1-2. a) Soske e neve bračna paren valjani te ovel len doverba ko Jehova? (Psalm 37:3, 4) b) Bašo so ka kera lafi ki akaja statija?

DALI panda hari planirinea te khuve ko brako, ili sigende khuvgjan ko brako? Sigurno edvaj adžikerea te uživine ko šužo životo tle partnerea, kole so but mangea. Džangjola pe, ko brako ka oven predizvikija hem sar nevo bračno pari mora te anen but važna odluke. O način sar reagirinena ko adala predizvikija hem sar anena odluke but ka vlijajnel upro adava dali ka oven ponadari da bahtale ili na. Ako isi tumen doverba ko Jehova, ka anen mudra odluke, tumaro brako ka ovel pozoralo hem ka oven panda pobahtale. Ako na primeninena e Devleskoro sovet, najverojatno ka oven tumen pharipa ko brako kola so ka anen tumenge problemija hem adaleske nane te oven bahtale. (Čitin Psalm 37:3, 4.)

² Iako akaja statija glavno kerela lafi bašo neve bračna parija, ki late isto ka dikha predizvikija kolencar so šaj te soočinen pe sa o bračna parija. Ka oven istaknime o pouke so šaj te sikljova len taro verna džuvlja hem murša so živingje ko purano vreme. Akala bibliska primerija sikavena amen pouke kola so šaj te primenina len ko različna podračja ko životo hem ko amaro brako. Isto agjaar, ka dikha so šaj te sikljova taro nesave bračna parija taro amaro vreme.

3-4. Save predizvikija šaj te oven e neve bračna paren?

³ Nesave manuša pottikninena e neve bračna paren te živinen sar sa o javera manuša. Na primer, o roditelija hem i familija šaj te keren lenge pritisok te ovel len so posigate čhave. Ili o amala hem i familija šaj te pottikninen len te kinen peske kher hem te sredinen le.

⁴ Ako na pazinena, o neve bračna parija šaj te anen odluke kola so ka čhiven len ko baro borči. Tegani, hem o rom hem i romni, verojatno ka valjani te keren but buti te šaj te platinen o borči. Šaj ka valjani te keren doborom but buti so nane te ovel len više vreme baši pli lično studija, baši Familijarno rat hem baši služba. Ola šaj čak te propuštinen sostanokija te šaj te zarabotinen poviše pare ili te na našaven pli buti. Ako kerena adava, tegani propuštinena but šuže prilike te šaj te bajraren pli služba bašo Jehova.

5. So sikljovea taro Klaus hem tari Marisa?

⁵ O iskustvo sikavela kaj ako koncentririnaja amen ko materijalna bukja nane te ova bahtale. Akava isto agjaar halile o Klaus hem i Marisa. * Keda lele pe, o solduj kerena sine but buti te šaj te ovel len udobno životo, ama adava na kergja len te oven bahtale. O Klaus vakerela: „Ko materijalno pogled sine amen but, ama na sine amen nisave duhovna celija. Ustvari, amaro životo sine komplicirano hem stresno“. Šaj tumen da primetingjen kaj o materijalna bukja na kerena tumen bahtale. Ako adava tano agjaar, ma obeshrabrinen tumen. Adava so ka dikhen e javerengoro šukar primer šaj te pomožinel tumenge te keren o potrebna promene. Najangle, te dikha so šaj o roma te sikljoven taro Cari o Josafat.

6. Sar o cari o Josafat primeningja o sovet soj pišimo ko Izreki 3:5, 6 keda soočingja pe jekhe bare problemea?

⁶ Tumen o roma, dali ponekogaš tumenge pharo te ispolninen tumare odgovornostija? Ako tano agjaar, šaj but te sikljoven taro cari o Josafat. Sar cari, o Josafat sine odgovorno bašo e narodoskoro šukaripe. Sar uspejngja te ispolninel akaja bari odgovornost? Ov dengja pestar sa te šaj te zaštitinel e narodo. Kergja o dizja ki Juda te oven pobezbedna hem khedingja bari vojska koja so sine poviše taro 1.160.000 vojnikija (2. Let 17:12-19). Pokasno, o Josafat soočingja pe bare problemea. Jekh bari vojska taro Amoncija, Moavcija hem manuša taro planinsko podračje taro Seir, zakaningje pe leske, leskere familijake hem leskere narodoske (2. Let. 20:1, 2). So kergja o Josafat? Ov rodingja pomoš taro Jehova hem sila. Postapingja baš sprema o načelo so arakhljola ko Izreki 3:5, 6. (Čitin.) E Josafateskiri ponizno molitva soj pišimi ko 2. Letopisi  20:5-12, sikavela amenge kobor bari doverba sine le ko Jehova. Sar odgovoringja o Jehova ki e Josafateskiri molitva?

7. Sar odgovoringja o Jehova ki e Josafateskiri molitva?

⁷ O Jehova odgovoringja e Josafateske preku jekh leviti so vikinela pe sine Jaziel. O Jehova vakergja: „Redinen tumen, tergjoven hem dikhen sar o Jehova ka spasinel tumen!“ (2. Let. 20:13-17). Akava na sine jekh voobičaeno način sar te vodinel pe jekh borba. Ama akala upatstvija na dengja len nesavo manuš, nego o Jehova. Adaleske so sine le bari doverba ko Devel, o Josafat kergja agjaar sar so sine leske vakerdo. Keda ov hem o narodo gele ki borba, na čhivgja ko prvo redo e najvešta vojnikon, nego e peačen kola so na sine len nisavo oružje. O Jehova ikergja pe ko plo lafi so dengja le e Josafateske — ov pobedingja e dušmanen (2. Let. 20:18-23).

8. So šaj o roma te sikljoven taro Josafat?

⁸ Tumen o roma šaj but te sikljoven taro Josafat. Isi tumen odgovornost te grižinen tumen tumare familijake. Adaleske, dena tumendar sa te šaj te zaštitinen len hem te grižinen tumen lenge. Keda isi tumen problemija, šaj mislinena kaj sien dovolno sposobna korkori te rešinen len. Ama, na valjani te ovel tumen doverba ki tumari sila. Namesto adava, molinen tumen e Jehovaske baši pomoš keda sien korkori. Isto agjaar, taro vilo molinen tumen zaedno tumare romnjencar. Roden vodstvo taro Jehova agjaar so ka proučinen i Biblija hem o publikacie kola so avena tari e Devleskiri organizacija, hem primeninen o sovetija so arakhena len adathe. O javera šaj nane te složinen pe tumencar keda ka anen odluke so temelinena pe ki Biblija hem šaj čak ka vakeren tumenge kaj sien glupava. Šaj ka vakeren tumenge kaj o pare hem o bukja so šaj te kinen len tane najšukar zaštita tle familijake. Ama ma bistren e Josafateskoro primer. Le sine le doverba ko Jehova hem adava sikavgja le ple postapkencar. O Jehova na mukhlja adale verno manuše, a nane te mukhel ni tumen (Ps. 37:28; Evr. 13:5). So javer šaj te keren o bračna parija te šaj te ovel len bahtalo životo?

9. So šaj te vakera bašo proroko o Isaija hem leskiri romni?

⁹ O Isaija hem leskiri romni čhivgje i služba bašo Jehova ko prvo than ko pumaro životo. Ov sine proroko hem šaj leskiri romni da prorokujnela sine, soske ki Biblija tani spomnimi sar „proročica“ (Isa. 8:1-4). Sar bračno pari ola koncentriringje pe ki služba bašo Jehova. Ola dengje but šužo primer e bračna parenge avdive!

10. Sar adava so o bračna parija ka proučinen o proroštvija tari Biblija ka pottikninel len te keren poviše ki služba bašo Jehova?

¹⁰ O bračna parija avdive šaj te džan palo primer so dengja le o Isaija hem leskiri romni, agjaar so ka keren sa so šaj ki služba bašo Jehova. Ola šaj te bajraren pumari doverba ko Jehova, agjaar so zaedno ka proučinen o bibliska proroštvija hem ka razmislinen sar sekogaš ispolninena pe * (Tit 1:2). Ola šaj te razmislinen bašo adava sar šaj te pomožinen te ispolninen pe nesave bibliska proroštvija. Na primer, šaj te pomožinen te ispolninel pe e Isuseskoro proroštvo kaj o šukar haberi bašo Carstvo ka propovedinel pe ko celo sveto angleder te avel o krajo (Mat. 24:14). So poviše uverinena  pe kaj o Bibliska proroštvija ispolninena pe, doborom poviše ka mangen te bajraren pumari služba bašo Jehova.

11. So šaj sine i Priskila hem o Akila te keren, hem soske?

¹¹ O terne bračna parija šaj te sikljoven tari Priskila hem taro Akila — jekh evrejsko bračno pari so živinela sine ko Rim. Ola šungje o šukar haberi bašo Isus hem ule hristijanja. Sigurno sine zadovolna pumare životoja. Ama lengoro životo taro jekh puti promeningja pe keda o imperatori o Klavdij dengja naredba sa o Evreija te džan peske taro Rim. Razmislin samo so značinela sine adava baši Priskila hem o Akila. Ola mora sine te mukhen o than kova so šukar pendžarena le sine, te arakhen jekh nevo kher hem palem te počminen te keren šatorija ko nevo than. Dali o neve, phare okolnostija čhinavgje len te keren sa so šaj ki služba bašo Jehova? Pa, sigurno džanaja o odgovor ko akava pučibe. Keda selingje pe ko Korint, o Akila hem i Priskila pomožingje ko adava sobranie hem sorabotingje e Pavlea te šaj te ohrabrinen e phralen hem e phenjen taro adava than. Palo nesavo vreme, ola gele ko javera dizja kote so sine pobari potreba bašo propovedibe (Dela 18:18-21; Rim. 16:3-5). Sigurno sine but zadovolna hem bahtale ko životo.

12. Soske valjani jekh bračno pari te čhivel peske duhovna celija?

¹² O bračna parija avdive šaj te džan palo primer tari Priskila hem o Akila agjaar so ka čhiven o Carstvo ko prvo than. O najšukar vreme keda valjani te keren lafi bašo pumare celija tano džikote zapoznajnena pe. Keda jekh pari čhivela peske duhovna celija hem trudinela pe te ispolninel len, tegani šaj ko poviše prilike te dikhel sar o Jehova pomožinela len ko lengoro životo (Prop. 4:9, 12). Te dikha o primer taro Rasel hem i Elizabet. O Rasel vakerela: „Džikote zapoznajnaja amen sine, keraja sine konkretno lafi bašo amare duhovna celija“. I Elizabet vakerela: „Kergjem lafi bašo akava, soske manglem te ova sigurna kaj ki idnina nane te ana odluke so ka ciden amen taro amare duhovna celija“. Lengere  okolnostija dozvolingje lenge te služinen ko javer than kote so sine pobari potreba taro objavitelija hem adaleske selingje pe ki Mikronezija.

13. Sprema Psalm 28:7 savo ka ovel o rezultati ako isi amen doverba ko Jehova?

¹³ Sar o Rasel hem i Elizabet, but parija odlučinena te živinen ednostavno životo te šaj te ovel len poviše vreme te propovedinen hem te sikaven e javeren bašo šukar haberi. Keda jekh pari čhivela peske duhovna celija hem zaedno trudinena pe te ispolninen len, ka ovel len but šukar rezultatija. Ka dikhen sar o Jehova grižinela pe lenge, lengiri doverba ki leste ka bajrol hem ka oven čače bahtale. (Čitin Psalm 28:7.)

14. Sar o apostol Petar hem leskiri romni sikavgje kaj isi len doverba ko vetuvanje soj tano pišimo ko Matej 6:25, 31-34?

¹⁴ O bračna parija šaj isto agjaar but te sikljoven taro apostol Petar hem leskiri romni. Otprilika šov masek dži ko jekh berš, otkeda prvo puti zapoznajngja pe e Isusea, ov valjani sine te anel jekh važno odluka. Ov astarela sine mačhe te šaj te grižinel pe ple familijake. Adaleske, keda o Isus vikingja e Petare te džal pali leste, ov valjani sine te lel ko predvid ple familijarna okolnostija (Luka 5:1-11). O Petar odlučingja te džal hem te propovedinel e Isusea. Adaja sine mudro odluka! Hem isi amen šukar pričina te verujna kaj e Petareskiri romni poddržingja adaja odluka. I Biblija sikavela kaj otkeda o Isus voskresningja, e Petareskiri romni nesavo vreme patujngja ple romea (1. Kor. 9:5). Sigurno, adaleske so oj sine šukar hristijansko romni, o Petar šaj sine slobodno te del sovet bašo roma hem bašo romnja (1. Pet. 3:1-7). Jasno tano kaj hem o Petar hem leskiri romni sine len doverba ko e Jehovaskoro vetuvanje kaj ov ka grižinel pe lenge ako ola čhivena o Carstvo ko prvo than ko plo životo. (Čitin Matej 6:25, 31-34.)

15. So sikljovena taro Tiago hem tari Ester?

¹⁵ Ako sian više ko brako nekobor berša, sar šaj ponadari te bajrare tli želba te šaj te kere poviše bašo Jehova? Jekh način tano agjaar so ka čitine o iskustvija taro javera bračna parija. Na primer, šaj te čitine o statie tari rubrika „Tie se stavile na raspolaganje“. Asavke statie pomožingje e Tijago hem e Estera, jekh bračno pari taro Brazil, te bajraren pumari želba te služinen poviše kote so isi pobari potreba taro objavitelija. O Tiago vakerela: „Keda čitinaja sine iskustvija bašo adava sar o Jehova pomožingja ple slugenge ko amaro vreme, amen da isto agjaar manglem te dža palo e Jehovaskoro vodstvo hem te osetina leskiri pomoš“. Palo nesavo vreme ola selingje pe ko Paragvaj, hem taro 2014 berš služinena ko portugalsko podračje. I Ester vakerela: „O solduj džene but mangaja o stiho taro Efešanite 3:20. But puti dikhlem sar ispolninena pe akala lafija ki služba“. Ko adava pismo dži ko Efešanja, o Pavle vetingja kaj o Jehova ka del amen but poviše taro adava so rodaja lestar. But puti amen korkori uveringjem amen ko akala lafija!

16. Kastar šaj te roden sovet o terne bračna parija keda razmislinena bašo ple celija?

¹⁶ O terne bračna parija šaj te sikljoven taro e javerengoro iskustvo kola so siklile te ovel len doverba ko Jehova. Nesave bračna parija šaj beršencar služingje ki polnovremeno služba. Soske na rodena lendar sovet keda razmislinena bašo tumare celija? Akava tano panda jekh način sar šaj te  sikaven doverba ko Jehova (Izr. 22:17, 19). O starešine da šaj te pomožinen e terne bračna parenge te čhiven peske duhovna celija hem te ispolninen len.

17. So slučingja pe e Klauseske hem e Marisake, hem so šaj te sikljova taro lengoro iskustvo?

¹⁷ Ponekogaš, iako šaj te čhiva amenge nesave celija ki amari služba, šaj nane te ikljol agjaar sar amen so planiringjem. Baš akava slučingja pe e Klauseske hem e Marisake, kolen so spomningjem len angleder. Otkeda sine trin berš ko brako, selingje pe ki podružnica ki Finska te šaj te služinen sar dobrovolcija ki izgradba. Ama doznajngje kaj našti te ačhoven poviše taro šov masek athe. Ko početok sine razočarime. Ama kratko palo adava, ola sine kanime te džan ko jekh kursi ki arapsko čhib hem akana tane bahtale so šaj te služinen ki javer phuv ko podračje kote so kerela pe arapsko lafi. Keda i Marisa setinela pe ko adava so slučingja pe, oj vakerela: „Darava sine te počminav te kerav nešto soj nevo hem te ovel man celosno doverba ko Jehova. Ama, dikhljum sar o Jehova sekogaš pomožingja amenge ko načinija so na očekujngjem len. Palo sa akava, mli doverba ko Jehova barili panda poviše“. Sar so dikhaja taro akava iskustvo, šaj te oven sigurna kaj o Jehova sekogaš ka nagradinel tumen ako isi tumen celosno doverba ki leste.

18. So šaj te keren o bračna parija te šaj ponadari da te ovel len doverba ko Jehova?

¹⁸ O brako tano poklon taro Jehova (Mat. 19:5, 6). Ov mangela o bračna parija te uživinen ko adava poklon (Izr. 5:18). Tumen o terne bračna parija, dali razmislingjen so šaj te keren tumare životoja? Dali dena tumendar sa te šaj te sikaven e Jehovaske kobor sien blagodarna bašo poklonija so dengja tumen? Keren lafi e Jehovaja ki molitva, proučinen leskoro Lafi te šaj te arakhen načelija so šaj te primeninen len ki tumari situacija. Palo adava, šunen o sovet kova so dela tumen o Jehova. Šaj te oven sigurna kaj ka ovel tumen šužo hem bahtalo životo ako i služba bašo Jehova tumenge ko prvo than!