1-2. a) Bašo kola pučiba ka kera lafi? b) So sikavela kaj o Jehova but mangela te pomožinel amenge?

 O JEHOVA šaj te pomožinel amenge te ikljova ko krajo e problemencar hem te ova radosna baši služba so keraja leske. Ko kola načinija pomožinela amenge? Hem sar šaj te ovel amen celosno korist tari pomoš so dela amen o Jehova? O odgovorija bašo akala pučiba ka doznajna len ki akaja statija. Ama angleder te kera lafi bašo adava, prvo te dikha dali o Jehova čače mangela te pomožinel amenge.

² O apostol Pavle ko plo pismo dži ko Evreija koristingja jekh lafi so šaj te pomožinel amenge te otkrina o odgovor. Ov pišingja: „O Jehova tano mlo pomošniko, nane te darav. So šaj te kerel mange o manuš?“ (Evr. 13:6). Nesave bibliska rečnikija vakerena kaj ko akava stiho o lafi „pomošniko“ značinela nekoj so sigjarela te pomožinel nekaske so molinela baši pomoš. Zamislin tuke sar o Jehova sigjarela te pomožinel nekaske so isi le problemija. Sigurno ka složine tut kaj akava but šukar opišinela e Jehovaskiri spremnost ili bari želba te ovel amaro pomošniko. Keda o Jehova pomožinela amen šaj radosno te istrajna keda isi amen problemija.

3. Ko kola trin načinija pomožinela amen o Jehova radosno te istrajna?

³ Kola tane nesave načinija sar o Jehova pomožinela amen radosno te istrajna? Te šaj te odgovorina ko akava  pučibe, te dikha jekh delo taro lil Isaija. Soske? Adaleske so but proroštvija so vakergja len o Jehova e Isaijaske važinena e Devleskere narodoske avdive. Isto agjaar, o Isaija but puti opišinela e Jehova lafencar so šaj but lokheste te haljova len. Asavke primerija šaj te arakha ko 30 poglavje taro Isaija. Ko adava poglavje o Isaija koristinela but šuže sporedbe te šaj te opišinel sar o Jehova pomožinela ple narodoske. Ov pišingja kaj o Jehova pomožinela amenge agjaar so 1) vnimatelno šunela amen hem odgovorinela ko amare molitve, 2) vodinela amen hem 3) nagradinela amen akana hem ki idnina. Te dikha akana nešto poviše bašo akala trin načinija sar o Jehova pomožinela amenge.

4. a) So vakergja o Jehova bašo Evreija taro e Isaijaskoro vreme, hem so dozvolingja te slučinel pe lenge? b) Savi nadež dengja o Jehova okolenge so sine verna? (Isaija 30:18, 19).

⁴ Ko početok taro 30 poglavje taro Isaija, o Jehova vakerela kaj o Evreija tane sar „tvrdoglava čhave“ kola so „dodajnena grevo upro grevo“. Ov ponadari vakerela: „Ola tane buntovna manuša... kola so na mangena te šunen e Jehovaskoro zakoni“ (Isa. 30:1, 9). Adaleske so ola odbingje te šunen, o Isaija prorokujngja kaj o Jehova ka dozvolinel te doživinen nevolja (Isa. 30:5, 17; Erem. 25:8-11). Hem baš adava slučingja pe keda o Vaviloncija lele len sar robija. Ama nesave taro adala Evreija sine verna hem o Isaija lenge vakergja o haberi baši nadež kaj o Jehova ka dozvolinel lenge palem te iranen pe ko Erusalim. (Čitin Isaija 30:18, 19.) Baš adava slučingja pe, o Jehova oslobodingja len taro Vavilon. Ama nakhle but berša angleder te kerel adava. O lafija „o Jehova strplivo ka adžikerel te kerel tumenge šukaripe“ sikavena kaj ka nakhel nesavo vreme angleder o verna te oven oslobodime. Ustvari, o Izraelcija sine 70 berš ko Vavilon hem palo adava nesave lendar irangje pe ko Erusalim (Isa. 10:21; Erem. 29:10). Otkeda irangje pe ki pli phuv čhinavgje te roven tari žal hem počmingje te roven tari radost.

5. Ko so uverinena amen o lafija taro Isaija 30:19?

⁵ Avdive šaj te ova ohrabrime taro lafija so pišingja len o Isaija: „Ov sigurno ka sikavel tuke milost keda molinea baši pomoš“ (Isa. 30:19). O Isaija uverinela amen kaj o Jehova vnimatelno ka šunel amen keda rodaja lestar pomoš, hem ov sigate ka odgovorinel ko amare molitve. O Isaija ponadari vakerela: „Samo so ka šunel tlo glaso ka odgovorinel tuke“. Akala lafija uverinena amen kaj amaro Dad tano spremno hem but mangela te pomožinel okolenge so rodena lestar pomoš. Akava pomožinela amenge radosno te istrajna.

6. Sar o lafija taro Isaija sikavena kaj o Jehova šunela sekole jekheskiri molitva posebno?

⁶ So javer šaj te sikljova taro akava stiho bašo amare molitve? O Jehova vnimatelno šunela sekole jekheskiri molitva. Soske šaj te vakera akava? Ko prvo delo taro Isaija 30 poglavje, o Jehova obratinela pe ple narodoske sar grupa. Ama ko 19 stiho ov obratinela pe sekole jekheske lično. O Isaija pišingja: „Tu nane više te rove“; „ov sigurno ka sikavel tuke milost“; „ka odgovorinel tuke“. Sar Dad kova so mangela amen o Jehova na vakerela ple obeshrabrime čhaveske ili čhajake: „Valjani te ove silno sar tlo phral ili tli phen“. Namesto adava, ov grižinela pe sekole jekheske lično hem šunela sekaskiri molitva posebno (Ps. 116:1; Isa. 57:15).

7. So vakergje o Isaija hem o Isus bašo adava kobor tano važno te ova uporna ki molitva?

 ⁷ Keda molinaja amen e Devleske bašo nešto so mučinela amen, o Jehova šaj prvo ka odgovorinel amenge agjaar so ka del amen sila te šaj te istrajna ki adaja situacija. Hem ako adava problemi trajnela poviše vreme, šaj ka valjani te molina e Jehova but puti baši sila te šaj te istrajna. Baš ko adava ohrabrinena amen o lafija so pišingja len o Isaija. Ov vakergja: „Ma mukhen [e Jehova] ko mir“ (Isa. 62:7). So značinela adava? Valjani doborom puti te molina amen e Jehovaske sar te phene na mukhaja le ko mir amare molitvencar. E Isaijaskere lafija setinkerena amen ko e Isuseskere sporedbe baši molitva kola so arakhljona ko Luka 11:8-10, 13. Adathe o Isus ohrabrinela amen „uporno“ te molina amen hem ponadari da te roda lestar sveti duh. Isto agjaar šaj te molina e Jehova te vodinel amen te šaj te ana šukar odluke.

8. Sar ispolningje pe o lafija taro Isaija 30:20, 21 ko purano vreme?

⁸ Čitin Isaija 30:20, 21. Keda o Erusalim sine opkolimo tari Vavilonsko vojska jekh berš tekvaš, i muka so sine e narodo andre ki diz sine doborom normalno sar maro hem pani. Ama sprema 20 hem 21 stiho, o Jehova vetingja e Evreenge kaj ako kainena pe hem ako meninena pumare postapke ov ka spasinel len. O Isaija bašo Jehova vakergja kaj tano lengoro „Najbaro Učiteli“ hem vetingja lenge kaj o Jehova ka sikavel len sar te obožavinen le ko ispravno način. Adala lafija ispolningje pe keda o Evreija sine oslobodime taro ropstvo. O Jehova sikavgja kaj tano lengoro Najbaro Učiteli hem adaleske so vodingja len, ola uspejngje te obnovinen o čačutno obožavibe. But siem radosna so o Jehova amenge da tano Najbaro Učiteli.

9. Kova tano jekh način sar o Jehova vodinela amen avdive?

⁹ Ko akala stihija o Isaija vakerela kaj amen siem sar učenikija kolen so o Jehova sikavela ko duj načinija. Prvo, ov vakerela: „Tle jakhencar ka dikhe tle najbare Učitele“. Ki akaja sporedba o Isaija vakerela kaj o Učiteli tergjola anglo ple učenikija. Bari čest tani amenge te ova sikavde taro Devel. Sar sikavela amen o Jehova? Ov kerela adava preku pli organizacija. But siem blagodarna bašo jasna upatstvija so dobinaja len preku late. O upatstvija  so dobinaja len ko amare sostanokija, kongresija, publikacie, JW Broadcasting^® hem preku but javera načinija pomožinena amenge radosno te istrajna ko akala phare vremija.

10. Ko savo način šunaja „o lafi pali [amende]“?

¹⁰ O Isaija spomningja jekh dujto način sar o Jehova vodinela amen. Ov vakergja: „Tumare kana ka šunen o lafi pali tumende“. Akate o proroko opišinela e Jehova sar vnimatelno učiteli kova so phirela palo ple učenikija hem sikavela lenge o drumo te šaj te vodinel len. Avdive šunaja e Devleskoro glaso palaldan. Sar? E Devleskere lafija sine pišime ki Biblija but vreme angleder, javere lafencar vreme soj pali amende. Znači, keda čitinaja i Biblija adava tano sar te phene amen šunaja e Devleskoro glaso pali amende (Isa. 51:4).

11. So valjani te kera te šaj radosno te istrajna, hem soske?

¹¹ Sar šaj te ovel amen celosno korist taro vodstvo so dela amen o Jehova preku pli organizacija hem plo Lafi? Primetin kaj o Isaija spomningja duj bukja. Prvo vakergja „adava tano o drumo“. Dujto „džan ki leste“ (Isa. 30:21). Nane dovolno samo te džana „o drumo“, valjani isto agjaar te dža ki leste. Preku e Jehovaskoro Lafi hem o način sar leskiri organizacija objasninela adava soj pišimo athe doznajnaja so rodela amendar o Jehova. Isto agjaar sikljovaja sar te primenina adava. Ako mangaja radosno te istrajna ki amari služba, valjani te kera o solduj bukja. Samo tegani ka šaj te ova sigurna kaj o Jehova ka nagradinel amen.

12. Sprema Isaija 30:23-26, save bereketija dengja o Jehova ple narodoske?

¹² Čitin Isaija 30:23-26. Sar ispolningja pe akava proroštvo upro Evreija kola so irangje pe ko Izrael taro Vavilonsko ropstvo? Ola dobingje hem ko fizičko hem ko duhovno pogled but bereketija. O Jehova dengja len but hajbaske. A soj panda považno, dengja len but duhovno hrana džikote obnovinena sine o čisto obožavibe. Nikogaš angleder e Devleskoro narodo na dobingja doborom duhovna bereketija sar ko adava vreme. O 26 stiho sikavela kaj o Jehova dengja len pobari svetlina, javere lafencar pomožingja lenge te haljoven leskoro Lafi (Isa. 60:2). E Jehovaskere bereketija pomožingje lenge ponadari da te služinen leske celo vilea hem te ovel len sila soske sine radosna (Isa. 65:14).

13. Sar o proroštvo bašo obnovibe e čisto obožavibaskoro ispolninela pe ko amaro vreme?

 ¹³ Dali o proroštvo bašo obnovibe o čisto obožavibe ispolninela pe ko amaro da vreme? Oja! Ko savo način? Taro 1919 berš a.e., milionja manuša tane oslobodime taro ropstvo taro Baro Vavilon — o svetsko carstvo e hovavne religijakoro. Ola tane vodime ko jekh but pošukar than tari Vetimi phuv. Vodime tane ko jekh duhovno raj (Isa. 51:3; 66:8). Soj tano akava duhovno raj?

14. Soj tano o duhovno raj, hem koj živinela ki leste? (Dikh o objasnime lafija.)

¹⁴ Taro 1919 berš a.e., e pomazanikon isi len i čest te živinen ko jekh duhovno raj. b Hem sar nakhela sine o vreme, okolen so isi len nadež te živinen ki phuv, „o javera bakhre“, isto agjaar khuvgje ki akaja duhovno phuv hem uživinena ko but bereketija so dela len o Jehova (Jovan 10:16; Isa. 25:6; 65:13).

15. Kote arakhljola o duhovno raj?

¹⁵ Kote šaj avdive te arakha i duhovno phuv, ili o raj? E Jehovaskere sluge živinena ki celi phuv. Znači, o duhovno raj da arakhljola ki celi phuv. Adaleske, bizi razlika kote živinaja, amen šaj te ova delo taro duhovno raj sa džikote aktivno poddržinaja o čačutno obožavibe.

16. Sar šaj ponadari da te dikha kobor šužo tano amaro raj?

¹⁶ Te šaj te ačhova ko akava duhovno raj, maškar o javera bukja so valjani te kera len, mora isto agjaar but te cenina amare phralen. Sar šaj te kera adava? Agjaar so ka koncentririna amen ko lengere šuže osobine, a na ko lengere greške (Jovan 17:20, 21). Soske tano adava važno? Te vakera jekh sporedba. Keda džaja ko parko amen očekujnaja te dikha različna šuže kašta. Slično, ko amare sobranija avdive isi različna ličnostija kola soj tane sar adala kašta (Isa. 44:4; 61:3). Valjani ponadari da te koncentririna amen ko šužipe e „šumakoro“, a na ko maane sekole jekhe „kašteskoro“ soj uzi amende. Na smejnaja te dozvolina amari  ili e javerengiri nesovršenost taro sobranie te čhinavel amen te dikha kobor tano šužo amaro phralipe ko celo sveto.

17. So šaj sekova jekh amendar te kerel te šaj te ovel jekhipe ko sobranie?

¹⁷ Sar šaj sekova jekh amendar te pomožinel te ovel jekhipe? Agjaar so ka kera te ovel mir (Mat. 5:9; Rim. 12:18). Sekova puti keda keraja nešto te šaj te ačhova ko šukar odnos e javerencar taro sobranie, amen pomožinaja o duhovno raj te ovel panda pošužo. Na bistraja kaj o Jehova privlečingja sekole jekhe soj ko akava duhovno raj te obožavinel le ko ispravno način (Jovan 6:44). Zamislin kobor radujnela pe o Jehova keda dikhela kaj daja amendar sa te ikera o mir hem o jekhipe maškar leskere sluge kolen so but ceninela len (Isa. 26:3; Agej 2:7).

18. Bašo so valjani but puti te razmislina, hem soske?

¹⁸ Sar šaj te ovel amen celosno korist taro bereketija so dobinaja len sar e Devleskere sluge? Šaj hor te razmislina bašo adava so proučinaja taro e Devleskoro Lafi hem taro amare publikacie. O proučibe hem o hor razmislibe ka pomožinel amenge te razvina hristijanska osobine kola so ka pottikninen amen te manga „jekh jekhe sar phralja“ hem te poštujna jekh jekheste (Rim. 12:10). Keda razmislinaja bašo bereketija so isi amen akana, adava pomožinela amenge te ova popaše e Jehovaja. Hem keda razmislinaja bašo bereketija so ka del amen ki idnina, adava kerela i nadež te ovel amenge panda porealno. Sa akava ka pomožinel amenge panda avdive radosno te služina e Jehovaske.

19. a) Sprema Isaija 30:18, ko so šaj te ova sigurna? b) So ka pomožinel amenge radosno te istrajna?

¹⁹ O Jehova „ka uštel“ te pomožinel amen keda ka čhivel krajo akale svetoske (Isa. 30:18). Džanaja kaj o Jehova tano pravedno Devel hem kaj ov nane te dozvolinel e Satanaskoro sveto te postojnel ni jekh dive poviše taro adava so valjani (Isa. 25:9). Strplivo adžikeraja o dive keda o Jehova ka oslobodinel amen. Ama džikote na avela adava dive, amen siem odlučna ponadari da te cenina i prednost so isi amen te molina amen, te proučina e Devleskoro Lafi hem te primenina adava hem te razmislina bašo amare bereketija. Keda keraja adava, o Jehova ka pomožinel amenge radosno te istrajna džikote obožavinaja le.