Adava značinela kaj ola ka oven uništime zasekogaš! Šaj li te zamisline tuke jekh sveto bizo Satana hem leskere demonija? Kobor šukar vreme samo ka ovel adava!

21. Soske šaj te ova bahtale bašo adava so čitingjem ko lil Otkrovenie?

²¹ Kobor tano ohrabruvačko adava so haljovaja so značinena o simbolija soj tane pišime ko lil Otkrovenie. Na samo so otkringjem koj tane e Jehovaskere dušmanja, nego isto agjaar dikhlem so ka slučinel pe lencar. Čače, „bahtalo tano okova so čitinela ko glaso hem okola so šunena o lafija taro akava proroštvo“ (Otk. 1:3). Ama otkeda ka oven uništime e Devleskere dušmanja, ko save bereketija ka uživinen o verna manuša? Bašo akava ka kera lafi ki sledno statija.