1-2. Sar o stiho taro Propovednik 11:6 tano povrzimo e propovedibaja o šukar haberi bašo Carstvo?

KO NESAVE phuvja, o manuša spremno prifatinena o šukar haberi — sar te phene edvaj adžikerena sine te šunen le! Ko javera phuvja o manuša na sikavena baro interes bašo Devel ili baši Biblija. Sar reagirinena but manuša ko šukar haberi ko than kote so živinea tu? Bizi razlika sar ola reagirinena, o Jehova mangela amen ponadari te propovedina sa džikote ov na vakerela kaj o propovedibe završingja.

² O Jehova više odlučingja keda o propovedibe ka ovel završimo hem „tegani ka avel o krajo“ (Mat. 24:14, 36). Ama angleder te ovel adava, sar šaj te ova poslušna ko lafija: „Ma mukh te odmorinel tlo vas“? * (Čitin Propovednik 11:6.)

3. So ka dikha ki akaja statija?

³ Ki angluni statija dikhlem štar bukja so šaj te pomožinen amenge uspešno te propovedina o šukar haberi sar „ribarija so astarena manušen“ (Mat. 4:19). Ki akaja statija ka dikha trin načinija sar šaj te ova poodlučna te propovedina, bizi razlika ki savi situacija arakhljovaja. Ka dikha soske tano važno 1) te ačhova koncentririme ko propovedibe, 2) te ova strpliva hem 3) te kera zorali amari vera.

4. Soske valjani te ačhova koncentririme ki zadača so dengja la amenge o Jehova?

⁴ O Isus vakergja ple učenikonge save ka oven o manuša hem so ka ovel ko posledna dive. Ov džanlja kaj akala bukja šaj te keren leskere sledbenikija te na koncentririnen pe ko propovedibe. Ov vakergja ple učenikonge te „ačhoven džangavde“ (Mat. 24:42). Ko e Noeskere dive, sine but bukja so lena sine e manušengoro vnimanie hem na pazingje ko adava so predupredingja len ov. Avdive, slična bukja šaj te len amaro da vnimanie (Mat. 24:37-39; 2. Pet. 2:5). Adaleske, amen mangaja te ačhova koncentririme ki zadača so dengja la amenge o Jehova.

5. Sprema o Dela 1:6-8, dži ki koja mera ka ovel propovedimo o šukar haberi?

⁵ Avdive, čače valjani te koncentririna amen ko propovedibe o šukar haberi baši Carstvo. O Isus prorokujngja kaj palo leskoro meribe leskere sledbenikija ponadari da ka propovedinen hem adava ka keren le ki pobari mera lestar (Jovan 14:12). Palo e Isuseskoro meribe, nesave taro leskere učenikija irangje pe ki pumari buti sar ribarija. Keda voskresningja, ov kergja jekh čudo hem pomožingja ple učenikonge te astaren bute mačhen. Palo adava čudo, o Isus istakningja kaj o propovedibe hem te keren pe učenikija tano but považno tari bilo koja buti (Jovan 21:15-17). Kratko angleder te džal ko nebo, vakergja ple učenikonge kaj o propovedibe so ov počmingja le nane te ovel samo ko Izrael, nego ko celo sveto. (Čitin Dela 1:6-8.) Beršencar pokasno, o Isus ki jekh vizija sikavgja e apostoleske, e Jovaneske, so ka ovel ko „e Gospodareskoro dive“. * Jekh taro bukja so dikhlja o Jovan sine jekh interesno vizija sar jekh angeli „ingarela o šukar haberi so ka ačhol večno... sekole nacijake, plemeske čhibjake hem narodoske“ (Otk. 1:10; 14:6). Jasno tano kaj avdive  o Jehova rodela amen da te učestvujna ko akava propovedibe ki celi Phuv sa džikote adava na završinela.

6. So ka pomožinel amenge te ačhova koncentririme ko propovedibe?

⁶ Šaj te ačhova koncentririme ko propovedibe ako razmislinaja bašo sa adava so kerela o Jehova te šaj te pomožinel amenge. Na primer, ov dela amen but duhovno hrana sar soj o pečatime ili elektronska publikacie, audiosnimke, videoklipija hem emisie ki amari internet-televizija. Samo razmislin bašo akava: ki amari internet-stranica isi informacie ko poviše taro 1.000 čhibja! (Mat. 24:45-47). O manuša ko sveto tane odvojme adaleske so poddržinena različna politička idee, pripadinena ko različna religie ili nesave tane but barvale a o javera čorole. Ama, poviše taro ofto milionja sluge e Devleskere tane ko jekhipe sa e phralencar ko celo sveto. Na primer, petok, 19 april 2019 berš, e Jehovaskere svedokija taro celo sveto sine ko jekhipe adaleske so šaj sine sarine te dikhen o videoklipi kote so razgledingja pe e Diveskoro stiho. Adaja rat, 20.919.041 manuša khedingje pe baši Spomen-svečenost te šaj te setinen pe ko e Isuseskoro meribe. Keda razmislinaja baši čest so isi amen te dikha ko amaro vreme sa akala šuže nastanija ko kola so amen da učestvujnaja, tegani siem pottiknime te ova zafatime te propovedina o šukar haberi bašo Carstvo.

7. Sar e Isuseskoro primer pomožinela amenge te ačhova koncentririme?

⁷ Javer način sar šaj te ačhova koncentririme ko propovedibe tano agjaar so ka dža palo e Isuseskoro primer. Ov na mukhlja ništo te lel leskoro vnimanie taro adava te propovedinel o čačipe (Jovan 18:37). O Satana našti sine te hovavel le adalea so nudingja leske „o carstvija taro celo sveto hem lengiri slava“, hem na pelo ko iskušenie keda o javera mangle te keren le cari (Mat. 4:8, 9; Jovan 6:15). Na vlijajngje upri leste o želbe bašo materijalno barvalipe hem na darandilo keda sine progonimo (Luka 9:58; Jovan 8:59). So ka pomožinel amenge te ačhova koncentririme keda amari vera tani ko ispit? Adava so ka setina amen ko sovet so dengja le o Pavle. Ov ohrabringja e hristijanen te džan palo e Isuseskoro primer hem agjaar nane te umorinen pe hem nane te otkažinen pe (Evr. 12:3).

8. Soj tani i strplivost, hem soske posebno valjanela amenge akana?

⁸ I strplivost tani sposobnost mirno te adžikerel pe sa džikote na meninela pe nesavi situacija. Valjani te ova strpliva ko različna situacie. Šaj mangaja jekh lošno situacija te završinel ili but vreme šaj adžikeraja te ovel nešto šukar. O proroko o Avakum but mangela sine te završinel o nasilstvo ki Juda (Avak. 1:2). E Isuseskere učenikija nadinena pe sine kaj o Carstvo „odma ka ovel vospostavimo“ hem ka spasinel len tari rimsko vlast (Luka 19:11). Edvaj adžikeraja o dive keda e Devleskoro Carstvo ka cidel sa o lošnipe hem ka anel nevo sveto kote so ka vladinel i pravda (2. Pet. 3:13). Ama, amen valjani te ova strpliva hem te adžikera o vreme keda o Jehova odredingja te kerel adava. Te dikha nesave načinija sar o Jehova sikavela amen te ova strpliva.

9. Kola primerija sikavena kaj o Jehova tano strplivo?

⁹ O Jehova tano sovršeno primer baši strplivost. Ov dengja dovolno vreme e Noeske te gradinel i arka hem te propovedinel i pravednost (2. Pet. 2:5; 1. Pet. 3:20). O Jehova šunela sine e Avraame džikote but puti pučlja le baši leskiri odluka te uništinel e lošna manušen kola so živinena sine ko dizja  Sodom hem Gomor (1. Moj. 18:20-33). Vekoncar, o Jehova sine but strplivo e izraelsko narodoja kova so na sine leske verno (Neem. 9:30, 31). Avdive dikhaja kaj o Jehova tano strplivo adaleske so sa e manušenge so mangena te oven lea paše dela len vreme „te kainen pe“ (2. Pet. 3:9; Jovan 6:44; 1. Tim. 2:3, 4). E Jehovaskoro primer dela amen šukar pričina amen da te ova strpliva džikote propovedinaja e manušenge hem sikavaja len. Ov isto agjaar sikavela amen te ova strpliva preku jekh sporedba so arakhljola ko leskoro Lafi.

10. Sar so pišinela ko Jakov 5:7, 8, so sikavela amen o primer taro zemjodelco?

¹⁰ Čitin Jakov 5:7, 8. O primer taro jekh zemjodelco so adžikerela o plodi te bajrol sikavela amenge sar te ova strpliva. Točno tano kaj nesave rastenija but sigate bajrona. Ama, poviše rastenija, a posebno adala so dena plodi, valjani lenge poviše vreme te šaj te oven zrela. Ko Izrael, i sezona te šaj te oven zrela o rastenija trajnela sine okolu šov masek. O zemjodelco sejnela sine o seme ki sredina taro oktomvri hem khedela sine o plodija ki sredina taro april (Mar. 4:28). Ka ova mudra ako amen da sikavaja strplivost sar o zemjodelco. Ama, akava šaj te ovel pharo.

11. Sar i strplivost ka pomožinel amenge ki služba?

¹¹ Obično o nesovršena manuša mangena odma te dikhen o rezultatija tari pumari buti. Ama, ako mangaja ki amari bavča te bajron rastenija hem te oven len plodija valjani stalno te grižina amen lenge. Mora te randa, te sadina, te ikala i štetno čar hem te vadina. Slično agjaar, ako mangaja te kera učenikija, valjani but te trudina amen. Valjani amenge vreme te otkornina taro interesentija o predrasude hem te sikljon te grižinen pe e javerenge. Ako siem strpliva nane te obeshrabrina amen keda o manuša nane te šunen amen. Ama, isto agjaar valjani te ova strpliva keda nesave manuša mangena te šunen hem te sikljoven. Našti silaja te terina jekhe interesente te ovel le vera. Ponekogaš,  čak e Isuseskere učenikija na halile odma so značinena sine leskere lafija (Jovan 14:9). Ma te bistra kaj amen šaj te sadina hem te vadina, ama o Devel kerela te bajrol (1. Kor. 3:6).

12. Sar šaj te ova strpliva keda propovedinaja amare familijake?

¹² Valjani te ova strpliva keda propovedinaja amare familijake. O načelo taro Propovednik 3:1, 7 šaj te pomožinel amenge ko adava. Adathe pišinela kaj isi vreme „te čutinel pe hem vreme te kerel pe lafi“. Amare šukar ponašibaja, šaj te svedočina amare familijake bizo lafija. Tari javer strana, mora sekogaš te ova spremna te vakera lenge bašo Jehova (1. Pet. 3:1, 2). Amen mora revno te propovedina hem te sikava e javeren, ama sekogaš valjani te ova strpliva sa e manušencar, a adava značinela amare familijaja da.

13-14. Kola primerija baši strplivost šaj te sledina?

¹³ Šaj te sikljova te ova strpliva taro primer e verna manušengoro ko purano vreme hem e verna manušengoro ko avdisutno vreme. O Avakum edvaj adžikerela sine te avel o krajo e lošnipaske, ama ov sikavgja strplivost keda vakergja: „Ko mlo stražarsko than ka tergjovav“ (Avak. 2:1). O apostol Pavle vakergja kaj mangela te završinel pli služba hem te dobinel pli nebesno nagrada. Ama, ov strplivo ponadari da ’svedočingja temelno bašo šukar haberi‘ (Dela 20:24).

¹⁴ Te dikha o primer taro jekh bračno pari kova so diplomiringja ki Škola Gilead. Ola sine bičhalde te služinen ki phuv kote so sine samo nekobor Svedokija hem kote so poviše manuša nane hristijanja. But hari lendar mangena sine te proučinen i Biblija. Ama, o javera so sine lencar ko Gilead hem služinena sine ko javera phuvja vakerena sine lenge bašo manuša kasaja so proučinena sine i Biblija hem so krstingje pe. Ama, akava bračno pari ponadari da strplivo propovedinela sine, iako but manuša ko lengoro podračje na šunena len sine. Palo ofto berš propovedibe ko podračje so izgledinela sine kaj but hari manuša šunena len, sine bahtale keda konečno jekh interesentka kasaja so proučinena sine i Biblija, krstingja pe. So sikavena amen akala primerija taro purano hem taro avdisutno vreme? Akala verna sluge na našavgje pli revnost hem na mukhle lengoro vas te odmorinel, a o Jehova nagradingja len baši lengiri strplivost. Te ova amen da sar „okola so baši pli vera hem strplivost dobinena adava soj vetimo“ (Evr. 6:10-12).

15. Sar šaj amari vera te kerel amen te ova poodlučna te propovedina?

¹⁵ Isi amen vera ki poraka so propovedinaja la hem adaleske but mangaja te vakera la so šaj poviše manušenge. Isi amen doverba ko vetuvanja so arakhljona ko e Devleskoro Lafi (Ps. 119:42; Isa. 40:8). Dikhaja sar ispolninena pe ko amaro vreme o bibliska proroštvija. Dikhaja sar bute manušengoro životo ovela pošukar keda počminena te ikeren o bibliska sovetija. Akala dokazija kerena amen te ova posigurna kaj o šukar haberi bašo Carstvo valjani te šunen le sarine.

16. Sprema adava so pišinela ko Psalm 46:1-3, sar i vera ko Jehova hem ko Isus pomožinela amenge te ova poodlučna te propovedina?

¹⁶ Isto agjaar isi amen vera ko Jehova, kastar so avela i poraka so propovedinaja la, hem ko Isus, kole so o Jehova dengja le vlast te ovel Cari ko Carstvo (Jovan 14:1). Bizi razlika so ka slučinel pe amenge, o Jehova sekogaš ka ovel amari zaštita hem sila. (Čitin Psalm 46:1-3.) Osven adava, isi amen doverba kaj o Isus taro nebo vodinela o propovedibe agjaar so koristinel pli sila hem i vlast so dengja le o Jehova (Mat. 28:18-20).

17. Vaker jekh primer soske valjani ponadari da te propovedina.

 ¹⁷ I vera kerela te ova panda posigurna kaj o Jehova ka nagradinel amaro trudo, hem adava šaj te kerel le ko načinija so ni na očekujnaja (Prop. 11:6). Na primer, sekova dive milje manuša dikhena amari literatura soj izložimi ko količke hem ko štandija. Dali akaja tani šukar metoda propovedibaske? Oja! Ki Amari služba bašo Carstvo taro noemvri 2014 berš pišinela sine baši jekh terni studentka koja so mangela sine te pišinel jekh esej bašo e Jehovaskere svedokija. Našti sine te arakhel amari dvorana, ama arakhlja amari literatura ko štandi uzo univerziteti, hem o Svedokija dengje la materijali bašo lakoro esej. Ko krajo, oj krstingja pe hem akana služinela sar opšto pioneri. Asavke iskustvija motivirinena amen ponadari da te propovedina soske isi panda manuša so valjani te šunen bašo Carstvo.

18. Soske šaj te ova sigurna kaj o propovedibe bašo Carstvo ka ovel završimo ko vreme keda o Jehova odredingja?

¹⁸ Šaj te ova sigurna kaj o propovedibe bašo Carstvo ka završinel ko vreme. Te dikha so ulo e Noeske ko dive. O Jehova dokažingja kaj ov sekogaš kerela o bukja ko najšukar vreme. Okolu 120 berš angleder, o Jehova odlučingja keda ka ovel o Potop. But berša pokasno, o Jehova vakergja e Noeske te gradinel i arka. Izgleda 40 ili 50 berša angleder te avel o Potop, o Noe kerela sine but buti. Iako o manuša na šunena le sine, ov ponadari da propovedinela sine sa džikote o Jehova na vakergja leske kaj tano vreme te čhivel e životnen ki arka. Tegani, točno ko vreme, „o Jehova phanlja o udar“ (1. Moj. 6:3; 7:1, 2, 16).

19. So šaj te očekujna ako na mukhaja amaro vas te odmorinel?

¹⁹ Panda hari o Jehova ka anel krajo bašo propovedibe. Palo adava, ov ka uništinel e Satanaskoro sveto hem ka kerel nevo sveto kova so ka ovel pherdo manušencar so ka šunen e Devle. Dži tegani, te ova sar o Noe, o Avakum hem javera kola so na mukhle te odmorinel pe lengoro vas. Ponadari da te ačhova koncentririme ko propovedibe, te ova strpliva hem te ovel amen zorali vera ko e Jehovaskere vetuvanja.