1. Sprema Matej 7:13, 14, soske šaj te vakera kaj siem ko jekh simbolično patuvanje?

ŠAJ te vakera kaj sarine amen siem ko jekh simbolično patuvanje. Amari cel tani te živina ko nevo sveto kote so ka vladinel amaro manglo Devel, o Jehova. Sekova dive, trudinaja amen te dža ko drumo so vodinela ko životo. Ama, sar so vakergja o Isus, adava drumo tano tesno hem ponekogaš tano pharo te džal pe ki leste. (Čitin Matej 7:13, 14.) Adaleske so siem nesovršena, lokheste šaj te mukha akava drumo (Gal. 6:1).

2. So ka dikha ki akaja statija? (Dikh i ramka „ I poniznost pomožinela amenge te kera promene“.)

² Ako mangaja te ačhova ko tesno drumo so vodinela ko životo, mora te ova spremna te menina amaro mislenje, stavija hem postapke. O apostol Pavle pottikningja e hristijanen taro Korint ponadari da te „keren o potrebna promene“ (2. Kor. 13:11). Akava sovet važinela amenge da. Ki akaja statija ka dikha sar šaj i Biblija te pomožinel amenge te kera promene hem sar o zrela amala šaj te pomožinen amenge te ačhova ko drumo so vodinela ko večno životo. Osven adava, ka dikha keda šaj te ovel amenge pharo te šuna o vodstvo so dela le e Jehovaskiri organizacija. Ka dikha sar i poniznost šaj te pomožinel amenge te kera promene bizo te našava amari radost džikote služinaja e Jehovaske.

3. Sar šaj e Devleskoro Lafi te pomožinel tuke?

³ Nane lokho te preispitina amare misle hem čuvstvija. Adaleske so amaro vilo tano hovavno, šaj te ovel  amenge pharo te džana ko kova pravco šaj ka vodinel amen (Erem. 17:9). Lokho tano te hovava korkori amen (Jak. 1:22). Adaleske valjani te koristina e Devleskoro Lafi te šaj te preispitina amen. E Devleskoro Lafi sikavela save siem andral, ili otkrinela save tane amare najhor misle hem o namere amare vileskere (Evr. 4:12, 13). Ki nesavi smisla, e Devleskoro Lafi tano sar jekh rendgen aparati kova so pomožinela amen te dikha so isi andre ki amende. Ama, mora te ova ponizna te šaj te ovel amen korist taro sovetija so dobinaja len tari Biblija hem taro okola so o Devel koristinela len te vodinel pli organizacija.

4. Kotar džanaja kaj o cari o Saul ulo gordo manuš?

⁴ O primer taro cari o Saul sikavela amenge so šaj te ovel ako na siem ponizna. O Saul ulo doborom gordo so na mangela sine korkori peske te priznajnel kaj valjani sine te meninel plo razmisluvanje hem ple postapke (Ps. 36:1, 2; Avak. 2:4). Akava ulo jasno keda o Jehova dengja le konkretno upatstvo bašo adava so valjani te kerel keda ka pobedinel e Amaličanen. Ama, o Saul na sine poslušno. A keda o proroko o Samoil kergja lea lafi bašo adava, ov na manglja te priznajnel kaj grešingja. Namesto adava, počmingja te opravdinel pe adalea so vakergja kaj na kergja ništo lošno hem e javeren kergja kriva (1. Sam. 15:13-24). Angleder da o Saul kergja nešto slično (1. Sam. 13:10-14). Žalno tano so dozvolingja leskoro vilo te ovel gordo. Adaleske so na meningja plo razmisluvanje, o Jehova ukoringja le hem otfrlingja le.

5. So šaj te sikljova taro e Sauleskoro lošno primer?

⁵ Adaleske so na mangaja te ova sar o Saul, šukar tano te puča amen: „Keda čitinava nesavo sovet taro e Devleskoro Lafi, dali rodava pričine te opravdinav mlo razmislibe? Dali mislinava kaj adava so kerava nane doborom lošno? Dali kerava e javeren kriva bašo mle postapke?“ Ako o odgovor taro bilo kova pučibe tano oja, tegani mora te menina amaro stavi hem amaro razmislibe. Ako na keraja adava, tegani šaj te ova doborom gorda so o Jehova nane te mangel te ova leskere amala (Jak. 4:6).

6. Savi razlika sine maškar o cari o Saul hem o cari o David?

⁶ Dikh i razlika maškar o cari o Saul hem o sledno cari taro Izrael, o David, kova so mangela sine „e Jehovaskoro zakoni“ (Ps. 1:1-3). O David džanela sine kaj o Jehova spasinela adalen soj ponizna, a protivinela pe e gorda manušenge (2. Sam. 22:28). Adaleske o David dozvolingja o Devel te meninel leskoro način sar razmislinela. Ov pišingja: „Ka falinav e Jehova, kova so dela man sovetija. Rakjate opomeninena man mle najgaravde čuvstvija“ (Ps. 16:7).

7. So ka kera ako siem ponizna?

⁷ Ako siem ponizna, ka mukha e Devleskoro Lafi te ispravinel amaro pogrešno razmisluvanje angleder te kera nešto soj pogrešno. I Biblija ka ovel sar glaso so vakerela amenge: „Adava tano o drumo, džan ki leste!“ I Biblija ka predupredinel amen ako počminaja te kera nešto pogrešno (Isa. 30:21). Ako siem poslušna e Jehovaske, adava ka koristinel amenge ko but načinija (Isa. 48:17). Na primer, nane te ladža keda nekoj ka ispravinel amen. Hem ka ova popaše e Jehovaja adaleske so haljovaja kaj ov grižinela pe amenge sar jekh ljubezno dad (Evr. 12:7).

8. Sprema Jakov 1:22-25, ki koja smisla e Devleskoro Lafi šaj te ovel amenge sar ajna?

⁸ E Devleskoro Lafi šaj te ovel amenge sar ajna. (Čitin Jakov 1:22-25.) But džene amendar dikhena pe ki ajna angleder te ikljoven kher­aldan. Agjaar šaj te dikha dali valjani te kera nesave promene angleder te dikhen amen o javera. Slično agjaar, keda čitinaja  i Biblija sekova dive, dikhaja save promene valjani te kera ko amaro razmislibe hem stavi. Bute dženenge koristinela adava so sabajle čitinena e diveskoro stiho angleder te ikljoven kher­aldan. Ola dozvolinena adava so čitinena te vlijajnel upri lende. Tegani, preku celo dive trudinena pe te primeninen o sovetija taro e Devleskoro Lafi. Osven adava, mora redovno te odvojna amenge vreme sekova dive te proučina i Biblija hem te razmislina baši late. Iako dikhjola lokho, akava tano jekh taro najvažna bukja so pomožinena amenge te ačhova ko tesno drumo so vodinela ko životo.

9. Keda jekh amal šaj ka valjani te del tut sovet?

⁹ Dali nekogaš slučingja pe tuke te kere nešto so šaj sine te ruminel tlo amalipe e Jehovaja? (Ps. 73:2, 3). Ako nesavo zrelo amal sine le hrabrost te vakerel tuke baši tli greška, dali šungjan le hem primeningjan leskoro sovet? Ako oja, tegani postapingjan ispravno, hem sigurno sian blagodarno so predupredingja tut (Izr. 1:5).

10. Sar valjani te postapine ako nesavo amal dela tut sovet?

¹⁰ E Devleskoro Lafi vakerela: „O verno amal dela sovet čak keda adava dukhala“ (Izr. 27:6). So značinela akava? Razmislin baši akaja sporedba: Zamislin tuke kaj zaedno jekhe amalea adžikerea te nakhe tari jekh prometno ulica hem tegani zvoninela tlo telefoni. Džikote dikhea ko telefoni, cidea te nakhe i ulica. Ko adava momenti, tlo amal silno astarela tlo vas hem cidela tut ko trotoari. Doborom silno astargja tlo vas so kergja tuke modrica, ama adalea so odma reagiringja, spasingja tut te na khuvel tut o vrda. Iako i modrica so kergja tuke ka dukhal tut nekobor dive, dali ka holjane leske bašo adava? Džangjola pe kaj na! Ka ove leske blagodarno so spasingja tut. Slično agjaar, ako jekh amal vakerela tuke kaj vakergjan ili kergjan nešto so nane sprema e Devleskere merilija, ko početok adava šaj te dukhal tut. Ama, ma holjan leske hem ma vredžin tut adaleske so dengja tut sovet. Adava bi ovela sine glupavo (Prop. 7:9). Namesto adava, ov blagodarno so tlo amal sine le hrabrost te vakerel tuke koja tani tli greška.

11. Soske nekoj šaj te odbinel o šukar sovet taro jekh paše amal?

¹¹ Koja šaj te ovel i pričina nekoj te odbinel o šukar sovet taro jekh paše amal? I gordost. O gorda manuša mangena te šunen „adava soj ugodno lengere kanenge“. Ola na mangena nekoj te vakerel lenge o čačipe (2. Tim. 4:3, 4). Ola mislinena kaj na valjani lenge sovet adaleske so mislinena kaj tane pomudra hem kaj tane považna taro javera. Ama, o apostol Pavle pišingja: „Ako nekoj mislinela kaj tano nešto, a nane ništo, korkori peste hovavela“ (Gal. 6:3). O cari o Solomon but šukar objasningja akava keda pišingja: „Pošukar tano čorolo, ama mudro terno čhavo, nego phuro hem glupavo cari, kova više na mangela te šunel sovet“ (Prop. 4:13).

12. Sprema Galatite 2:11-14, so sikljovaja taro e Petareskoro primer?

¹² Dikh savo primer mukhlja amenge o apostol Petar keda o apostol Pavle ukoringja le angli sarinende. (Čitin Galatite 2:11-14.) Ako o Petar koncentririnela pe sine ko adava sar hem keda o Pavle dengja le sovet, ov šaj sine te holjanel leske. Ama, o Petar sine mudro. Ov prifatingja o sovet hem na ikergja holi. Namesto adava, pokasno vakergja e Pavleske kaj tano leskoro „manglo phral“ (2. Pet. 3:15).

13. Bašo so valjani angleder te razmislina ako mangaja nekaske te da sovet?

¹³ So valjani te ovel tut ki godi ako mislinea kaj valjani te de sovet nesave amaleske?  Angleder te kere lea lafi, puč tut: „Dali šaj sium prepravedno?“ (Prop. 7:16). O prepravedno manuš sudinela e javerenge sprema ple merilija, a na sprema e Jehovaskere, hem šaj na sikavela milost. Otkeda šukar ka razmisline soske mangea te de sovet tle amaleske hem panda mislinea kaj valjani te kere adava, jasno vaker leske kova tano o problemi hem puč le nekobor pučiba te šaj te pomožine leske korkori te haljovel soske adava so kergja tano pogrešno. Keda dea sovet, adava valjani te temelinel pe ki Biblija. Ma bistre kaj tlo amal bašo ple postapke nane odgovorno angli tute, nego anglo Jehova (Rim. 14:10). Koristin i mudrost so arakhljovela ko e Devleskoro Lafi, hem ov sočuvstvitelno sar o Isus (Izr. 3:5; Mat. 12:20). Soske? Adaleske so o Jehova ka postapinel amencar isto sar amen so postapinaja e javerencar (Jak. 2:13).

14. So dela amenge e Jehovaskiri organizacija?

¹⁴ O Jehova vodinela amen ko životo preku pli organizacija soj tele ki phuv, koja dela amen publikacie, videoklipija hem sostanokija so pomožinena amenge te primenina o sovetija taro e Devleskoro Lafi. Šaj te ovel amen celosno doverba ko sa o informacie soske temelinena pe ko e Devleskoro Lafi. O phralja taro Vodečko telo rodena vodstvo taro sveti duh keda odlučinena kova tano najšukar način te propovedinel pe. Sepak, o Vodečko telo redovno preispitinela ple odluke te šaj te dikhel dali valjani te kerel nesave promene. Soske? Adaleske so o okolnostija ko akava sveto meninena pe, e Devleskiri organizacija da valjani te prilagodinel pe sprema lende (1. Kor. 7:31).

15. Soj tano pharo nesave objavitelenge?

¹⁵ Keda e Devleskiri organizacija dela amen neve objasnuvanja bašo bibliska sikljojba ili dela amen upatstvija bašo moralna merilija, amen spremno prifatinaja len hem primeninaja len. Ama, sar reagirinaja keda i organizacija kerela promene kola so vlijajnena ko javera aspektija taro amaro životo? Na primer, ko posledna berša but barile o trošakija baši izgradba hem bašo održibe o objektija so koristinaja len. Adaleske, o Vodečko telo odlučingja kobor so šaj poviše sobranija te koristinen isto dvorana bašo sostanokija. Adaleske, nesave sobranija sine spojme, a nesave dvorane sine bikime. Adale parencar gradinena pe neve  dvorane ko thana kote so isi pobari potreba. Ako živinea ko than kote so sine bikimi nesavi dvorana hem kote so nesave sobranija sine spojme, šaj te ovel tuke pharo te prilagodine tut ko neve okolnostija. Akana nesave objavitelija mora te patujnen podur te šaj te džan ko sostanokija. Javera so kerena sine buti ki izgradba ili te održinel pe nesavi dvorana šaj pučena pe soske adaja dvorana bikinela pe. Šaj mislinena peske kaj džabe trošingje pumaro vreme hem trudo. Sepak, ola prifatinena o neve upatstvija hem zaslužinena te oven pofalime.

16. Sar adava so ka primenina o sovet taro Kološanite 3:23, 24 ka pomožinel amenge ponadari da te ova bahtale?

¹⁶ Amen ponadari da ka ova bahtale ako na bistraja kaj sa so keraja tano bašo Jehova hem kaj ov vodinela pli organizacija. (Čitin Kološanite 3:23, 24.) O cari o David dengja šužo primer keda dengja taro plo barvalipe te šaj te gradinel pe o hrami. Ov vakergja: „Koj sium me hem soj tano mlo narodo te šaj dobrovolno te da tuke akava? Tutar avela sa, hem dengjem tuke adava so dobingjem le taro tle vasta“ (1. Let. 29:14). Keda daja prilogija, amen da daja e Jehovaske adava so avela taro leskere vasta. Sepak, o Jehova but ceninela o vreme, i sila hem o pare so trošinaja len bašo aktivnostija so kerela len leskiri organizacija (2. Kor. 9:7).

17. Soske na valjani te obeshrabrine tut ako haljovea kaj valjani te kere nesave promene?

¹⁷ Te šaj te ačhova ko tesno drumo so vodinela ko životo, sarine amen mora te dža palo e Isuseskoro primer (1. Pet. 2:21). Ako haljovea kaj valjani te kere nesave promene, ma obeshrabrin tut. Adava tano šukar znako soske sikavea kaj mangea te dža palo e Jehovaskoro vodstvo. Ma bistre kaj o Jehova džanela kaj siem nesovršena, hem adaleske na očekujnela amendar sovršeno te dža palo e Isuseskoro primer.

18. So valjani te kera te šaj te resa dži ki amari cel?

¹⁸ Te mislina ko adava so ka avel hem te ova spremna te kera promene ko amaro razmislibe, stavi hem postapke (Izr. 4:25; Luka 9:62). Te ačhova ponizna, te ova bahtale hem te kera o potrebna promene (2. Kor. 13:11). Ako keraja akava, tegani „o Devel e mangipaskoro hem e mireskoro ka ovel [amencar]“. Agjaar, ov ka pomožinel amenge te ova bahtale akana hem ka del amen životo ko nevo sveto.