1-2. Koj šaj te pomožinel jekhe interesenteske te napredujnel hem te krstinel pe?

„BUT mangava sine adava so sikljovava sine ko mlo biblisko kursi“, vakerela i Emi koja so živinela ko Fidži. „Džanljum kaj adava tano o čačipe ama keda počmingjum te družinav man e phralencar hem e phenjencar adava pomožingja mange te kerav promene hem te krstinav man“. Akava sikavela amen nešto važno. Jekh interesenti verojatno šaj pošukar te napredujnel hem te krstinel pe ako pomožinena leske o javera taro sobranie.

² Sekova objaviteli šaj te pomožinel e interesentenge te oven delo taro sobranie (Ef. 4:16). Jekh pionerka so vikinela pe Lejlani, koja so živinela ko Vanuatu phenela: „Jekh izreka vakerela kaj valjani celo gav te šaj te bajrarel pe jekhe čhave. Isto akava važinela keda kerena pe učenikija. Valjani celo sobranie te šaj te anel pe nekas ko čačipe“. Te šaj jekh čhavo te ovel zrelo manuš leske valjani te pomožinen leskere roditelija, javera ki familija, o amala hem o učitelija ki škola. Ola kerena adava adalea so ohrabrinena e čhave hem sikavena le važna pouke. Slično agjaar, o objavitelija šaj te ohrabrinen, te den sovet hem šužo primer e interesentenge hem agjaar ka pomožinen lenge te napredujnen hem te krstinen pe (Izr. 15:22).

3. So sikljovea taro adava so vakergje i Ana, o David hem i Lejlani?

³ Soske jekh objaviteli kova so proučinela e interesentea valjani te ovel bahtalo keda o javera ko sobranie pomožinena e interesenteske? Primetin so vakergja i Ana, jekh specijalno pionerka tari Moldavija: „But tano pharo samo jekh manuš te grižinel pe bašo sa o potrebe e interesenteskere keda počminela te napredujnel duhovno“. O David, soj tano  isto agjaar specijalno pioneri ki Moldavija, vakerela: „But puti o objavitelija vakerena nešto so khuvela e interesentenge ko vilo, nešto bašo so me na razmislingjum“. I Lejlani vakerela javer pričina: „Keda o interesenti osetinela o mangipe hem i griža so o javera phralja hem phenja sikavena leske, adava pomožinela leske te haljol kaj ola tane čače e Devleskoro narodo“ (Jovan 13:35).

4. So ka dikha ki akaja statija?

⁴ Ama, šaj pučea tut: „Sar šaj me te pomožinav e interesenteske te napredujnel ako me na proučinava lea?“ Te dikha so šaj te kera keda nekoj kaninela amen te dža lea ko jekh biblisko kursi hem so šaj te kera keda o interesenti počminela te avel ko sostanokija? Isto agjaar, ka dikha sar šaj o starešine te pomožinen e interesenteske te napredujnel hem te krstinel pe.

5. So valjani te kere keda sian kanimo te ove prisutno ko jekh biblisko kursi?

⁵ O objavitele so vodinela o biblisko kursi isi le glavno odgovornost te pomožinel e interesenteske te haljol e Devleskoro Lafi. Ako o objaviteli kaninela tut te dža lea, tegani tu sar leskoro partneri ki služba valjani te pomožine leske (Prop. 4:9, 10). Ama, so šaj konkretno te kere te šaj te pomožine e objavitele džikote vodinela o biblisko kursi?

6. Keda sian prisutno ko jekh biblisko kursi, sar šaj te primenine o načelo taro Izreki 20:18?

⁶ Spremin tut bašo biblisko kursi. Prvo, puč e objavitele so proučinela e interesentea te vakerel tuke nešto bašo interesenti. (Čitin Izreki 20:18.) Šaj te puče: „Šaj li te vakere mange nešto bašo interesenti? Koja tema ka proučinen hem so mangea te istaknine tari adaja tema? Isi li nešto so valjani ili na valjani te kerav ili te vakerav keda proučinena? Sar šaj te ohrabrinav e interesente te napredujnel?“ Džangjola pe, o objaviteli nane te vakerel tuke privatna informacie bašo interesenti, ama adava so ka vakerel ka ovel tuke korisno. Jekh misionerka, i Džoi, kerela lafi bašo akala bukja keda kaninela nekas te oven prisutna keda oj vodinela biblisko kursi. Oj vakerela: „Akala informacie pomožinena okoleske soj mancar ki služba te mangel te pomožinel e interesenteske hem te razmislinel so ka vakerel džikote proučinaja“.

7. Soske valjani te spremine tut keda sian prisutno ko nekaskoro biblisko kursi?

⁷ Ako sian kanimo te ove prisutno ko jekh biblisko kursi, ka ovel šukar ako angleder spreminea tut baši i tema so ka kerel pe lafi (Ezra 7:10). O David, kova so spomningjem le poangle, vakerela: „Ceninava keda mlo partneri soj mancar ki služba spreminela pe bašo kursi, tegani šaj te vakerel nešto soj korisno“. Osven adava,  o interesenti verojatno ka primetinel kaj solduj džene sien šukar spremime hem adava ka ovel leske šukar primer. Čak ako na uspejnea temelno te spremine tut bašo materijali, šukar ka ovel te odvojne tuke vreme te dikhe o glavna misle tari tema.

8. Sar šaj te ohrabrine e interesente tle molitvaja?

⁸ I molitva tani jekh važno delo ko jekh biblisko kursi. Adaleske, ako sian zamolimo te moline tut razmislin angleder so ka vakere. Tegani ka džane so te vklučine ko tle molitve (Ps. 141:2). I Hana, tari Japonija, panda setinela pe ko molitve jekhe phenjakere so prisustvujngja ko biblisko kursi džikote oj sine interesentka. Oj vakerela: „Primetingjum kaj oj sine but paše e Jehovaja hem me da mangljum te ovav sar late. Isto agjaar, osetingjum kaj mangela man keda spomningja mlo anav ko molitve“.

9. Sprema Jakov 1:19, sar šaj te pomožine e objaviteleske so vodinela o biblisko kursi?

⁹ Poddržin e objavitele džikote vodinela o biblisko kursi. I phen Omamujovi, koja so služinela sar specijalno pioneri ki Nigerija, vakerela: „Jekh šukar partneri ki služba šunela šukar džikote trajnela o biblisko kursi. Ov dela šukar komentarija ama na kerela but lafi soske haljola kaj ov nane odgovorno te vodinel o biblisko kursi“. Tegani, sar šaj te džane keda valjani nešto te vakere, hem so šaj te vakere? (Izr. 25:11). Šun vnimatelno džikote o objaviteli so vodinela i studija hem o interesenti kerena lafi. (Čitin Jakov 1:19.) Tegani ka ove spremno te vakere nešto ko ispravno momenti. Džangjola pe, mora šukar te procenine i situacija. Na primer, nane te kere but lafi hem te čhinave e objavitele so vodinela o kursi džikote objasninela nešto ili te počmine te kere lafi baši javer tema. Ama, ako vakerea jekh kratko komentari, dea jekh sporedba ili pučea nesavo pučibe, šaj te pomožine te haljol pe i glavno misla. Ponekogaš šaj ka misline kaj nane tut više so te dodajne baši tema, ama ako pofalinea e interesente hem sikavea leske lično interes tu pomožinea leske te napredujnel.

10. Sar šaj tlo iskustvo te pomožinel jekhe interesenteske?

¹⁰ Vaker tlo iskustvo. Ako tano soodvetno kratko vaker e interesenteske sar zapoznajngjan o čačipe, sar nakhavgjan jekh predizvik ili sar pomožingja tuke o Jehova ko tlo životo (Ps. 78:4, 7). Tlo iskustvo šaj te ovel baš adava so valjani te šunel o interesenti. Adava šaj te kerel leskiri vera te ovel pozorali ili te ohrabrinel le ponadari da te napredujnel hem te krstinel pe. Isto agjaar, šaj te sikavel leske sar te nakhavel jekh iskušenie so isi le (1. Pet. 5:9). O Gabriel, kova so živinela ko Brazil hem akana služinela sar pioneri, setinela pe so pomožingja  leske keda ov proučinela sine i Biblija. Ov vakerela: „Keda šunava sine o iskustvija e phralengere, haliljum kaj o Jehova džanela save problemija isi amen. Hem ako ola šaj sine te nakhaven len, tegani šaj me da!“

11-12. Soske valjani ljubezno te dodžakera e interesente so avela ko sostanokija?

¹¹ Te šaj jekh interesenti te krstinel pe, mora redovno te prisustvujnel ko sostanokija soske adava but ka koristinel leske (Evr. 10:24, 25). Verojatno o objaviteli so proučinela lea ka kaninel le te avel prvo puti ko sostanok. Keda tano prisutno sarine amen šaj te ohrabrina le ponadari da te avel ki dvorana. Sar šaj te kera adava?

¹² Ljubezno dodžaker e interesente (Rim. 15:7). Ako ljubezno dodžakeraja e interesente ko sostanokija ov verojatno ka mangel ponadari da te avel ki dvorana. Bizo te kere leske te osetinel pe nezgodno ljubezno pozdravin le hem zapoznajn le e javerencar. Ker lea lafi soske o objaviteli so proučinela lea šaj panda na reslja ili šaj tano zafatimo nesave zadačencar ki dvorana. Vnimatelno šun so vakerela o interesenti hem sikav leske lično interes. Sar šaj adava so ljubezno ka dodžakere le te pomožinel e interesenteske? Te dikha o primer taro Dimitri, kova so krstingja pe angleder nekobor berša hem akana služinela sar sluga-pomošniko. Keda razmislinela bašo plo prvo sostanok ov vakerela: „Džikote adžikerava sine angli dvorana, jekh phral dikhlja kaj sine mange nezgodno te khuvav. Adaleske vikingja man zaedno te khuva. But džene ale te pozdravinen pe mancar. Sium sine but iznenadimo. Doborom svidžingja pe mange so mangljum te ovel amen sostanokija sekova dive. Nikogaš na doživingjum nešto asavko“.

13. Sar šaj tlo šukar primer te pomožinel e interesenteske?

¹³ Ov šukar primer. Tlo šukar primer šaj te pomožinel e interesenteske te uverinel pe kaj arakhlja o čačipe (Mat. 5:16). O Vitalij, kova so služinela sar pioneri ki Moldavija, vakerela: „Dikhljum sar o javera ko sobranie živinena, sar razmislinena hem sar ponašinena pe. Adava uveringja man kaj e Jehovaskere svedokija služinena e Devleske ko ispravno način“.

14. Sar šaj tlo primer te pomožinel nekaske te napredujnel?

¹⁴ Te šaj te krstinel pe, o interesenti valjani te primeninel ko plo životo adava so sikljola. Adava nane sekogaš lokho. Keda o interesenti ka dikhel kobor koristinela tuke adava so primeninea o bibliska načelija ov ka mangel te džal palo tlo primer (1. Kor. 11:1). Te dikha o primer tari Hana, so spomningjem la angleder. Oj vakerela: „O phralja hem o phenja sine mange primer soske  kerena sine o bukja kolenge so sikljovava sine. Dikhljum sar šaj te ohrabrinav, te prostinav hem sar šaj te sikavav mangipe. Ola sekogaš kerena sine lafi pozitivno bašo javera. Mangljum te džav palo lengoro primer“.

15. Keda kerela pe lafi bašo interesenti, sar šaj te primenina o stiho taro Izreki 27:17?

¹⁵ Ov amal e interesentea. Keda o interesenti redovno avela ko sostanokija sikav leske lično interes hem trudin tut pošukar te zapoznajne le (Fil. 2:4). Šaj te vakere leske kobor sian bahtalo keda dikhea o promene so kerela len. Isto agjaar, šaj te puče le bašo leskoro biblisko kursi, baši leskiri familija ili leskiri buti. Akala razgovorija šaj te keren tumen te oven popaše. Ama, pazin te na puče but lična pučiba kolencar so ka čhive le ki nezgodno situacija. Keda ovea leskoro amal tu pomožinea leske te napredujnel hem te krstinel pe. (Čitin Izreki 27:17.) I Hana akana služinela sar opšto pioneri. Oj setinela pe keda počmingja te džal ko sostanokija hem vakerela: „Keda kergjum mange amala ko sobranie edvaj adžikerava sine te džav ko sostanokija, čak sium sine prisutno keda sium sine umorno. Uživinava sine te družinav man mle neve amalencar hem adava pomožingja mange te čhinavav o amalipe okolencar so na služinena sine e Jehovaske. Mangljum te ovav popaše e Jehovaja, e phralencar hem e phenjencar, hem adaleske odlučingjum te krstinav man“.

16. So valjani javer te kere te šaj te pomožine e interesenteske te osetinel pe šukar ko sobranie?

¹⁶ Džikote o interesenti napredujnela hem kerela promene, pomožin leske te osetinel pe sar delo taro sobranie. Adava šaj kerea le agjaar so ka ove gostoprimlivo (Evr. 13:2). O Denis, kova so služinela ki Moldavija, setinela pe keda sine interesenti hem vakerela: „Nekobor puti mi romni hem me siem sine kanime te družina amen e phralencar. Vakerena sine amenge sar o Jehova pomožingja lenge hem adava ohrabringja amen. Akala prilike uveringje amen kaj mangaja te služina e Jehovaske hem kaj ki idnina adžikerela amen jekh but šužo nevo životo“. Keda o interesenti ovela objaviteli tu šaj te kanine le te dža lea ki služba. O Diego, jekh objaviteli taro Brazil, vakerela: „But phralja vikinena man sine te džav lencar ki služba. Adava sine najšukar način te zapoznajnav len pošukar. Agjaar šaj sine poviše te sikljovav hem uljum panda popaše e Jehovaja hem e Isusea“.

17. Sar šaj o starešine te pomožinen e interesentenge?

¹⁷ Odvojn vreme bašo interesentija. Tumen o starešine šaj te pomožinen e interesentenge te napredujnen hem te krstinen pe keda sikavena lenge iskreno interes. Šaj li redovno te kere e interesentencar lafi ko sostanokija? Ola ka primetinen kaj grižinea  tut lenge ako setinea tut ko lengoro anav, posebno keda počminena te komentirinen. Šaj li te odvojne tuke vreme te dža jekhe objavitelea ki služba keda proučinela jekhe interesentea? Tu šaj te pomožine e interesenteske poviše nego so mislinea. I Džeki, jekh pionerka koja so živinela ki Nigerija, vakerela: „But phralja tane iznenadime keda doznajnena kaj o phral soj tano mancar ki studija tano starešina. Jekh interesenti vakergja: ’Mlo svešteniko nikogaš na bi kerela sine adava. Ov džala samo ko barvale hem samo ako platinena le‘“. Akava interesenti akana avela ko sostanokija.

18. Sar šaj o starešine te ispolninen pli odgovornost soj lenge dendi sprema Dela 20:28?

¹⁸ Obučin hem ohrabrin e objavitelen so vodinena biblisko kursi. Tumen o starešine isi tumen važno odgovornost te pomožinen e objavitelenge te oven šukar propovednikija hem učitelija. (Čitin Dela 20:28.) Ako nekoj ladžala te vodinel o biblisko kursi džikote sian tu prisutno, tegani nudin tu te vodine. I Džeki, soj spomnimi poangle, vakerela: „O starešine često pučena man sine bašo mle interesentija. Keda soočinava man nesave predizvikoncar džikote vodinava o biblisko kursi, ola dena man korisna sovetija“. O starešine šaj but te ohrabrinen hem te motivirinen e objavitelen so vodinena bibliska kursija (1. Sol. 5:11). I Džeki, isto agjaar vakerela: „Ceninava keda o starešine ohrabrinena man hem vakerena mange kaj ceninena adava so dava sa mandar ki služba. Akala lafija osvežinena man sar jekh čaša šudro pani ko jekh tato dive. Lengere ljubezna lafija pomožinena mange te bajrarav mli doverba ki mande hem te ovav bahtali džikote pomožinava e interesentenge“ (Izr. 25:25).

19. Soske sarine amen šaj te ova bahtale?

¹⁹ Iako šaj ko momenti na vodinaja biblisko kursi, amen šaj te pomožina nekaske te napredujnel duhovno. Bizo te kera but lafi, amen šaj amare šukar spremime komentarencar te poddržina e objavitele džikote vodinela o biblisko kursi. Amen šaj te ova amala e interesentencar keda avena ki dvorana hem te ova lenge šukar primer. O starešine ka ohrabrinen e interesenten agjaar so ka odvojnen lenge vreme. Isto agjaar, o starešine ka ohrabrinen e objavitelen so proučinena e interesentencar agjaar so ka obučinen len hem ka pofalinen len. Amen siem but bahtale keda šaj nešto te kera, čak ako adava tano hari, te šaj te pomožina nekaske te mangel e Jehova hem te služinel leske.