STATIJA PROUČIBASKE 40
But džene ka oven sikavde baši pravednost
Okola so anena bute dženen ki pravednost ka svetinen sar o zvezde ki celi večnost (DAN. 12:3)
GILI 151 O Jehova ka vikinel len
BAŠO SO KA KERA LAFI a
1. Kola vozbudliva bukja ka slučinen pe džikote trajnena o milja berša?
KOBOR šužo vreme ka ovel keda ka počminel o voskresenie ki phuv džikote trajnena o milja berša. Sarine kastar so mulo nekoj, edvaj adžikerena palem te dikhen le. O Jehova da edvaj adžikerela te dikhel len (Jov 14:15). Šaj te zamislina amenge kobor ka ova sarine bahtale keda palem ka dikha amare manglen. Sar so dikhlem ki angluni statija, o pravedna ka „voskresninen životoske“ soske lengere anava tane pišime „ko lil e životoskoro“ (Dela 24:15; Jovan 5:29). Šaj but džene taro amare mangle ka oven maškar o prva so ka voskresninen. b A o nepravedna — okola so na sine len šukar prilika te zapoznajnen e Jehova hem te služinen leske angleder te meren — „ka voskresninen sudibaske“.
2-3. a) Sprema Isaija 11:9, 10 koja ka ovel i najbari obrazovno programa ki manušikani istorija? b) Bašo so ka kera lafi ki akaja statija?
2 Sa o voskresnime ka valjani te oven sikavde (Isa. 26:9; 61:11). Znači, ka valjani te organizirinel pe i najbari obrazovno programa ki celo manušikani istorija. (Čitin Isaija 11:9, 10.) Soske? Jekh pričina tani adaja so o nepravedna so ka voskresninen ka valjani te sikljoven bašo e Devleskoro Carstvo, bašo Isus Hristos hem leskiri otkupno žrtva, bašo adava kobor tano važno e Jehovaskoro anav hem soske samo le isi le pravo te vladinel. Čak o pravedna ka valjani te sikljoven kola javera da bukja kergja o Jehova te šaj te ispolninel pli namera. Nesave taro akala verna manuša mule angleder te ovel završimi i Biblija. Znači hem o nepravedna hem o pravedna ka valjani te sikljoven bašo but bukja.
3 Ki akaja statija ka kera lafi bašo sledna pučiba: Ko savo način ka organizirinel pe akaja bari obrazovno programa? So ka slučinel pe okolencar so ka reagirinen pozitivno ko adava so ka sikljoven, a so ka slučinel pe okolencar so nane te reagirinen pozitivno? O odgovorija taro akala pučiba tane amenge važna avdive. Sar so ka dikha, nesave interesna proroštvija taro lil Daniel hem Otkrovenie ka pomožinen amenge potočno te haljova so ka slučinel pe keda o mule ka voskresninen. Prvo, te dikha o vozbudliva nastanija soj prorokujme ko Daniel 12:1, 2.
„OKOLA SO SOVENA KO E PHUVJAKORO PRAVO KA UŠTEN“
4-5. So otkrinaja taro Daniel 12:1 bašo posledna dive?
4 Čitin Daniel 12:1. O lil Daniel otkrinela amenge ko kova redo ka slučinen pe nesave vozbudliva nastanija ko posledna dive. Na primer ko Daniel 12:1 pišinela kaj o Mihael, o Isus Hristos, „tergjola te pomožinel [e Devleskere] narodoske“. Adava delo taro proroštvo počmingja te ispolninel pe ko 1914 berš keda o Isus ulo Cari ko e Devleskoro nebesno Carstvo.
5 Ama e Danieleske isto agjaar sine vakerdo kaj o Isus „ka uštel“ ko „vreme e nevoljakoro savi so na sine otkeda postojnela narodo pa dži ko adava vreme“. Akava „vreme e nevoljakoro“ tani i „bari nevolja“ koja soj spomnimi ko Matej 24:21. O Isus uštela, ili kerela nešto, te šaj te braninel e Devleskere narodo ko krajo taro akava vreme e nevoljakoro, javere lafencar, ko Armagedon. Ko lil Otkrovenie baši lende vakerela pe kaj tane „o baro mnoštvo“ so avena tari bari nevolja (Otk. 7:9, 14).
6. So ka slučinel pe otkeda o baro mnoštvo ka preživinel i bari nevolja? Objasnin. (Dikh hem ko Pučiba taro čitatelija ko akava broj tari kula kova so kerela lafi bašo voskresenie životoske ki phuv.)
6 Čitin Daniel 12:2. So ka slučinel pe otkeda o baro mnoštvo ka preživinel akava vreme e nevoljakoro? Akava proroštvo na ispolninela pe ko simbolično način — sar so angleder haljovaja sine kaj e Devleskere sluge ka voskresninen ko duhovno pogled ko posledna dive. c Namesto adava, akale proroštvoja mislinela pe ko voskresenie so ka slučinel pe ko nevo sveto. Soske vakeraja adava? O lafi „pravo“ koristinela pe isto agjaar ko Jov 17:16 hem taro kontekst šaj te dikha kaj akale lafea mislinela pe ko grobo. Akava sikavela kaj ko Daniel 12:2 mislinela pe ko doslovno voskresenie kova so ka slučinel pe otkeda ka završinen o posledna dive hem pali i vojna Armagedon.
7. a) Ki savi smisla nesave ka oven voskresnime „bašo večno životo“? b) Soske tano adava „pošukar voskresenie“?
7 Tegani, so značinena o lafija taro Daniel 12:2 kote so pišinela kaj nesave ka voskresninen „bašo večno životo“? Adava značinela kaj o voskresnime so ka prodolžinen te zapoznajnen e Jehova hem ka oven leske poslušna hem e Isuseske džikote trajnena o milja berša, ko krajo ka dobinen večno životo (Jovan 17:3). Akava ka ovel „pošukar voskresenie“ taro okola so slučingje pe ko purano vreme (Evr. 11:35). Soske? Adaleske so adala nesovršena manuša so sine voskresnime ko krajo palem mule.
8. Soske javera ka voskresninen „baši večno ladž“?
8 Ama na sa o voskresnime ka mangen te prifatinen te oven sikavde taro Jehova. E Danieleskoro proroštvo vakerela kaj nesave ka voskresninen „baši večno ladž“. Adaleske so ka sikaven buntovno stavi lengere anava nane te oven pišime ko lil e životoskoro hem nane te dobinen večno životo. Namesto adava ka dobinen „večno ladž“ ili uništuvanje. Znači ko Daniel 12:2 kerela pe lafi bašo adava so ka slučinel pe ko krajo sa okolencar so ka voskresninen hem kaj i odluka so ka anel pe baši lende ka zavisinel taro adava so ka keren otkeda ka voskresninen d (Otk. 20:12). Nesave ka dobinen večno životo a nesave na.
BUT DŽENE KA OVEN SIKAVDE BAŠI PRAVEDNOST
9-10. So javer ka slučinel pe otkeda ka završinel i bari nevolja hem koj tane adala so „ka svetinen sar o zvezde“?
9 Čitin Daniel 12:3. So javer ka slučinel pe otkeda ka nakhel o „vreme e nevoljakoro“? Ko trito stiho taro Daniel 12-to poglavje isto agjaar kerela pe lafi bašo nešto so ka slučinel pe otkeda ka završinel i bari nevolja.
10 Koj tane adala so „ka svetinen sar zvezde“? O Matej 13:43 pomožinela amenge te otkrina koj tane adala keda vakerela: „Tegani o pravednikija ka svetinen sar o kham ko Carstvo pumare Dadeskoro“. Keda o Isus vakergja akala lafija ov kerela sine lafi bašo „čhave e Carstvoskere“ kola soj leskere pomazime phralja hem so ka služinen zaedno lea ko nebesno Carstvo (Mat. 13:38). Znači ko Daniel 12:3 sigurno mislinela pe bašo pomazanikija hem baši zadača koja so ola ka keren la džikote trajnena o milja berša.
O 144.000 ka sorabotinen zaedno e Isusea te šaj te vodinen i bari obrazovno programa džikote trajnena o milja berša (Dikh ko pasus 11)
11-12. Savi zadača ka ovel e 144.000 džikote trajnena o milja berša?
11 Sar ka anen o pomazanikija bute dženen ki pravednost? O pomazanikija ka sorabotinen zaedno e Isusea te šaj te vodinen i obrazovno programa koja so ka ikerel pe ki phuv džikote trajnena o milja berša. O 144.000 nane te vladinen samo sar carija nego isto agjaar ka služinen sar sveštenikija (Otk. 1:6; 5:10; 20:6). Adaleske ola ka šaj te pomožinen ko „sasljaribe e narodon“ hem te pomožinen e manušenge hari po hari te aven dži ko sovršenstvo (Otk. 22:1, 2; Ezek. 47:12). Kova baro bahtalipe ka ovel adava e pomazanikonge.
12 Koj ka oven maškar o adala „but džene“ kola so ka oven ande dži ki pravednost? Ki adaja grupa ka oven okola so ka voskresninen hem isto agjaar okola so ka preživinen o Armagedon zaedno e čhavencar so ka bijangjoven ko nevo sveto. Dži ko krajo taro milja berša sa okola so ka oven dživde ki phuv ka oven sovršena. Tegani, keda točno ka oven pišime lengere anava trajno penkaloja ko lil e životoskoro?
O POSLEDNO ISPIT
13-14. So ka valjani sa o sovršena manuša te sikaven angleder te dobinen večno životo?
13 Na valjani te bistra kaj ako nekoj tano sovršeno na značinela kaj avtomatski ka dobinel večno životo. Razmislin bašo Adam hem i Eva. Iako ola sine sovršena sepak valjani sine te sikaven kaj tane poslušna e Jehovaske te šaj te dobinen večno životo. Ama žalno tano adava so ola na sine leske poslušna (Rim. 5:12).
14 A sar ka ovel sa okole manušencar so ka oven dživde ki phuv ko krajo taro milja berša? Ola sarine ka oven sovršena. Dali sa adala sovršena manuša ka poddržinen e Jehova ki celo večnost? Ili nesave lendar ka oven sar o Adam hem i Eva kola so iako sine sovršena na ačhile verna? Sar šaj te džana o odgovor ko akala važna pučiba?
15-16. a) Keda ka ovel sarinen prilika te sikaven pumari vernost e Jehovaske? b) So ka slučinel pe palo akava ispit?
15 O Satana ka ovel phanlo milja berša. Ko adava periodi ov ka našti nikas te hovavel. Ama ko krajo taro adala milja berša ov ka ovel oslobodimo. Tegani ov ka probinel te hovavel e sovršena manušen. Ko adava ispit sa e sovršena manušen ki phuv ka ovel len prilika jasno te sikaven dali ka den čest e Jehovaskere anaveske hem ka poddržinen leskoro vladibe (Otk. 20:7-10). Dali lengere anava ka oven trajno pišime ko lil e životoskoro but ka zavisinel taro adava ki kaskiri strana ka oven ko adava ispit.
16 I Biblija vakerela kaj ka oven manuša so ka otfrlinen e Jehovaskoro vladibe, isto sar o Adam hem i Eva. So ka slučinel pe lencar? Ko Otkrovenie 20:15 pišinela: „Sekova jekh so na sine pišimo ko lil e životoskoro sine frdimo ko jagalo ezero“. Akava sikavela kaj akala buntovnikija ka oven uništime zasekogaš. Ama pobaro delo taro sovršena manuša ka ačhoven verna ko akava posledno ispit. Lengere anava ka oven pišime trajno ko lil e životoskoro.
KO „VREME E KRAJOSKORO“
17. So vakergja o angeli e Danieleske kaj ka slučinel pe ko amaro vreme? (Daniel 12:4, 8-10).
17 Kobor siem vooduševime keda razmislinaja bašo akala nastanija so ka slučinen pe ki idnina. Ama o Daniel isto agjaar dobingja jekh važno informacija taro jekh angeli bašo adava so ka slučinel pe ko amaro vreme, „ko vreme e krajoskoro“. (Čitin Daniel 12:4, 8-10; 2. Tim. 3:1-5). O angeli vakergja e Danieleske: „O čačutno pendžaribe ka bajrol“. Znači akava proroštvo ka ovel but pojasno e Devleskere narodoske ko amaro vreme. Ama o angeli isto agjaar vakergja kaj „o lošna ka keren lošnipe hem nijekh taro adala lošna nane te haljovel“.
18. So ka slučinel pe panda hari okolencar soj lošna?
18 Avdive but džene šaj mislinena peske kaj ništo nane te slučinel pe okolenge so kerena lošnipe (Mal. 3:14, 15). Ama panda hari o Isus ka sudinel okolenge soj sar buznja hem ka odvojnel len taro okola soj sar bakhre (Mat. 25:31-33). Akala lošna nane te preživinen i bari nevolja, a nane ni te voskresninen ko nevo sveto. Lengere anava nane te oven ko „lil e setibaskoro“ bašo kova so kerela pe lafi ko Malahija 3:16.
19. So valjani te kera panda akana hem soske? (Malahija 3:16-18).
19 Akana tano vreme keda amare postapkencar valjani te sikava kaj na siem maškar okola soj lošna. (Čitin Malahija 3:16-18.) O Jehova avdive khedela okolen soj leske sar „skapoceno sopstvenost“, okolen so but ceninela. Sigurno mangaja te ova jekh taro adala.
Kobor šukar ka ovel te dikha e Daniele, amare manglen hem panda bute dženen sar uštena te len pumaro nasledstvo ko nevo sveto (Dikh ko pasus 20)
20. Savo vetuvanje sine dendo ko krajo e Danieleske hem soske edvaj adžikerea te ispolninel pe adava vetuvanje?
20 Avdive amen živinaja ko but vozbudlivo vreme. Ama panda hari ka slučinen pe panda but po interesna bukja. Panda hari ka dikha sar sa o lošnipe ka ovel cidimo. Palo adava ka dikha sar ispolninela pe o vetuvanje e Jehovaskoro so dengja le e Danieleske: „Ko krajo taro divesa ka ušte te šaj te dobine tlo delo“ (Dan. 12:13). Dali edvaj adžikerea te avel o dive keda o Daniel zaedno tle manglencar palem ka uštel? Ako oja, tegani de tutar sa panda akana te ove verno hem šaj te ove sigurno kaj tlo anav ka ačhovel pišimo ko e Jehovaskoro lil e životoskoro.
GILI 80 Ispitin hem dikh kaj o Jehova tano šukar
a Ki akaja statija isi promena ko amaro haljojbe baši jekh bari obrazovno programa kolake so pišinela ko Daniel 12:2, 3. Ka dikha keda ka slučinel pe adava hem koj ka učestvujnel ki late. Isto agjaar, ka dikha sar akaja obrazovno programa ka spreminel sarinen so ka ačhon ki phuv bašo posledno ispit kova so ka ovel ko krajo taro milja berša.
b Šaj prvo ka voskresninen okola so ačhile verna dži ko plo meribe ko posledna dive hem pali lende ka voskresninen okola so mule angleder. Znači o voskresenie ka ovel ko faze, generacija pali generacija. Ako ovela agjaar, tegani sekole generacija ka ovel la prilika te dodžakerel okolen so mule angleder lende. Bizi razlika sar ka ovel, keda i Biblija kerela lafi bašo nebesno voskresenie oj vakerela kaj ka voskresninen „sprema plo redo“. Adaleske, šaj te pretpostavina kaj o voskresenie ki phuv isto agjaar ka ovel sprema nesavo redo (1. Kor. 14:33; 15:23).
c Akava objasnuvanje tano promena ko amaro haljojbe kova so arakhljola ko lil Obrni vnimanie na Danielovoto proroštvo! poglavje 17 hem ki Stražarsko kula taro 1 juli 1987 berš, str. 21-25. (angl.)
d A ko Dela 24:15 hem ko Jovan 5:29, kote soj spomnime „o pravedna“ hem „o nepravedna“ hem okola so „kergje šukaripe“ hem okola so „kergje lošnipe“, kerela pe lafi bašo bukja so kergje len o voskresnime angleder te meren.
