1. Soske but manuša tane bunime?

AVDIVE isi but religie so vakerena kaj tane hristijanska hem kaj obožavinena e Devle ko ispravno način. Adaleske na siem iznenadime so but manuša tane bunime! Ola pučena pe: Dali isi samo jekh čačutni religija ili sa o religie tane prifatliva e Devleske? Dali lično siem uverime kaj sar e Jehovaskere svedokija sikavaja o čačipe, hem kaj amaro obožavibe tano o edinstveno način so prifatinela le o Jehova? Šaj li čače te ova sigurna ko adava? Te dikha akana o jasna dokazija.

2. Sprema 1. Solunjanite 1:5, soske o Pavle sine uverimo kaj arakhlja o čačipe?

² O Pavle sine but uverimo kaj arakhlja o čačipe. (Čitin 1. Solunjanite 1:5.) Leskoro veruvanje na temelinela pe sine ko čuvstvija, nego ov hor proučinela sine e Devleskoro Lafi. Ov verujnela sine kaj „celo lil avela taro Devel“ (2. Tim. 3:16). Hem so doznajngja? Ko spisija o Pavle arakhlja jasna dokazija kaj o Isus sine o vetimo Mesija, dokazija so o evrejska religiozna vodačija otfrlingje. Akala licemerna vodačija vakerena sine kaj sikavena e manušen o čačipe bašo Devel, a ustvari kerena sine bukja so o Devel mrzinela len (Tit 1:16). Različno lendar, o Pavle na birinela sine ko kola delija taro e Devleskoro Lafi ka verujnel. Ov sine spremno te sikavel hem „celosno te kerel e Devleskiri volja“ (Dela 20:27).

3. Dali valjani te ovel amen o odgovorija ko sa o pučiba te šaj te ova cvrsto uverime? (Dikh isto agjaar i ramka „ E Jehovaskere delija hem misle — ’doborom but so našti te gejnen pe‘“.)

 ³ Nesave mislinena kaj i čačutni religija mora te odgovorinel ko sa o pučiba, čak ko adala pučiba kolenge so nane odgovor ki Biblija. Dali šaj te očekujna nešto asavko? Te dikha e Pavleskoro primer. Ov pottikningja e hristijanen te „ispitinen sa“ te šaj te uverinen pe kaj adava tano čače, ama ov isto agjaar priznajngja kaj isi but bukja so ov na haljola len sine (1. Sol. 5:21). Ov vakergja kaj na džanaja sa „soske akana dikhaja liko ki ajna koja so na dela jasno slika“ (1. Kor. 13:9, 12). O Pavle na halilo sa hem amen da na haljovaja sa. Ama ov halilo o osnovna čačipe bašo Jehova. Ov džanela sine dovolno te šaj te ovel uverimo kaj arakhlja o čačipe!

4. Sar šaj te ova panda pouverime kaj amen arakhlem o čačipe, hem so ka dikha bašo čačutne hristijanja?

⁴ Jekh način sar šaj te ova panda pouverime kaj arakhlem o čačipe tano ako sporedinaja e Isuseskoro obožavibe adalea so kerena e Jehovaskere svedokija avdive. Ki akaja statija, ka dikha kaj o čačutne hristijanja 1) otfrlinena o idolopoklonstvo, 2) poštujnena e Jehovaskoro anav, 3) mangena o čačipe hem 4) vilestar mangena pe.

5. So sikljovaja taro Isus bašo adava sar valjani te obožavina e Devle, hem sar šaj te primenina adava so ov sikavgja amen?

⁵ Adaleske so o Isus but mangela e Jehova, sar ko nebo agjaar ki Phuv, obožavinela sine samo le (Luka 4:8). Ov sikavgja ple sledbenikon te keren o isto. Ni o Isus ni leskere verna učenikija na koristingje likija ko pumaro obožavibe. Adaleske so o Devel tano duho, nikoj našti te kerel nešto so ličinela sar leste (Isa. 46:5). Ama so  ako nekoj kerela likija taro manuša so mislinela kaj tane svetcija hem molinela pe lenge? Ki dujto taro deš zapovedija o Jehova vakergja: „Ma ker tuke rezbimo liko ni bilo so javer so ličinela sar adava so isi upre ko nebo ili tele ki phuv. Na smejnea te klanjine tut lenge“ (2. Moj. 20:4, 5). Okola so mangena te keren e Devleskiri volja haljovena kaj ov na mangela ola te obožavinen javere idolen.

6. Palo kaskoro primer džana e Jehovaskere svedokija avdive keda kerela pe lafi bašo obožavibe?

⁶ O istoričarija vakerena kaj o prva hristijanja obožavinena sine samo e Devle. Na primer, o lil Istorija e hristijansko crkvakiri vakerela kaj o prva hristijanja na bi prifatinena sine i ideja te koristinen pe likija ko thana obožavibaske. Avdive, e Jehovaskere svedokija džana palo primer e hristijanengoro taro prvo veko. Amen na molinaja amen anglo likija taro „svetcija“ ili angelija, na molinaja amen čak ni e Isuseske. Na pozdravinaja o zname hem na keraja ništo so ka sikavel kaj obožavinaja bilo savi država. Bizi razlika sar ka reagirinen o javera, amen siem odlučna te šuna e Isuseskere lafija: „E Jehova tle Devle obožavin le hem samo leske služin“ (Mat. 4:10).

7. Kola razlike isi maškar e Jehovaskere svedokija hem o javera religie?

⁷ Avdive nesave religiozna vodačija tane poznata ili but vlijatelna, adaleske but manuša mangena te sledinen len. Ola tane doborom vooduševime lendar so dikhena ki lende sar devela. Džana ko lengere crkve, kinena lengere lila, hem dena but pare lenge ili e organizacienge kola so ola poddržinena len. Nesave verujnena ko sekova lafi so ka vakeren. Ola tane doborom vooduševime lendar sar ka phene dikhena e Isuse angli peste. Ama okola so obožavinena e Jehova ko ispravno način na džana palo manuša. Iako poštujnaja okolen so predvodinena, amen prifatinaja adava so o Isus sikavgja amen: „Sarine tumen sien phralja“ (Mat. 23:8-10). Na obožavinaja e manušen, bizi razlika dali tane religiozna vodačija ili politička vladetelija. Hem na poddržinaja lengere aktivnostija hem celija. Namesto adava, amen siem neutralna hem odvojme taro sveto. Ko sa akava amen siem but porazlična taro sa o javera religie so vakerena kaj tane hristijanska (Jovan 18:36).

8. Kotar džanaja kaj o Jehova mangela leskoro anav te ovel proslavimo hem sarine te džanen le?

⁸ Ki jekh prilika o Isus molingja pe: „Mo Dad proslavin tlo anav“. O jehova lično odgovoringja taro nebo ki adaja molitva hem vetingja kaj ka proslavinel plo anav (Jovan 12:28). Džikote sine ki Phuv, o Isus proslavingja ple Dadeskoro anav (Jovan 17:26). Adaleske, razumno tano te očekujnel pe kaj e čačutne hristijanenge tano čest te koristinen e Devleskoro anav hem te vakeren le e javerenge.

9. Sar o hristijanja taro prvo veko sikavgje kaj poštujnena e Devleskoro anav?

⁹ Ko prvo veko a.e., kratko otkeda sine kerdo o hristijansko sobranie, o Jehova „počmingja te khedel manušen taro javera narodija so ka phiraven leskoro anav“ (Dela 15:14). Adale hristijanenge sine bari prednost so šaj sine te koristinen e Devleskoro anav hem te vakeren le e javerenge. Ola koristinena sine e Devleskoro anav ki služba hem keda pišinena sine o bibliska lila. * Agjaar, ola sikavgje kaj  tane narodo bašo e Devleskoro anav (Dela 2:14, 21).

10. Save dokazija isi kaj e Jehovaskere svedokija tane narodo bašo e Jehovaskoro anav?

¹⁰ Dali e Jehovaskere svedokija tane narodo bašo e Jehovaskoro anav? Te dikha o dokazija. Avdive but religiozna vodačija kergje sa samo te šaj te garaven e Devleskoro lično anav. Ola cidingje le taro pumare bibliska prevodija, a ko nesave slučaija zabraningje te koristinel pe ko lengere crkve. * Jasno tano kaj samo e Jehovaskere svedokija poštujnena e Devleskoro anav sar so valjani. Amen najviše keraja e javerencar lafi bašo e Devleskoro anav tari bilo koja javer religiozno grupa. Adaleske, daja amendar sa, te šaj te živina sprema amaro anav — Jehovaskere svedokija (Isa. 43:10-12). Pečatingjem poviše taro 240 milionja primerokija taro Prevod Nov svet e Biblijakoro, kova so koristinela e Jehovaskoro anav ko thana kotar so o javera prevodija cidingje le. Isto agjaar, isi amen bibliska publikacie kola so koristinena e Jehovaskoro anav ko poviše taro milja čhibja.

11. Sar o hristijanja taro prvo veko sikavgje kaj mangena o čačipe?

¹¹ O Isus mangela sine o čačipe, javere lafencar o čačipe bašo Devel hem baši leskiri namera. Ov živingja sprema adava  čačipe, hem vakergja le e javerenge (Jovan 18:37). E Isuseskere sledbenikija isto agjaar but mangle o čačipe (Jovan 4:23, 24). Ustvari, o apostol Petar bašo hristijanstvo vakergja kaj tano o „drumo e čačipaskoro“ (2. Pet. 2:2). Adaleske so but mangena sine o čačipe, o hristijanja taro prvo veko otfrlingje o religiozna idee, tradicie hem o lično mislenje kola so na sine sprema o čačipe (Kol. 2:8). Slično, avdive o čačutne hristijanja trudinena pe te živinen sprema o čačipe agjaar so pazinena lengoro veruvanje hem o način sar živinena te temelinel pe ko e Devleskoro Lafi (3. Jov. 3, 4).

12. So slučinela pe keda o vodečko telo haljovela kaj valjani te kerel promene ko nesavo haljojbe, hem soske kerela akala promene?

¹² E Jehovaskere svedokija na vakerena kaj ola sekogaš celosno haljovena sa tari Biblija. Ponekogaš, kergje greške ko način sar objasningje nesavo biblisko sikljojbe ili ko način sar organiziringje o sobranija. Ama adava na valjani te iznenadinel amen. I Biblija vakerela kaj leskoro narodo ka haljol pošukar o čačipe sar so ka nakhel o vreme (Kol. 1:9, 10). O Jehova otkrinela o čačipe hari pohari hem valjani strplivo te adžikera i svetlina e čačipaskiri te ovel sa posilno (Izr. 4:18). Keda o vodečko telo haljovela kaj valjani te kerel pe promena ko nesavo haljojbe ili ko način sar kerena pe sine nesave bukja, ola odma kerena adaja promena. But crkve avdive kerena promene ko ple sikljojba te šaj te ugodinen e manušenge hem te oven popaše e svetoja. Ama e Jehovaskere svedokija kerena promene te šaj te oven popaše e Devlea hem te obožavinen le isto sar so obožavingja le o Isus (Jak. 4:4). Amen na keraja promene adaleske so o manuša taro sveto meningje plo stavi, nego adaleske so haljovaja pošukar i Biblija. Amen mangaja o čačipe! (1. Sol. 2:3, 4).

13. Koja tani i najvažno osobina e čačutne hristijanengiri, hem sar sikavena la e Jehovaskere svedokija avdive?

¹³ Taro sa o osobine so sine e hristijanen ko prvo veko, i najpendžardi osobina so sine len sine o mangipe. O Isus vakergja: „Taro adava sarine ka džanen kaj sien mle učenikija, ako isi tumen mangipe maškar tumende“ (Jovan 13:34, 35). Avdive e Jehovaskere svedokija taro celo sveto uživinena ko čačutno mangipe hem jekhipe. Nijekh javer organizacija nane sar amende doborom paše. Amen siem sar jekh familija, iako avaja tari različno kultura ili rasa. Adava dikhela pe ko amare kongresija hem sostanokija. Akava pomožinela amenge panda poviše te ova uverime kaj obožavinaja e Jehova ko jekh prifatlivo način.

14. Sprema Kološanite 3:12-14, kova tano jekh važno način sar šaj te sikava baro mangipe jekh jekheske?

¹⁴ I Biblija pottikninela amen: „Te ovel tumen baro mangipe jekh jekheske“ (1. Pet. 4:8). Jekh način sar sikavaja asavko mangipe tano agjaar so prostinaja amenge hem trpinaja amen jekh jekhea. Isto agjaar, rodaja prilike te sikava darežlivost hem gostoprimlivost sarinenge ko sobranie, čak okolenge kola so šaj povredingje amen. (Čitin Kološanite 3:12-14.) Asavko mangipe tano čače o najbaro dokaz bašo čačutne hristijanja.

15. Ko save javera načinija amaro obožavibe tano sar e prva hristijanengoro?

¹⁵ Ko javera da načinija amen obožavinaja e Jehova sar o hristijanja taro prvo veko.  Na primer, organizirime siem ko slično način sar adala hristijanja, isi amen pokrainska nadglednikija, starešine hem sluga pomošnikija (Fil. 1:1; Tit 1:5). Hem sar lende, amen da poštujnaja e Jehovaskere zakonija bašo seks hem brako, baši svetost e rateskiri hem mangaja te zaštitina o sobranie taro grešnikija so na kainena pe (Dela 15:28, 29; 1. Kor. 5:11-13; 6:9, 10; Evr. 13:4).

16. So sikljovaja taro lafija so arakhljovena ko Efešanite 4:4-6?

¹⁶ O Isus vakergja kaj but džene ka vakeren kaj tane leskere učenikija, ama nane sarine te oven čačutne hristijanja (Mat. 7:21-23). I Biblija isto agjaar vakerela kaj ko posledna dive but džene samo lafencar ka vakeren kaj „darana taro Devel“ (2. Tim. 3:1, 5). Ama e Devleskoro Lafi jasno vakerela amenge kaj isi samo „jekh vera“ koja soj prifatimi taro Devel. (Čitin Efešanite 4:4-6.)

17. Koj džala palo Isus avdive hem živinela sprema i čačutni vera?

¹⁷ Koj živinela sprema i čačutni vera avdive? Dikhlem o dokazija. Kergjem lafi bašo primer obožavibaske kova so mukhlja le o Isus hem palo kova so gele o prva hristijanja. Isi samo jekh odgovor, adala tane e Jehovaskere svedokija. Koja bari čest isi amen so siem delo taro e Jehovaskoro narodo, hem so džanaja o čačipe bašo Jehova hem baši leskiri namera. Adaleske, ponadari da ov cvrsto uverimo kaj arakhljan o čačipe.