1-2. a) Sprema Izreki 16:31, sar valjani te dikha ko amare pophure phralja hem phenja? b) Ko kola pučiba ka dobina odgovor ki akaja statija?

KO JEKH parko ko SAD, o manuša šaj te arakhen dijamantija džikote phirena. Ama, akala dijamantija nane obrabotime. Adaleske o manuša so dikhena akala dijamantija šaj na haljovena kaj ola tane but skapocena bara.

² Slično sar akala dijamantija, amare verna phure phralja hem phenja tane but skapocena. E Devleskoro Lafi sporedinela o parne bala jekhe krunaja. (Čitin Izreki 16:31; 20:29.) Ama, ponekogaš šaj te na primetina len. O terne so haljovena kobor vredinena amare pophure phralja hem phenja ka dobinen nešto soj poskapoceno taro doslovno barvalipe. Ki akaja statija ka dobina odgovor ko trin pučiba: Soske o Jehova dikhela e pophure phralen hem phenjen sar skapocena? Savo than isi len ki e Jehovaskiri organizacija? So šaj te kera te šaj te sikljova taro lengoro primer?

3. Ko sklad e lafencar taro Psalm 92:12-15, soske amare pophure phralja hem phenja tane skapocena e Jehovaske?

³ Amare pophure phralja hem phenja tane skapocena e Jehovaske. O Jehova šukar pendžarela len hem ceninela lengere but šuže osobine. Ov tano bahtalo keda o pophure prenesinena i mudrost e poternenge so ola stekningje la džikote služinena sine e Jehovaske (Jov 12:12; Izr. 1:1-4). O Jehova isto agjaar ceninela lengiri istrajnost (Mal. 3:16). Iako sine len problemija ko životo ola sepak ačhile verna e Jehovaske. Lengiri nadež baši idnina akana  tani pozorali nego keda prvo puti šungje bašo čačipe. Hem o Jehova mangela len soske ola čak ko phuripe ponadari vakerena e javerenge bašo leskoro anav. (Čitin Psalm 92:12-15.)

4. So šaj te ohrabrinel amare pophure phralen hem phenjen?

⁴ Ako sian jekh taro pophure phralja hem phenja, ov sigurno kaj o Jehova na bistrela adava so kergjan angleder (Evr. 6:10). Sian sine but revno ki služba, hem adava kerela e Jehova bahtalo. Tu istrajngjan keda sine tut problemija — čak phare problemija — sian sine poslušno hem ikergjan tut ko bibliska merilija. Verno grižingjan tut bašo važna zadače ki e Jehovaskiri organizacija hem dengjan obuka e javerenge. Dengjan tlo najšukar te šaj te prilagodine tut ko but promene so kergja e Jehovaskiri organizacija. Poddržingjan hem ohrabringjan okolen soj tane ki polnovremeno služba. O Jehova but mangela tut adaleske so sian verno! Ov vetinela kaj „nane te mukhel okolen soj tane leske verna“ (Ps. 37:28). Hem dengja lafi kaj čak keda ka parnjon tle bala ov ka poddržinel tut (Isa. 46:4). Znači, ma mislin kaj adaleske so phuriljan na sian više važno ki e Jehovaskiri organizacija. Tu sian but skapoceno!

5. So na valjani te bistren o pophure phralja hem phenja?

⁵ O pophure šaj te oven but korisna ki e Jehovaskiri organizacija. Iako šaj nane više silna sar angleder, len isi len baro iskustvo so stekningje le beršencar. Sar so dikhaja taro primerija taro purano vreme hem taro amaro vreme, o Jehova šaj ponadari da but te koristinel len ko različna načinija.

6-7. Vaker bibliska primerija taro pophure so dobingje bereketija adaleske so sine verna e Jehovaske.

⁶ Ki Biblija isi šukar primerija taro verna manuša so ponadari da služingje e Jehovaske keda phurile. Na primer, e Mojsee sine le okolu 80 berš keda počmingja te služinel sar proroko hem vodači e Izraelcongoro. Keda e Daniele šaj sine le  poviše taro 90 berš, o Jehova ponadari da koristinela le sine sar proroko. Slično, o Jovan keda pišingja o lil Otkrovenie šaj sine le okolu 90 berš.

⁷ But javera verna sluge na sine poznata, hem adaleske šaj o javera na primetinena len sine. Sepak, o Jehova primetingja len hem nagradingja len adaleske so sine verna. Na primer, „o pravedno hem verno“ manuš, o Simeon, kratko tano spomnimo ki Biblija, ama o Jehova džanela sine koj tano hem nagradingja le adalea so dengja le i prednost te dikhel e Isuse sar bebe hem te prorokujnel baši leste hem baši leskiri daj (Luka 2:22, 25-35). Isto agjaar, razmislin baši udovica i Ana, koja so služinela sine sar proročica. Iako sine la 84 berš, oj „nikogaš na propuštinela sine te džal ko hrami“. Adaleske o Jehova nagradingja la agjaar so oj da ki jekh prilika dikhlja e Isuse keda sine bebe. O Simeon hem i Ana sine but skapocena e Jehovaske (Luka 2:36-38).

8-9. So kerena ponadari da o udovice ki e Jehovaskiri organizacija?

⁸ Ko amaro vreme, but pophure sluge tane šukar primer e poternenge. Te dikha o primer tari phen Loes Didur. La sine la 21 berš keda počmingja te služinel sar specijalno pioneri ki Kanada. Palo adava, oj hem lakoro rom o Džon služingje but berša ki patuvačko služba. Palo adava, služingje ko Betel ki Kanada poviše taro 20 berš. Keda sine la 58 berš, oj hem o Džon sine kanime te služinen ki Ukraina. So kergje ola? Dali mislingje kaj tane but phure te služinen ki javer phuv? Ola gele ki Ukraina hem o Džon sine imenujmo te služinel ko Odbor e podružnicakoro. Palo efta berš o Džon mulo, ama i Loes odlučingja te ačhol adari. Akana la isi la 81 berš, hem oj panda verno služinela ko Betel ki Ukraina, kote so sarine mangena la.

⁹ O udovice sar i Loes šaj nane doborom primetime taro javera sar keda lengere roma sine dživde. Sepak, ola tane but skapocena. O Jehova but ceninela e phenjen kola so beršencar poddržingje pumare romen hem akana ponadari da verno služinena e Jehovaske (1. Tim. 5:3). Ola isto agjaar ohrabrinena e ternen.

10. Savo šukar primer dengja o Toni?

¹⁰ O phure phralja hem phenja so živinena ko starski dom tane isto agjaar but skapocena. Na primer, jekh phral so vikinela pe Toni živinela ko starski dom. Ov krstingja pe ki Pensilvanija (SAD), ko avgust 1942 berš, keda sine le 20 berš. Kratko palo adava vikingje le te džal ki vojska, ama adaleske so odbingja phanle le duj tekvaš berš ko zatvor. Ov hem leskiri romni i Hilda bajrargje pumare duje čhaven ko čačipe. Beršencar o Toni služingja sar  pretsedavačko nadgledniko ko trin sobranija (akana pendžardo sar koordinator ko starešinstvo) hem služingja sar pokrainsko nadgledniko. Posetinela sine jekh zatvor hem adari vodinela sine sostanokija hem bibliska kursija. Iako akana isi le 98 berš, o Toni panda tano aktivno ki služba e Jehovaske. Ov ponadari da dela plo najšukar te služinel e Jehovaske zaedno e phralencar hem e phenjencar taro leskoro sobranie.

11. Sar ka sikava kaj amenge skapocena adala so živinena ko starski dom ili korkori?

¹¹ Sar šaj te sikava kaj poštujnaja e pophuren soj tane ko starski dom ili so živinena korkori? Sekogaš keda isi prilika, o starešine šaj te pomožinen lenge te oven prisutna ili te šunen o sostanokija hem te propovedinen. Šaj te sikava kaj lično grižinaja amen lenge agjaar so ka posetina len, ili ka javina amen lenge. Posebno mangaja te sikava vnimanie e pophurenge so živinena dur taro pumaro sobranie. Na valjani te bistra len! Nesave pophure phralenge hem phenjenge šaj nane lokho te keren pestar lafi, ili mislinena kaj adava nane soodvetno. Ama, but ka ohrabrina amen ako odvojnaja lenge vreme, pučaja len pučiba hem ako šunaja len džikote vakerena amenge o šuže iskustvija so doživingje len ki e Jehovaskiri organizacija.

12. So šaj te arakha ko amaro sobranie?

¹² Šaj ka iznenadina amen keda ko amaro sobranie ka arakha pophure phralen hem phenjen so isi len šuže iskustvija. Na primer, i phen Hariet verno služingja but berša ko plo sobranie ko Nu Džersi (SAD). Palo adava, geli te živinel ki pli čhaj. O phralja hem phenja taro nevo sobranie odvojngje peske vreme pošukar te zapoznajnen la hem halile kaj oj tani but skapoceno. Oj ohrabrinela len sine agjaar so vakerela lenge sine iskustvija tari služba keda zapoznajngja o čačipe okolu ko 1925 berš. Ko adava vreme, keda džala sine te propovedinel, oj sekogaš lela sine pea jekh četka dandenge soske šaj sine te phanden la. Ustvari, ko 1933 berš, oj sine phanli duj puti ko zatvor po jekh kurko. Lakoro rom so na sine Svedoko, poddržinela la sine adalea so ov grižingja pe lengere trine čhavenge keda oj sine ko zatvor. Asavke verna pophure sar i Hariet sigurno zaslužinena te oven cenime!

13. Savo than isi e pophuren ki e Jehovaskiri organizacija?

¹³ Amare pophure phralja hem phenja tane but važna ki e Jehovaskiri organizacija. Ola dikhle sar o Jehova ko različna načinija dengja bereketi ple organizacijake hem lenge. Ola siklile but važna pouke taro greške so kergje len ko pumaro životo. Dikh ki lende sar „izvor tari mudrost“ hem sikljov taro lengoro iskustvo (Izr. 18:4). Ako odvojnea tuke vreme pošukar te zapoznajne len, tli vera ka bajrol hem but ka sikljove!

14. Sprema 5. Mojseeva 32:7, soj tane pottiknime o terne te keren?

¹⁴ Ker tu o prvo čekori te kere lafi e pophurencar. (Čitin 5. Mojseeva 32:7.) Točno, šaj na dikhena više šukar, šaj pobavno phirena hem šaj našti više šukar te keren lafi, ama ola panda mangena te oven aktivna ki služba bašo Jehova hem kergje peske jekh „šukar anav“ angli leste (Prop. 7:1). Ma bistre soske o Jehova ceninela  len. Ponadari da sikav lenge poštovanje. Ov sar o Elisej. Ov sine uporno te ačhol paše uzo Ilija hem adaleske trin puti vakergja leske: „Nane te mukhav tut“ (2. Car. 2:2, 4, 6).

15. Save pučiba šaj te puča e pophuren?

¹⁵ Sikav iskreno interes e pophurenge agjaar so ljubezno ka puče len pučiba (Izr. 1:5; 20:5; 1. Tim. 5:1, 2). Na primer, šaj te puče len: „Keda sian sine terno, so uveringja tut kaj arakhljan o čačipe? Sar o bukja so slučingje pe tuke pomožingje tut te ove popaše e Jehovaja? So pomožingja tuke te ačhove bahtalo ki služba e Jehovaske?“ (1. Tim. 6:6-8). Palo adava, šun len šukar džikote raskažinena tuke!

16. Savi korist ka ovel e poternen hem e pophuren ako kerena lafi jekh jekhea?

¹⁶ Keda jekh poterno hem pophuro kerena lafi, o solduj šaj te ohrabrinen pe (Rim. 1:12). Tumen o poterne ka oven panda posigurna kaj o Jehova grižinela pe ple narodoske, hem o pophure ka osetinen pe mangle. Ola ka oven bahtale te raskažinen tumenge sar o Jehova dengja len bereketija.

17. Soske šaj te vakera kaj o pophure soj verna ovena pošuže sar nakhena o berša?

¹⁷ Obično o fizičko šužipe e beršencar našavgjovela, ama okola soj verna e Jehovaskere, ovena sa pošuže angli leste (1. Sol. 1:2, 3). Soske? Adaleske so beršencar dozvolingje e Devleskoro duho te obučinel len hem te pomožinel len te razvinen but šuže osobine. So poviše zapoznajnaja amare pophuren, poštujnaja len hem sikljovaja lendar, doborom poskapocena ka oven amenge!

18. So ka dikha ki sledno statija?

¹⁸ O sobranie ovela posilno na samo keda o poterne ceninena e pophuren, nego isto agjaar keda o pophure ceninena e poternen. Ki sledno statija ka dikha sar šaj o pophure te sikaven kaj ceninena e ternen ko sobranie?