1. Sprema Matej 24:9, soske na valjani te ova iznenadime keda o sveto mrzinela amen?

O JEHOVA kergja amen te manga hem te ova mangle. Adaleske keda nekoj mrzinela amen, osetinaja amen but lošno hem šaj čak daraja. Na primer, i phen Džordžina koja so živinela ki Evropa vakerela: „Keda sine man 14 berš mi daj počmingja te mrzinel man adaleske so služinava sine e Jehovaske. Osetinava man sine otfrlimi hem počmingjum te mislinav kaj na sium šukar manuš“. * Jekh phral kova so vikinela pe Danilo pišinela: „Darandiljum hem osetingjum man ponižimo keda o vojnikija počmingje te khuven man, te vredžinen man hem te zakaninen pe mange adaleske so sium e Jehovaskoro svedoko“. Asavki omraza povredinela amen, ama na siem iznenadime. O Isus vakergja kaj o manuša ka mrzinen amen. (Čitin Matej 24:9.)

2-3. Soske e Isuseskere učenikija tane mrzime?

² O sveto mrzinela e Isuseskere sledbenikon. Soske? Adaleske so isto sar o Isus, amen da na siem delo taro sveto (Jovan 15:17-19). Iako sikavaja poštovanje sprema o manušikane vlade, amen odbinaja te obožavina lende hem o simbolija so prestavinena len. Amen obožavinaja samo e Jehova hem poddržinaja e Devleskoro pravo te vladinel upro manuša — pravo kova so o Satana hem leskoro potomstvo na priznajnena le (1. Moj. 3:1-5, 15). Amen propovedinaja kaj samo e Devleskoro Carstvo ka rešinel o manušikane problemija hem kaj adava Carstvo panda hari ka uništinel sa okolen so protivinena pe leske (Dan. 2:44; Otk. 19:19-21). Akava tano šukar  haberi e krotka manušenge, ama lošno haberi okolenge soj lošna (Ps. 37:10, 11).

³ Isto agjaar, o manuša mrzinena amen adaleske so živinaja sprema e Devleskere pravedna merilija. Akala merilija skroz razlikujnena pe taro akale svetoskere rumime moralna merilija. Na primer, but manuša avdive otvoreno odobrinena o odvratna nemoralna postapke, sar so sine ko Sodom hem Gomor, dizja kola so uništingja len o Jehova (Juda 7). Adaleske so ikeraja amen ko bibliska moralna načelija, but manuša asana amenge hem vakerena kaj na siem tolerantna (1. Pet. 4:3, 4).

4. Save osobine pomožinena amenge keda o javera mrzinena amen?

⁴ So ka pomožinel amenge te istrajna keda o manuša mrzinena hem vredžinena amen? Valjani te ovel amen silno vera kaj o Jehova ka pomožinel amenge. Sar jekh štiti, amari vera šaj te ačhavel „sa o jagale strele e Lošnoskere“ (Ef. 6:16). Ama, osven i vera valjani amenge isto agjaar mangipe. Soske? Adaleske so o mangipe „na holjanela lokheste“. Ov učharela hem trpinela sa o bukja so šaj te dukhaven amen (1. Kor. 13:4-7, 13). Te dikha akana sar šaj o mangipe sprema o Jehova, o mangipe sprema amare phralja hem phenja hem čak o mangipe sprema amare dušmanja te pomožinel amenge te istrajna keda o javera mrzinena amen.

5. So šaj sine o Isus te kerel adaleske so mangela sine ple Dade?

⁵ I rat angleder te ovel mudardo, o Isus vakergja ple verna sledbenikonge: „Mangava e Dade, adaleske kerava agjaar sar so zapovedingja mange o Dad te kerav“ (Jovan 14:31). E Isuseskoro mangipe sprema o Jehova dengja le sila te izdržinel phare nevolje so valjani sine te slučinen pe leske. Amaro mangipe sprema o Jehova šaj te pomožinel amenge ko isto način.

6. Sprema Rimjanite 5:3-5, sar e Jehovaskere sluge osetinena pe keda mrzinela len o sveto?

⁶ O mangipe sprema o Devel sekogaš pomožingja e Jehovaskere slugenge te istrajnen keda isi len progonstvo. Na primer, keda o mokjno evrejsko sudsko sovet zapovedingja e apostolenge te čhinaven te propovedinen, o mangipe sprema o Devel pottikningja len poviše te šunen e Devle nego e manušen (Dela 5:29; 1. Jov. 5:3). Akava baro mangipe sprema o Devel pomožinela amare phralenge te ačhoven verna iako tane progonime taro surova hem mokjna vlastija. Namesto te ova obeshrabrime, amenge tano čest te istrajna keda o sveto mrzinela amen. (Dela 5:41; čitin Rimjanite 5:3-5.)

7. Sar valjani te postapina keda nekoj tari amari familija protivinela pe amenge?

⁷ O protivibe tari amari familija šaj te ovel jekh taro najpharo ispit. Keda dikhena kaj mangaja te sikljova bašo Jehova, nekoj tari familija šaj mislinela kaj siem zavedime. Javera šaj te mislinen kaj delindilem. (Sporedin Marko 3:21.) Ola šaj čak nasilno te protivinen pe amenge. Asavko protivibe na valjani te iznenadinel amen. O Isus vakergja: „E manušeskere dušmanja ka oven leskere kherutne“ (Mat. 10:36). Džangjola pe, bizi razlika sar amari familija dikhela ki amende, amen na mrzinaja len. Namesto adava, kobor poviše bajrola amaro mangipe sprema o Jehova, doborom poviše ka manga e manušen (Mat. 22:37-39). Ama, nikogaš nane te čhinava te šuna o zakonija hem o načelija tari Biblija samo te šaj te ugodina e manušenge.

8-9. So pomožingja jekhe phenjake te ačhol cvrsto iako sine la baro protivibe?

⁸ I Džordžina, koja so sine spomnimi po angle, šaj sine te ačhol cvrsto iako lakiri  daj but protivinela pe sine lake. Oj objasninela: „Me hem mi daj počmingjem zaedno te proučina i Biblija e Svedokoncar. Ama, palo šov masek, keda mangljum te džav ko sostanokija mi daj počmingja te protivinel pe mange. Doznajngjum kaj oj sine ko kontakt e otpadnikoncar, hem keda kerela sine mancar lafi koristinela sine lengere argumentija. Osven adava, vredžinela man sine, cidela sine mle bala, marela man sine hem frdela sine mli literatura. Otkeda phergjum 15 berš krstingjum man. Mi daj manglja te čhinavav te služinav e Jehovaske agjaar so čhivgja man ko domi bašo problematična čhave. Nesave taro adala čhave lena sine droga hem sine kriminalcija. O protivibe tano posebno pharo keda avela nekastar so valjani te mangel tut hem te grižinel pe tuke“.

⁹ So pomožingja e Džordžinake? Oj vakerela: „Mi daj počmingja te protivinel pe mange baš ko isto dive keda završingjum te čitinav celo Biblija. Sium sine celosno uverimi kaj arakhljum o čačipe hem adava kergja man te ovav popaše e Jehovaja. Redovno molinava man sine leske hem ov šunela man sine. Keda živinava sine ko adava domi, jekh phen vikinela man sine ko plo kher hem zaedno proučinaja sine i Biblija. Sa adava vreme sium sine ohrabrimi taro phralja hem o phenja ki dvorana. Kergje man delo taro pumare familie. Sine mange jasno kaj o Jehova tano posilno taro amare protivnikija, bizi razlika koj tane ola“.

10. Savi doverba šaj te ovel amen ko Jehova?

¹⁰ O apostol Pavle pišingja kaj ništo našti „te odvojnel amen taro e Devleskoro mangipe kova so sikavela le amenge preku Hristos Isus, amaro Gospodari“ (Rim. 8:38, 39). Iako nesavo vreme šaj ka ovel amenge pharo, o Jehova sekogaš ka ovel amencar hem ka del amen uteha hem sila. Sar so dikhlem taro e Džordžinakoro iskustvo, o Jehova isto agjaar pomožinel amenge preku amari skapoceno duhovno familija.

11. Sar o mangipe so opišingja le o Isus ko Jovan 15:12, 13 pomožingja leskere učenikonge? Vaker jekh primer.

¹¹ I rat angleder te merel, o Isus potsetingja ple učenikon te mangen pe jekh jekhea. (Čitin Jovan 15:12, 13.) Ov džanlja kaj o samopožrtvuvano mangipe ka pomožinel lenge te ačhoven ko jekhipe hem te izdržinen i omraza so sikavela lenge sine o sveto. Te dikha  o primer taro sobranie ko Solun. Panda taro početok keda ulo adava sobranie, o phralja hem o phenja sine progonime. Ama, ola ule primer bašo adava so verno istrajngje hem bašo mangipe so sikavgje (1. Sol. 1:3, 6, 7). O Pavle ohrabringja len ponadari da te sikaven mangipe čak ki pobari mera (1. Sol. 4:9, 10). O mangipe valjani sine te pottikninel len te utešinen adalen soj razočarime hem te poddržinen adalen soj slaba (1. Sol. 5:14). Ola šungje e Pavleskere sovetija hem adaleske ko plo dujto pismo, kova so pišingja le jekh berš pokasno, o Pavle šaj sine te vakerel lenge: „O mangipe so isi tumen jekh jekheske sa poviše bajrola“ (2. Sol. 1:3-5). Lengoro mangipe pomožingja lenge te izdržinen pharipa hem progonstvija.

12. Sar amare phralja hem phenja tari jekh phuv kote so sine vojna, sikavgje mangipe jekh jekheske?

¹² Te dikha o iskustvo e Daniloskoro, soj spomnimo po angle, hem leskere romnjakoro. Keda i vojna reslja ki lengiri diz, ola ponadari da džana sine ko sostanokija, propovedinena sine kobor so šaj hem delinena sine o hajbe pumare phralencar hem phenjencar. Jekh dive, vooružime vojnikija ale ki lende khere. O Danilo vakerela: „Ola rodena sine te otkažinav man tari mli vera. Keda odbingjum, ola počmingje te maren man hem te daraven man kaj ka mudaren man agjaar so pukajngje upro mlo šero. Angleder te džan, zakaningje pe mange kaj ka iranen pe te silujnen me romnja. Ama, amare phralja sigate čhivgje amen ko vozi te dža ki javer diz. Nikogaš nane te bistrav o mangipe so sikavgje amenge adala mangle phralja. Hem keda reslem ki javer diz, o phralja taro adava than dengje amen hajbaske hem pomožingje mange te arakhav buti hem than živibaske. Agjaar posle amen da šaj sine te pomožina e javere Svedokonge so našena sine tari vojna“. Asavke iskustvija sikavena amenge kaj o hristijansko mangipe šaj te pomožinel amenge te istrajna keda o javera mrzinena amen.

13. Sar o sveti duh pomožinela amenge te istrajna džikote služinaja e Jehovaske čak keda o manuša mrzinena amen?

¹³ O Isus vakergja ple sledbenikonge te mangen pumare dušmanen (Mat. 5:44, 45). Adava nane lokho. Ama, šaj te kera adava adaleske so pomožinela amenge e Devleskoro sveti duh. Ko osobine so avena taro sveti duh tane vklučime o mangipe, isto agjaar  strplivost, ljubeznost, šukaripe hem samokontrola (Gal. 5:22, 23). Akala osobine pomožinena amenge te istrajna keda o javera mrzinena amen. But manuša čhinavgje te protivinen pe amenge adaleske so lengoro rom, romni, čhave ili komšija so služinena e Jehovaske sikavgje akala šuže osobine. But protivnikija ule čak amare phralja hem phenja. Ako tuke pharo te mange okolen so mrzinena tut adaleske so služinea e Jehovaske, molin tut bašo sveti duh (Luka 11:13). Hem ov celosno uverimo kaj te ove poslušno e Devleske tano sekogaš o najšukar (Izr. 3:5-7).

14-15. Sar o lafija taro Rimjanite 12:17-21 pomožingje e Jasminake te sikavel mangipe ple romeske iako but protivinela pe sine lake?

¹⁴ Te dikha e Jasminakoro primer. Keda uli jekh taro e Jehovaskere svedokija, lakoro rom mislingja kaj zavedingje la hem manglja te čhinavel la te služinel e Devleske. Ov vredžinela la sine hem teringja e familija, jekhe religiozno vodače hem manuše so kerela magie te zakaninen pe lake hem te obvininen la kaj oj rasturinela ple familija. Lakoro rom čak vredžingja e phralen džikote trajnela sine jekh sostanok. I Jasmina but puti rovela sine adaleske so postapinena sine laja but grubo.

¹⁵ Ki dvorana e Jasminakiri duhovno familija dela la sine uteha hem sila. O starešine pottikningje la te primeninel o lafija so arakhljona ko Rimjanite 12:17-21. (Čitin.) Oj vakerela: „Sine mange pharo. Ama, molingjum man e Jehovaske te pomožinel mange hem kergjum sa te šaj te primeninav adava so vakerela i Biblija. Adaleske, keda mo rom namerno frdela sine čik ki kujna, me čistinava la sine. Keda vredžinela man sine, me odgovorinava sine ljubezno. Hem keda sine nasvalo, me grižinava man sine leske“.

16-17. So sikljovea taro e Jasminakoro primer?

¹⁶ I Jasmina sine nagradimi so sikavgja mangipe ple romeske. Oj vakerela: „Me rome počmingja te ovel le poviše doverba ki mande soske džanlja kaj sekogaš ka vakerav adava soj čače. Ov počmingja te šunel man hem te sikavel mange poštovanje keda keraja sine lafi baši religija hem vetingja kaj nane te kerel mange više problemija. Akana ov ohrabrinela man te džav ko sostanokija. Amaro brako tano but pošukar hem khere isi amen mir. Nadinava man kaj mo rom ka prifatinel o čačipe te šaj zaedno te služina e Jehovaske“.

¹⁷ E Jasminakoro primer sikavela kaj o mangipe „sa učharela... ko sa nadinela pe, sa trpinela“ (1. Kor. 13:4, 7). I omraza šaj te ovel but mokjno hem te dukhavel, ama o mangipe  tano but posilno. O mangipe kovljarela o vilo okolengoro so protivinena pe amenge. Keda sikavaja mangipe, keraja bahtalo e Jehovaskoro vilo. Iako o protivnikija šaj ponadari da te mrzinen amen, sepak šaj te ova bahtale. Soske?

18. Soske šaj te ova bahtale keda o javera mrzinena amen?

¹⁸ O Isus vakergja: „Bahtale sien keda o manuša mrzinena tumen“ (Luka 6:22). Amen na biringjem te ova mrzime hem na uživinaja keda siem progonime baši amari vera. Tegani, soske šaj te ova bahtale keda o javera mrzinena amen? Te dikha trin pričine. Prvo, keda istrajnaja, o Devel tano zadovolno amendar (1. Pet. 4:13, 14). Dujto, amari vera tani ispitimi hem ovela pozorali (1. Pet. 1:7). Hem trito, ka dobina jekh skapoceno nagrada — večno životo! (Rim. 2:6, 7).

19. Soske o apostolija sine bahtale otkeda sine marde kaštencar?

¹⁹ Kratko otkeda o Isus voskresningja, o apostolija doživingje o bahtalipe bašo kova so ov kergja lafi. Ola sine bahtale, iako sine marde kaštencar hem sine lenge zabranimo te propovedinen. Soske sine bahtale? Adaleske so sine „dostojna te oven ladžakerde bašo [e Isuseskoro] anav“ (Dela 5:40-42). Lengoro mangipe sprema lengoro Gospodari sine pobaro nego i dar so sine len taro lengere dušmanja. Hem ola sikavgje pumaro mangipe adalea so ponadari da propovedingje o šukar haberi „bizo te čhinaven“. But phralja avdive ponadari da verno služinena iako isi len pharipa. Ola džanena kaj o Jehova nane te bistrel adava so kerena hem o mangipe so sikavena bašo leskoro anav (Evr. 6:10).

20. So ka dikha ki sledno statija?

²⁰ O sveto ka mrzinel amen sa džikote na avela leskoro krajo (Jovan 15:19). Ama, na valjani te dara. Sar so ka dikha ki sledno statija, o Jehova ka del sila hem ka zaštitinel ple verna manušen (2. Sol. 3:3). Adaleske, ponadari da te manga e Jehova, te manga amare phralen hem phenjen hem čak te manga amare dušmanen. Keda šunaja akava sovet, ka ova ko jekhipe hem amari vera ka ovel pozorali. Ka ana čest e Jehovaske hem ka dokažina kaj o mangipe tano posilno tari omraza.