1-2. Koja tani jekh pričina soske valjani te interesina amen bašo lil Otkrovenie?

 DALI nekoj dengja tut te dikhe leskoro album slikencar? Džikote dikhea o slike, poviše taro adala džene na džanea len. Ama ki jekh slika ačhovea hem dikhea la pošukar. Soske? Adaleske so tu sian ki late. Džikote dikhea la, probinea te setine tut keda hem kote slikingjen tumen. Isto agjaar, probinea te dikhe koj adala soj tane tuja ki slika. Adaja slika tuke posebno interesno.

² O lil Otkrovenie tano sar adaja slika. Soske? Najhari taro duj pričine. Prvo, akava biblisko lil sine pišimo amenge. Ko prvo stiho taro akava lil pišinela: „Otkrovenie taro Isus Hristos, kova so dengja le o Devel, te sikavel ple robonge o bukja so ka slučinen pe panda hari“ (Otk. 1:1). Znači akava lil nane sa e manušenge, nego samo amenge, e Devleske slugenge. Sar Devleskoro narodo na valjani te iznenadinel amen adava so siem delo taro proroštvo so ispolninela pe ko akava lil, javere lafencar dikhaja amen „ki slika“.

3-4. Sprema o lil Otkrovenie, keda ka ispolninen pe akala proroštvija, hem sar valjani te vlijajnel adava upro sekova jekh amendar?

³ I dujto pričina soske valjani te interesina amen bašo akala proroštvija tani o vreme keda ka ispolninen pe. Bašo adava vreme, o Jovan vakergja: „Vodimo taro  sveti duh, arakhliljum ko e Gospodareskoro dive“ (Otk. 1:10). O Jovan pišingja akala lafija okolu 96 berš a.e., keda „e Gospodareskoro dive“ sine panda but dur (Mat. 25:14, 19; Luka 19:12). Ama, sprema o bibliska proroštvija adava dive počmingja ko 1914 berš, keda o Isus ulo Cari ko nebo. Taro adava berš počmingje te ispolninen pe o proroštvija taro Otkrovenie kote soj vklučimo e Devleskoro narodo. Oja, amen avdive živinaja ko e „Gospodareskoro dive“!

⁴ Adaleske so živinaja ko akava važno vreme, amen valjani posebno te šuna o ljubezno sovet soj pišimo ko Otkrovenie 1:3: „Bahtalo tano okova so čitinela ko glaso hem okola so šunena o lafija taro akava proroštvo hem so ikerena pe ko adava so pišinela ki leste, soske paše tano o vreme keda ka ispolninel pe“. Znači, valjani te čitina ko glaso, te šuna o lafija taro akava proroštvo hem te ikera amen ko adava. Kola tane nesave taro adala lafija kolende so valjani te ikera amen?

5. Sar o lil Otkrovenie sikavela kobor tano važno te trudina amen te obožavina e Jehova ko prifatlivo način?

⁵ Taro prvo poglavje taro Otkrovenie, doznajnaja kaj o Isus džanela sa so slučinela pe ko sobranie (Otk. 1:12-16, 20; 2:1). Adava šaj te dikha le taro porake so bičhalgja len ko efta sobranija ki Mala Azija. Ko adala porake ov dengja konkretna upatstvija te šaj te pomožinel e hristijanenge taro prvo veko te trudinen pe te obožavinen e Jehova ko prifatlivo način. Hem adala porake važinena sa e Devleskere slugenge avdive da. Koja tani i pouka amenge? Amaro vodači, o Isus Hristos, but šukar džanela ki savi duhovno sostojba siem. Ov vodinela amen, zaštitinela amen hem dikhela sa so slučinela pe. Ov džanela so valjani te kera te šaj ponadari da te ova prifatliva anglo e Jehovaskere jakhja. Te dikha save upatstvija dengja len kolende so valjani te ikera amen avdive.

6. a) Sprema e Isuseskere lafija ko Otkrovenie 2:3, 4, savo problemi sine e sobranie ko Efes? b) Savi pouka sikljovaja taro akava?

⁶ Čitin Otkrovenie 2:3, 4. Na smejnaja te našava amaro prvo mangipe sprema o Jehova. E Isuseskiri poraka dži ko sobranie ko Efes sikavela kaj istrajngje hem kaj iako sine len predizvikija, na čhinavgje te služinen e Jehovaske. Sepak, našavgje pumaro mangipe so sine len ko početok. Ola mora sine palem te zamangen e Jehova sar angleder, te šaj lengoro obožavibe te ovel prifatlivo. Slično agjaar, avdive da mora te kera nešto poviše nego samo te istrajna. Valjani te istrajna taro ispravna pričine. Amare Devleske nane samo važno so keraja, nego isto agjaar soske keraja adava. Amare motivija tane leske važna soske ov očekujnela te obožavina le adaleske so but mangaja le hem siem blagodarna leske (Izr. 16:2; Marko 12:29, 30).

7. a) Sprema Otkrovenie 3:1-3, savo problemi sine e sobranie ko Sard? b) So valjani amen te kera?

⁷ Čitin Otkrovenie 3:1-3. Mora ponadari da te ačhova džangavde. O phralja hem o phenja taro sobranie ko Sard sine len javer problemi. Iako angleder sine duhovno aktivna, ola čhinavgje te keren adava. Adaleske o Isus vakergja lenge „te džangavgjoven“. Savi pouka šaj te sikljova taro akava? Džangjola pe, o Jehova nane te  bistrel adava so kergjem (Evr. 6:10). Sepak, na valjani te mislina kaj adaleske so angleder kergjem dovolno ki služba e Jehovaske akana na valjani više te trudina amen but ki služba. Iako šaj amare okolnostija meningje pe, valjani ponadari da te ačhova zafatime ki „buti e Gospodareske“, hem te ačhova džangavde dži ko krajo (1. Kor. 15:58; Mat. 24:13; Marko 13:33).

8. So sikljovaja taro e Isuseskere lafija dži ko phralja tari Laodikija? (Otkrovenie 3:15-17).

⁸ Čitin Otkrovenie 3:15-17. Mora te ova revna hem te služina e Jehovaske celo vilea. E Isuseskiri poraka dži ko phralja tari Laodikija istakninela jekh javer problemi. Ola sine „mlaka“ ko lengoro obožavibe. Adaleske so sine ramnodušna, o Isus vakergja lenge kaj tane „žalibaske“. Valjani sine revno te služinen e Jehovaske (Otk. 3:19). Koja tani i pouka amenge? Ako našavgjem amari revnost, valjani te bajrara amaro cenenje bašo sa o šukar bukja so kerela len o Jehova hem leskiri organizacija (Otk. 3:18). Nikogaš na valjani te dozvolina i želba bašo udobno životo te čhinavel amen te čhiva o duhovna aktivnostija ko prvo than.

9. Sprema e Isuseskiri poraka bašo hristijanja ko Pergam hem Tijatira, savi opasnost valjani te izbegina?

⁹ Mora te otfrlina e otpadnikongere sikajba. O Isus ukoringja nesaven taro Pergam adaleske so kergje podelbe maškar o phralja (Otk. 2:14-16). Ov pofalingja e phralen tari Tijatira soske otfrlingje e „Satanaskere hor bukja“ hem pottikningja len cvrsto te ikeren pe ko čačipe (Otk. 2:24-26). O duhovno slaba hristijanja kola so počmingje te džan palo hovavne sikljojba valjani sine te kainen pe. So sikljovaja amen taro akava? Mora te otfrlina sekova sikljojba kova so nane ko sklad e Jehovaskere razmislibaja. O otpadnikija šaj ka sikaven pe sar asavke „so darana taro Devel“, ama na živinena agjaar (2. Tim. 3:5). But polokho ka ovel amenge te haljova kola tane adala pogrešna sikljojba hem te otfrlina len ako šukar proučinaja e Devleskoro Lafi (2. Tim. 3:14-17; Juda 3, 4).

10. Savi javer pouka šaj te sikljova taro adava so o Isus vakergja e phralenge hem e phenjenge taro Pergam hem Tijatira?

¹⁰ Na smejnaja te kera, te toleririna a ni te odobrina bilo savi vrsta nemoral. E phralen taro Pergam hem tari  Tijatira sine len javer da problemi. O Isus osudingja nesaven taro sobranie soske na otfrlingje o nemoral (Otk. 2:14, 20). Koja tani i pouka amenge? Našti te očekujna o Jehova te toleririnel, javere lafencar te nakhel preku nesavi nemoralno postapka, čak ako beršencar služinaja leske hem isi amen but odgovornostija (1. Sam. 15:22; 1. Pet. 2:16). Ov očekujnela te ikera amen ko leskere uče moralna merilija, bizi razlika kobor e svetoskere merilija ovena pološna (Ef. 6:11-13).

11. So siklilem dži akana? (Dikh hem i ramka „ Pouke amenge“.)

¹¹ So siklilem dži akana? Dikhlem kaj valjani te da sa amendar te šaj amaro obožavibe te ovel prifatlivo e Jehovaske. Ako keraja nešto so ka kerel amaro obožavibe te na ovel više prifatlivo, tegani valjani odma te kera promene ko adava (Otk. 2:5, 16; 3:3, 16). Ama, o Isus spomningja panda nešto ki pli poraka dži ko sobranie. So sine adava?

12. So šaj te sikljova taro e Isuseskere porake dži ko sobranie tari Smirna hem Filadelfija? (Otkrovenie 2:10)

¹² Te dikha akana e Isuseskere porake dži ko sobranija tari Smirna hem Filadelfija. Ov phengja e phralenge ma te daran taro progonstvo, soske o Jehova ka nagradinel len ako ačhile verna. (Čitin Otkrovenie 2:10; 3:10.) Koja tani i pouka amenge? Valjani te očekujna kaj ka ovel amen progonstvo hem te ova spremna te istrajna (Mat. 24:9, 13; 2. Kor. 12:10). Soske tano važno te na bistra akava?

13-14. Sar o nastanija taro Otkrovenie 12 poglavje vlijajngje upro e Devleskoro narodo?

¹³ O lil Otkrovenie vakerela amenge kaj e Devleskoro narodo ka ovel progonimo ko e „Gospodareskoro dive“ — vreme ko kova so amen živinaja avdive. Ko lil Otkrovenie 12 poglavje pišinela kaj sine vojna ko nebo odma otkeda o Isus ulo Cari. O Mihael, javere lafencar o Isus Hristos, hem leskere angelija boringje pe protiv o Satana hem o demonija (Otk. 12:7, 8). Ki adaja vojna, e Devleskere dušmanja sine pobedime hem frdime tele ki phuv kote so kerena bari šteta e manušenge (Otk. 12:9, 12). Ama sar sa akava vlijajnela upro e Devleskoro narodo?

¹⁴ O lil Otkrovenie ponadari vakerela amenge sar reagiringja o Satana. Adaleske so našti više te džal upre ko nebo, ov ikalela pli holi upro e Devleskere pomazanikija soj tane ki phuv. Akala pomazanikija tane pretstavnikija e Devleskere Carstvoskere hem lenge tani dendi i zadača te svedočinen bašo Isus (Otk. 12:17; 2. Kor. 5:20; Ef. 6:19, 20) Sar ispolningja pe akava proroštvo?

15. Kas pretstavinena o „duj svedokija“ soj tane spomnime ko 11 poglavje taro lil Otkrovenie, hem so slučingja pe lencar?

 ¹⁵ O Satana čhivgja e Devleskere dušmanen te napadinen e pomazanikon kola so predvodinena sine ki propovedničko aktivnost. Adala phralja ko lil Otkrovenie sine pretstavime „duje svedokoncar“ kola so sine mudarde * (Otk. 11:3, 7-11). Ko 1918 berš, bašo ofto odgovorna phralja sine vakerde hovavne obvinenija hem adaleske sine osudime ko but berša zatvor. But džene mislingje kaj i zadača akale pomazanikongiri sine čhinavdi.

16. So slučingja pe ko 1919 berš, ama so prodolžingja o Satana te kerel taro adava vreme?

¹⁶ O proroštvo taro Otkrovenie 11 poglavje isto agjaar vakerela kaj o „duj svedokija“ ka oven irame ko životo palo kratko vreme. Akava proroštvo ispolningja pe ko jekh neočekuvano način odma o javer berš otkeda akala phralja sine čhivde ko zatvor. Ko mart 1919 berš adala pomazanikija sine oslobodime hem pokasno na sine više nijekh obvinenie protiv lende. O phralja palem počmingje te predvodinen ki propovedničko aktivnost. Ama o Satana na čhinavgja te napadinel e Devleskere narodo. Ottegani o Satana počmingja te progoninel e Devleskere narodo, a akava progonstvo ko Otkrovenie tano sporedimo sar „reka“ (Otk. 12:15). Čače, sa akava rodela amendar „istrajnost hem vera“ (Otk. 13:10).

17. Savi pomoš dobingja e Devleskoro narodo iako o Satana napadinela len sine?

¹⁷ O 12 poglavje taro lil Otkrovenie vakerela kaj e Devleskoro narodo ka dobinel pomoš kotar so na očekujnela. Ko adava poglavje tano objasnimo kaj „i phuv“ ka gltinel „e reka“ taro progonstvo (Otk. 12:16). Baš akava slučingja pe. Ponekogaš nesave porazumna manuša ili organizacie kolen so isi nesavo vlijanie ko e Satanaskoro sveto, sar soj o sudsko sistem, sine tari e Devleskere narodoskiri strana hem pomožingja lenge. But puti e Jehovaskere sluge pobedingje ko sudska slučaija kolendar so dobingje pobari sloboda. Sar koristingje akaja sloboda? Ola mudro  koristingje sekoja prilika te šaj te keren i zadača koja so o Jehova dengja la amenge (1. Kor. 16:9). Soj tano vklučimo ki akaja zadača?

18. Koja tani amari najvažno zadača ko akala posledna dive?

¹⁸ O Isus prorokujngja kaj leskoro narodo ka objavinel o „šukar haberi bašo Carstvo“ ki celi phuv angleder te avel o krajo (Mat. 24:14). Džikote kerena adava ola ka dobinen pomoš taro angelija. Bašo akava ko Otkrovenie tano pišimo: „Hem dikhljum jekh javer angeli sar letinela ko nebo, hem ingarela o šukar haberi so ka ačhovel večno te vakerel le okolenge so živinena ki phuv — sekole nacijake, plemeske, čhibjake hem narodoske“ (Otk. 14:6).

19. Kova javer haberi mora te propovedinen okola so mangena e Jehova?

¹⁹ Osven o šukar haberi bašo Carstvo, e Devleskoro narodo valjani te objavinel javer da haberi. Ola isto agjaar valjani te poddržinen e angelengiri zadača koja soj tani opišimi taro 8 dži ko 10 poglavje ko lil Otkrovenie. Akala angelija objavinena poviše nevolje protiv okola so otfrlinena e Devleskere Carstvo. Adaleske, e Jehovaskere svedokija objavinena jekh haberi baši osuda, kova soj sporedimo sar „kukudik hem jag“ hem akava haberi otkrinela e Devleskiri osuda protiv o različna delija taro e Satanaskoro lošno sveto (Otk. 8:7, 13). O manuša valjani te džanen kaj o krajo tano paše te šaj te keren bare promene ko plo životo hem te preživinen o dive tari e Jehovaskiri holi (Sof. 2:2, 3). Ama akava haberi na svidžinela pe bute dženenge, adaleske valjani te ovel amen hrabrost te šaj te objavina le. Ki bari nevolja, o posledno haberi baši osuda ka ovel panda podirektno (Otk. 16:21).

20. Bašo so ka kera lafi ko sledna duj statie?

²⁰ Čače valjani te šuna „o lafija taro akava proroštvo“ soske siem delo taro ispolnuvanje taro adava so pišinela ko lil Otkrovenie (Otk. 1:3). Ama sar šaj verno te istrajna ko progonstvo hem ponadari da te da amaro najšukar hrabro te vakera o haberi? Duj bukja šaj te keren amen pozorale: Prvo, adava so vakerela amenge o lil Otkrovenie bašo e Devleskere dušmanja, hem dujto, o bereketija so ka dobina len ki idnina ako ačhovaja verna. Bašo akala duj bukja ka kera lafi ko sledna duj statie.