1. Kola pučiba šaj pučaja amen?

DALI ponekogaš sekirinea tut keda razmislinea bašo nastanija so ka slučinen pe? Sar na primer, o uništibe e hovavne religijakoro, o napad taro Gog taro Magog hem i vojna Armagedon. Dali nekogaš pučea tut, keda ka slučinen pe akala strašna nastanija, dali me ka šaj me te ačhovav verno? Ako ale tuke asavke misle ki godi, but ka pomožinel tuke adava so ka kera lafi bašo e Isuseskere lafija soj pišime ko glavno stiho tari akaja statija. O Isus vakergja ple učenikonge: „Te na ovel tumenge pharo ko vilo. Verujnen ko Devel“ (Jovan 14:1). I zorali vera ka pomožinel amenge te ova hrabra, bizi razlika so ka slučinel pe.

2. Sar šaj te kera pozorali amari vera, hem so ka dikha ki akaja statija?

² So šaj te pomožinel amenge te kera pozorali amari vera te šaj te izdržina ko ispitija so ka oven amen ki idnina? Adava so ka razmislina sar postapinaja panda avdive keda amari vera tani ispitimi. Agjaar ka džana ko kola podračja taro amaro životo valjani te kera pozorali amari vera. Sekova puti keda istrajnaja ko nesavo ispit, amari vera ovela pozorali. Akava ka pomožinel amenge te istrajna ko nevolje so ka oven ki idnina. Ki akaja statija, ka dikha štar situacie kote so e Isuseskere učenikija valjani sine te sikaven poviše vera. Palo adava, ka dikha sar šaj amen da te istrajna ko slična predizvikija avdive hem sar adava ka spreminel amen baši idnina.

3. So pomožinena amenge te haljova o lafija so arakhljona ko Matej 6:30, 33?

³ Normalno tano jekh poglavari te mangel te grižinel pe leskere familija te ovel la hajbaske, urajbaske hem than živibaske.  Ama, akava nane sekogaš lokho te kerel pe ko akava pharo vreme. Ko nesave slučaija, amare phralja hem phenja našavgje pumari buti, hem iako dengje pestar sa, našti arakhle javer buti. A javera, mora sine te odbinen buti koja so nane amenge e hristijanenge. Keda ka slučinen pe asavke bukja, valjani te ovel amen bari vera kaj o Jehova ka grižinel pe bašo amare familijarna potrebe. O Isus jasno vakergja akava ple učenikonge ki pli propoved ki gora. (Čitin Matej 6:30, 33.) Keda siem cvrsto uverime kaj o Jehova nane te mukhel amen, tegani ka šaj te koncentririna amen ko bukja soj važna — o Carstvo. Džikote dikhaja sar o Jehova grižinela pe bašo amare materijalna potrebe, ov ka ovel amenge po realno hem amari vera ka ovel pozorali.

4-5. So pomožingja jekhe familijake te na ovel but sekirimi bašo materijalna potrebe?

⁴ Primetin sar jekh familija tari Venecuela dikhlja sar pomožinela lenge o Jehova keda sine sekirime bašo pumare materijalna potrebe. Angleder, i familija Kastro sine len jekh farma kolatar so zarabotinena sine bašo jekh skromno životo. Tegani, jekh banda ali ki lende, lele lendar i farma hem brkingje len adathar. O dad, o Migel, vakerela: „Akana keraja buti ki jekh tikni niva kolake so platinaja kirija. Sekova dive počminava le agjaar so molinava man e Jehovaske te del amen adava so valjani amenge adale diveske“. O životo akale familijake nane lokho. Ama ola redovno džana ko sostanok hem ki služba, soske isi len bari vera kaj amaro manglo Dad ka grižinel pe lenge sekova dive. I služba bašo Jehova tani lenge ko prvo than ko životo, hem o Jehova grižinela pe bašo lengere potrebe.

⁵ Džikote trajnela sine adava pharo vreme, o Migel hem leskiri romni koncentririnena pe sine te dikhen sar o Jehova pomožinela lenge. Ponekogaš, o Jehova koristingja phralen hem phenjen te šaj te den len o potrebna bukja hem te pomožinen e Migeleske te arakhel buti. A ponekogaš, o Jehova preku i podružnica dela len sine adava so valjani lenge. O Jehova nikogaš na mukhlja len. Adaleske, ola šaj sine te dikhen sar lengiri vera bajrola sine sa poviše. Otkeda spomningje nesavi konkretno situacija kolate so o Jehova pomožingja lenge, lengiri najbari čhaj, i Hozelin, vakerela: „But tano ohrabruvačko te dikhe e Jehovaskoro vas doborom paše. Ov tano mlo amal hem isi man doverba kaj ov sekogaš ka pomožinel mange“. Oj isto agjaar vakerela: „O problemija so doživingjem len sar familija spremingje amen bašo pophare ispitija so ka oven amen ki idnina“.

6. Sar šaj te kere pozorali tli vera keda isi tut finansiska problemija?

⁶ Ako isi tut finansiska problemija, sigurno nane tuke lokho. Ama, kobor hem te oven phare tle okolnostija, tu ponadari da šaj te koristine akava vreme te šaj te bajrare tli vera. Molin tut e Jehovaske džikote čitinea o lafija e Isuseskere soj pišime ko Matej 6:25-34, hem razmislin baši lende.  Razmislin bašo primerija taro amaro vreme kola so sikavena kaj o Jehova grižinela pe okolenge soj tane zafatime ko teokratska aktivnostija (1. Kor. 15:58). Ako kerea agjaar, ka bajrare tli doverba kaj o Jehova ka grižinel pe tuke isto sar so grižingja pe e javerenge ko slična okolnostija. Ov na samo so džanela so valjani tuke, nego ov isto džanela sar te del tut adava. Keda dikhea sar o Jehova pomožinela tuke ko životo, adava kerela tli vera te ovel po zorali hem tegani ka šaj te izdržine o pobare problemija so ka aven ki idnina (Avak. 3:17, 18).

7. Sprema Matej 8:23-26, sar jekh bari bura čhivgja ko ispit e apostolengiri vera?

⁷ Ki jekh prilika, keda o Isus hem leskere učenikija sine ko more, uli jekh bari bura. (Čitin Matej 8:23-26.) O Isus koristingja adaja prilika te šaj te pomožinel ple učenikonge te haljoven kaj valjani te keren pozorali pumari vera. O branija sine doborom bare, so o brodi počmingja te phergjol pani, ama o Isus sovela sine mirno. Keda o učenikija darandile hem vazdingje e Isuse te šaj te spasinel len, ov vakergja lenge: „Soske darana, doborom li hari vera isi tumen?“ O apostolija valjani sine te haljoven kaj o Jehova but lokhe šaj sine te zaštitinel e Isuse hem okolen so sine lea. Savi pouka šaj te sikljova taro akava? I zorali vera šaj te pomožinel amenge te izdržina sekoja bura, bizi razlika dali doslovno ili simbolično.

8-9. Sar e Anelakiri vera sine ispitimi, hem so pomožingja lake?

⁸ Razmislin bašo adava sar e Anelakiri vera, jekh phen taro Portoriko koja so nane ko brako, uli pozorali otkeda nakhlja taro jekh baro problemi. Oj nakhlja tari jekh doslovno bari bura. Lakere problemija počmingje ko 2017 berš, keda o uragani Marija uništingja lakoro kher hem palo adava našavgja pli buti. Oj vakerela: „Ko adala phare dive sium sine but sekirimi, ama sikliljum te ovel man doverba ko Jehova agjaar so molinava man sine leske hem na mukhava sine o sekiracie te peraven man“.

⁹ I Anel vakerela kaj i poslušnost isto agjaar pomožingja lake te izdržinel ko problemija. Oj vakerela: „Adava so šunava sine o upatstvija tari organizacija pomožingja mange te ačhovav smirimi. O Jehova pomožingja mange preku o phralja hem o phenja. Ola ohrabringje man hem dengje man bukja kola so valjani sine mange te šaj preživinav“. Oj isto agjaar vakerela: „O Jehova dengja man but poviše taro adava so očekujngjum, hem mi vera uli panda pozorali“.

10. So šaj te kere ako soočinea tut bare buraja?

¹⁰ Dali soočinea tut jekhe bare buraja? Šaj isi tut problemija adaleske so doživingjan prirodno katastrofa. Ili šaj isi tut nesavo seriozno nasvalipe kova so peljargja tut hem na džanea so te kere. Šaj ponekogaš sekirinea tut, ama ma mukh i sekiracija te kerel te na ovel tut doverba ko Jehova. Ov lea popaše agjaar so ka moline tut leske taro vilo.  Bajrar tli vera agjaar so ka razmisline sar o Jehova pomožingja tuke (Ps. 77:11, 12). Šaj te ove sigurno kaj ov nane te mukhel tut — ni akana a ni ki celi večnost.

11. Soske valjani te ova odlučna te šuna okolen so predvodinena?

¹¹ So javer šaj te pomožinel tuke te istrajne ko nevolje? Sar so vakergja i Anel, i poslušnost. Sikljov te ovel tut doverba okolende kaste so o Jehova hem o Isus isi len doverba. Ponekogaš, okola so predvodinena šaj te den upatstvija kola so šaj te oven amenge hari čudna. Ama, o Jehova dela plo bereketi okolenge soj poslušna. Tari Biblija hem taro iskustvija e verna slugengoro džanaja kaj i poslušnost spasinela životija (2. Moj. 14:1-4; 2. Let. 20:17). Adaleske, razmislin bašo asavke primerija. Agjaar, ka ove panda po odlučno te ove poslušno ko upatstvija tari organizacija akana hem ki idnina (Evr. 13:17). Hem tegani, nane te ovel tut pričina te dara tari najbari bura koja so panda hari ka avel (Izr. 3:25).

12. Sprema Luka 18:1-18, sar i vera pomožinela amenge te izdržina i nepravda?

¹² O Isus džanlja kaj i nepravda ka čhivel ko ispit leskere učenikongiri vera. Te šaj te pomožinel lenge te istrajnen, ov vakergja lenge jekh sporedba koja soj tani pišimi ko lil Luka. O Isus ki adaja sporedba kergja lafi baši jekh udovica koja so uporno molinela sine jekhe nepravedno sudija baši pravda. Oj sine sigurno kaj lakiri upornost ka isplatinel pe. Hem čače, ko krajo o sudija šungja la. So sikljovaja amen taro akava? O Jehova nane nepravedno. Adaleske o Isus vakergja: „Nane li o Devel te kerel leskere birime te dobinen pravda, okola so rodena le dive hem rat?“ (Čitin Luka 18:1-8.) Palo adava o Isus vakergja: „Keda ka avel o manušikano čhavo, dali ka arakhel asavki vera ki Phuv?“ Keda doživinaja nepravda, valjani te sikava kaj isi amen zorali vera sar adaja udovica, agjaar so ka ova strpliva hem istrajna. Ako isi amen asavki vera, šaj te ova sigurna kaj porano ili pokasno, o Jehova ka pomožinel amenge. Isto agjaar, valjani te verujna kaj e molitva isi la sila. Ponekogaš, šaj te dobina odgovor ko amare molitve ko način so na očekujngjem le.

13. Sar i molitva pomožingja jekhe familijake koja so doživingja nepravda?

¹³ Te dikha o iskustvo jekhe phenjakoro so vikinela pe Vero, so živinela ki Demokratsko Republika Kongo. Oj, lakoro rom kova so nane e Jehovaskoro svedoko hem lakiri čhaj kola so sine la 15 berš, mora sine te našen taro pumaro gav soske sine napadimo taro vojnikija. Džikote našena sine, ačhavkergje len jekh grupa taro vojnikija hem zakaningje pe lenge kaj ka mudaren len. Tegani i phen Vero počmingja te rovel. Te šaj te smirinel la, lakiri čhaj počmingja ko glaso te molinel pe hem te koristinel poviše puti ki molitva e Jehovaskoro anav. Keda  završingja e molitvaja, o komandanti e vojnikongoro pučlja la: „Čhaje, koj sikavgja tut te moline tut?“ Oj vakergja: „Mi daj, agjaar so koristingja i najpendžardi molitva koja so arakhljola ko Matej 6:9-13“. Tegani o komandanti vakergja: „Čhaje, tu hem te roditelija šaj te džan tumenge, o Jehova tumaro Devel neka zaštitinel tumen“.

14. So šaj te čhivel ko ispit amari vera, hem so ka pomožinel amenge te istrajna?

¹⁴ Asavke iskustvija sikavena amen nikogaš ma te bistra kobor tani važno i molitva. Ama so ako na dobinea odgovor ko tle molitve odma ili ko jekh posebno način? Slično sar i udovica tari e Isuseskiri sporedba, ponadari da molin tut. Ov uverimo kaj amaro Devel nane te mukhel tut hem kaj ov ko pravo vreme hem ko plo način ka odgovorinel tuke. Ponadari da rode taro Jehova sveti duh (Fil. 4:13). Ma bistre kaj o Jehova panda hari ka del tut doborom baro bereketi so ka bistre sekoja nevolja so doživingjan la. Džikote o Jehova pomožinela tuke te izdržine o bare problemija, tu ka ove pozoralo te istrajne ko ispitija so ka oven tut ki idnina (1. Pet. 1:6, 7).

15. Sprema Matej 17:19, 20, savo pharipe sine e apostolen?

¹⁵ O Isus vakergja ple učenikonge kaj i vera ka pomožinel lenge te nakhaven o pharipe. (Čitin Matej 17:19, 20.) Ki jekh prilika, ola našti sine te ikalen jekhe demone taro manuš, iako ko javera slučaija adava uspešno kergje le. Kote sine o problemi? O Isus vakergja lenge kaj valjani lenge poviše vera. Ov vakergja kaj ako isi len dovolno vera, ka šaj te premestinen pharipa kola soj bare sar planina! Avdive, amen da šaj isi amen pharipa kola so dikhjona sar bari planina.

16. Sar i vera pomožingja jekhe phenjake so vikinela pe Gejdi te istrajnel otkeda lakoro rom sine mudardo?

¹⁶ Razmislin baši Gejdi, jekh phen tari Gvatemala. Džikote oj hem lakoro rom o Edi iranena pe sine taro sostanok, nesave manuša mudargje lakere rome. Sar lakiri vera pomožingja lake te istrajnel, iako sine la but bari dukh? Oj vakerela: „I molitva pomožingja mange te frdav mlo pharipa e Jehovaske hem agjaar sine man andruno mir. Dikhava sar o Jehova grižinela pe mange preku mli familija hem preku o phralja hem o phenja taro sobranie. Adava so sium zafatimi ki služba pomožinela mange te na ovav doborom tažno hem te na ovav preterano sekirimi bašo tajsutno dive. Otkeda nakhljum sa akava haliljum kaj, bizi razlika savo ispit ka ovel man ki idnina, ka šaj te istrajnav ki leste soske poddržinena man o Jehova, o Isus hem i organizacija“.

17. So šaj te kera ako isi amen problemi kova so dikhjola sar jekh planina?

¹⁷ Dali tugujnea adaleske so mulo tutar nekoj paše? Odvojn tuke vreme te kere pozorali tli vera ki nadež bašo voskresenie, agjaar  so ka čitine bibliska izveštaija bašo okola so voskresningje. Dali tuke žal adaleske so nekoj tari tli familija tano isklučimo? Proučin te šaj te uverine tut kaj e Devleskoro ukor tano sekogaš najšukar. Bizi razlika savo problemi isi tut, dikh ko adava sar prilika te kere pozorali tli vera. Phrav e Jehovaske tlo vilo ki molitva. Namesto te cide tut, ačhov paše tle phralencar hem tle phenjencar (Izr. 18:1). Učestvujn ko aktivnostija so ka pomožinen tuke te istrajne, čak ako džikote kerea adava osetinea bari dukh hem rovela pe tuke (Ps. 126:5, 6). Ponadari da čitin i Biblija, dža ko sostanokija hem ki služba. Hem ponadari da razmislin bašo but šuže bereketija kola so o Jehova vetingja len tuke. Džikote dikhea sar o Jehova pomožinela tuke, tli vera ki leste ka bajrol panda poviše.

18. So šaj te kere ako primetinea kaj tli vera nane dovolno zorali?

¹⁸ Ma obeshrabrin tut ako o nevolje so sine tut, ili so isi tut akana, sikavgje tuke kaj tli vera nane dovolno zorali. Dikh ko adava sar prilika te kere tli vera pozorali. Isto sar o apostolija, tu da šaj te rode taro Devel te del tut „panda vera“ (Luka 17:5). Isto agjaar, razmislin bašo primerija kolenge so kergjem lafi ki akaja statija. Slično sar o Migel hem i Juraj, razmislin baši sekoja situacija keda o Jehova grižingja pe tuke. Slično sar i čhaj tari Vero, hem sar i Anel, molin tut taro vilo e Jehovaske, posebno keda isi tut jekh baro problemi. Hem sar i Gejdi, dikh sar o Jehova šaj te grižinel pe tuke preku i familija hem preku o phralja hem o phenja. Keda dozvolinea e Jehovaske te pomožinel tuke te istrajne ko problemija so isi tut akana, ka ove panda po uverimo kaj ov ka pomožinel tuke te istrajne ko nevolje so ka oven tut ki idnina.

19. Ko so sine sigurno o Isus, hem ko so šaj tu te ove sigurno?

¹⁹ O Isus pomožingja ple učenikonge te dikhen kote valjani lenge poviše vera. Ama ov nikogaš na sumningja pe kaj ola verno ka istrajnen ko ispitija so ka oven len ki idnina (Jovan 14:1; 16:33). Ov sine sigurno kaj jekh „baro mnoštvo manuša“ ka preživinen i bari nevolja adaleske so isi len zorali vera (Otk. 7:9, 14). Ka ove li maškar lende? Tu šaj te ove, soske o Jehova sikavela amenge šukaripe kova so na zaslužinaja le. Adaleske, de tutar sa te šaj te koristine sekoja prilika te kere zorali tli vera panda avdive! (Evr. 10:39).