1. Bašo so koristingja o Jehova e Petare kratko angleder te merel?

 O APOSTOL Petar služingja verno e Jehovaske but berša. Ov sine zaedno e Isusea džikote propovedinela sine. Isto agjaar, ov počmingja te propovedinel ko podračja kote so na sine Evreija hem pokasno ulo členi ko vodečko telo. Ko krajo taro leskoro životo keda džanlja kaj panda hari ka merel, o Jehova dengja le panda jekh zadača. Otprilika 62-64 berš a.e., o Jehova vodingja le te pišinel duj pismija — o bibliska lila Prvo hem Dujto Petareskoro. E Petare sine le nadež kaj palo leskoro meribe akala pismija ka pomožinen e hristijanenge (2. Pet. 1:12-15).

2. Soske e Petareskere duj pismija sine baš ko vreme?

² O Petar pišingja ple pismija ko vreme keda leskere phralja hem phenja sine len „razna iskušenija“ (1. Pet. 1:6). Nesave lošna manuša probingje te čhiven hovavne sikljojba ko sobranie hem te terinen e hristijanen te postapinen pogrešno (2. Pet. 2:1, 2, 14). O hristijanja so živinena sine ko Erusalim panda hari valjani sine te doživinen „o krajo bašo sa“, javere lafencar o Erusalim hem o hrami valjani sine te oven uništime tari rimsko vojska (1. Pet. 4:7). Sigurno e Petareskere pismija pomožingje e hristijanenge te dikhen so šaj te keren te šaj te istrajnen ko pharipa so sine len hem isto agjaar sar šaj te spreminen pe bašo pharipa so ka oven len ki idnina. b

3. Soske valjani te dikha e Petareskere pismija?

³ Iako o Petar pišingja akala pismija e hristijanenge taro prvo veko, o Jehova manglja te oven vklučime ko leskoro Lafi. Adaleske akana amen šaj te ovel amen korist lendar (Rim. 15:4). Slično sar adala hristijanja, amen da živinaja ko jekh sveto kova so ohrabrinela ko pogrešna postapke  hem adava šaj te kerel amenge pharo te služina e Jehovaske. Osven adava, panda hari amen da ka doživina jekh nevolja koja so ka ovel but pobari tari adaja so angja krajo bašo Erusalim hem bašo hrami. Ko duj pismija e Petareskere isi nesave važna pouke. Ola ka pomožinen amen te ova spremna bašo krajo akale svetoskoro, te čhinava te dara taro manuša hem te ovel amen silno mangipe jekh jekheske. Asavke pouke isto agjaar ka pomožinen e starešinenge te dikhen sar šaj te grižinen pe e phralenge taro sobranie.

4. Sprema 2. Petareskoro 3:3, 4, so šaj te čhivel ko ispit amari vera?

⁴ Živinaja maškar o manuša kola so na verujnena ko adava so vakerela i Biblija baši idnina. O protivnikija šaj asana amenge adaleske so but berša vakeraja kaj o krajo tano paše hem kaj ka avel. A nesave vakerena kaj o krajo nikogaš nane te avel. (Čitin 2. Petareskoro 3:3, 4.) Ako šunaja nešto asavko taro manuša kaske so propovedinaja, taro kolege ili tari familija amari vera šaj te ovel ko ispit. O Petar vakergja so šaj te pomožinel amenge.

5. So ka pomožinel amenge strplivo te adžikera o krajo akale svetoskoro? (2. Petareskoro 3:8, 9).

⁵ Nesavenge šaj te dikhjol kaj o Jehova adžikerela but džikote anela o krajo akale svetoskoro. E Petareskere lafija šaj te pomožinen amenge te ovel amen ispravno stavi adaleske so setinkerena amen kaj o Jehova na dikhela isto ko vreme sar so dikhena o manuša. (Čitin 2. Petareskoro 3:8, 9.) E Jehovaske milja berša tane sar jekh dive. Ov tano strplivo hem na mangela nijekh te ovel uništimo. Ama keda ka avel adava dive o sveto sigurno ka ovel uništimo. Adaleske isi amen bari čest so šaj te koristina akava vreme so ačhilo te šaj te propovedina e manušenge ko celo sveto.

6. So ka pomožinel amenge te ikera Jehovaskoro dive ki godi? (2. Petareskoro 3:11, 12).

⁶ O Petar pottikninela amen te ikera ki godi e Jehovaskoro dive. (Čitin 2. Petareskoro 3:11, 12.) Sar šaj te kera adava? Šukar ka ovel, ako šaj sekova dive te razmislina bašo blagoslovija so ka dobina len ko nevo sveto. Šaj te zamisline tuke sar dišinea čisto vozduh, sar haja zdravo hrana, sar dodžakerea tle manglen so voskresningje hem sar sikavea e manušen kola so živingje but vekija angleder bašo adava sar ispolningje pe o bibliska proroštvija. Asavko razmisluvanje ka pomožinel amenge strplivo te adžikera adava vreme hem te ova sigurna kaj o krajo tano but paše. Adava so angleder džanaja so ka slučinel pe panda hari ka pomožinel amenge te na ova cidime taro hovavne učitelija (2. Pet. 3:17).

7. Sar šaj i dar taro manuš te vlijajnel upri amende?

⁷ Adaleske so džanaja kaj o Jehova panda hari ka anel o krajo akale svetoske, pottiknime siem te da amendar sa te propovedina o šukar haberi e javerenge. Ama ponekogaš šaj nane amen hrabrost bašo adava. Soske? Adaleske so šaj daraja so ka mislinen ili so ka keren o manuša. Baš akava slučingja pe e Petareske. I rat keda astargje e Isuse, o Petar darandilo te vakerel kaj tano e Isuseskoro učeniko hem trin puti vakergja kaj na pendžarela le (Mat. 26:69-75). Ama adaleske so o Petar pobedingja i dar ov šaj sine pokasno te pišinel: „Ma daran taro adava so ola darana hem ma voznemirinen tumen“ (1. Pet. 3:14). E Petareskere lafija uverinena amen kaj amen da šaj te pobedina i dar taro manuš.

8. So šaj te pomožinel amenge te pobedina i dar taro manuš? (1. Petareskoro 3:15).

 ⁸ So šaj te pomožinel amenge te pobedina i dar taro manuš? O Petar vakerela: „O Hristos, sar Gospodari, neka ovel sveto ko tumare vile“ (Čitin 1. Petareskoro 3:15.) Na valjani te bistra kaj o Isus Hristos tano amaro Cari hem kaj isi le bari mokj. Ako daraja te svedočine nekaske keda isi tut prilika te kere adava tegani setin tut ko amaro Cari. Zamislin sar vladinela ko nebo hem sar tergjovena angli leste milionja angelija. Ma bistre kaj le isi le i „celo vlast“ hem ko nebo hem ki phuv hem kaj ov ka ovel tuja „ko sa o dive dži ko krajo akale svetoskoro“ (Mat. 28:18-20). O Petar pottikninela amen te ova sekogaš spremna te branina amari vera. Dali mangea te svedočine nekaske ki buti, ki škola ili ki nesavo javer than? Tegani angleder razmislin keda šaj te pojavinel pe tuke asavki prilika hem spremin tut bašo adava so mangea te vakere. Molin tut baši hrabrost hem neka ovel tut doverba kaj o Jehova ka pomožinel tuke te pobedine i dar taro manuš (Apo. 4:29).

9. Sar ki jekh prilika o Petar na sikavgja mangipe? (Dikh hem i slika.)

⁹ O Petar siklilo sar te sikavel mangipe. Ov sine adathe keda o Isus vakergja: „Dava tumen nevi zapoved: mangen tumen jekh jekhea!  Sar me so mangljum tumen, agjaar tumen da mangen tumen jekh jekhea“ (Jovan 13:34). Iako o Petar šungja akala lafija ov pokasno na manglja te hal zaedno e phralencar kola so na sine Evreija adaleske so darandilo taro evrejska hristijanja. O apostol Pavle opišingja akaja situacija ov vakergja kaj o Petar postapingja licemerno (Gal. 2:11-14). O Petar prifatingja leskoro strogo sovet hem adaleske siklilo nešto lestar. Ko ple solduj pismija istakningja kaj na valjani samo te osetina mangipe bašo amare phralja hem phenja, nego isto agjaar kaj valjani te sikava adava mangipe.

10. So pomožinela amenge te na sikava nelicemerno mangipe? Objasnin (1. Petareskoro 1:22).

¹⁰ O Petar vakerela kaj valjani te ovel amen nelicemerno mangipe amare phralenge hem phenjenge. (Čitin 1. Petareskoro 1:22.) Asavko mangipe šaj te ovel amen ako siem poslušna e čačipaske. Ko akava čačipe tano vklučimo o sikajbe kaj „o Devel nane pristrasno“ (Apo. 10:34, 35). Našti te ova poslušna ki e Isuseskiri zapoved bašo mangipe ako sikavaja mangipe samo nesavenge ko sobranie, a javerenge na. Džangjola pe, šaj nesavencar ka ova popaše nego javerencar isto sar so sine o Isus. (Jovan 13:23; 20:2). Ama o Petar setinkerela amen kaj valjani te manga sa e phralen soske ola tane delo tari amari familija (1. Pet. 2:17).

11. So značinela te manga e javeren „silno taro vilo“?

¹¹ O Petar pottikninela amen „te manga amen silno taro vilo“. Ko akava kontekst te mange silno značinela te mange nekas čak keda tano pharo te sikavel pe leske mangipe. Na primer, so ako jekh phral ko nesavo način vredžinela tut ili povredinela tut? Šaj prirodno avela amenge te irana leske namesto te sikava leske mangipe. Sepak, o Petar siklilo taro Isus kaj o Devel na mangela te iranel lošnipaja (Jovan 18:10, 11). Ov pišingja: „Ma iranen lošnipaja bašo lošnipe, ni vredžibaja bašo vredžibe, namesto adava, iranen šukaripaja“ (1. Pet. 3:9). Ako isi tut silno mangipe sprema o javera adava ka pottikninel tut te ove ljubezno hem obzirno čak okolencar so povredingje tut.

12. a) Ko so javer pottikninel amen o baro mangipe? b) Sar soj sikavdo ko videoklipi Čuvaj go edinstvoto koe e skapocen dar, so mangea te trudine tut te kere?

¹² Ko plo prvo pismo, o Petar isto agjaar koristinela o izraz „baro mangipe“. Asavko mangipe na učharela samo nekobor grevija, nego „but grevija“ (1. Pet. 4:8). Keda vakergja akala lafija, o Petar šaj setingja pe ki pouka bašo prostibe koja so o Isus sikavgja le nekobor berša angleder. Ko adava vreme o Petar verojatno mislingja peske kaj tano darežlivo soske vakergja kaj ka prostinel ple phraleske „dži ko efta puti“. Ama o Isus sikavgja leste — hem amen — te prostina dži ko 77 puti, javere lafencar sekogaš (Mat. 18:21, 22). Ako tuke pharo te primenine akava sovet, ma obeshrabrin tut! Sarine amen siem nesovršena, adaleske ponekogaš amenge pharo te prostina. Ama važno tano te kere sa so šaj te prostine tle phraleske hem te smirine tut lea. c

13. Soske šaj te ovel pharo e starešinenge te grižinen pe bašo pumare phralja hem phenja?

¹³ O Petar sigurno nikogaš na bistergja e Isuseskere lafija so vakergja len leske otkeda voskresningja: „Grižin tut mle tikne bakhrenge“ (Jovan 21:16). Ako sian starešina, džanea kaj akala lafija važinena tuke  da. Ama, ponekogaš šaj te ovel pharo jekhe starešinaske te arakhel vreme baši akaja važno zadača. Ola najangle mora te grižinen pe pumare familijake ko materijalno, emocionalno hem duhovno pogled. Ola isto agjaar predvodinena ki služba hem učestvujnena ko sostanokija hem ko kongresija. Nesave tane členija ko Odborija so pomožinena maškar o doktorija hem e Jehovaskere svedokija ili služinena ko Lokalno oddel bašo proektiribe hem gradibe. E starešinen čače isi len but buti!

14. So šaj te keren o starešine ako mislinena kaj tane but zafatime ili umorna te šaj te grižinen pe e stadoske? (1. Petareskoro 5:1-4).

¹⁴ O Petar pottikningja e javere starešinen te oven „pastirija e Devleskere stadoske“. (Čitin 1. Petareskoro 5:1-4.) Ako sian starešina, džanaja kaj mangea te phralen hem phenjen hem kaj mangea te grižine tut lenge. Ama ponekogaš mislinea kaj sian but zafatimo ili osetinea tut but umorno te šaj te kere adaja zadača. So šaj te kere? Vaker e Jehovaske sa so mučinela tut hem kobor mangea te pomožine te phralenge hem phenjenge. O Petar pišingja: „Ako nekoj služinela, neka ovel le doverba kaj šaj te kerel adava e silaja koja so dela la o Devel“ (1. Pet. 4:11). Te phralen hem phenjen šaj isi len problemija so nane celosno te rešinen pe ko akava sveto. Ama ma bistre o najbaro pastiri, o Isus Hristos, šaj te pomožinel lenge poviše nego bilo koj javer. Ov šaj te grižinel pe lenge hem avdive hem ko nevo sveto. Sa so rodela o Jehova taro starešine tano te mangen pumare phralen, te grižinen pe lenge hem te oven šukar „primer e stadoske“.

15. Sar jekh starešina grižinela pe e phralenge? (Dikh hem i slika.)

¹⁵ O Vilijam kova so beršencar služinela sar starešina halilo kobor tano važno te grižinel pe e phralenge hem e phenjenge. Keda počmingja i pandemija KOVID-19, ov hem o javera starešine čhivgje peske cel sekova kurko te javinen pe sekole objaviteleske tari pli grupa. Ov objasninela soske kerena adava: „But taro adala phralja ko adava vreme sine korkori khere hem šaj sine sigate te počminen te razmislinen negativno“. Keda nesave phrale ili phenja isi le problemi, o Vilijam vnimatelno šunela te šaj te haljovel so valjani lenge ili so mučinela len. Tegani ov trudinela pe te arakhel  nesave publikacie ili videoklipija tari amari internet-stranica te šaj te ohrabrinel adale phrale ili phenja. Ov vakerela: „Akana tano vreme keda valjani panda poviše te grižina amen e phralenge. Amen but trudinaja amen te šaj te pomožina e manušenge te sikljoven bašo Jehova. Valjani isto doborom te trudina amen te šaj te pomožina amare phralenge te ačhoven ko čačipe“.

16. Ko save načinija šaj te primenina o pouke so siklilem len taro e Petareskere pismija?

¹⁶ Ki akaja statija dikhlem samo nekobor pouke taro e Petareskere duj pismija. Šaj primetingjan bukja kolende so mangea te ove pošukar. Na primer, dali mangea počesto te razmisline bašo blagoslovija so ka oven ko nevo sveto? Dali čhivgjan tuke cel te svedočine ki buti, ki škola ili ki nesavi javer neformalno prilika? Dali razmislingjan ko kola načinija šaj te sikave pobaro mangipe te phralenge hem te phenjenge? Tumen o starešine, dali sien odlučna te grižinen tumen e Jehovaskere bakhrenge spremno hem mangipaja? Ako iskreno ispitinea tut šaj ka dikhe kaj isi tut nesave slabostija, ama ma obeshrabrin tut. Amaro Gospodari o Isus tano šukar hem ov ka pomožinel tuke te kere o potrebna promene (1. Pet. 2:3). O Petar uverinela amen: „O Devel... celosno ka obučinel tumen, ka kerel tumen zorale, ka pomožinel tumenge te ačhoven verna, hem ka kerel te tergjoven cvrsto“ (1. Pet. 5:10).

17. So ka dobina ako na otkažinaja amen hem ako mukhaja o Jehova te obučinel amen?

¹⁷ Ko početok o Petar mislinela sine kaj na zaslužinela te ovel e Isuseskoro učeniko (Luka 5:8). Ama adaleske so ljubezno pomožingje leske o Jehova hem o Isus, o Petar na otkažingja pe taro adava te ovel sledbeniko e Hristoseskoro. Adaleske o Jehova dozvolingja o Petar „te khuvel ko večno Carstvo amare Gospodareskoro hem Spasiteleskoro, e Isus Hristoseskoro“ (2. Pet. 1:11). Adaja sine but bari nagrada! Ako tu da na otkažinea tut sar o Petar hem mukhea o Jehova te obučinel tut, tu da ka dobine o večno životo sar nagrada. Hem baši tli vera ka ove spasimo (1. Pet. 1:9).