STATIJA PROUČIBASKE 19
Sar šaj te bajrara amari vera ko e Jehovaskoro vetuvanje bašo nevo sveto?
Keda [o Jehova] vakerela nešto, nane li te kerel adava? (4. MOJ. 23:19)
GILI 142 Zorale te ikera amen ki amari nadež
BAŠO SO KA KERA LAFI a
1-2. So valjani te kera džikote adžikeraja o nevo sveto?
BUT siem blagodarna bašo e Jehovaskoro vetuvanje so ka anel jekh nevo pravedno sveto (2. Pet. 3:13). Iako na džanaja keda točno ka ispolninel pe akava, o bukja so slučinena pe ko sveto sikavena kaj na valjani panda but te adžikera (Mat. 24:32-34, 36; Dela 1:7).
2 Bizi razlika kobor vreme siem ko čačipe, sarine amen valjani te bajrara amari vera ko adava vetuvanje sa džikote na ispolninela pe. Soske? Adaleske so čak i silno vera šaj te slabonel. Ustvari, o apostol Pavle baši slabo vera vakergja kaj tani „grevo kova so šaj lokhe te peravel amen“ (Evr. 12:1). Te šaj amari vera te na tiknjol, valjani redovno hor te razmislina bašo bukja kola so dokažinena kaj o nevo sveto panda hari ka avel (Evr. 11:1).
3. Bašo so ka kera lafi ki akaja statija?
3 Ki akaja statija ka dikha ko kola trin načinija šaj te bajrara amari vera ko e Jehovaskoro vetuvanje bašo nevo sveto: 1) agjaar so hor ka razmislina baši otkupnina, 2) agjaar so ka razmislina baši e Jehovaskiri mokj hem 3) agjaar so ka ova zafatime duhovna aktivnostencar. Palo adava ka dikha sar e Jehovaskiri poraka so vakergja la e Avakumeske bajrarela amari vera. Ama prvo te dikha ko save situacie šaj te arakhljova panda avdive hem sar i silno vera ko vetuvanje bašo nevo sveto šaj te pomožinel amenge.
KEDA VALJANI TE SIKAVA SILNO VERA?
4. Bašo kola odluke valjani amenge silno vera?
4 Sekova dive anaja odluke kolenge so valjani te ovel amen bari vera. Na primer, anaja odluke bašo društvo, zabava, obrazovanie, brako, čhave hem buti. Ko asavke situacie šukar tano te puča amen: „Dali mle odluke sikavena kaj sium sigurno kaj akava sveto tano privremeno hem kaj panda hari ka avel e Devleskoro nevo sveto, ili mukhava ko mle odluke te vlijajnen manuša kola so verujnena kaj akale svetoja završinela sa?“ (Mat. 6:19, 20; Luka 12:16-21). Ka ana šukar odluke ako bajraraja amari vera ko adava kaj o nevo sveto ka avel but sigate.
5-6. Soske valjani amenge silno vera keda nakhaja taro phare vremija? Vaker primer.
5 Isto agjaar isi amen nevolje baši kolende so valjani amenge silno vera. Šaj isi amen progonstvo ili valjani te ikljova ko krajo seriozno nasvalipaja ili javere bukjencar kola so šaj te obeshrabrinen amen. Ko početok šaj te mislina amenge kaj šaj te istrajna ki adaja nevolja. Ama obično o nevolje trajnena poviše vreme, adaleske valjani amenge silno vera te šaj te istrajna hem ponadari da te služina radosno e Jehovaske (Rim. 12:12; 1. Pet. 1:6, 7).
6 Džikote trajnela nesavi nevolja, šaj te mislina amenge kaj o nevo sveto nikogaš nane te avel. Dali akava značinela kaj isi amen slabo vera? Nane sekogaš agjaar. Te vakera jekh primer. Ko jekh but šudro jeven šaj te mislina amenge kaj o nilaj nikogaš nane te avel. Ama sepak o nilaj avela. Slično, keda siem but obeshrabrime šaj mislinaja amenge kaj o nevo sveto nikogaš nane te avel. Ama ako isi amen silno vera tegani džanaja kaj e Devleskere vetuvanja ka ispolninen pe (Ps. 94:3, 14, 15; Evr. 6:17-19). Keda siem uverime ko adava amen šaj ponadari da te čhiva e Jehova ko prvo than ko amaro životo.
7. Taro kova negativno stavi valjani te arakha amen?
7 Jekh javer buti kote so isto agjaar valjani amenge silno vera tano o propovedibe. But manuša kaske so propovedinaja mislinena kaj „o šukar haberi“ bašo nevo sveto so ka avel nane realno (Mat. 24:14; Ezek. 33:32). Nikogaš na mangaja te dozvolina asavko negativno stavi te vlijajnel upri amende. Te šaj te na slučinel pe amenge adava mora ponadari da te bajrara amari vera. Te dikha trin načinija sar šaj te kera adava.
HOR RAZMISLIN BAŠI OTKUPNINA
8-9. Sar adava so hor ka razmislina baši otkupnina šaj te bajrarel amari vera?
8 Jekh način sar šaj te bajrara amari vera tani ako hor razmislinaja baši otkupnina. I otkupnina tani garancija kaj e Devleskere vetuvanja ka ispolninen pe. Keda šukar razmislinaja bašo adava soske sine dendi i otkupnina hem koja bari žrtva kergja o Jehova, tegani bajraraja amari vera kaj sigurno ka ispolninel pe e Devleskoro vetuvanje bašo večno životo ko pošukar sveto. Soske šaj te vakera akava?
9 Te razmislina hari bašo adava so mora sine te keren o Jehova hem o Isus baši otkupnina. O Jehova taro nebo bičhalgja ple mangle prvobijame Čhave kolea so sine najpaše, te bijangjovel ki phuv sar sovršeno manuš. Ki phuv o Isus doživingja razna pharipa. Palo adava sine mučimo hem mulo bare dukhencar. Akaja sine but bari cena so platingja la o Jehova. Amaro manglo Devel nikogaš na bi dozvolinela sine leskoro Čhavo te ovel mučimo hem te merel te šaj samo jekh kratko vreme te uživina ko životo (Jovan 3:16; 1. Pet. 1:18, 19). Adaleske so o Jehova platingja bari cena, ov ka kerel sa te šaj te ovel amen prilika večno te živina ko nevo sveto.
RAZMISLIN BAŠI E JEHOVASKIRI MOKJ
10. Sprema Efešanite 3:20, so šaj te kerel o Jehova?
10 Dujto način sar šaj te bajrara amari vera tano ako razmislinaja baši e Jehovaskiri mokj. Le isi le mokj te ispolninel sa so ka vetinel. But manuša mislinena kaj našti te ispolninel pe o vetuvanje bašo večno životo ko jekh nevo sveto. Ama o Jehova but puti vetinela bukja kola so o manuša nikogaš našti te ispolninen len, a ov šaj soske tano Semokjno Devel (Jov 42:2; Mar. 10:27). Adaleske na iznenadinela amen adava so ov vetinela amenge bukja kola so nikoj javer našti te ispolninel len. (Čitin Efešanite 3:20.)
11. Vaker jekh taro e Devleskere neobična vetuvanja. (Dikh i ramka „ Nesave neobična vetuvanja so ispolningje pe“.)
11 Te razmislina bašo nesave vetuvanja kola so o Jehova dengja ple narodoske taro purano vreme a izgledinena sine kaj našti te ispolninen pe. Keda o Avraam hem i Sara sine phure, ov vakergja lenge kaj ka ovel len čhavo (1. Moj. 17:15-17). O Jehova isto agjaar vakergja e Avraameske kaj leskere potomcija ka živinen ko Hanaan. O Izraelcija, kola so sine e Avraameskere potomcija, šaj mislingje peske kaj akava vetuvanje nikogaš nane te ispolninel pe soske but berša sine robija ko Egipet. Ama ko krajo ispolningja pe. Pokasno, o Jehova vakergja kaj e Elisaveta ka ovel la čhavo iako sine phuri. Ov isto agjaar vakergja e Marijake, koja so sine čhaj, kaj ka bijanel leskere Čhave. Akalea valjani sine te ispolninel pe jekh vetuvanje kova so o Jehova dengja le angleder nekobor milja berša ki Edensko gradina (1. Moj. 3:15).
12. Ko so uverinena amen o lafija taro Isus Navin 23:14 hem Isaija 55:10, 11 baši e Jehovaskiri mokj?
12 Keda razmislinaja bašo sa o vetuvanja so dengja len o Jehova hem sar ispolningja len, haljovaja koja bari mokj isi le hem tegani amari vera ko leskoro vetuvanje bašo jekh nevo sveto ovela panda posilno. (Čitin Isus Navin 23:14; Isaija 55:10, 11.) Agjaar ka šaj pošukar te pomožina e javerenge te haljoven kaj o vetuvanje bašo jekh nevo sveto nane suno ili fantazija. Keda o Jehova kergja lafi bašo nevo nebo hem nevi phuv, ov vakergja: „Ko akala lafija šaj te verujnel pe hem tane čačutne“ (Otk. 21:1, 5).
OV ZAFATIMO DUHOVNA AKTIVNOSTENCAR
SOSTANOKIJA
Sar šaj akaja duhovno aktivnost te bajrarel tli vera? (Dikh ko pasus 13)
13. Sar šaj o sostanokija te bajraren amari vera? Objasnin.
13 Trito način sar šaj te bajrara amari vera tano agjaar so ka ova zafatime duhovna aktivnostencar. Na primer, razmislin sar pomožinena amenge amare sostanokija. I Ana, koja so but berša služingja ko različna vrste polnovremeno služba, vakerela: „O sostanokija pomožinena mange ponadari da te ovel man silno vera. Čak ako o govor na sine baš interesno ili o phral na vakergja nešto nevo, me but puti šunava sine nešto so pomožingja mange pošukar te haljovav i Biblija hem adava kerela mli vera pozorali“. b Amari vera šaj isto agjaar te bajrara keda šunaja e javerengere komentarija ko sostanok (Rim. 1:11, 12; 10:17).
SLUŽBA
Sar šaj akaja duhovno aktivnost te bajrarel tli vera? (Dikh ko pasus 14)
14. Sar i služba pomožinela amenge te bajrara amari vera?
14 Javer način sar bajraraja amari vera tano agjaar so džaja ki služba (Evr. 10:23). I Barbara koja so služinela e Jehovaske poviše taro 70 berš vakerela: „Me sekogaš dikhava sine ki služba sar nešto so bajrarela mli vera. So poviše kerava sine lafi e javerencar bašo e Jehovaskere but šuže vetuvanja, doborom poviše mli vera ovela sine pozorali“.
LIČNO STUDIJA
Sar šaj akaja duhovno aktivnost te bajrarel tli vera? (Dikh ko pasus 15)
15. Sar i lično studija pomožinela amenge te kera posilno amari vera? (Dikh hem i slika.)
15 Jekh javer buti koja so kerela amari vera te ovel pozorali tani i lično studija. E Suzanake but pomožinela adava so isi la raspored keda hem so ka proučinel. Oj vakerela: „Nedela spreminava i Stražarsko kula bašo sledno kurko. Ponedelnik hem vtornik spreminava man bašo sostanok Amaro životo hem služba. O javera dive isi man nesavo biblisko proekti kova so proučinava le“. Adaleske so i Suzana redovno ikerela pe ko plo raspored proučibaske oj celo vreme kerela buti ki pli vera. I Irena koja so beršencar služingja ko glavno sedište vakerela kaj adava so proučinela o bibliska proroštvija pomožinela lake te bajrarel pli vera. Oj vakerela: „But vooduševinela man adava so e Jehovaskere proroštvija ispolningje pe dži ko najtikne detalija“. c
„SIGURNO KA ISPOLNINEL PE“
16. Soske o lafija so vakergja len o Jehova e Avakumeske važinena amenge da avdive? (Evreite 10:36, 37).
16 Nesave sluge e Jehovaskere but berša više adžikerena te avel o krajo akale svetoskoro. Sar manuša šaj te mislina amenge kaj adaleske so o krajo akale svetoskoro panda na alo o Jehova kasninela. Ama ov džanela sar osetinena pe leskere sluge, adaleske ov uveringja e proroko e Avakume: „I vizija ka ispolninel pe ko plo vreme hem sigjarela sprema o krajo hem nane te hovavel. Čak hem te dikhjol sar te phene kasninela, adžiker la soske sigurno ka ispolninel pe hem nane te kasninel“ (Avak. 2:3). Dali o Devel vakergja akala lafija te šaj te pomožinel samo e Avakumeske, ili akala lafija važinena amenge da avdive? O Jehova vodingja e apostol Pavle te primeninel adala lafija upro hristijanja kola so edvaj adžikerena o nevo sveto. (Čitin Evreite 10:36, 37.) Znači šaj te ova sigurna kaj čak ako mislinaja kaj e Devleskoro vetuvanje kasninela ov sigurno ka ispolninel pe, nane te kasninel!
17. Sar primeningja jekh phen o sovet kova so o Jehova dengja le e Avakumeske?
17 But sluge e Jehovaskere primeningje o sovet te adžikeren, adava kergje le čak but berša. Na primer, i Luis počmingja te služinel e Jehovaske ko 1939-to berš. Oj vakerela: „Ko adava vreme mislinava sine kaj o Armagedon ka avel angleder te završinav e sredno školaja. Ama adava na slučingja pe. Ko sa adala berša but pomožingje mange o bibliska izveštaija bašo manuša kola so adžikergje but vreme angleder te dobinen adava so sine lenge vetimo. Sar na primer, o izveštaija bašo Noe, o Avraam, o Josif hem javera. I doverba kaj o vetuvanja ka ispolninen pe pomožingja mange hem e javerenge te ova uverime kaj o nevo sveto tano but paše“. But džene kola so but berša služinena e Jehovaske složinena pe akale lafencar.
18. Sar adava so ka razmislina bašo stvorime bukja bajrarela amari vera bašo nevo sveto?
18 Točno tano adava kaj o nevo sveto panda na alo. Ama razmislin bašo nesave bukja so više tane akate — o zvezde, o kašta, o životne hem o javera manuša. Nikoj našti te vakerel kaj sa akala bukja na postojnena iako sine jekh vreme keda akala bukja na postojngje. Ola postojnena samo adaleske so o Jehova stvoringja len (1. Moj. 1:1, 26, 27). Amare Devle isto agjaar isi le namera te kerel jekh nevo sveto hem ov ka ispolninel adaja namera. Ko nevo sveto o manuša ka uživinen večno ko sovršeno sastipe. Šaj te ova sigurna kaj ko vreme so odredingja le o Devel, o nevo sveto ka postojnel isto sar so postojnela o univerzum avdive (Isa. 65:17; Otk. 21:3, 4).
19. Sar šaj te bajrare tli vera?
19 Džikote avela o nevo sveto ker sa so šaj te bajrare tli vera. Sekogaš ov blagodarno baši otkupnina. Razmislin baši e Jehovaskiri mokj hem ov zafatimo e duhovna aktivnostencar. Ako kerea akala bukja šaj te ove maškar „okola so baši pli vera hem strplivost dobinena adava soj vetimo“ (Evr. 6:11, 12; Rim. 5:5).
GILI 139 Dikh tut ko nevo sveto
a Nesave anava tane menime.
b Šaj te arakhe but statie so kerena lafi bašo bibliska proroštvija ako rodea ki tema „Proroštvija“ ko Priračniko istražibaske e Jehovaskere svedokongoro. Na primer, dikh i statija „Sѐ što prorekuva Jehova se ispolnuva“ koja so arakhljola ki Stražarska kula taro 1 januari 2008 berš.
c But džene na verujnena ko adava so vakerela i Biblija bašo jekh nevo sveto. Ola mislinena kaj adava tano samo nesavo suno ili jekh paramis. Ama amen siem sigurna kaj sa e Jehovaskere vetuvanja ka ispolninen pe. Ama amen ponadari da valjani te kera buti ki amari vera te šaj te ačhovel zorali. Sar šaj te kera adava? Akaja statija ka objasninel.
