1. Sar jekh čhavo sikavgja kobor tani leske realno i nadež bašo voskresenie?

 JEKH čhavo so vikinela pe Metju, isi le pharo nasvalipe hem adaleske mora sine te ovel poviše puti operacija. Keda sine le efta berš, zaedno ple familijaja dikhle e masekoskiri emisija taro JW Broadcasting^®. Ko krajo tari emisija ola dikhle i muzičko videoprezentacija kote so sikavela pe sar o javera dodžakerena okolen so voskresninena. b Otkeda završingja i emisija, o Metju gelo ko ple roditelija, astargja len taro vas, hem vakergja: „Dikhena li mamo, tato, čak hem te merav me palem ka uštav. A tumen adžikeren man, ma sekirinen tumen“. Šaj li te zamisline tuke sar osetingje pe akala roditelija keda dikhle kobor lengere čhaveske tani realno i nadež bašo voskresenie!

2-3. Soske tano šukar sarine amen te razmislina baši nadež ko voskresenie?

² Ka ovel šukar sarine amen ponekogaš te razmislina baši nadež so isi amen — o voskresenie (Jovan 5:28, 29). Soske? Adaleske so nikogaš našti te džana so ka slučinel pe amencar, šaj te ova seriozno nasvale ili taro jekh puti te merel amendar nekoj so mangaja le (Prop. 9:11; Jak. 4:13, 14). Amari nadež ko voskresenie šaj te pomožinel amen te istrajna keda doživinaja asavko nešto (1. Sol. 4:13). I Biblija uverinela amen kaj amaro nebesno Dad šukar džanela amen hem but mangela amen (Luka 12:7). Razmislin bašo adava kobor šukar mora te pendžarel amen o Jehova, te šaj te voskresninel amen isto sar so siem sine kote soj vklučimo amaro karakter hem sekjavanje. O Jehova but mangela amen hem dengja amen i prilika večno te živina, čak hem te mera ov ka voskresninel amen.

 ³ Ki akaja statija prvo ka dikha soske šaj te verujna ko vetuvanje bašo voskresenie. Palo adava ka dikha o izveštaj tari Biblija soj povrzimo amare glavno stihoja: „To phral ka uštel“ (Jovan 11:23). Ko krajo ka dikha so valjani te kera te šaj i nadež bašo voskresenie te ovel amenge panda porealno.

4. Ko so mora te ova uverime te šaj te verujna ko jekh vetuvanje? Vaker primer.

⁴ Te šaj te verujna ko jekh vetuvanje amen mora te ova uverime kaj okova so dela o vetuvanje isi le i želba hem i mokj ili sposobnost te ispolninel adava. Te dikha jekh primer: Zamislin kaj tlo kher tano oštetimo taro jekh baro nevreme. Jekh amal avela hem vetinela tuke kaj ka pomožinel tut te popravine tlo kher. Le isi le iskreno želba te pomožinel tuke hem adaleske sian uverimo kaj ka kerel adava. Ako ov džanela sar te gradinel hem isi le o potrebna alatija, tegani džanea kaj ov tano sposobno te kerel adava. Adaleske tu verujnea ko leskoro vetuvanje. Tegani, so šaj te vakera bašo e Devleskoro vetuvanje bašo voskresenie? Dali čače isi le želba hem mokj te šaj te ikerel pe ko plo lafi?

5-6. Soske šaj te ova sigurna kaj e Jehova isi le želba te voskresninel e mulen?

⁵ Dali e Jehova isi le želba te voskresninel e mulen? Sigurno kaj isi le. Ov vodingja nekobore bibliska pisatelen te pišinen leskoro vetuvanje bašo voskresenie so ka ovel ki idnina (Isa. 26:19; Osi. 13:14; Otk. 20:11-13). Keda o Jehova dela lafi bašo nešto, ov sekogaš ikerela pe ko adava (Is. Nav. 23:14). Ustvari, o Jehova edvaj adžikerela te voskresninel e mulen. Soske šaj te vakera adava?

⁶ Razmislin bašo adava so vakergja o Jov. Ov sine sigurno kaj čak ako merela, e Jehova ka ovel le bari želba te dikhel le palem dživdo (Jov 14:14, 15). E Jehova isi le i isto želba sa ple slugenge so mule. Ov edvaj adžikerela te iranel len ko životo hem sarine te oven saste hem radosna. A so ka ovel e milijarde manušencar kola so mule bizo te ovel len prilika te doznajnen o čačipe bašo Jehova? Amaro manglo Devel mangela len da te voskresninel (Dela 24:15). Ov mangela te del len prilika te oven leskere amala hem te živinen zasekogaš ki phuv (Jovan 3:16). Akava sikavela kaj e Jehova isi le želba te voskresninel e mulen.

7-8. Soske šaj te ova sigurna kaj e Jehova isi le mokj te voskresninel e mulen?

⁷ Dali e Jehova isto agjaar isi le i mokj te voskresninel e mulen? Sigurno kaj oja, soske ov tano Semokjno (Otk. 1:8). Adava značinela kaj ov tano doborom mokjno so šaj te uništinel sekole dušmane, čak o meribe (1. Kor. 15:26). Adava so džanaja akava šaj te del amen sila hem te utešinel amen. Te dikha o iskustvo e phenjakoro Ema Arnold. Oj hem lakiri familija doživingje nekobor ispitija ki vera džikote trajnela sine i Dujto svetsko vojna. Ola našavgje pumare manglen ko nacističko koncentraciono logori hem te šaj te utešinel ple čhaja, i Ema vakergja: „Ako o manuša so mule našti te voskresninen tegani adava značinela kaj amaro dušmani, o meribe, tano but posilno taro Devel, ama adava nane agjaar“. Džangjola pe, ništo nane posilno taro Jehova! O Semokjno Devel kova so stvoringja o životo tano sposobno te iranel ko životo okolen so mule.

⁸ Javer pričina soske džanaja kaj o Devel tano sposobno te voskresninel e mulen tano adava so leskoro pamtibe nane le granica. Ov vikinela sekole zvezda ko anav (Isa. 40:26). Isto agjaar na bistrela okolen so mule (Jov 14:13; Luka 20:37, 38). Ov šaj but lokhe te pamtinel sekova detali taro okola  so ka voskresninel len, čak lengoro izgled, ličnost, iskustvo ko životo hem lengoro sekjavanje.

9. Soske verujnea ko e Jehovaskoro vetuvanje bašo voskresenie so ka ovel ki idnina?

⁹ Znači, šaj te verujna ko e Jehovaskoro vetuvanje bašo voskresenie so ka ovel ki idnina adaleske so džanaja kaj le isi le hem i želba hem i mokj te kerel adava. Te dikha jekh javer pričina soske šaj te ovel amen doverba ko e Devleskoro vetuvanje bašo voskresenie: O Jehova više voskresningja manušen. Ko purano vreme ov dengja mokj nekobore manušenge, kote soj vklučimo o Isus, te voskresninen e mulen. Akana ka dikha jekh izveštaj so arakhljola ko Jovan 11 poglavje hem kerela lafi bašo jekh taro voskresenija so kergja le o Isus.

10. So slučingja pe ki Vitanija džikote o Isus propovedinela sine ki javer strana taro Jordan, hem so kergja ov? (Jovan 11:1-3).

¹⁰ Čitin Jovan 11:1-3. Te razmislina so slučingja pe ko krajo taro 32 berš a.e., ki Vitanija. Ko akava gav živinena sine e Isuseskere paše amala o Lazar hem leskere phenja i Marija hem i Marta (Luka 10:38-42). Jekh dive o Lazar nasvalilo hem adaleske leskere phenja sine sekirime. Ola bičhalgje nekas te izvestinel e Isuse kova so sine ki javer strana taro Jordan. Taro adava than dži ki Vitanija valjani sine te phirel pe duj dive (Jovan 10:40). Žalno tano so o Lazar najverojatno mulo adava dive keda o manuš izvestingja e Isuse. Iako o Isus džanlja kaj leskoro amal mulo, ov ačhilo ko adava than panda duj dive hem tegani gelo ki Vitanija. Keda reslja, o Lazar sine više štar dive mulo. O Isus manglja te kerel nešto kolea so ka kerel šukaripe ple amalenge hem ka slavinel e Devle (Jovan 11:4, 6, 11, 17).

11. Savi pouka bašo amalipe šaj te sikljova taro akava izveštaj?

¹¹ Taro akava izveštaj sikljovaja jekh pouka bašo amalipe. Keda i Marija hem i Marta izvestingje e Isuse na vakergje leske te avel ki Vitanija, nego ola samo mangle ov te džanel kaj leskoro amal tano nasvalo (Jovan 11:3). Keda o Lazar mulo, o Isus šaj sine te voskresninel le duraldan. Ama namesto adava, ov odlučingja te džal ki Vitanija te šaj te ovel e Marijaja hem e Martaja. Dali isi tut jekh amal kova soj sekogaš spremno te pomožinel tut bizo te rode lestar adava? Tegani džanea kaj ov sekogaš ka ovel uzi tute keda ka oven tut „phare dive“ (Izr. 17:17). Isto sar o Isus amen da te ova asavko amal e javerenge! Akana te irana amen ko izveštaj hem te dikha so javer slučingja pe.

12. So vetingja o Isus e Martake, hem soske šaj sine te verujnel ko adava vetuvanje? (Jovan 11:23-26).

¹² Čitin Jovan 11:23-26. Keda i Marta doznajngja kaj o Isus tano paše uzi Vitanija, oj sigate geli ki leste hem vakergja leske: „Gospodare, te ove sine tu akate, mo phral nane te merel sine“ (Jovan 11:21). Džangjola pe, ov šaj sine te sasljarel e Lazare ama o Isus manglja te kerel nešto soj povpečatlivo. Ov vetingja: „To phral ka uštel“.  Isto agjaar vakergja e Martake: „Me sium o voskresenie hem o životo“. Akale lafencar dengja la panda jekh pričina soske te verujnel ko leskoro vetuvanje. Oja, o Devel dengja e Isuseske i mokj te voskresninel e mulen. Ov više voskresningja jekhe tikne čhaja kratko otkeda muli, hem isto agjaar voskresningja jekhe terne o isto dive keda mulo (Luka 7:11-15; 8:49-55). Ama dali šaj sine te voskresninel nekas kova so sine mulo više štar dive hem leskoro telo počmingja te raspadinel pe?

13. Sprema Jovan 11:32-35, sar reagiringja o Isus keda dikhlja sar i Marija hem o javera rovena? (Dikh hem i slika.)

¹³ Čitin Jovan 11:32-35. Zamislin so slučingja pe ponadari. E Lazareskiri javer phen i Marija geli ko Isus hem povtoringja adava so vakergja lakiri phen: „Gospodare, te ove sine tu akate, mo phral nane te merel sine“. Oj hem o javera so sine laja sine phage tari dukh. E Isuseske pelo but žal keda dikhlja hem šungja sar rovena. Keda dikhlja sar tugujnena leskere amala, ov počmingja te rovel. O Isus halilo len soske džanela kobor dukhala keda merela nekoj so mangea le. Ov edvaj adžikergja te kerel nešto te šaj o javera te čhinaven te roven.

14. So šaj te sikljova bašo Jehova taro adava sar o Isus reagiringja keda dikhlja sar i Marija rovela?

¹⁴ Adava sar o Isus reagiringja keda dikhlja e Marija sar rovela sikavela amenge kaj o Jehova tano Devel pherdo sočuvstvo. Soske šaj te vakera adava? Sar so dikhlem ki angluni statija, e Isuse isi le o isto razmisluvanje hem čuvstvija sar ple Dadeskere (Jovan 12:45). O Isus rungja adaleske so pelo leske žal bašo ple amala kola so tugujnena sine. Adaleske šaj te ova sigurna kaj e Jehovaske da tano but pharo keda amen rovaja (Ps. 56:8). Na pottikninela tut li akava te ova popaše amare sočuvstvitelno Devlea?

15. Sprema Jovan 11:41-44, so slučingja pe ko e Lazareskoro grobo? (Dikh hem i slika.)

¹⁵ Čitin Jovan 11:41-44. O Isus reslja ko grobo e Lazareskoro hem vakergja te ciden o bar. Ama i Marta vakergja kaj pošukar ma te kerel pe adava, soske o telo leskoro akana sigurno khandela. O Isus odgovoringja lake: „Na vakergjum li tuke kaj ako verujnea ka  dikhe e Devleskiri slava?“ (Jovan 11:39, 40). Tegani o Isus vazdingja plo šero hem anglo sarine molingja pe. Ov manglja te del celo slava e Jehovaske bašo adava so ka slučinel pe. Tegani o Isus vakergja: „Lazar ikljov!“ Hem o Lazar iklilo taro grobo. O Isus kergja nešto so nesave mislingje kaj našti te kerel pe. c

16. Sar o izveštaj so arakhljola ko Jovan 11 poglavje bajrarela amari vera ki nadež bašo voskresenie?

¹⁶ O izveštaj so arakhljola ko Jovan 11 poglavje bajrarela amari vera ki nadež bašo voskresenie. Sar? Setin tut kaj o Isus vakergja e Martake: „To phral ka uštel“ (Jovan 11:23). Isto sar plo Dad, e Isuse da isi le i želba hem i mokj te ispolninel adava vetuvanje. Leskere asva sikavgje kaj le isi le želba te voskresninel e mulen hem te uništinel o meribe kova so kerela tažna e manušen. Keda o Lazar iklilo taro grobo, o Isus panda jekh puti sikavgja kaj isi le mokj te voskresninel e mulen. Razmislin isto agjaar so vakergja o Isus e Martake: „Na vakergjum li tuke kaj ako verujnea ka dikhe e Devleskiri slava?“ (Jovan 11:40). Isi amen šukar pričine te verujna kaj o Devel ka ispolninel plo vetuvanje te voskresninel e mulen. Ama sar šaj akaja nadež te ovel amenge panda porealno?

17. So valjani te ovel amen ki godi keda čitinaja o bibliska izveštaija bašo voskresenija?

¹⁷ Čitin hem razmislin bašo voskresenija so sine angleder. Ki Biblija isi ofto izveštaija bašo manuša so voskresningje ki phuv. d Ka ovel šukar vnimatelno te proučine akala izveštaija. Džikote kerea adava neka ovel tut ki godi kaj adala murša, džuvlja hem čhave čače postojngje. Dikh kola pouke šaj te sikljove lendar. Razmislin sar sekova izveštaj  sikavela kaj e Devle isi le i želba hem i mokj te voskresninel e mulen. Isto agjaar, ma bistre posebno te koncentririne tut ko najvažno voskresenie — e Isuseskoro. Adava so but džene dikhle e Isuse otkeda voskresningja bajrarela amari vera kaj ka ovel voskresenie ki idnina (1. Kor. 15:3-6, 20-22).

18. Sar šaj te izvlečine korist taro gilja baši nadež ko voskresenie? (Dikh hem i fusnota.)

¹⁸ Šun hem giljav o gilja baši nadež ko voskresenie, hem razmislin baši lende e (Ef. 5:19). Akala gilja kerena o voskresenie te ovel amenge panda porealno hem bajrarena amari vera ki akaja but šuži nadež. Šun len, vežbin len hem ki Familijarno rat ker lafi bašo teksti. Pamtin o teksti hem hor razmislin baši leste te šaj te bajrarel tli vera hem te khuvel tuke ko vilo. Tegani ako doznajnea kaj isi tut nesavo seriozno nasvalipe ili merela tutar nekoj, e Jehovaskoro duho ka pomožinel tut te setine tut ko akala gilja te šaj te utešinen tut hem te den tut sila.

19. So šaj te zamislina amenge bašo voskresenie? (Dikh i ramka „ So mangea te puče len?“)

¹⁹ Ker tuke slika ki godi. O Jehova dengja amen sposobnost te zamislina amen ko nevo sveto. Jekh phen objasninela: „Odvojngjum doborom vreme te zamislinav man ko nevo sveto so šaj sine čak te osetinav o miris e lulugjengoro“. Zamislin tuke sar dikhea e verna muršen hem džuvlen taro biblisko vreme. Kas edvaj adžikerea te dikhe? So mangea te puče le? Isto agjaar zamislin sar palem ka ove zaedno te manglencar so mule. Ker tuke slika ki godi — o prva lafija, o prvo gušibe hem o asva tari radost.

20. Ko so valjani te ova odlučna?

²⁰ But siem blagodarna bašo e Jehovaskoro vetuvanje bašo voskresenie. Šaj te ova sigurna kaj leskoro vetuvanje ka ispolninel pe, soske e Jehova isi le hem i želba hem i mokj te kerel adava. Te ova odlučna ponadari da te bajrara amari vera ki akaja but šuži nadež. Ako keraja adava ka ova popaše e Devlea kova so, sar te phene, sekaske amendar vakerela: „Te mangle ka ušten!“