1. Sar reagiringja o Petar keda o Isus pomožingja le čudoja te astarel mačhe?

 O PETAR celo rat na astargja nijekh mačho. Ama, sepak o Isus vakergja leske: „Dža e čamcoja kote soj pohor hem frden tumare mreže te astaren mačhe!“ (Luka 5:4). O Petar kergja adava so vakergja leske o Isus iako mislingja kaj nane te astarel ništo. Ama astargje doborom but mačhe so o mreže počmingje te čhingjon. Keda halile kaj akava sine čudo so kergja le o Isus, o Petar hem o manuša so kerena sine lea buti „čudingje pe“. Tegani o Petar vakergja: „Dža tuke mandar Gospodare, soske sium grešno manuš!“ (Luka 5:6-9). Akala lafija sikavena kaj o Petar mislingja kaj na zaslužinela čak te ovel uzo Isus.

2. Soske tano bašo amaro šukaripe ako dikhaja e Petareskoro primer?

² E Petare sine le pravo, ov sine „grešno manuš“. Ki Biblija pišinela kaj ov ponekogaš vakergja ili kergja nesave bukja baši kolende pokasno pelo pišmani. Dali tu da, isto sar o Petar, borinea tut nesave negativno osobinaja ili poviše vreme trudinea tut te nakhave nesavi slabost? Ako oja, šaj te ohrabrinel tut e Petareskoro primer. Soske? Razmislin bašo akava: O Jehova šaj sine te odlučinel te na oven pišime e Petareskere greške ki Biblija. Ama, ov mukhlja te oven pišime te šaj amen te sikljova nešto lendar (2. Tim. 3:16, 17). Adava so ka doznajna nešto poviše bašo akava manuš kole so sine le slabostija hem čuvstvija isto sar amare, ka pomožinel amenge te dikha kaj o Jehova na očekujnela amendar  te ova sovršena. Ov na mangela te otkažina amen, nego ponadari da te trudina amen iako isi amen slabostija.

3. Soske na valjani te otkažina amen iako isi amen slabostija?

³ Soske tano but važno te na otkažina amen? Adaleske so keda trudinaja amen te kera nesavi buti poviše vreme, obično ovaja pošukar ko adava. Te vakera jekh primer: Keda nekoj mangela te sikljol te bašalel nesavo instrumenti ka valjani leske but vreme te vežbinel. Džikote vežbinela ov ka kerel but greške, ama ako na otkažinela pe ov ka ovel pošukar. Čak keda ka ovel da šukar muzičari ov ponekogaš šaj palem te kerel nesavi greška. Sepak ov nane te otkažinel pe, ponadari da ka vežbinel te ovel pošukar. Slično, čak keda mislinaja kaj nakhavgjem nesavi slabost, amen šaj palem te pera ki late. Ama ponadari da trudinaja amen te ova pošukar. Sarine vakeraja ili keraja nešto bašo koleste pokasno peraja pišmani. Sepak, ako na otkažinaja amen o Jehova ka pomožinel amenge te ova sa pošukar hem pošukar (1. Pet. 5:10). Akana te dikha e Petareskoro primer kole iako sine le slabostija na otkžingja pe. O sočuvstvo so sikavgja o Isus e Petareske iako grešinela sine ka pottikninel amen ponadari da te služina e Jehovaske.

4. Sprema Luka 5:5-10, so vakergja o Petar baši peste, ama sar ohrabringja le o Isus?

⁴ Ki Biblija na pišinela soske o Petar vakergja kaj tano „grešno manuš“ ili kola grevija sine le ki godi. (Čitin Luka 5:5-10.) Ama šaj kergja nesave seriozna greške. O Isus džanlja kaj o Petar darala sine soske šaj mislinela peske sine kaj nane dovolno šukar. Sepak, o Isus džanlja kaj o Petar šaj te ačhovel verno. Adaleske, o Isus ljubezno vakergja leske: „Ma dara“. I doverba koja so o Isus sikavgja e Petareske celosno meningja leskoro životo. Pokasno o Petar hem leskoro phral o Andrej čhinavgje e bukjaja te astaren mačhe hem ule e Mesijaskere sledbenikija, tegani o Jehova ko but načinija blagoslovingja le (Mar. 1:16-18).

5. Save blagoslovija doživingja o Petar adaleske so na dozvolingja o negativna čuvstvija te čhinaven le te ovel e Isuseskoro učeniko?

⁵ E Petare sine le but šuže iskustvija sar učeniko e Hristoseskoro. Ov dikhlja sar o Isus sasljargja e nasvalen, paldingja demonen hem čak sar voskresningja e mulen. b (Mat. 8:14-17; Mar. 5:37, 41, 42). Isto agjaar, le sine le prilika te ovel prisutno keda o  Isus ki jekh vizija sine sikavdo sar Cari ko e Devleskoro Carstvo. O Petar nikogaš na bistergja akava nastan (Mar. 9:1-8; 2. Pet. 1:16-18). Čače, ov nikogaš nane sine te dikhel akala bukja te na ovel sine e Isuseskoro sledbeniko. Sigurno but radujngja pe so na mukhlja o negativna čuvstvija baši peste te čhinaven le te doživinel akala blagoslovija!

6. Dali o Petar taro jekh puti uspejngja te nakhavel ple slabostija? Objasnin.

⁶ O Petar ponadari da borinela pe sine ple slabostencar iako šungja hem dikhlja sa so kergja o Isus. Te dikha nekobor primerija. Keda o Isus objasningja kaj ka cidel muke hem kaj ka ovel mudardo sar so vakerela o proroštvo, o Petar vakergja kaj ne mora te ovel adava (Mar. 8:31-33). Isto agjaar, o Petar hem o javera apostolija celo vreme rasprajnena pe sine bašo adava koj tano najbaro (Mar. 9:33, 34). I posledno rat angleder te merel o Isus, o Petar napadingja jekhe manuše hem čhingja o kan leskoro (Jovan 18:10). I isto rat, o Petar darandilo hem trin puti vakergja kaj na pendžarela ple amale e Isuse (Mar. 14:66-72). Palo adava but rungja (Mat. 26:75).

7. Savi prilika sine e Petare otkeda o Isus voskresningja?

⁷ O Isus na otkažingja pe taro plo apostoli kova so sine but obeshrabrimo. Otkeda o Isus voskresningja, ov dengja prilika e Petareske te sikavel kaj panda mangela le. Ki adaja prilika o Isus vakergja leske te služinel sar ponizno pastiri leskere bakhrenge (Jovan 21:15-17). Ov spremno prifatingja adaja zadača. Ov sine ko Erusalim ki Pedesetnica hem sine maškar o prva kola so sine pomazime e Devleskere silaja.

8. Koja seriozno greška kergja o Petar ki Antiohija?

⁸ O Petar mora sine te borinel pe ple slabostencar čak keda ulo pomazimo. Ko 36-to berš a.e. o Devel bičhalgja e Petare ko Kornelij kova so na sine Evrei. Ki adaja prilika o Devel pomazingja e Kornelija hem adava sine dokaz kaj o Devel „nane pristrasno“ hem kaj okola so nane Evreija šaj sine te oven delo taro hristijansko sobranie (Apo. 10:34, 44, 45). Palo adava nastan, o Petar počmingja te hal zaedno maro okolencar so nane Evreija, nešto kova so nikogaš na bi kerela sine angleder (Gal. 2:12). Ama, nesave Evreija so sine hristijanja mislinena sine kaj ola hem okola so nane Evreija na valjani te han zaedno. Keda nesave so sine len asavko stavi ale ki Antiohija, o Petar čhinavgja te hal zaedno e phralencar so na sine Evreija, adaleske so najverojatno darandilo te na vredžinel e hristijanen so sine Evreija. Keda o apostol Pavle dikhlja so kergja o Petar, ov ukoringja le anglo javera (Gal. 2:13, 14). Iako kergja akaja greška o Petar na otkažingja pe. So pomožingja le?

9. Sar o lafija taro Jovan 6:68, 69, sikavena kaj o Petar sine verno?

⁹ O Petar sine verno, ov na mukhlja ništo te čhinavel le te sledinel e Isuse. Ov sikavgja pli vernost ki jekh prilika keda o Isus vakergja nešto so leskere učenikija na halile. (Jovan 6:68, 69.) But džene čhinavgje te sledinen e Isuse bizo te adžikeren nesavo odgovor ili objasnuvanje. Ama, o Petar na kergja adava. Ov halilo kaj samo ko Isus „tane o lafija bašo večno životo“.

10. Sar o Isus sikavgja kaj isi le doverba ko Petar? (Dikh hem i slika.)

¹⁰ O Isus na otkažingja pe taro Petar. Ki posledno rat taro leskoro životo, o Isus džanlja kaj o Petar hem o javera apostolija ka mukhen le. Sepak, o Isus sikavgja doverba ko Petar kaj ov kaj ov ka ovel duhovno zoralo  hem ka ačhol verno (Luka 22:31, 32). O Isus halilo kaj „o duho tano spremno... ama o telo tano slabo“ (Mar. 14:38). Adaleske, čak keda o Petar vakergja kaj na pendžarela le, o Isus na otkažingja pe taro plo apostoli. Otkeda voskresningja o Isus, pojavingja pe e Petareske — verojatno keda sine korkori (Mar. 16:7; Luka 24:34; 1. Kor. 15:5). Akava sigurno but ohrabringja e Petare kova so sine razočarimo!

11. Sar o Isus uveringja e Petare kaj o Jehova ka grižinel pe bašo leskere materijalna potrebe?

¹¹ O Isus uveringja e Petare kaj o Jehova ka grižinel pe leske. Otkeda voskresningja o Isus panda jekh puti pomožingja e Petare hem e javere apostolen čudoja te astaren mačhe (Jovan 21:4-6). Akava čudo uveringja e Petare kaj o Jehova but lokheste šaj te pomožinel e Petare te grižinel pe bašo leskere materijalna potrebe. Šaj ki adaja prilika o Petar setingja pe ko e Isuseskere lafija keda manglja te vakerel kaj o Jehova ka grižinel pe okolenge so „najangle rodena o Carstvo“ (Mat. 6:33). Sa akava pomožingja e Petareske te čhivel i služba ko prvo than, a na te astaren pe mačhe. Ov hrabro propovedingja ki Pedesetnica 33-to berš a.e. hem pomožingja poviše milja manušenge te prifatinen o šukar haberi (Apo. 2:14, 37-41). Palo adava pomožingja e Samarjanenge hem okolenge so na sine Evreija te prifatinen e Isuse (Apo. 8:14-17; 10:44-48). O Jehova sigurno koristingja e Petare te pomožinel manušenge taro različna nacie te aven ko sobranie.

12. Sar šaj o primer e Petareskoro te pomožinel amen ako poviše vreme borinaja amen te nakhava nesavi slabost?

¹² O Jehova šaj te pomožinel amen te na otkažina amen. Šaj nane sekogaš te ovel amenge lokho, posebno ako poviše vreme borinaja amen te nakhava nesavi slabost. Ponekogaš, amare slabostija šaj te dikhjon amenge pophare taro adala so sine e Petare. Ama o Jehova šaj te del amen sila te na otkažina amen (Ps. 94:17-19). Na primer, jekh phral živinela sine sar homoseksualco poviše berša angleder te doznajnel o čačipe. Ov celosno kergja promene ko plo životo hem počmingja te živinel sprema o bibliska merilija. Sepak, ponekogaš borinela pe sine pogrešna želbencar. So pomožingja leske te na otkažinel pe? Ov vakerela: „O Jehova dela man sila. Leskere duhoja sikliljum kaj šaj te živinav sprema o bibliska merilija.  O Jehova dozvolinela mange te služinav ki leskiri organizacija, hem iako sium nesovršeno ov ponadari da dela man sila “.

13. Sprema Apostolija 4:13, 29, 31, sar šaj te dža palo primer e Petareskoro? (Dikh hem i slika.)

¹³ Sar so dikhlem, o Petar poviše puti kergja seriozna greške adaleske so darandilo taro manuš. Ama adaleske so molingja pe baši sila ov šaj sine te postapinel hrabro. (Čitin Apostolija 4:13, 29, 31.) Amen da šaj te pobedina amari dar. Te dikha so slučingja pe jekhe terne phraleske so vikinela pe Horst hem živinela sine ki nacističko Germanija. Ov poviše puti pelo ko pritisok ki škola te vakerel: „Hajl Hitler!“ Leskere roditelija namesto te rasprajnen pe lea, ola molingje pe zaedno lea e Jehovaske te del le hrabrost. Adaleske so pomožingje le leskere roditelija hem sine le doverba ko Jehova, o Horst ko krajo sine le sila te ačhovel cvrsto. Ov pokasno vakergja: „O Jehova nikogaš na otkažingja pe mandar“. c

14. Sar šaj o grižliva pastirija te ohrabrinen okolen soj obeshrabrime?

¹⁴ O Jehova hem o Isus nane te otkažinen pe amendar. Adava dikhaja le taro e Petareskoro primer. Otkeda vakergja kaj na pendžarela e Isuse, ov valjangja te anel jekh but važno odluka — dali ka otkažinel pe ili ponadari da ka ovel e Hristoseskoro učeniko? O Isus taro vilo molingja pe e Jehovaske te šaj i vera e Petareskiri te na slabonel. O Isus vakergja e Petareske baši akaja molitva hem sine le doverba ko Petar kaj ka ohrabrinel ple phralen (Luka 22:31, 32). Kobor sine ohrabrimo o Petar keda setinela pe sine ko e Isuseskere lafija! Keda valjani te ana važno odluka o Jehova šaj te koristinel grižliva  pastiren te ohrabrinen amen te šaj te ačhova verna (Ef. 4:8, 11). O Pol kova so služinela but berša sar starešina trudinela pe te kerel akava. Ov vakerela okolenge so razmislinena dali ponadari da te služinen e Jehovaske te setinen pe ko adava sar o Jehova privlečingja len ko čačipe. Palo adava uverinela len kaj o Jehova bašo plo verno mangipe nane te otkažinel pe lendar. Ko krajo vakerela: „Dikhljum bute dženen so sine obeshrabrime ama na otkažingje pe adaleske so pomožingja lenge o Jehova“.

15. Sar o primer taro Petar hem taro phral Horst sikavena kaj o lafija taro Matej 6:33 tane čače?

¹⁵ Ako čhivaja i služba ko prvo than ko amaro životo, o Jehova ka grižinel pe bašo amare materijalna potrebe isto sar so grižingja pe e Petareske hem e javere apostolenge (Mat. 6:33). Pali Dujto svetsko vojna o Horst, kole so spomningjem le angleder, razmislinela sine te ovel pioneri. Ama ov sine but čorolo hem na sine sigurno dali šaj dovolno te zarabotinel te šaj te ačhovel ki polnovremeno služba. Ov odlučingja te dikhel dali o Jehova čače ka grižinel pe leske, agjaar so celo kurko gelo ki služba džikote sine i poseta taro pokrainsko nadgledniko. Ko krajo taro adava kurko ov sine but iznenadimo keda o pokrainsko nadgledniko dengja le jekh pliko parencar ama na vakergja leske kastar tano.. Ko adava pliko sine dovolno pare te šaj te prodolžinel e pionersko službaja nekobor masek. O Horst ko akava poklon dikhlja sar dokaz kaj o Jehova ka grižinel pe leske. Dži ko krajo taro plo životo ov čhivgja o Carstvo ko prvo than (Mal. 3:10).

16. Soske tano šukar te sikljova nešto poviše taro primer e Petareskoro hem bašo adava so pišingja ko ple pismija?

¹⁶ Kobor sine radosno o Petar so o Isus na šungja le keda vakergja leske: „Dža tuke mandar Gospodare“. O Isus prodolžingja te obučinel e Petare te ovel verno apostoli hem šukar primer e hristijanenge. Sarine amen šaj te sikljova but skapocena pouke tari adaja obuka. O Petar pišingja nesave taro adala pouke ko duj pismija kola so bičhalgja len ko prvo veko e sobranienge hem akana tane delo tari Biblija. Ki sledno statija ka dikha nesave važna pouke taro akala pismija hem sar šaj te primenina len avdive.