1-2. Savo simbolično tresibe sine prorokujmo bašo amaro vreme?

„BAŠO samo nekobor minutija, o dukjane hem o purane khera počmingje te peren. Sarine sine ki panika. But manuša vakergje kaj trajngja okolu duj minutija. A mange sar te phene trajngja saatencar.“ Akala tane lafija taro manuša so preživingje o zemjotres ko Nepal, so sine ko 2015 berš. Ako tu da doživingjan nešto doborom strašno, nane lokhe te bistre le.

² Ama, avdive slučinela pe jekh but po javer tresibe, hem nane samo ki jekh diz ili jekh država. O Jehova tresinela sa e narodon ko sveto hem adava kerela le beršencar. Akava tresibe prorokujngja le o proroko o Agej. Ov pišingja: „Agjaar vakerela o Jehova e vojskengoro: ’Panda jekh puti — hem adava panda hari — ka tresinkerav o nebo hem i phuv, o more hem o kopno‘“ (Agej 2:6).

3. Sar razlikujnela pe akava simbolično tresibe taro doslovno zemjotres?

³ O tresibe bašo kova so kerela lafi o Agej, nane sar o doslovno zemjotres kova so anela samo šteta. Namesto adava, akava tresibe kerela te oven šukar bukja. O Jehova vakerela amenge: „Ka tresinkerav sa e narodon, hem ka aven o skapocena bukja taro sa o narodija, hem ka pherav mlo kher slavaja“ (Agej 2:7). So značingja akava proroštvo okolenge so živinena sine ko e Ageeskoro vreme? Hem so značinela amenge avdive? Ki akaja statija ka dikha o odgovorija bašo akala pučiba hem ka dikha sar šaj amen te učestvujna ko tresibe e narodongoro avdive.

4. Soske bičhalgja o Jehova e Agee ko plo narodo?

⁴ O proroko o Agej dobingja jekh važno zadača taro Jehova. Te dikha so slučingja pe angleder te dobinel akaja zadača. O Agej verojatno sine maškar okola so ko 537 berš a.a.e. taro Vavilon irangje pe ko Erusalim. Kratko otkeda resle ko Erusalim, akala verna manuša čhivgje o temeli e Jehovaskere khereskoro, ili e hrameskoro (Ezra 3:8, 10). Ama kratko palo adava, ola obeshrabringje pe hem čhinavgje te gradinen o hrami soske o manuša okolu lende protivinena pe sine lenge (Ezra 4:4; Agej 1:1, 2). Adaleske, ko 520 berš a.a.e. o Jehova vakergja e Ageeske te pomožinel e narodo te ovel palem revno hem te završinel o hrami * (Ezra 6:14, 15).

5. Soske e Ageeskiri poraka sine ohrabruvačko e Devleskere narodoske?

⁵ I cel tari e Ageeskiri poraka sine te bajrarel e Evreengiri vera ko Jehova. Ov hrabro vakergja e Evreenge, kola so sine obeshrabrime: „’Oven silna, tumen o narodo‘, vakerela o Jehova, ’hem keren buti!‘ ’Soske me sium tumencar‘, vakerela o Jehova zapovedniko e vojskengoro“ (Agej 2:4). O lafija „o Jehova zapovedniko e vojskengoro“ sigurno but ohrabringje len. E Jehova isi le avtoriteti upri but bari vojska taro angelija, adaleske e Evreen valjani sine te ovel len doverba ki leste ako mangena sine te uspejnen.

6. Savo sine o rezultati taro tresibe kova so prorokujngja le o Agej?

⁶ O Jehova bičhalgja e Agee te vakerel e Evreenge kaj ka tresinkerel sa e narodon. Akaja haberi ohrabringja e Evreen kola so čhinavgje te gradinen o hrami hem sikavgja kaj o Jehova ka tresinel e Persija, koja ko adava vreme sine svetsko sila. Hem savo ka ovel sine o rezultati taro adava tresibe? Prvo, e Devleskoro narodo ka završinel sine gradibaja o hrami. Palo adava, čak okola so nane Evreija ka aven sine te obožavinen e Jehova ko obnovimo hrami. Adaja poraka sigurno but ohrabringja e Devleskere narodo! (Zah. 8:9)

7. Ki koja zadača učestvujnaja amen avdive koja so tresinkerela o sveto? Objasnin.

⁷ So značinela amenge avdive e Ageeskoro proroštvo? O Jehova panda jekh puti tresinkerela sa e nacien, hem akava puti amen da učestvujnaja ko adava. Razmislin bašo akava: Ko 1914 berš o Jehova čhivgja e Isuse te ovel Cari ko leskoro nebesno Carstvo (Ps. 2:6). Keda adava Carstvo počmingja te vladinel adava na sine šukar haberi e svetsko vodačenge. Adava značinela sine kaj o odredimo vreme e narodongoro — javere lafencar o periodi keda na sine vladeteli so pretstavinela sine e Jehova — završingja (Luka 21:24). Tari adaja pričina, posebno taro 1919 berš, e Jehovaskoro narodo vakerela sine sarinenge kaj samo e Devleskoro Carstvo ka rešinel e manušengere problemija. O propovedibe akava „šukar haberi bašo Carstvo“ tresinkergja celo sveto (Mat. 24:14).

8. Sprema Psalm 2:1-3, sar reagiringje pobaro delo taro narodo ko akava haberi?

⁸ Sar reagiringje o manuša ko akava haberi? Poviše džene negativno reagiringje. (Čitin Psalm 2:1-3.) O narodija voznemiringje pe. Na mangle te prifatinen e Vladetele kole so o Jehova čhivgja le. Ola na dikhena ko haberi bašo Carstvo  so propovedinaja le sar „šukar haberi“. Nesave vlade čak zabraningje o propovednička aktivnostija! Iako but vladetelija taro akala narodija vakerena kaj služinena e Devleske, ola na mangena te otkažinen pe tari pli mokj hem avtoriteti. Isto sar o vladetelija ko e Isuseskoro vreme, o avdisutne da vladetelija protivinena pe e Jehovaskere Pomazanikoske, agjaar so napadinena leskere verna sledbenikon (Dela 4:25-28).

9. Sar o Jehova pomožinela e narodonge iako na prifatinena o haberi bašo Carstvo?

⁹ So kerela o Jehova iako o narodija negativno reagirinena ko adava haberi? O Psalm 2:10-12 dela amen o odgovor: „Adaleske, tumen o carija, postapinen razumno! Prifatinen o ukor, tumen o sudie tari phuv! Daran taro Jehova hem služinen leske, hor poštujnen le bahtalipaja! Poštujnen e čhave te šaj o Devel te na holjanel hem te na meren, soske leskiri holi šaj sigate te thabljol. Bahtale tane sa okola so o Devel lenge than garajbaske“. O Jehova ljubezno mukhela akale protivnikonge vreme te šaj te anen i ispravno odluka. Ola panda šaj te promeninen pe hem te prifatinen e Jehovaskoro Carstvo. Ama ačhilo panda hari vreme. Živinaja ko „posledna dive“ akale svetoskere (2. Tim. 3:1; Isa. 61:2). Nikogaš dži akana na sine doborom itno o manuša te džanen o čačipe hem te birinen te služinen e Jehovaske.

10. Koja pozitivno reakcija taro tresibe tani opišimi ko Agej 2:7-9?

¹⁰ Nesave manuša pozitivno reagirinena ko akava simbolično tresibe so prorokujngja le o Agej. Ov vakergja amenge kaj o tresibe kerela „o skapocena bukja [o iskrena manuša] taro sa o narodija“ te aven hem te obožavinen e Jehova. * (Čitin Agej 2:7-9.) Hem o Isaija hem o Mihej isto agjaar prorokujngje kaj akava ka slučinel pe ko „posledna dive“ (Isa. 2:2-4; Mih. 4:1, 2).

11. Sar reagiringja jekh phral keda prvo puti šungja o haberi bašo Carstvo?

 ¹¹ Dikh sar vlijajngja akava haberi kova so tresinkerela celo sveto upro Ken, jekh phral so akana služinela ko svetsko sedište. Ov panda šukar setinela pe keda prvo puti šungja bašo Carstvo, angleder otprilika 40 berš. O Ken vakerela: „Keda prvo puti šungjum o čačipe taro e Devleskoro Lafi, sium sine but bahtalo so doznajngjum kaj živinaja ko posledna dive akale svetoskere. Haliljum kaj te šaj o Devel te dikhel šukar ki mande hem te ovel man večno životo mora sine te cidav man taro akava sveto so nane stabilno, hem te ačhovav odlučno tari e Jehovaskiri strana. Molingjum man e Jehovaske hem kergjum adava. Mukhljum o sveto pali mande hem garavgjum man ko sigurno than, ko e Devleskoro Carstvo kova so našti te tresinkerel pe“.

12. Sar e Jehovaskoro duhovno hrami pherdilo slava ko akala posledna dive?

¹² Jasno tano kaj o Jehova dela bereketi ple narodoske. Ko akala posledna dive, but manuša počmingje te obožavinen e Devle. Ko 1914 berš, siem sine samo nekobor milja. Akana, poviše taro 8 milionja obožavinena e Devle hem panda but milionja sekova berš tane prisutna ki Spomen-svečenost. Agjaar, o dvorija soj ki Phuv taro e Jehovaskoro duhovno hrami pherdile „skapocena bukjencar taro sa o narodija“. * Isto agjaar, keda o manuša promeninena pe hem uravena i nevi ličnost slavinela pe e Jehovaskoro anav (Ef. 4:22-24).

13. Adalea so barilo o broj taro objavitelija, save javera proroštvija ispolningje pe? (Dikh i slika ki naslovno strana.)

¹³ Akala vozbudliva nastanija ispolningje javera da proroštvija, sar soj o proroštvo taro 60 poglavje taro Isaija. Ko 22 stiho taro adava poglavje pišinela: „Taro hari ka ovel milja, hem taro tikno ka ovel silno narodo. Me o Jehova ka sigjarkerav adava keda ka avel o vreme“. Adaleske so but manuša počminena te obožavinen e Jehova, slučinela pe nešto but šukar. Adala  „skapocena bukja“, ili o manuša, isi len različna sposobnostija hem želba te propovedinen o „šukar haberi bašo Carstvo“. Sar rezultati, e Jehovaskoro narodo šaj te koristinen adala sposobnostija kolenge so o Isaija vakergja kaj tane sar „o thud e narodongoro“ (Isa. 60:5, 16). Akala skapocena murša hem džuvlja pomožinena te propovedinel pe ko 240 phuvja hem te prevedinel pe literatura ko poviše taro milja čhibja.

14. Savi odluka mora akana te anen o manuša?

¹⁴ Ko akala posledna dive, o tresibe e narodongoro terinela e manušen te anen odluka. Dali ka poddržinen e Devleskoro Carstvo, ili ka ovel len doverba ko vlade akale svetoskere? Akaja tani jekh odluka koja so sekova jekh valjani te anel la. Iako e Jehovaskere sluge tane poslušna e vladenge ko phuvja kote so živinena, ola tane celosno neutralna keda kerela pe lafi baši politika akale svetoskiri (Rim. 13:1-7). Ola džanena kaj samo o Carstvo ka rešinel e manušengere problemija, a adava Carstvo nane delo taro akava sveto (Jovan 18:36, 37).

15. Sar o lil Otkrovenie sikavela kaj ka ovel ispitimi e Devleskere narodoskiri vera?

¹⁵ O lil Otkrovenie kerela lafi bašo ispit so ka ovel e Devleskere narodo ko posledna dive. Adava ispit ka anel amenge baro progonstvo. O vlade taro akava sveto ka roden te ova lenge celosno poslušna, hem ka progoninen sarinen so nane te mangen te poddržinen len (Otk. 13:12, 15). Ka čhiven silaja „sa e manušen, e tiknen hem e baren, e barvalen hem e čorolen, okolen soj slobodna hem okolen soj robija, te oven obeležime ko desno vas ili ko čekat“ (Otk. 13:16). O robija taro purano vreme sine obeležime te šaj te džanel pe koj sine lengoro gospodari. Slično, sarinendar avdive ka očekujnel pe te ovel len akava simbolično belego ko pumare vasta, ili ko čekat. O razmisluvanje hem o postapke okolengoro so ka priminen akava belego ka sikavel kaj ola poddržinena akava političko sistem.

16. Soske akana tano itno te kera pozorali amari vernost ko Jehova?

¹⁶ Dali ka prifatina akava simbolično belego hem ka da amari poddrška akale vladenge? Okola so odbinena te priminen o belego ka oven len pharipa hem ka oven ki opasnost. O lil Otkrovenie objasninela kaj „nikoj našti te kinel ili te bikinel, osven okova so isi le o belego“ (Otk. 13:17). Ama, e Devleskoro narodo džanela so ka kerel o Devel okolencar so isi len o belego soj spomnimo ko Otkrovenie 14:9, 10. Namesto te prifatinen o belego, lenge ko vasta ka ovel pišimo: „Pripadinava e Jehovaske“ (Isa. 44:5). Panda akana valjani te sikava kaj siem verna e Jehovaske. Ako keraja agjaar, tegani o Jehova ka ovel bahtalo te vakerel kaj pripadinaja leske.

17. So na valjani te bistra baši e Jehovaskiri strplivost?

¹⁷ O Jehova sikavgja kaj tano but strplivo ko akala posledna dive. Na mangela nikoj te ovel uništimo (2. Pet. 3:9). Ov dengja prilika sarinenge te kainen pe hem te anen mudro odluka. Ama leskiri strplivost isi la granice. Okola so na mangena te poddržinen e Devleskoro carstvo, ka doživinen o ista posledice sar o faraoni taro e Mojseeskoro vreme. O Jehova vakergja e faraoneske: „Dži akana šaj sine te pružinav mlo vas hem te mukhav čuma upri tute hem upro tlo narodo, te šaj te brišinav  tut tari phuv. Ama mukhljum tut dživdo, te šaj te sikavav mli mokj hem te objavinav mlo anav ki celo phuv“ (2. Moj. 9:15, 16). Ko krajo sa o narodija mora te džanen kaj samo o Jehova tano čačutno Devel (Ezek. 38:23). Sar ka slučinel pe akava?

18. a) Savo javer tresibe tano opišimo ko Agej 2:6, 20-22? b) Kotar džanaja kaj e Ageeskere lafija ka ispolninen pe ki idnina?

¹⁸ Vekoncar palo Agej, o apostol Pavle pišingja e evrejska hristijanenge kaj o lafija taro Agej 2:6, 20-22 ka ispolninen pe ki idnina. (Čitin.) O Pavle pišingja: „A akana ov vetingja: ’Panda jekh puti ka tresinkerav na samo i phuv nego hem o nebo‘. A o lafija ’panda jekh puti‘ značinena kaj ka ovel cidimo adava so šaj te tresinel pe, javere lafencar adava so na kergja le o Devel, te šaj te ačhol adava so našti te tresinel pe“ (Evr. 12:26, 27). Akava tresibe nane sar o tresibe taro Agej 2:7. Ko Agej 2:20-22, kerela lafi kaj okola so sar o faraoni, na mangena te prifatinen e Jehovaskoro pravo te vladinel, ka oven uništime zasekogaš.

19. So nane te ovel tresimo, hem kotar džanaja adava?

¹⁹ So nane te ovel tresimo, ili cidimo? O Pavle ponadari vakerela: „Adaleske so valjani te dobina o carstvo kova so našti te tresinkerel pe, te ačhova dostojna bašo e Devleskoro šukaripe kova so na zaslužinaja le, preku kova so šaj te služina e Devleske agjaar sar soj leskiri volja, daraja hem hor poštujbaja“ (Evr. 12:28). Otkeda ka završinel akava posledno tresibe, samo e Devleskoro Carstvo ka postojnel. Ponadari ka ačhol cvrsto ko plo than! (Ps. 110:5, 6; Dan. 2:44).

20. Savi odluka valjani o manuša te anen, hem sar šaj te pomožina lenge?

²⁰ O manuša mora akana te birinen soske na ačhilo panda but vreme! Ako birinena ponadari da te poddržinen akava sveto ola ka oven uništime. Ako birinena te služinen e Jehovaske hem kerena promene ko plo životo te šaj te keren leskiri volja, tegani ka živinen večno (Evr. 12:25). Amare propovedibaja šaj te pomožina e manušenge te anen akaja važno odluka. Adaleske, te pomožina panda poviše skapocena manušenge te odlučinen te poddržinen e Devleskoro Carstvo. Hem nikogaš te na bistra o lafija taro amaro gospodari o Isus: „Akava šukar haberi bašo carstvo ka propovedinel pe ko celo sveto bašo svedoštvo sa e narodonge, hem tegani ka avel o krajo“ (Mat. 24:14).