1. Kotar džanaja kaj, keda pomožinaja e manušenge te oven e Hristoseskere učenikija, učestvujnaja ko delo so spasinela životija?

KEDA pomožinaja e manušenge te oven e Hristoseskere učenikija, učestvujnaja ko delo so spasinela životija! Kotar džanaja adava? Keda o Isus dengja i zapoved koja tani pišimi ko Matej 28:19, 20, ov vakergja: „Džan hem keren učenikija... hem krstinen len“. Kobor tano važno o krstibe? Ako mangaja te živina večno, mora te krstina amen. Okola so mangena te krstinen pe valjani te verujnen kaj šaj te oven spasime samo adaleske so o Isus dengja plo životo sar žrtva hem sine voskresnimo. Adaleske o Petar vakergja e phralenge hem e phenjenge: „O krstibe... akana spasinela tumen da... preku o voskresenie e Isus Hristoseskoro“ (1. Pet. 3:21). Sprema akava, keda jekh nevo interesenti krstinela pe, ov šaj te nadinel pe kaj ka živinel večno.

2. Sprema 2. Timotej 4:1, 2, sar valjani te sikava e manušen?

² Te šaj te kera učenikija, valjani šukar te sikava e manušen. (Čitin 2. Timotej 4:1, 2.) Soske? Adaleske so o Isus dengja amen i zapoved: „Džan hem keren učenikija... sikaven len“. O apostol Pavle pottikninela amen te istrajna ko adava, soske agjaar ka spasina hem amen hem okolen so šunena amen. E Pavle sine le šukar pričina keda vakergja: „Pazin šukar... sar sikavea“ (1. Tim. 4:16). Adaleske so amari cel tani te pomožina e manušenge te oven e Hristoseskere učenikija, valjani te sikava len ko najšukar način.

3. So ka dikha ki akaja statija?

 ³ Amen redovno sikavaja milionja manušen bašo čačipa so arakhljona ki Biblija. Ama, sar so dikhlem ki angluni statija, amen mangaja te pomožina poviše dženenge taro akala manuša te krstinen pe. Ki akaja statija, ka dikha panda pandž bukja so sarine amen valjani te kera len te šaj te pomožina e interesentenge te krstinen pe.

4. Soske na valjani te kera but lafi keda sikavaja e interesenten? (Dikh hem i fusnota.)

⁴ Amen mangaja o bibliska čačipa. Adaleske šaj mangaja but te kera lafi e manušencar baši lende. Ama, bizi razlika dali vodinaja o Proučibe i Stražarsko kula, o Proučibe i Biblija ki dvorana ili biblisko kursi, na valjani te kera but lafi. Adaleske so amari cel tani te sikava e manušen tari Biblija, valjani te sikava samokontrola hem te na vakera e interesenteske sa so džanaja bašo nesavo biblisko stiho ili nesavi tema * (Jovan 16:12). Razmislin kobor bukja pendžarea sine tari Biblija keda krstingjan tu hem kobor džanea akana. Tegani šaj haliljan samo o osnovna bibliska čačipa (Evr. 6:1). Valjangje tuke berša te sikljove adava so džanea akana. Adaleske ma trudin tut taro jekh puti te sikave e interesente sa adava so džanea.

5. a) Sprema 1. Solunjanite 2:13, so mangaja te pomožina e interesenteske te haljovel? b) Sar šaj te pottiknina e interesente te kerel poviše lafi džikote proučinaja lea?

⁵ Mangaja o interesenti te haljovel kaj adava so sikljovela tano taro e Devleskoro Lafi. (Čitin 1. Solunjanite 2:13.) Sar šaj te kera adava? Džikote proučinena, ohrabrin le te kerel lafi bašo adava so sikljola. Namesto sekogaš te objasnine leske o bibliska stihija, puč le ov te vakerel sar halilo o stiho. Pomožin le te haljovel sar lično leske tano korisno e Devleskoro Lafi. Puč le pučiba te šaj te dikhe sar haljovela o stihija so čitinela len hem sar vlijajnena upri leste (Luka 10:25-28). Na primer, puč le: „Sar akava stiho pomožinela tuke te dikhe jekh taro e Jehovaskere osobine?“ „Sar šaj te pomožinen tuke o bukja so sikliljan len akana tari Biblija?“ „So mislinea bašo adava so sikliljan?“ (Izr. 20:5). Nane najvažno kobor džanela o interesenti baši Biblija, nego dali mangela hem dali primeninela adava so sikljovela.

6. Soske tano šukar te la amencar poiskusna objavitelen keda proučinaja nekasaja?

⁶ Keda proučinea nekasaja, dali nekogaš  lea tuja poiskusna objavitelen? Ako kerea adava, šaj te puče len dali šukar sikavea e interesente hem dali šukar koristinea i Biblija. Mora te ove ponizno ako mangea te ove pošukar keda sikavea e javeren (Sporedin Dela 18:24-26.) Isto agjaar, puč e poiskusno objavitele dali, sprema leste, o interesenti haljovela šukar adava so sikljola. Šaj hem te puče le dali šaj te proučinel e interesentea jekh ili duj kurke keda tu na sian adathe. Agjaar o interesenti ka šaj redovno te proučinel hem ka haljovel kobor tano važno adava. Ma mislin kaj ov tano „tlo“ interesenti hem kaj nikoj javer našti te proučinel lea osven tu. Adaleske so o šukaripe e interesenteskoro tano tuke najvažno taro sa, tu mangea te kere sa so šaj te pomožine leske te sikljovel bašo čačipe bizo te čhinavel.

7. So ka pomožinel e interesenteske te mangel adava so sikljola?

⁷ O interesenti valjani te dikhel kaj mangea o čačipa tari Biblija hem kaj verujnea ki lende (1. Sol. 1:5). Tegani leske da ka ovel pointeresno adava so sikljola. Ko nesave prilike šaj te vakere leske nesave konkretna bibliska načelija so pomožingje lično tuke. Agjaar ka haljol kaj ki Biblija isi praktična sovetija so šaj te pomožinen leske da.

8. So šaj javer te kere te šaj te pomožine e interesenteske, hem soske tano šukar te kere adava?

⁸ Džikote proučinea e interesentea vaker leske bašo nesave phralja hem phenja so sine len slična problemija sar leskere hem uspejngje te nakhaven len. Keda džaja ki leste šaj te le tuja nekas taro sobranie so ka vakerel leske sar i Biblija pomožingja leske lično. Isto agjaar, šaj te arakhe ohrabruvačka iskustvija ki jw.org ki rubrika „I Biblija meninela životija“. * Asavke statie hem videoklipija šaj te pomožinen e interesenteske te haljol kobor tano mudro te primeninel o bibliska načelija ko plo životo.

9. Sar šaj te ohrabrine e interesente te vakerel ple familijake ili amalenge adava so sikljola?

⁹ Ako o interesenti tano ko brako, dali leskoro bračno partneri isto agjaar proučinela i Biblija? Ako na, vaker e bračno partnereske kaj ov da šaj te bešel tumencar keda proučinena. Ohrabrin e interesente te vakerel ple familijake ili amalenge  adava so sikljola (Jovan 1:40-45). Sar? Šaj ednostavno te puče le: „Sar bi objasninea sine akava nekaske tari tli familija?“ ili „Kova biblisko stiho bi šaj te koristine te šaj te dokažine adava jekhe amaleske?“ Ko asavko način ka pomožine e interesenteske jekh dive ov da te sikavel e javeren. Palo adava, keda ka ispolninel o uslovija, šaj te počminel te džal ki služba sar nekrsteno objaviteli. Šaj te puče e interesente dali džanela nekas so mangela te proučinel i Biblija. Ako oja, odma kontaktirin adale manuše hem nudin leske te proučine lea i Biblija. Sikav leske o videoklipi Sar šaj te sikljove tari Biblija? *

10. Sprema 1. Solunjanite 2:7, 8, sar šaj te dža palo e Pavleskoro primer?

¹⁰ Mora te sikava kaj iskreno grižinaja amen okolenge kasaja so proučinaja. Valjani te dikha ki lende sar amare idna phralja hem phenja. (Čitin 1. Solunjanite 2:7, 8.) Sigurno nane lenge lokho te otkažinen pe taro amala so isi len ko sveto hem te keren sa o potrebna promene te šaj te služinen e Jehovaske. Adaleske valjani te pomožina lenge te arakhen peske čačutne amala ko sobranie. Ov amal e interesentea agjaar so ka nakhave lea vreme na samo keda proučinena, nego ko javera da prilike. Ako javinea tut leske ko telefoni, ako bičhalea leske jekh poraka ili ako džaja kratko ki leste ko javer da vreme, ka sikave kaj čače grižinea tut leske.

11. So valjani te arakhen o interesentija ko sobranie, hem soske?

¹¹ Jekh izreka vakerela: „Valjani celo gav te šaj te bajrarel pe jekhe čhave“. Amen šaj te vakera: „Valjani celo sobranie te šaj nekoj te ovel e Isuseskoro učeniko“. Adaleske valjani te pomožina e interesentenge te zapoznajnen e javeren ko sobranie, kola so ka pomožinen lenge te oven popaše e Jehovaja. Agjaar ka ovel len prilika te družine pe e Jehovaskere narodoja kova so šaj te pomožinel lenge ko duhovno hem ko emocionalno pogled. Mangaja sekova interesenti te haljol kaj siem bahtale soj tano amencar hem kaj tano delo tari amari duhovno familija. Isto agjaar, mangaja te osetinel pe šukar ko amaro hristijansko phralipe ko kova so isi mangipe. Tegani ka ovel leske polokho te čhinavel te družinel pe e manušencar so nane te pomožinen leske te mangel e Jehova (Izr. 13:20). Ako leskere purane amala izbeginena le, ov ka džanel kaj šaj te arakhel peske čačutne amala ki e Jehovaskiri organizacija (Mar. 10:29, 30; 1. Pet. 4:4).

12. Soske valjani te vakera e interesenteske kobor tano važno te del lafi e Jehovaske kaj ka služinel leske hem te krstinel pe?

¹² Ker lafi otvoreno e interesentea bašo adava kobor tano važno te del lafi e Jehovaske kaj ka služinel leske hem te krstinel pe. Ustvari, amari glavno pričina soske proučinaja lea tani jekh dive ov da te ovel e Isuseskoro krstimo učeniko. Otkeda nekobor masekija redovno ka proučina e interesentea, a posebno keda ka počminel te avel ko sostanokija, ov valjani te haljol kaj mangaja te pomožina leske te služinel e Jehovaske hem te ovel leskoro Svedoko.

13. Kola bukja valjani te kerel o interesenti te šaj te krstinel pe?

¹³ Isi nekobor bukja so jekh interesenti valjani te kerel ako mangela te krstinel pe. Sar prvo, valjani te pendžarel e Jehova, te mangel le hem te ovel le vera ki leste (Jovan 3:16; 17:3). Palo adava, o interesenti valjani te ovel amal e Jehovaja hem e phralencar hem e phenjencar ko sobranie (Evr. 10:24, 25; Jak. 4:8). Sar so nakhela o vreme, o interesenti čhinavela te kerel bukja so na mangela len o Devel hem kainela pe bašo lošna bukja so kergja len (Dela 3:19). Osven adava, leskiri vera ka pottikninel le te kerel lafi e javerencar bašo čačipe (2. Kor. 4:13). Ko krajo, dela lafi e Jehovaske kaj ka služinel leske hem krstinela pe ko pani (1. Pet. 3:21; 4:2). Adava tano but radosno dive sarinenge! Džikote o interesenti kerela akala bukja te šaj te krstinel pe, često pofalin le hem ohrabrin le ponadari da te kerel akala bukja.

14. Sar šaj te dikhe dali jekh interesenti duhovno napredujnela?

¹⁴ Valjani te ova strpliva keda pomožinaja e interesenteske te pherel o uslovija te krstinel pe. Ama, valjani te dikha dali isi le želba te služinel e Jehovaske. Dali dikhea kaj trudinela pe te šunel e Isuseskere zapovedija ili samo mangela te džanel interesna bukja tari Biblija?

15. So ka sikavel dali o interesenti tano spremno krstibaske?

¹⁵ Redovno razmislin bašo adava sar napredujnela o interesenti. Na primer, dali vakerela so osetinela bašo Jehova? Dali molinela pe leske? (Ps. 116:1, 2). Dali uživinela džikote čitinela i Biblija?  (Ps. 119:97). Dali redovno džala ko sostanokija? (Ps. 22:22). Dali kerela o potrebna promene ko plo životo? (Ps. 119:112). Dali počmingja te kerel lafi ple familijaja ili ple amalencar bašo adava so siklilo? (Ps. 9:1). A najvažno taro sa, dali mangela te ovel e Jehovaskoro svedoko? (Ps. 40:8). Ako o interesenti na kerela promene ko nesave taro akala bukja, trudin tut taktično te doznajne koja tani i pričina, a palo adava ker lea lafi ko jekh ljubezno ama otvoreno način. *

16. Keda valjani te čhinave te proučine nekasaja?

¹⁶ Te šaj te procenine dali valjani ponadari da te proučine e interesentea, redovno puč tut: „Dali o interesenti spreminela pe bašo proučibe? Dali mangela te avel ko sostanokija? Dali panda isi le lošna navike? Dali panda tano členi tari nesavi hovavni religija?“ Ako o odgovor tano oja, ponadari da te proučinel pe asavke manušea, tano sar te sikave te plivinel nekas so na mangela te sapangjovel! Ako o interesenti na ceninela adava so sikljola hem na mangela te kerel promene, dali vredinela ponadari da te proučine lea?

17. Sprema 1. Timotej 4:16, so mora sarine amen te kera?

¹⁷ Adaleske so seriozno haljovaja e Isuseskiri zapoved te kera učenikija, mangaja te da sa amendar te šaj te pomožina e interesentenge te krstinen pe. Adaleske keda sikavaja len koristinaja i Biblija hem siem vooduševime hem uverime džikote keraja adava. Ohrabrinaja len te arakhen peske amala ko sobranie. Isto agjaar, pomožinaja lenge te čhiven peske cel te den lafi e Jehovaske kaj ka služinen leske hem te krstinen pe, hem redovno razmislinaja sar napredujnena ko duhovno pogled. (Dikh i ramka „ Sar šaj te pomožine e interesenteske te krstinel pe“.) But siem bahtale so šaj te učestvujna ko akava propovedničko delo so spasinela životija! Te ova odlučna te da sa amendar te šaj te pomožina e interesentenge te ispolninen o uslovija te krstinen pe.