STATIJA PROUČIBASKE 45
Sar o Jehova pomožinela amenge te kera amari služba?
Ola sigurno ka džanen kaj maškar lende sine proroko (EZEK. 2:5)
GILI 67 Vakeren o šukar haberi!
BAŠO SO KA KERA LAFI a
1. So šaj te očekujna hem bašo so šaj te ova sigurna?
DŽIKOTE keraja amari služba šaj te očekujna kaj o manuša ka protivinen pe amenge. A ki idnina akava verojatno ka slučinel pe panda poviše (Dan. 11:44; 2. Tim. 3:12; Otk. 16:21). Sepak, šaj te ova uverime kaj o Jehova ka del amen i pomoš koja so valjani amenge. Soske? O Jehova sekogaš pomožingja ple slugenge uspešno te završinen pumari zadača, bizi razlika kobor sine pharo adava. Jekh asavko primer sine o Ezekiel. Te dikha so slučingja pe leske džikote propovedinela sine e Evreenge so sine robija ko Vavilon.
2. So vakergja o Jehova bašo manuša kaske so propovedingja o Ezekiel, hem so ka dikha ki akaja statija? (Ezekiel 2:3-6).
2 Save manušenge valjani sine o Ezekiel te propovedinel? O Jehova opišingja len sar „drska“, „zorale vileskere“ hem sar „buntovnikija“. Ola dukhavena poviše taro kare hem tane poopasna taro škorpie. Adaleske, o Jehova but puti phengja e Ezekieleske: „Ma dara!“ (Čitin Ezekiel 2:3-6.) O Ezekiel šaj sine uspešno te kerel pli služba adaleske so 1) o Jehova bičhalgja le, 2) dobingja sila taro e Devleskoro duho hem 3) hraningja pe taro e Devleskere lafija. Sar pomožingje leske akala trin bukja? Hem sar pomožinena amen avdive?
O JEHOVA BIČHALGJA E EZEKIELE
3. Kola lafija zajakningje e Ezekiele, hem sar o Jehova uveringja le kaj poddržinela le?
3 O Jehova vakergja e Ezekieleske: „Bičhalava tut“ (Ezek. 2:3, 4). Sigurno akala lafija zajakningje e Ezekiele. Soske? Verojatno o Ezekiel setingja pe kaj o Jehova vakergja nešto slično e Mojseeske hem e Isaijaske keda biringja len sar leskere prorokija (2. Moj. 3:10; Isa. 6:8). Isto agjaar, ov džanlja sar o Jehova pomožingja akale duje prorokonge uspešno te keren pumare zadače. Adaleske, keda o Jehova vakergja e Ezekieleske duj puti „bičhalava tut“, tegani šaj sine te ovel le doverba ko Jehova kaj ov ka poddržinel le. Akaja izjava arakhljola but puti ko lil Ezekiel: „Dobingjum jekh poraka taro Jehova“ (Ezek. 3:16). Hem but puti pišingja: „Palem dobingjum poraka taro Jehova“ (Ezek. 6:1). Akava sikavela kaj o Ezekiel sine uverimo kaj tano bičhaldo taro Jehova. Isto agjaar, sar čhavo jekhe sveštenikoskoro ov sigurno siklilo sar o Jehova sekogaš pomožingja ple prorokonge. E Isakoske, e Jakoveske hem e Eremijaske o Jehova vakergja: „Me sium tuja“ (1. Moj. 26:24; 28:15; Erem. 1:8).
4. Kola utešna lafija sigurno zajakningje e Ezekiele?
4 Sar ka reagirinen but Izraelcija ko adava so isi te vakerel o Ezekiel? O Jehova vakergja: „O Izraelcija nane te mangen te šunen tut, soske na mangena te šunen man“ (Ezek. 3:7). Adalea so ka odbinen e Ezekiele, ustvari ola ka odbinen e Jehova. Akala lafija uveringje e Ezekiele kaj adava so o manuša nane te mangen te šunen le, na značinela kaj nane uspešno ki pli zadača sar proroko. O Jehova isto agjaar uveringja le kaj keda ka ispolninel pe i osuda so objavingja la, o manuša „ka džanen kaj maškar lende sine proroko“ (Ezek. 2:5; 33:33). Sigurno akala utešna lafija dengje le i sila so valjani leske te kerel pli služba.
O JEHOVA BIČHALELA AMEN
Isto sar o Ezekiel, džanaja kaj o Jehova tano amencar keda soočinaja amen problemencar hem protivibaja (Dikh ko pasusija 5-6)
5. Sprema Isaija 44:8, kotar dobinaja sila?
5 Amen da dobinaja sila soske džanaja kaj o Jehova bičhalgja amen. Ov sikavela amenge čest adalea so vikinela amen ple „svedokija“ (Isa. 43:10). Adaja tani bari prednost! O Jehova amenge da phenela „ma daran“ isto sar so vakergja adava e Ezekieleske. Soske na valjani te dara taro amare protivnikija? Isto sar o Ezekiel, amen da siem bičhalde taro Jehova hem isi amen leskiri poddrška. (Čitin Isaija 44:8.)
6. a) Kotar džanaja kaj o Jehova poddržinela amen? b) So utešinela hem ohrabrinela amen?
6 O Jehova uverinela amen kaj ka poddržinel amen. Na primer, angleder te vakerel: „Tumen sien mle Svedokija“, o Jehova vakergja: „Keda ka nakhe taro pajna, me ka ovav tuja. Keda ka nakhe taro reke, nane te poplavinen tut. Keda ka phire preku i jag, nane te thabljove ni o plameno nane te tharel tut“ (Isa. 43:2). Džikote keraja amari služba ponekogaš ka oven amen predizvikija kola soj sar poplave hem ka soočina amen nevoljencar kola soj sar jag. Ama čak ko asavke situacie amen ponadari da propovedinaja soske o Jehova pomožinela amenge (Isa. 41:13). Isto sar e Ezekiele, amende da but džene odbinena ama adava na značinela kaj na propovedinaja šukar. Siem utešime hem ohrabrime adaleske so džanaja kaj o Jehova tano zadovolno keda ponadari da verno vakeraja o haberi. O Pavle vakergja: „Sekoj ka dobinel nagrada sprema plo trudo“ (1. Kor. 3:8; 4:1, 2). Jekh phen so služinela but berša sar pionerka vakerela: „But sium radosno adaleske so džanava kaj o Jehova nagradinela amaro trudo“.
O EZEKIEL DOBINGJA SILA PREKU E DEVLESKORO DUHO
O Ezekiel dikhlja vizija tari e Jehovaskiri nebesno kočija hem adava uveringja le kaj o Jehova ka pomožinel leske te kerel pli služba (Dikh ko pasus 7)
7. Keda razmislinela sine baši vizija, sar vlijajnela sine adava upro Ezekiel? (Dikh i slika ki naslovno strana.)
7 O Ezekiel dikhlja kobor mokjno tano e Devleskoro duho. Ki jekh vizija, ov dikhlja sar o sveti duh dejstvujnela upro mokjna angelija hem sar pomožinela te dvižinen pe o bare trkalakija tari nebesno kočija (Ezek. 1:20, 21). Sar reagiringja o Ezekiel? Ov pišingja: „Keda dikhljum adava frdingjum man ki phuv“. O Ezekiel sine doborom vooduševimo so pelo tele ki phuv (Ezek. 1:28). Sekogaš keda razmislinela sine baši adaja vizija sigurno ov sine but ohrabrimo hem uverimo kaj e Jehovaskere sveti duhoja šaj te kerel pli služba.
8-9. a) So slučingja pe e Ezekieleske keda o Jehova zapovedingja leske te uštel? b) Sar o Jehova ponadari da zajakningja e Ezekiele baši leskiri phari zadača?
8 O Jehova zapovedingja e Ezekieleske: „Manušikano čhavo, ušti ko pre te šaj te kerav tuja lafi“. Adaja zapoved hem e Devleskoro duho dengje leske i sila so valjangja leske te šaj te uštel. O Ezekiel pišingja: „O duho khuvgja ki mande hem kergja te uštav ko pre“ (Ezek. 2:1, 2). Ki celi pli služba o Ezekiel sine vodimo taro e Jehovaskoro „vas“, javere lafencar leskoro sveti duh (Ezek. 3:22; 8:1; 33:22; 37:1; 40:1). E Devleskoro duho dengja le i sila baši zadača so dobingja la — te propovedinel okolenge soj „zorale šereskere hem zorale vileskere“ (Ezek. 3:7). O Jehova vakergja e Ezekieleske: „Kergjum tlo muj zoralo isto sar lengoro hem tlo čekat zoralo sar lengoro. Kergjum tlo čekat sar dijamanti, pozoralo taro bar. Ma dara ni taro lengere lafija ni lendar“ (Ezek. 3:8, 9). Sar te phene o Jehova vakergja leske: „Ma dozvolin e manušengiri tvrdoglavost te obeshrabrinel tut. Me ka dav tut sila“.
9 Palo adava, e Devleskoro duho celo vreme vodingja e Ezekiele ki leskiri služba. O Ezekiel pišingja: „E Jehovaskoro vas silno dejstvujnela sine upri mande“. Valjangja leske jekh kurko te šaj celosno te sikljol hem te haljol o haberi so valjani sine te objavinel le te šaj te ovel uverimo džikote propovedinela (Ezek. 3:14, 15). Tegani, o Jehova vakergja leske te džal ki jekh dolina kote so „o duho khuvgja ki leste“ (Ezek. 3:23, 24). Palo adava o Ezekiel sine spremno te počminel ple službaja.
E DEVLESKORO DUHO DELA AMEN I SILA SO VALJANI AMENGE
So pomožingja e Ezekieleske hem so šaj te pomožinel amenge te kera amari služba? (Dikh ko pasus 10)
10. Savi pomoš valjani amenge te šaj te propovedina hem soske?
10 Savi pomoš valjani amenge te šaj te kera amari služba? Te šaj te odgovorina ko akava, te dikha so slučingja pe e Ezekieleske. Angleder te počminel ple službaja e Devleskoro duho dengja le i sila so valjangja leske. Slično sar o Ezekiel, te šaj te propovedina valjani amenge e Devleskoro sveti duh. Soske? Adaleske so o Satana borinela pe protiv amende, te šaj te čhinava e propovedibaja (Otk. 12:17). Sar manuša šaj te mislina amenge kaj o Satana tano doborom mokjno so našti te borina amen protiv leste. Ama adalea so džaja ki služba amen ustvari pobedinaja le (Otk. 12:9-11). Sar? Keda propovedinaja amen sikavaja kaj na daraja taro e Satanaskoro protivibe. Sekova puti keda džaja ki služba amen pobedinaja e Satana. So haljovaja taro adava so iako isi amen protivibe amen šaj ponadari da te propovedina? Haljovaja kaj o Jehova dela amen i sila preku plo sveti duh hem kaj isi amen e Jehovaskiri poddrška (Mat. 5:10-12; 1. Pet. 4:14).
11. Sar ka pomožinel amen e Devleskoro duho, hem sar šaj ponadari da te dobina le?
11 So javer šaj te haljova taro adava so o Jehova ko simbolično način kergja zoralo e Ezekieleskoro muj hem čekat? E Devleskoro duho šaj te del amen sila koja so valjani amenge te šaj te izdržina bilo savo problemi so ka ovel amen ki služba (2. Kor. 4:7-9). Tegani, so valjani te kera te šaj ponadari da te dobina e Devleskoro duho? Valjani redovno te molina amen bašo duho hem te ova uverime kaj o Jehova ka šunel amen. O Isus vakergja ple učenikonge: „Molinen tumen... roden... khuven“, tegani o Jehova „ka del sveti duh okolenge so rodena lestar adava“ (Luka 11:9,13; Dela 1:14; 2:4).
O EZEKIEL HRANINGJA PE TARO E DEVLESKERE LAFIJA
12. Sprema Ezekiel 2:9-3:3, kotar avela sine o svitok hem so pišinela sine ki leste?
12 O Ezekiel na dobingja sila samo taro e Devleskoro duho, nego isto agjaar taro e Devleskere lafija. Ki jekh vizija o Ezekiel dikhlja vas so ikerela svitok. (Čitin Ezekiel 2:9-3:3.) Kotar alo adava svitok? So pišinela ki leste? Hem sar hraningja pe lestar o Ezekiel? Te dikha. O svitok alo taro e Devleskoro prestol, verojatno o Jehova koristingja jekh taro štar angelija kolen so o Ezekiel angleder dikhlja len, te del le o svitok (Ezek. 1:8; 10:7, 20). Ko svitok sine e Devleskere lafija — jekh baro haberi baši osuda kova so o Ezekiel valjani sine te vakerel e buntovno Izraelconge (Ezek. 2:7). Akava haberi sine ko solduj strane taro svitok.
13. So vakergja o Jehova e Ezekieleske te kerel e svitokoja, hem soske sine gudlo?
13 O Jehova vakergja ple prorokoske te hal o svitok hem „te pherel plo vogi lea“. O Ezekiel sine poslušno hem halja celo svitok. So značinela akava delo tari vizija? O Ezekiel valjani sine celosno te haljol o haberi kova so valjani sine te objavinel le. Valjani sine te ovel delo lestar te šaj te vlijajnel ko leskere najhor čuvstvija, hem adava te pottikninel le te propovedinel. Tegani slučingja pe nešto so na očekujngja, ov halilo kaj o svitok „sine gudlo sar avgin“ (Ezek. 3:3). Soske? I čest te pretstavinel e Jehova sine leske gudli, ili but šužo iskustvo (Ps. 19:8-11). Ov sine blagodarno so o Jehova biringja le te služinel sar leskoro proroko.
14. So pomožingja e Ezekieleske te prifatinel pli zadača?
14 Pokasno, o Jehova vakergja e Ezekieleske: „Sa o lafija so vakerava len čhiv len tuke ko vilo hem šun šukar“ (Ezek. 3:10). O Jehova vakergja leske adava te šaj te trudinel pe te pamtinel o lafija taro svitok hem hor te razmislinel baši lende. Keda o Ezekiel kergja adava leskiri vera uli pozorali. Isto agjaar, ko adava svitok sine jekh silno haberi kova so valjani sine te vakerel pe e manušenge (Ezek. 3:11). Keda o Ezekiel celosno halilo e Devleskoro haberi hem verujngja ki leste, ov sine spremno te počminel ple zadačaja hem te završinel la. (Sporedin Psalm 19:14.)
AMEN DA ŠAJ TE HRANINA AMEN TARO E DEVLESKERE LAFIJA
15. So valjani „te čhiva amenge ko vilo“ te šaj te istrajna?
15 Te šaj te istrajna ki amari služba, amen da valjani ponadari te hranina amen taro e Devleskere lafija. Valjani „te čhiva amenge ko vilo“ sa so vakerela amenge o Jehova. Avdive o Jehova kerela amencar lafi preku i Biblija. Sar šaj te uverina amen kaj e Devleskoro Lafi ponadari da vlijajnela upro amare misle, čuvstvija hem motivija?
16. So valjani te kera, hem sar adava ka vlijajnel upro amaro vilo?
16 Amen siem ki šukar fizičko sostojba soske haja redovno maro hem amaro telo obrabotinela adava hajbe. Ako mangaja te ova ki šukar duhovno sostojba, tegani valjani redovno te proučina e Devleskoro Lafi hem hor te razmislina bašo adava. Na mangaja te bistra i pouka bašo svitok. O Jehova mangela „te phera amaro vogi leskere Lafea“, javere lafencar šukar te haljova i Biblija. Adava šaj te kera le molitvaja, čitibaja hem hor razmislibaja. Ko početok molinaja amen te šaj e Devleskere misle te vlijajnen upro amaro vilo. Palo adava čitinaja jekh biblisko stiho. Tegani hor razmislinaja bašo adava so čitinaja. So ka ovel o rezultati? So poviše razmislinaja, doborom poviše ka haljova e Devleskoro Lafi hem agjaar amari vera ka ovel pozorali.
17. Soske tano but važno hor te razmislina bašo adava so čitinaja tari Biblija?
17 Soske tano but važno te čitina i Biblija hem hor te razmislina bašo adava? Adava šaj te del amen sila te šaj te propovedina o haberi bašo Carstvo akana, hem te objavina i osuda koja so šaj ka valjani panda hari te vakera la. Isto agjaar, keda razmislinaja bašo e Jehovaskere but šuže osobine, adava šaj te kerel te ova panda popaše lea. Tegani ka uživina ko nešto so ka ovel amenge but gudlo — andruno mir hem zadovolstvo (Ps. 119:103).
POTTIKNIME SIEM TE ISTRAJNA
18. So ka valjani te priznajnen o manuša hem soske?
18 Amen na siem prorokija sar o Ezekiel, ama siem odlučna ponadari da te objavina i poraka taro Jehova sa džikote na vakerela te čhinava adalea. Keda ka avel o vreme baši osuda tegani o manuša taro amaro podračje našti te vakeren kaj na sine predupredime ili kaj o Devel na dikhlja len (Ezek. 3:19; 18:23). Namesto adava, ola ka haljoven kaj o haberi so propovedingjem sine taro Devel.
19. So ka del amen sila te šaj te kera amari služba?
19 So ka del amen sila te šaj te kera amari služba? O ista trin bukja so pomožingje e Ezekieleske. Ponadari da propovedinaja soske džanaja kaj siem bičhalde taro Jehova, kaj e Devleskoro duho dela amen i sila so valjani amenge hem kaj hraninaja amen taro e Devleskoro Lafi. Adaleske so o Jehova pomožinela amenge, siem pottiknime te kera amari služba hem „te istrajna dži ko krajo“ (Mat. 24:13).
GILI 65 Dža angle!
a O proroko o Ezekiel sine uspešno ki pli služba. Ki akaja statija ka dikha trin bukja so pomožingje leske. Džikote keraja lafi bašo adava, ka ova panda pouverime kaj o Jehova ka pomožinel amenge te kera amari služba.