Te dikha sar i Biblija odgovorinela ko akala pučiba.

Ko Dela 24:15 pišinela kaj „ka voskresninen o pravedna hem o nepravedna“. O pravedna tane okola so služingje e Devleske džikote sine dživde, hem adaleske lengere anava tane pišime ko lil e životoskoro (Mal. 3:16). Ko nepravedna tane vklučime okola so mule a na sine len šukar prilika te zapoznajnen e Jehova, adaleske lengere anava nane pišime ko lil e životoskoro.

Ko Jovan 5:28, 29 tane spomnime o ista duj grupe baši kola so pišinela ko Dela 24:15. O Isus athe vakerela kaj okola so „kergje šukaripe“ ka oven voskresnime živibaske hem okola so „kergje lošnipe“ ka oven voskresnime sudibaske. O pravedna kergje šukaripe džikote sine dživde. Ola ka voskresninen bašo životo adaleske so lengere anava panda tane pišime ko lil e životoskoro. Ama o nepravedna kergje lošnipe džikote sine dživde. Adaleske ola ka voskresninen sudibaske. Lengere anava panda nane pišime ko lil e životoskoro hem adaleske ka valjani te nakhel nesavo vreme kote so ka oven ispitime. Ko adava vreme ka ovel len prilika te sikljoven bašo Jehova hem lengere anava te oven pišime ko lil e životoskoro.

Ko Otkrovenie 20:12, 13 pišinela kaj sarine so ka voskresninen ka valjani te keren o bukja soj pišime ko neve svitokija, adala tane o neve zakonija kola so ka del amen o Devel ko nevo sveto. Okola so nane te oven poslušna ka oven uništime (Isa. 65:20).

Ko Daniel 12:2 tano prorokujmo kaj nesave taro adala so mule „ka ušten bašo večno životo hem javera baši večno ladž“. Akava stiho kerela lafi bašo adava so ka slučinel pe ko krajo okolencar so ka voskresninen — ka dobinen ili „večno životo“ ili „večno ladž“. Znači ko krajo taro milja berša nesave ka dobinen večno životo a javera ka oven uništime zasekogaš (Otk. 20:15; 21:3, 4).

Te šaj te ovel amenge akava pojasno te vakera jekh primer. Akala duj grupe so ka voskresninen šaj te sporedina len e manušencar so mangena te živinen ki javer država. O pravedna tane sar okola manuša so dobinena rabotno viza ili viza bašo prestoj kolaja so isi len pumare odredena pravija hem sloboda. A tari javer strana, o nepravedna tane sar okola manuša kolen so isi len viza samo bašo kratko prestoj ili turističko viza. Ako mangena ponadari te živinen ki adaja država, akala manuša ka valjani te ispolninen nesave uslovija. Slično, o nepravedna so ka voskresninen ka valjani te oven poslušna ko e Jehovaskere zakonija hem te postapinen pravedno ako mangena te ačhoven ko raj. Hem bizi razlika savi viza ka dobinen o strancija, keda ka resen ki jekh država, nesave lendar ko krajo šaj te dobinen državjanstvo a javera šaj te oven paldime. Savi odluka ka anel pe lenge but ka zavisinel taro adava sar ka postapinen ki adaja nevi država. Slično, savi odluka ka anel pe sarinenge so ka voskresninen but ka zavisinel tari lengiri vera hem taro lengere postapke ko nevo sveto.

O Jehova nane samo Devel e mangipaskoro nego ov isto agjaar tano pravedno Devel (5. Moj. 32:4; Ps. 33:5). Ov ka sikavel plo mangipe sarinenge so ka voskresninen, hem okolenge soj pravedna hem okolenge soj nepravedna. Ama ov isto agjaar ka očekujnel sarinendar te oven poslušna ko leskere merilija bašo adava soj ispravno a soj pogrešno. Hem samo okola so ka mangen le hem ka živinen sprema leskere merilija ka ovel lenge dozvolimo te živinen večno ko nevo sveto.