Ama angleder te vakerav so slučingja pe palo adava, prvo te vakerav tumenge sar počmingjum e polnovremeno službaja.

Bijandiljum ko 1942 berš ko but šužo karibsko ostrov ko Kurasao. Mo dad tano taro Surinam, ama ov selingja pe akate baši buti. But berša angleder te bijangjovav, mo dad ulo jekh taro prva Jehovaskere svedokija kola so krstingje pe ko Kurasao. a Ov sekova kurko proučinela sine amencar i Biblija, iako ponekogaš na mangaja sine te proučina. Keda sine man 14 berš celo familija selingjem amen ko Surinam te šaj mo dad te grižinel pe ple dajake.

Ko Surinam počmingjum te družinav man ternencar taro sobranie kola so revno služinena sine e Jehovaske. Ola sine nekobor berša pobare mandar hem služinena sine sar opšta pionerija. Lengere muja asana sine džikote raskažinena sine save iskustvija sine len ki služba. Palo sostanokija, me hem me amala keraja sine lafi bašo bibliska teme. Ponekogaš keraja sine adava džikote bešaja sine avri hem dikhaja sine o zvezde. Akala amala pomožingje mange te haljovav so mangava ko životo, a adava tano te kerav buti e Jehovaske. Adaleske krstingjum man keda sine man 16 berš. A ko 18 berš počmingjum e pionersko službaja.

Sar pioneri sikliljum but pouke hem ola pomožingje mange ki celo mli polnovremeno služba. Na primer, i prvo pouka so sikliljum la sine kobor tano važno te obučinav e javeren. Keda počmingjum e pionersko službaja pomožingja mange jekh misioneri so vikinela pe Vilijam Van Sajl. b Ov but sikavgja man  bašo adava sar te kerav me teokratska zadače. Ko adava vreme na sium sine svesno kaj but ka valjanel mange akaja obuka. O sledno berš uljum specijalno pioneri hem palo adava počmingjum te grižinav man e grupicenge kola so sine skroz andre ki šuma ko Surinam. But ceninava i obuka so dengje man o phralja! Ottegani trudingjum man te džav palo lengoro primer agjaar so odvojngjum mange vreme te obučinav e javeren.

I dujto pouka so sikliljum la sine kobor tano šukar te ovel tut skromno ama but šukar organizirimo životo. Ko početok taro sekova masek, me hem jekh javer specijalno pioneri so služinela sine zaedno mancar, planirinaja sine kola bukja valjani amenge bašo sledna kurke. Tegani, jekh amendar patujnela sine čak dži ki glavno diz te šaj te kinel adava so valjani amenge. Valjani sine šukar te pazina sar koristinaja o džeparac hem šukar te koristina o bukja so kingjem len te šaj te resen amen celo masek. Ako sigate trošinaja sine o bukja so sine amen, tegani ki šuma sine but pharo te arakha nekas so šaj sine te pomožinel amenge. Sigurno sium kaj adava so sikliljum ko terne berša, te ovel man skromno ama but šukar organizirimo životo, pomožingja mange ponadari da te koncentririnav man ki služba bašo Jehova celo mlo životo.

I trito pouka so sikliljum la sine kobor tano korisno te sikave e manušen ki lengiri čhib. Džikote bariljum, sikliljum te kerav lafi ko holandski, angliski, papiamento hem sranantongo (isto agjaar pendžardi sar sranan) — i čhib koja so obično kerela pe lafi ko Surinam. Ama dikhljum kaj o manuša so živinena sine ki šuma šunena sine poviše o šukar haberi keda propovedinaja sine ki lengiri čhib. Sine mange pharo te kerav lafi ko nesave taro akala čhibja sar soj i čhib saramakan kote so koristinela pe uče hem niska tonija. Ama isplatingja pe so trudingjum man te sikljovav adaja čhib. Ko sa adala berša šaj sine te proučinav poviše manušencar soske šaj sine te kerav lencar lafi ki lengiri čhib.

Džangjola pe, sine isto agjaar situacie kote so ladžakergjum man. Na primer, ki jekh prilika mangljum te pučav jekhe interesentka koja so kerela lafi ko saramakan sar osetinela pe soske sine la dukha ko vogi. Ama namesto adava, pučljum la dali tani khamni! Šaj te zamislinen tumenge kobor oj da ladžandili taro akava pučiba. Iako slučinena pe sine mange asavke greške, sepak trudinava man sine te propovedinav e manušenge ki lengiri čhib.

Ko 1970 berš uljum pokrainsko nadgledniko. Ko adava berš bute grupicenge so sine ki šuma sikavgjum preku proektori i prezentacija „Posetin o glavno sedište e Jehovaskere svedokongoro“. Te šaj te resa dži ko phralja hem phenja, me hem nesave javera phralja koristingjem jekh čamco. Ko amaro čamco sine jekh generator, benzini, lampe hem celo  oprema so valjani sine amenge baši prezentacija. Te šaj te sikava e javerenge i prezentacija valjani sine te la celo amari oprema ki šuma. Nešto so odma avela mange ki godi keda razmislinava bašo adava tano kobor svidžingja pe e manušenge i prezentacija. But radujngjum man so šaj sine te pomožinav e javeren te sikljon bašo Jehova hem baši leskiri organizacija. O duhovna bereketija sine but pobare tari bilo savi žrtva so kergjum la ki e Jehovaskiri služba.

Iako sine mange jasno kaj sar bekjari polokho tano te kerav mli služba sepak mangljum te ženinav man. Adaleske počmingjum konkretno te molinav man te arakhav romni koja so radosno ka služinel mancar ki akaja polnovremeno zadača so na sine baš lokhi. Palo jekh berš počmingjum te zapoznajnav man jekhe specijalno pionerkaja koja so vikinela pe Etel kola so sine la samopožrtvuvano stavi. I Etel panda taro tiknipe manglja te džal palo e apostol Pavleskoro primer hem adaleske dengja pestar sa ki služba. Venčingjem amen septemvri ko 1971 berš hem počmingjem zaedno te služina ki pokrainsko služba.

I Etel barili ki jekh čoroli familija hem adaleske na sine lake problemi te ovel mancar ki patuvačko služba ki šuma. Na primer, keda spreminaja amen sine te posetina nesavo sobranie na laja sine but bukja amencar. Thovaja sine amare šeja ki reka hem nangjovaja sine athe. Isto agjaar, haja sine sa so ka spreminen o phralja. Na primer, haja sine iguane, pirane ili sa so astarena sine ki šuma ili ki reka. Keda na sine len činie, haja sine ko e bananengere listija. Isto agjaar but puti haja sine vastencar. Me hem i Etel osetingjem kaj adaleske so zaedno keraja žrtve ki služba bašo Jehova, adava pomožingja amen te ova trin šele phanle ko jekh  (Prop. 4:12). Ništoske na bi meninaja adava vreme so nakhlem.

Jekh dive keda irangjem amen tari poseta doživingjum baš adava so vakergjum ko početok taro mlo iskustvo. Keda reslem ko than kote so i reka sigate džala sine, o čamco batingja ko pani ama odma palo adava uštilo upro pani. Sine amen srekja so uravgjem elekija spasibaske hem na pelem taro čamco. Ama o čamco pherdilo pani. Frdingjem o hajbe taro tendžere te šaj lencar te ikala o pani taro čamco.

Adaleske so frdingjem sa amaro hajbe manglem te astara mačhe. Ama na astargjem nijekh mačho. Tegani molingjem amen e Jehovaske te del amen hajbe adale diveske. Odma pali molitva jekh phral astargja baro mačho kova so sine dovolno so pandže dženenge te ha.

Palo pandž berš patuvačko služba, i Etel hem me dobingjem bereketi so iznenadingja amen — i Etel ačhili khamni. Sium sine radosno, iako na džanljum sar ka vlijajnel adava upro amaro životo. Sine amen bari želba ponadari da te ačhova ki polnovremeno služba. Ko 1976 berš, bijandilo amaro čhavo o Etniel, palo duj tekvaš berš bijandilo amaro dujto čhavo, o Džovani.

Adaleske so ko adava vreme sine bari potreba ko Surinam i podružnica dozvolingja mange ponadari da te ovav ki pokrainsko služba. Džikote o čhave sine panda tikne dengje man te posetinav samo nekobor sobranija. Agjaar šaj sine nekobor kurke ko masek te služinav sar pokrainsko nadgledniko, a o javera kurke taro masek služinava sine sar pioneri ko sobranie kote so sium sine dodelimo. I Etel hem o čhave avena sine mancar keda posetinava sine o sobranija so sine paše, ama keda džava sine dur ki šuma bašo posete hem kongresija tegani džava sine korkori.

Valjani sine šukar te organizirinav man te šaj te grižinav man bašo sa mle odgovornostija. Trudinava man sine te ikera amari Familijarno rat sekova kurko. A keda posetinava sine o sobranija ki šuma, i Etel ikerela sine i Familijarno rat. Ama but puti keraja sine o bukja sar familija. Isto agjaar redovno odvojnaja sine vreme baši rekreacija. Nekogaš khelaja sine nesave igre, a nekogaš džaja sine ko nesave interesna thana. But puti ačhovava  sine kasno rakjate te šaj te spreminav man bašo mle sobraniska zadače. A i Etel tani baš sar i vredno romni soj opišimi ko Izreki 31:15. Oj uštela sine rano sabajle te šaj zaedno sar familija te čitina e diveskoro stiho hem te kerel amenge sabaluko. But sium blagodarno so isi man samopožrtvuvano romni hem koja so sekogaš pomožinela mange te ispolninav mle odgovornostija.

Sar roditelija, dengjem amendar sa te šaj amare čhave te mangen e Jehova hem i služba. Manglem amare čhave te oven ki polnovremeno služba, ama na baši amenge nego adaleske so ola mangena. Sekogaš vakeraja sine lenge sar i polnovremeno služba ka kerel len radosna. Ama isto agjaar vakeraja sine lenge save predizvikija sine amen hem sar o Jehova sine celo vreme amencar te poddržinel amen. Isto agjaar trudinaja amen sine amare čhaven te ovel len društvo so čhivena e Jehova ko prvo than.

O Jehova dengja amen sa so valjani amenge sar familija. Džangjola pe, sar poglavari me sekogaš trudingjum man te dav mlo delo. Adava so služinava sine ki šuma sar specijalno pioneri sikavgja man te štedinav pare te šaj pokasno te lav adava so ka valjani amenge. Ama ponekogaš iako keraja sine sa so valjani, na sine amen sekogaš o potrebna bukja. Ko adala prilike dikhljum sar o Jehova pomožinela amenge. Na primer, taro 1986 dži ko 1992 berš, ko Surinam sine gragjanska nemirija hem posebno ko adava vreme sine but pharo te oven tut o osnovna bukja. Ama čak tegani o Jehova grižingja pe amenge (Mat. 6:32).

Celo životo o Jehova grižingja pe amenge hem pomožingja amen te ova radosna hem zadovolna. O čhave sine amenge baro bereketi hem čest sine amenge te vospitina len te služinen e Jehovaske. But radujnaja amen so posvetingje pumaro životo ki polnovremeno služba. Hem o Etniel hem o Džovani sine ki škola koja so akana vikinela pe Škola bašo polnovremena objavitelija, hem akana zaedno pumare romnjencar služinena ko Betel ko Surinam.

Iako akana me hem i Etel siem phure amen panda služinaja sar specijalna pionerija. Hem doborom siem zafatime so panda nane man vreme te sikljovav te plivinav. Ama nane mange krivo bašo ništo. Keda razmislinava bašo mlo životo, mislinava kaj adava so sar terno odlučingjum te kerav buti ki polnovremeno služba bašo Jehova sine i najšukar odluka so dži akana angjum la.