1. Koja šukar cel šaj te čhiva amenge sar so phujrovaja?

SO POPHURE ovaja, šaj daraja kaj na siem više korisna e Jehovaske sar so siem sine angleder. Šaj na siem fizički silna sar keda siem sine poterne. Ama, šaj te koristina amari mudrost hem o iskustvo so stekningjem le te šaj te pomožina e poternenge te oven korisna ki e Jehovaskiri organizacija hem te prifatinen poviše odgovornostija. Jekh phral so but berša tano starešina vakergja: „Keda našti sine poviše te kerav sar so kerava sine angleder adaleske so phuriljum, sium sine blagodarno so sine poterne sposobna phralja kola so sine spremna te završinen o zadače“.

2. Bašo so ka kera lafi ki akaja statija?

² Ki angluni statija kergjem lafi bašo adava sar e poternen šaj te ovel len korist keda ovena paše amala e pophurencar. Ki akaja statija, ka dikha sar i poniznost, i skromnost, i blagodarnost hem i darežlivost šaj te pomožinen e pophurenge te sorabotinen e poternencar hem sar adava ka pomožinel sarinenge ko sobranie.

3. Sprema Filipjanite 2:3, 4, soj tani i poniznost, hem sar šaj adava te pomožinel jekhe hristijaneske?

³ O pophure mora te oven ponizna ako mangena te pomožinen e ternenge. O ponizno manuš dikhela e javeren sar pobare pestar. (Čitin Filipjanite 2:3, 4.) O pophure kola so sikavena akaja osobina, but puti haljovena kaj isi poviše bibliska načinija sar šaj šukar te završinel pe jekh zadača. Adaleske, ola na očekujnena taro javera te keren  o bukja ko isto način sar ola so kerena len sine angleder (Prop. 7:10). Iako isi len baro iskustvo kolea so šaj te sikaven e poternen, sepak ola haljovena kaj i „scena akale svetoskiri meninela pe“ hem šaj ka valjani te prilagodinen pe ko neve okolnostija (1. Kor. 7:31).

4. Sar o pokrainska nadglednikija sikavena slično stavi sar e levitengoro?

⁴ O phure soj ponizna, haljovena kaj sar so phujrovena našti više te keren doborom sar so kerena sine angleder. Na primer, razmislin bašo amare pokrainska nadglednikija. Keda pherena 70 berš, ola tane zamolime te služinen ki javer zadača. Adava šaj te ovel lenge pharo soske sine bahtale ki adaja zadača hem but mangena la sine. Osven adava, isi len bari želba ponadari da te služinen ki late. Ama, ola haljovena kaj pošukar tano o poterne phralja te keren adaja zadača. Adalea sikavena kaj isi len slično stavi sar o levitija taro purano Izrael, kola so valjani sine te čhinaven e službaja ko sveto šatori keda ka pheren sine 50 berš. Adala pophure levitija sine bahtale bizi razlika savi zadača sine len. Ola revno kerena sine sa so šaj ko ple neve zadače hem pomožinena sine isto agjaar e ternenge (4. Moj. 8:25, 26). Avdive, okola so angleder sine pokrainska nadglednikija, iako čhinavgje te posetinen o sobranija, ola dena pestar sa te pomožinen ko sobranie kote so služinena akana.

5. So šaj te sikljove taro Den hem tari Keti?

 ⁵ Razmislin bašo Den, kova so 23 berš služingja sar pokrainsko nadgledniko. Keda phergja 70 berš, ov hem leskiri romni i Keti sine bičhalde te služinen sar specijalna pionerija. Sar prilagodingje pe ko neve okolnostija? O Den vakerela kaj akana tano pozafatimo nego angleder! Akana grižinela pe bašo ple sobraniska odgovornostija, pomožinela e phralenge te ispolninen o uslovija bašo sluga pomošnikija, hem obučinela e javeren te svedočinen ko prometna thana hem ko zatvorija. Tumen o pophure, bizi razlika dali sien ki polnovremeno služba ili na, šaj but te pomožinen e javerenge. Sar? Prilagodinen tumen ko tumare neve okolnostija, čhiven tumenge neve celija, hem koncentririnen tumen ko adava so šaj te keren, a na ko adava so našti te keren.

6. Soske tano mudro te ova skromna? Vaker primer.

⁶ Jekh skromno manuš haljovela dži kaj tane leskere granice (Izr. 11:2). Adaleske, ov na očekujnela pestar poviše taro adava so šaj te kerel. Agjaar šaj te ovel bahtalo hem uspešno. E skromno manuše šaj te sporedina le nekasaja so uklela jekh brego vrdaja. O vozači mora te meninel ki potikni brzina te šaj te uklel o brego vrdaja. Akava značinela kaj verojatno ka vozinel pobavno, ama sepak ka vozinel. Slično, o skromno manuš džanela keda valjani „te meninel ki potikni brzina“ te šaj ponadari da te ovel aktivno hem uspešno ki služba bašo Jehova (Fil. 4:5).

7. Sar sikavgja o Varzelaj skromnost?

⁷ Razmislin bašo Varzelaj, kole so sine le 80 berš, keda o cari o David vikingja le te živinel ko carsko dvoro. O Varzelaj sine skromno hem na prifatingja e careskiri pokana. Adaleske so sine phuro, ov džanlja kaj ka ovel leske pharo te kerel adava hem adaleske dengja predlog o Himam, kova so sine poterno, te džal leske ko than (2. Sam. 19:35-37). Slično sar o Varzelaj, o pophure tane bahtale so šaj te den e poterne phralenge prilika te služinen.

8. Sar o David sikavgja skromnost keda manglja te gradinel o hrami?

⁸ O cari o David isto agjaar sine but šukar primer baši skromnost. Ov but manglja te gradinel kher e Jehovaske. Ama keda o Jehova vakergja leske kaj akaja prednost ka del la e Solomoneske, kova so sine poterno, o David prifatingja akaja odluka hem kergja sa te šaj te poddržinel akava proekti (1. Let. 17:4; 22:5). O David na mislingja kaj ov pošukar ka kerel adaja zadača adaleske so o Solomon sine „terno hem na sine iskusno“ (1. Let. 29:1). Ov džanlja kaj o gradibe e hrameskoro zavisinela taro e Jehovaskoro bereketi, a na taro berša hem o iskustvo adalengoro so ka vodinen i buti. Slično sar o David, o pophure avdive panda tane aktivna, čak keda lengiri zadača meninela pe. Hem džanena kaj o Jehova ka del bereketi e ternenge so kerena o zadače kola so ola kerena sine angleder.

9. Sar jekh členi taro odbor e podružnicakoro sikavgja skromnost?

⁹ Ko amaro vreme isto agjaar isi amen primerija baši skromnost sar soj o phral Šigeo. Ko 1976 berš, keda sine le 30 berš, ov sine imenujmo te služinel ko odbor jekhe podružnicakoro. Ko 2004 berš ov počmingja te služinel sar koordinatori ko adava odbor. Pokasno, ov halilo kaj na sine le više sila sar angleder hem kaj našti više sine te završinel šukar i buti. Ov ki molitva razmislingja kaj ka ovel šukar ako  jekh poterno phral lela adaja odgovornost. Iako nane više koordinatori, ov ponadari da služinela sar členi ko adava odbor. Sar so dikhlem taro Varzelaj, taro David hem taro Šigeo, okova soj ponizno hem skromno, koncentririnela pe ko e ternengere jaka strane, a na ko adava kaj nane iskusna. Ov na dikhela len sar konkurencija, nego sar sorabotnikija (Izr. 20:29).

10. Savo stavi isi e pophuren sprema o poterne ko sobranie?

¹⁰ O pophure dikhena ko poterne sar poklonija taro Jehova hem ola tane blagodarna bašo adava so kerena o terne. Keda avena ko pophure berša, ola ceninena e ternen soj tane spremna te koristinen pli sila te završinen o zadače hem te služinen ko sobranie.

11. Sar o izveštaj taro lil Rut 4:13-16 sikavela kobor tano šukar e pophurenge keda prifatinena pomoš taro poterne?

¹¹ Ki Biblija, i Noemina tani but šukar primer bašo pophure kola so sikavgje blagodarnost hem prifatingje pomoš taro poterne. Otkeda mulo lakoro čhavo, oj vakergja ple bojrake, e Rutake, te iranel pe ki pli familija. Ama, i Rut sine uporno te džal laja ko Vitleem, hem i Noemina prifatingja adaja pomoš (Rut 1:7, 8, 18). Adaja odluka sine but šukar e soldujenge. (Čitin Rut 4:13-16.) I poniznost ka pottikninel e pophuren te džan palo e Noeminakoro primer.

12. Sar o apostol Pavle sikavgja pli blagodarnost?

¹² O apostol Pavle sine blagodarno baši pomoš so dobingja la taro phralja. Na primer, ov blagodaringja e hristijanenge taro Filipi bašo poklonija so bičhalgje leske  (Fil. 4:16). Sikavgja blagodarnost baši pomoš so dobingja la taro Timotej (Fil. 2:19-22). Isto agjaar, blagodaringja e Devleske bašo phralja so ale te ohrabrinen le keda sar zatvoreniko ingargje le ko Rim (Dela 28:15). O Pavle sine energično manuš kova so patujnela sine but milja kilometre te šaj te propovedinel hem te ohrabrinel e phralen. Sepak, ov ponizno prifatinela sine pomoš taro phralja hem taro phenja.

13. Sar šaj o pophure te sikaven kaj tane blagodarna bašo terne?

¹³ Tumen o pophure, šaj te sikaven tumari blagodarnost e ternenge taro tumaro sobranie ko poviše načinija. Ako mangena te pomožinen tumenge bašo prevoz, pazaribe ili bašo javera bukja, prifatinen lengiri pomoš. Ma bistren kaj adava tano jekh način sar o Jehova sikavela tumenge mangipe. Šaj ka oven iznenadime kobor paše amala šaj te oven okolencar so pomožinena tumenge. Sekogaš, trudinen tumen te pomožinen e ternenge duhovno te napredujnen, hem vakeren lenge kaj sien but bahtale so dikhena kaj ola mangena ki pobari mera te služinen ko sobranie. Nakhaven lencar vreme hem vakeren lenge o iskustvija taro tumaro životo. Keda kerena agjaar, ka sikaven kaj sien blagodarna e Jehovaske bašo terne so isi ko sobranie (Kol. 3:15; Jovan 6:44; 1. Sol. 5:18).

14. Sar sikavgja o David darežlivost?

¹⁴ Taro cari o David sikljovaja panda jekh važno osobina koja so o pophure valjani te sikaven la — darežlivost. Ov dengja baro prilog taro plo barvalipe te šaj te poddržinel o gradibe e hrameskoro (1. Let. 22:11-16; 29:3, 4). Kergja akava iako i zasluga bašo gradibe o hrami ka ovel dendi leskere čhaveske e Solomoneske. Slično, keda nane te ovel amen više sila te učestvujna ko gradežna teokratska objektija, šaj ponadari da te poddržina akala proektija agjaar so ka da dobrovolna prilogija sprema amare okolnostija. Isto agjaar, šaj te pomožina e ternenge amare iskustvoja so stekningjem le.

15. Save skapocena poklonija dengja o apostol Pavle e Timoteeske?

¹⁵ Razmislin isto agjaar bašo primer kova so dengja le o apostol Pavle baši darežlivost. Ov vikingja e Timotee te džal lea ki misionersko služba, hem o Pavle darežlivo sikavgja akale terne sar te propovedinel hem te sikavel (Dela 16:1-3). Ov obučingja e Timotee te ovel šukar propovedniko hem učiteli (1. Kor. 4:17). Palo adava, o Timotej koristingja adava so siklilo te šaj te obučinel e javeren.

16. Soske o Šigeo obučingja e javeren?

¹⁶ O pophure avdive na darana kaj nane više te oven korisna ako obučinena e poternen te keren o zadače kola so ola angleder kerena len sine ko sobranie. Na primer, o Šigeo kole so spomningjem le angleder, beršencar obučinela sine e poternen so služinena ko odbor e podružnicakoro. Ov kergja akava te šaj te poddržinel o aktivnostija bašo Carstvo ki phuv kote so živinela. Adaleske keda ov našti sine više te služinel sar koordinatori, jekh šukar obučimo phral šaj sine te zameninel le. O Šigeo služinela poviše taro 45 berš ko odbor e podružnicakoro, hem ov ponadari da koristinela plo iskustvo te šaj te pomožinel e poterne phralenge. O phralja sar o Šigeo tane baro bereketi maškar e Devleskoro narodo!

17. Sprema Luka 6:38, so šaj o pophure te den e javerenge?

 ¹⁷ Tumen o pophure phralja hem phenja sien dokaz kaj o najšukar životo tano ako verno služinaja e Jehovaske. Tumare primerea sikavena kaj vredinela te trudina amen te sikljova o bibliska načelija hem te primenina len ko životo. Džanena sar kerena pe sine o bukja angleder, ama isto agjaar haljovena kaj valjani te prilagodinen tumen ko neve okolnostija. Tumen o pophure so sigende krstingjen tumen, šaj isto agjaar te pomožinen e ternenge ko but načinija. Šaj te vakeren lenge sar adava so zapoznajngjen e Jehova ko pophure berša kergja tumen bahtale. O poterne ka uživinen te šunen tumare iskustvija hem o bukja so siklilen ko tumaro životo. Ako sien darežliva agjaar so ka obučinen e javeren bašo bukja so siklilen len ko tumaro životo, o Jehova ka del tumen but bereketija. (Čitin Luka 6:38.)

18. Sar šaj o phure hem o terne te pomožinen jekh jekheske?

¹⁸ Keda tumen o pophure ka oven paše e ternencar, tegani ka šaj te pomožinen jekh jekheske (Rim. 1:12). Sekole jekhe isi le nešto korisno so e javere nane le. E phuren isi len mudrost hem iskustvo kola so stekningje len ko plo životo. A e poternen isi len sila. Keda o terne hem o phure sorabotinena sar amala, ola anena slava amare nebesno Dadeske hem tane bereketi sarinenge ko sobranie.