Sprema 1. Korinkjanite 15:8, o Pavle vakergja: „A sar posledno pojavingja pe mange da, adaleske sium sar čhavo kova so predvreme bijandilo“. Akate, o Pavle kerela lafi baši situacija keda ki vizija dikhlja e Isuse ki leskiri nebesno slava. Angleder, mislinaja sine kaj te šaj te dikhel e Isuse ki nebesno slava, e Pavleske sine dendi čest te bijangjovel, ili te voskresninel, ko duhovno životo vekoncar angleder te počminel asavko voskresenie. Ama otkeda pošukar proučingja pe akava stiho dikhlem kaj isi potreba te kera promena ko amaro objasnuvanje.

Tegani so mislingja o Pavle keda vakergja „sium sar čhavo kova so predvreme bijandilo“? Isi nekobor objasnuvanja.

Ov ulo e Isuseskoro učeniko taro jekh puti hem sine šokirimo keda slučingja pe adava. Keda nekoj bijangjovela predvreme adava but puti slučinela pe iznenadeno. Džikote o Savle — kova so pokasno ulo pendžardo sar Pavle — džala sine ko Damask te progoninel e hristijanen, ov na očekujngja te dikhel ki vizija e voskresnime Isuse. Adava so o Pavle ulo e Isuseskoro učeniko na iznenadingja samo leste nego hem e hristijanen tari adaja diz kolen so planiringja te progoninel. Akava so slučingja pe e Pavleske but šokiringja le. Palo adava ov nesavo vreme našti sine te dikhel (Dela 9:1-9, 17-19).

Ov ulo e Isuseskoro učeniko „ko pogrešno vreme“. O orginalno grčko lafi soj prevedimo sar „bijamo predvreme“, šaj isto agjaar te prevedinel pe sar „bijamo ko pogrešno vreme“. Jekh javer biblisko prevod akava stiho prevedinela le agjaar: „Sar ka phene bijandiljum ko vreme keda nikoj na očekujnela sine“. Ko vreme keda o Pavle ulo e Isuseskoro učeniko, o Isus više irangja pe ko nebo. O Pavle ko prethodna stihija spomninela bute dženen kola so dikhle e voskresnime Isuse angleder te džal ko nebo, ama le na sine le adaja prilika (1. Kor. 15:4-8). Ama o Isus dengja le adaja prilika keda pojavingja pe leske, iako sar te phene sine „ko pogrešno vreme“.

Ov ko jekh skromno način kergja baši peste lafi. Sprema nesave istražuvačija, akale lafencar o Pavle šaj sine kritizersko sprema peste. Ako o Pavle mislingja ko adava, tegani ov priznajngja kaj na zaslužinela te ovel apostoli. Ustvari, ov vakergja: „Soske, me sium najtikno taro apostolija hem na zaslužinava te ovav vikimo apostoli, soske me progoninava sine e Devleskoro sobranie. Ama, o Devel sikavgja mange šukaripe so na zaslužinava le hem adaleske sium apostoli“ (1. Kor. 15:9, 10).

Znači, verojatno o Pavle manglja te phenel kaj o Isus pojavingja pe leske iznenadeno, kaj ulo e Isuseskoro učeniko ko vreme keda nikoj na očekujngja ili kaj ov na zaslužinela sine asavki vizija. Bizi razlika so manglja te vakerel, jasno tano kaj ov but ceningja adava so slučingja pe leske. Adava sine leske jekh taro najbare dokazija kaj o Isus voskresningja. Adaleske ni hari na čudinela amen adava so keda propovedinela sine bašo e Isuseskoro voskresenie, ov često spomninela sine adaja vizija so dikhlja la (Dela 22:6-11; 26:13-18).