1. Koja tani amari duhovno potreba, hem sar adava tano povrzimo e bahtalipaja?

 O ČAČUTNO bahtalipe nane samo šukar čuvstvo kova so sigate nakhela, nego šaj te trajnel celo životo. Soske vakeraja agjaar? O Isus objasningja akava ki pli Propoved ki gora. Ov vakergja: „Bahtale tane okola soj svesna kaj valjani lenge o Devel“ (Mat. 5:3). O Isus džanlja kaj o manuša tane agjaar stvorime te ovel len bari želba te pendžaren hem te obožavinen ple Stvoritele, e Jehova. Hem adaleske so o Jehova tano „bahtalo Devel“, okola so obožavinena le isto agjaar šaj te oven bahtale (1. Tim. 1:11).

2-3. a) Sprema e Isuseskere lafija koj javer šaj te ovel bahtalo? b) Bašo so ka kera lafi ki akaja statija, hem soske valjani te kera lafi bašo adava?

² Dali valjani te ovel amenge sa šukar ko životo te šaj te ova bahtale? Na. Ki Propoved ki gora o Isus vakergja nešto interesno. Čak „okola so tugujnena“ — adaleske so osetinena pe kriva bašo nesave grevija ili adaleske so isi len problemija — šaj te oven bahtale. O Isus isto agjaar phengja okola da soj progonime hem vredžime adaleske soj leskere učenikija šaj isto agjaar te oven bahtale (Mat. 5:4, 10, 11). Ama sar šaj nekoj te ovel čače bahtalo ko asavke okolnostija?

³ O Isus manglja te vakerel kaj o bahtalipe na zavisinela taro adava dali isi amen idealna uslovija ko životo,  nego kaj ka ova čače bahtale ako zadovolinaja amare duhovna potrebe hem ako ovaja paše e Devlea (Jak. 4:8). Sar šaj te uspejna ko adava? Ki akaja statija ka dikha trin bukja kola so valjani te kera te šaj te ova čače bahtale.

4. Kova tano o prvo čekori so valjani te kera te šaj te ova čače bahtale? (Psalm 1:1-3).

⁴ 1. ČEKORI: Te šaj te ova čače bahtale mora te hranina amen ko duhovno pogled. Hem o manuša hem o životne valjani te han te šaj te preživinen ama samo o manuša šaj duhovno te hraninen pe. Hem adava tano potrebno. Adaleske o Isus vakergja: „O manuš na valjani te živinel samo taro maro, nego taro sekova lafi so ikljola taro e Jehovaskoro muj“ (Mat. 4:4). Adaleske na valjani te dozvolina te nakhel nijekh dive bizo te čitina e Devleskoro skapoceno Lafi, i Biblija. O psalmisti vakergja: „Bahtalo tano o manuš so uživinela ko e Jehovaskoro zakoni hem čitinela le dive hem rat“. (Čitin Psalm 1:1-3.)

5-6. a) So šaj te sikljova tari Biblija? b) Sar ka pomožinel amenge adava so ka čitina i Biblija?

⁵ Adaleske so o Jehova mangela amen ov mukhlja ki Biblija te oven pišime važna informacie bašo adava so valjani te kera te šaj te ovel amen bahtalo životo. Ki late šaj te čitina koja tani leskiri namera amencar, doznajnaja sar šaj te ova lea paše hem so valjani te kera te šaj te prostinel amare grevija. Isto agjaar, doznajnaja baši but šuži nadež koja so vetingja la amenge (Erem. 29:11). Akala čačipa so sikljovaja len džikote proučinaja i Biblija kerena amen but bahtale.

 ⁶ Džanaja kaj ki Biblija isto agjaar isi but praktična sovetija bašo sekojdnevno životo. Keda šunaja adala sovetija šaj te ova bahtale. Sekogaš keda sian razočarimo taro problemija odvojn tuke vreme poviše te čitine i Biblija hem razmislin bašo adava so čitinea. O Isus vakergja: „Bahtale tane okola so šunena e Devleskoro lafi hem ikerena le“ (Luka 11:28).

7. Sar šaj najšukar te koristine o vreme keda čitinea i Biblija?

⁷ Keda čitinea e Devleskoro Lafi, ma sigjar uživin ko adava so čitinea. Te vakera jekh primer kova so verojatno poviše dženenge slučingja pe. Šaj nekoj khere spremingja tuke tlo omileno hajbe. Ama šaj adaleske so sigjarea ili sian preukopirimo mislencar sigate haja bizo te uživine ko sekova zalago so lea. Otkeda završingjan e hajbaja haliljan kaj but sigate haljan hem bi mangea te ha sine popohari te šaj te uživine. Nešto slično šaj te slučinel pe keda čitinaja i Biblija. Ponekogaš doborom sigate čitinaja la so nane amen vreme te uživina ko lakoro haberi. Odvojn tuke vreme te šaj te uživine džikote čitinea i Biblija. Ker tuke slika ki godi, zamislin tuke o glasija taro bibliska ličnostija hem razmislin bašo adava so čitingjan. Ako kerea akava, ka ove pobahtalo.

8. Sar „o verno hem razborito robo“ kerela pli zadača? (Dikh hem i fusnota.)

⁸ O Isus čhivgja „e verno hem razborito robo“ te del duhovno hrana ko pravo vreme, hem adaleske isi amen but duhovno hrana * (Mat. 24:45). I Biblija tani i glavno sostojka koja so koristinela o Verno robo ki sekoja publikacija (1. Sol. 2:13). Akaja duhovno hrana pomožinela amenge te džana sar razmislinela o Jehova. Adaleske čitinaja i Stražarsko kula hem Džangavgjoven! hem o statie so arakhljovena ki amari internet-stranica, spreminaja amen bašo amare sostanokija hem sekova masek dikhaja i emisija taro JW Broadcasting^®, ako tani dostapno. Ako šukar hraninaja amen ko duhovno pogled tegani ka šaj te kera o dujto čekori so ka ingarel amen dži ko bahtalipe.

9. Kova tano o dujto čekori so ingarela dži ko čačutno bahtalipe?

⁹ 2. ČEKORI: Te šaj te ova čače bahtale valjani te živina sprema e Jehovaskere merilija. O psalmisti pišingja: „Bahtalo tano sekoj so darala taro Jehova hem džala palo leskere drumija“ (Ps. 128:1). Te dara taro Jehova značinela te poštujne le doborom so nane te kere nešto kolea so šaj te razočarine le (Izr. 16:6). Adaleske, na čhinavaja te da amendar sa te šaj te živina sprema e Jehovaskere merilija bašo ispravno hem pogrešno kola soj tane pišime ki Biblija (2. Kor. 7:1). Ka ova bahtale ako keraja o bukja so mangela o Jehova hem ako otfrlinaja adava so ov mrzinela (Ps. 37:27; 97:10; Rim. 12:9).

10. Osven so valjani te džana soj tani e Devleskiri volja, so javer valjani te kera? (Rimjanite 12:2).

¹⁰ Čitin Rimjanite 12:2. Nekoj šaj džanela kaj e Jehova isi le pravo te odlučinel soj ispravno a soj pogrešno ama adava nane dovolno, ov mora isto agjaar te prifatinel adala merilija ko plo životo. Na primer, jekh manuš šaj džanela kaj e vlada isi la pravo te odredinel kole brzinaja tano dozvolimo te vozinel pe. Ama šaj nane spremno te prifatinel adala pravilija hem adaleske vozinela poviše tari dozvolimi brzina. Znači, taro amare postapke  dikhela pe dali čače verujnaja kaj e Jehovaskere merilija tane najšukar amenge (Izr. 12:28). O David džanlja akava hem adaleske vakergja: „Ka de man te pendžarav o drumo e životoskoro. But sium bahtalo keda tergjovava angli tute hem ko tlo desno vas isi večno bahtalipe“ (Ps. 16:11).

11-12. a) Keda isi amen problemija ili siem obeshrabrime ko so valjani te pazina? b) Sar šaj o lafija taro Filipjanite 4:8 te pomožinen amenge keda birinaja zabava?

¹¹ Keda isi amen problemi ili siem razočarime, šaj mangaja te kera nešto kolea so ka cida amendar adava problemi te šaj te na sekirina amen više. Adava tano normalno, ama mora te pazina te na kera nešto so o Jehova mrzinela (Ef. 5:10-12, 15-17).

¹² Ko plo pismo dži ko Filipjanja o apostol Pavle pottikningja e hristijanen ponadari da te razmislinen bašo sa soj „pravedno... čisto... vredno mangipaske... [hem] sa soj šukar“. (Čitin Filipjanite 4:8.) Iako o Pavle akate na pišingja konkretno baši zabava ama akava valjani but te vlijajnel upro adava savi zabava birinaja. Razmislin dali o gilja so šunea, o filmija so dikhea, o lila so čitinea hem o videoigre so khelea tane ko sklad e lafencar so vakergja len o Pavle. Akava ka pomožinel tuke te haljove soj tano prifatlivo e Devleske a so nane (Ps. 119:1-3). Amen mangaja te živina sprema e Jehovaskere uče merilija. Tegani ka ovel amen čisto sovest hem ka šaj te kera o sledno čekori so ingarela dži ko čačutno bahtalipe (Dela 23:1).

13. Kova tano o trito čekori so ingarela amen dži ko bahtalipe? (Jovan 4:23, 24).

¹³ 3. ČEKORI: De tutar sa te šaj i služba bašo Jehova te ovel tuke ko prvo than. Adaleske so o Jehova stvoringja amen ov zaslužinela te obožavina le (Otk. 4:11; 14:6, 7). Znači, i najvažno buti ko amaro životo valjani te ovel te obožavina e Jehova ko način ov sar so mangela, „duhoja hem čačipaja“. (Čitin Jovan 4:23, 24.) Amen dozvolinaja o sveti duh te vodinel amen te šaj amaro obožavibe te ovel sprema o čačipe so arakhljola ko e Devleskoro Lafi. O obožavibe valjani te ovel amenge ko prvo than čak ako živinaja ki phuv kote so amare aktivnostija tane ograničime ili zabranime. Ko akava momenti poviše taro 100 phralja hem phenja tane phanle ko zatvor adaleske soj tane e Jehovaskere svedokija. * Čak ko asavke okolnostija tane bahtale hem kerena sa so šaj te molinen pe, te proučinen hem te vakeren e javerenge bašo e Devleskoro Carstvo. Keda o manuša kritikujnena amen ili progoninena amen šaj te ova bahtale soske džanaja kaj o Jehova tano amencar hem kaj ov ka nagradinel amen (Jak. 1:12; 1. Pet. 4:14).

14. So slučingja pe jekhe phraleske taro Tadžikistan hem soske?

¹⁴ Nesave phralen hem phenjen sine len but phare okolnostija ama ola ačhile bahtale soske kergje o trin čekorija kola so dikhlem len. O Jovidon Bobojonov, jekh phral taro Tadžikistan, keda sine le 19 berš odbingja te džal ki vojska. Adaleske ko 4 oktomvri 2019 berš silaja lele le kheraldan hem čhivgje le ko zatvor štar masek hem ponašingje pe lea sar kriminalco. Nekobor phuvja ki televizija izvestingje baši akaja nepravda. Sine izvestimo kaj margje le te šaj te keren leske pritisok te  del zakletva hem te uravel uniforma. Palo adava, ov sine osudimo hem bičhaldo ko zatvor džikote ko krajo o pretsedateli tari adaja phuv na oslobodingja le. Ko celo adava vreme o phral ačhilo verno hem na našavgja plo bahtalipe. Ov uspejngja ko adava soske sekogaš sine svesno bašo ple duhovna potrebe.

15. Sar o Jovidon hraninela pe sine ko duhovno pogled džikote sine ko zatvor?

¹⁵ Džikote sine ko zatvor o Jovidon hraninela pe sine duhovno iako na sine le i Biblija ili nesavi javer publikacija. Sar šaj sine te kerel adava? O phralja hem o phenja so ingarena sine leske hajbaske pišinena sine ko torbe e diveskoro stiho. Agjaar ov šaj sine te čitinel i Biblija hem sekova dive te razmislinel bašo adava. Otkeda iklilo taro zatvor ov vakergja jekh sovet sa okolenge so panda na doživingje phare nevolje. Ov vakergja: „But tano važno šukar te koristinen tumaro slobodno vreme te šaj pošukar te pendžaren e Jehova agjaar so ka čitinen leskoro Lafi hem amare publikacie“.

16. Bašo kola bukja razmislinela sine o Jovidon?

¹⁶ Amaro phral živingja sprema e Jehovaskere merilija. Namesto te razmislinel bašo pogrešna želbe hem te počminel te postapinel ko pogrešno način ov razmislinela  sine bašo Jehova hem baši leskiri volja. O Jovidon sine vooduševimo taro adava kobor šuže bukja stvoringja o Jehova. Sekova sabajle šunela sine sar giljavena o čiriklja. Rakjate dikhela sine i mesečina hem o zvezde. Ov vakerela: „Adala poklonija taro Jehova kergje man bahtalo hem ohrabringje man“. Keda siem blagodarna e Jehovaske bašo sa o bukja so dela amen ko duhovno hem telesno pogled tegani siem but bahtale hem adava bahtalipe šaj te del amen sila te istrajna.

17. Sar šaj o lafija taro 1. Petrovo 1:6, 7, te pomožinen nekaske soj ki slično situacija sar o Jovidon?

¹⁷ O Jovidon isto agjaar čhivgja ko prvo than i služba bašo Jehova. Ov sine svesno kobor tano važno te ačhol pe verno e čačutne Devleske. O Isus vakergja: „E Jehova tle Devle obožavin le hem služin samo leske“ (Luka 4:8). O komandirija tari vojska hem o vojnikija terinena le sine te otkažinel pe tari pli religija. Ama namesto te kerel adava ov molinela pe sine sekova dive hem sekoja rat. Molinela sine e Jehova te pomožinel leske ma te otkažinel pe hem te ačhol leske verno. Iako doživingja bari nepravda o Jovidon ačhilo verno. Akana tano but bahtalo soske leskiri vera tani pobari nego angleder te ovel phanlo hem mardo. (Čitin 1. Petrovo 1:6, 7.)

18. Sar šaj te ačhova bahtale?

¹⁸ O Jehova džanela so valjani amenge te šaj te ova bahtale. Ako keraja o trin čekorija so ingarena dži ko čačutno bahtalipe šaj te ačhova bahtale čak keda ka arakhljova ko phare situacie. Tegani amen da šaj te vakera: „Bahtale tane o manuša kaskoro Devel tano o Jehova“ (Ps. 144:15).