1. So vakergja o Isus ple učenikonge bašo adava keda ka avel o krajo hem savo predupreduvanje dengja len?

 NEKOBOR dive angleder te merel o Isus, štar taro leskere učenikija pučle le: „Kova ka ovel o znako... bašo krajo akale svetoskoro?“ (Mat. 24:3). Akala učenikija verojatno pučena pe sine kotar ka džanen keda ka ovel uništimo o Erusalim hem o hrami. Keda odgovoringja lenge, o Isus na kergja lafi samo bašo krajo taro Erusalim hem taro hrami, nego isto agjaar bašo „krajo akale svetoskoro“ soj ko amaro vreme. Ov vakergja: „Bašo adava dive ili saati nikoj na džanela. Ni o angelija ko nebo, ni o Čhavo, nego samo o Dad“. Palo adava ov predupredingja sa ple učenikon te ačhoven džangavde hem te pazinen (Mar. 13:32-37).

2. Soske sine but važno o hristijanja taro prvo veko te ačhoven džangavde?

² O evrejska hristijanja taro prvo veko mora sine te ačhoven džangavde, soske taro adava zavisinela sine lengoro životo. O Isus vakergja ple sledbenikonge ko so valjani te dikhen te šaj te džanen kaj tano paše o krajo keda ka oven uništime o Erusalim hem o hrami. Ov vakergja: „Keda ka dikhen o Erusalim kaj tano opkolimo taro vojske, tegani džanen kaj leskoro uništuvanje tano paše“. Ko adava momenti ola valjani sine te oven poslušna ko e Isuseskoro predupreduvanje hem „te našen ko planine“ (Luka 21:20, 21). Okola so šungje akava predupreduvanje preživingje keda o Rimjanja uništingje o Erusalim.

3. Bašo so ka kera lafi ki akaja statija?

 ³ Avdive amen živinaja ko krajo akale lošno svetoskoro. Adaleske amen da mora te ačhova džangavde. Ki akaja statija ka dikha sar šaj te ova uramnotežena džikote dikhaja so slučinela pe ko sveto, sar šaj te pazina so keraja hem sar šaj najšukar te koristina o vreme so ačhilo.

4. Soske valjani te interesinel amen sar o momentalna svetska nastanija ispolninena o bibliska proroštvija?

⁴ Šukar tano te interesina amen sar o svetska nastanija ispolninena o proroštvija. Na primer, o Isus vakergja kola konkretna nastanija ka slučinen pe te šaj te džana kaj o krajo akale svetoskoro tano paše (Mat. 24:3-14). O apostol Petar ohrabringja amen te dikha sar ispolninena pe o proroštvija te šaj amari vera te ovel zorali (2. Pet. 1:19-21). A o posledno lil tari Biblija počminela e lafencar: „Otkrovenie taro Isus Hristos, kova so dengja le o Devel, te sikavel ple robonge o bukja so ka slučinen pe panda hari“ (Otk. 1:1). Adaleske interesinaja amen bašo nastanija so slučinena pe ko sveto hem mangaja te džana sar ola šaj te ispolninen nesavo biblisko proroštvo. Hem šaj but mangaja te kera lafi bašo asavke nastanija jekh jekhea.

5. So valjani te izbegina, a so valjani te kera? (Dikh hem i slika.)

⁵ Keda keraja lafi bašo nesavo biblisko proroštvo na valjani te širina amaro lično mislenje bašo adava sar ka ispolninel pe. Soske? Adaleske so na mangaja te vakera nešto so ka anel podelbe ko sobranie. Na primer, šaj ka šuna sar o svetska vodačija kerena lafi bašo adava sar ka rešinen nesavo problemi hem ka anen mir hem sigurnost. Namesto te pretpostavina kaj asavke izjavaja ispolninela pe o proroštvo taro 1. Solunjanite 5:3, amen valjani te džana o najneve informacie soj ko amare publikacie. Keda keraja lafi bašo bukja so temelinena pe ko amare publikacie tegani pomožinaja e phralenge te ačhon ko jekhipe agjaar so ka razmislinen ko isto način (1. Korinkjanite 1:10; 4:6).

6. So šaj te sikljova taro 2. Petrovo 3:11-13?

⁶ Čitin 2. Petrovo 3:11-13. O apostol Petar pomožinela amenge te ovel amen uramnoteženo stavi keda razmislinaja bašo nesavo biblisko proroštvo. Ov pottikninela amen te ovel amen ki godi e Jehovaskoro dive. Soske? Na adaleske so mangaja te otkrina o dive hem o saati keda ka avel o Armagedon, nego adaleske so mangaja te koristina o vreme so ačhilo te šaj amare postapke te oven sveta hem lendar te dikhel pe kaj siem celosno posvetime e Devleske (Mat. 24:36; Luka 12:40). Javere lafencar, mangaja te postapina ko ispravno način hem i služba te kera la adaleske so mangaja le. Adaleske valjani te pazina so keraja.

7. Sar sikavaja kaj pazinaja amen? (Luka 21:34).

⁷ O Isus vakergja ple sledbenikonge te pazinen na samo ko adava so slučinela pe ko sveto nego isto agjaar te pazinen ki peste. Akava jasno dikhela pe taro predupreduvanje soj pišimo ko Luka 21:34. (Čitin.) O Isus adathe vakergja: „Pazinen tumen“. Okova so pazinela ki peste svesno  tano baši bilo koja opasnost so šaj te ruminel leskoro amalipe e Jehovaja, hem trudinela pe te izbeginel la. Agjaar ov ačhovela ko e Devleskoro mangipe (Izr. 22:3; Juda 20, 21).

8. So vakergja o apostol Pavle e hristijanenge?

⁸ O apostol Pavle phengja e hristijanenge te pazinen ki peste. Na primer e hristijanenge ko Efes vakergja: „Šukar pazinen sar živinena — na sar okola so nane mudra, nego sar okola soj mudra“ (Ef. 5:15, 16). Amari duhovnost tani nonstop ki opasnost, adaleske i Biblija dela amen sovet te trudina amen te haljova „soj tani e Jehovaskiri volja“ te šaj te zaštitina amen tari bilo koja opasnost so avela taro Satana (Ef. 5:17).

9. Sar šaj te haljova koja tani e Jehovaskiri volja?

⁹ I Biblija na kerela lafi baši sekoja jekh opasnost so šaj te ruminel amaro amalipe e Jehovaja. But puti mora te ana odluke kolenge so ki Biblija na kerela pe konkretno lafi. Te šaj te ana mudra odluke valjani te haljova koja tani „e Jehovaskiri volja“. A te šaj te kera adava valjani redovno te proučina e Devleskoro Lafi hem hor te razmislina bašo adava so čitinaja. So poviše haljovaja e Jehovaskiri volja hem trudinaja amen te ovel amen e Hristoseskiri godi, doborom pobari ka ovel i verojatnost te postapina mudro, čak keda nane te oven amen konkretna upatstvija so ka vakeren amenge so te kera (1. Kor. 2:14-16). Ponekogaš nesave opasnostija šaj lokhe te dikhen pe, a javera na.

10. Kola tane nesave opasnostija so mora te izbegina?

¹⁰ Nesave opasnostija so mora te izbegina len tane o flertujbe, o preterano pijbe, o preterano hajbe, te koristina lafija so povredinena, isto agjaar te dikha bukja kote so isi nasilstvo, pornografija hem slično (Ps. 101:3). Amaro dušmani o Beng rodela sekogaš prilike te ruminel amaro amalipe e Jehovaja (1. Pet. 5:8). Ako na pazinaja, ov šaj te „sadinel“ ki amari godi hem ko amaro vilo ljubomora, nečesnost, alčnost, omraza, gordost hem holi (Gal. 5:19-21). Ko početok šaj te mislina amenge kaj akala čuvstvija nane doborom opasna. Ama ako odma na keraja nešto te šaj te ikala len korendan, ola ka prodolžinen te bajron sar jekh otrovno rastenie hem te keren amenge šteta (Jak. 1:14, 15).

11. Koja tani jekh garavdi opasnost so mora te izbegina la, hem soske?

¹¹ Jekh garavdi opasnost tani o lošno društvo? Razmislin baši akaja situacija. Kerea nekasaja buti so nane Svedoko. Adaleske so mangea to kolega te ovel le šukar mislenje bašo e Jehovaskere svedokija sian lea ljubezno hem pomožinea le. Ponekogaš šaj čak zaedno kerea lea pauza. Palo nesavo vreme počesto sian lea ki pauza. Ko nesave situacie počminela te kerel lafi bašo nemoralna bukja. Prvo ignoririnea adava, ama pokasno navikninea ko asavke razgovorija hem na smetinela tut više adava. Tegani vikinela tut zaedno te ikljoven pali buti. Palo nesavo vreme počminea više te razmisline sar leste. Hem nane te nakhel but vreme keda ka počmine te ponašine tut sar leste. Džangjola pe, amen siem ljubezna hem poštujnaja sarinen, ama na smejnaja te bistra kaj amaro društvo šaj but te vlijajnel upri amende (1. Kor. 15:33). Sar so pottikningja amen o Isus, ako pazinaja so keraja nane te družina amen okolencar so  na živinena sprema e Jehovaskere merilija (2. Kor. 6:15). Ka dikha i opasnost hem ka izbegina la.

12. So valjani sine e Isuseskere učenikija te keren džikote adžikergje te avel o krajo?

¹² O Isus manglja leskere učenikija te oven zafatime džikote adžikerena sine te avel o krajo. Adaleske dengja len važno zadača. Zapovedingja lenge te propovedinen o šukar haberi „ko Erusalim, ki celo Judeja, ki Samarija hem ko najdur thana ki phuv“ (Dela 1:6-8). Sine len bari buti te keren. Adalea so sine zafatime te završinen akaja zadača ola koristingje plo vreme najšukar so šaj.

13. Soske valjani te koristina amaro vreme najšukar so šaj? (Kološanite 4:5).

¹³ Čitin Kološanite 4:5. Te šaj te pazina so keraja valjani šukar te razmislina sar koristinaja amaro vreme. Sekole jekheske amendar šaj te slučinen pe bukja so na očekujnaja len (Prop. 9:11). Amaro životo šaj taro jekh puti te završinel.

14-15. Sar šaj najšukar te koristina amaro vreme? (Evreite 6:11, 12). (Dikh hem i slika.)

¹⁴ Keda keraja e Jehovaskiri volja hem ovaja lea popaše tegani koristinaja amaro  vreme najšukar so šaj (Jovan 14:21). Valjani te ova „duhovno zorale, istrajna, sekogaš zafatime ki buti e Gospodareske“ (1. Kor. 15:58). Tegani keda ka avel o krajo, bizi razlika dali o krajo akale svetoskoro ili o krajo amare životoskoro, nane te pera pišmani soske na koristingjem amaro vreme najšukar so šaj (Mat. 24:13; Rim. 14:8).

¹⁵ Avdive o Isus ponadari da vodinela ple učenikon džikote propovedinena bašo e Devleskoro Carstvo ki celo phuv. Ov ikergja pe ko plo lafi. Preku e Jehovaskiri organizacija o Isus obučinela amen sar te propovedina hem dela amen sa so valjani amenge te šaj te završina adaja zadača (Mat. 28:18-20). Amen keraja amaro delo agjaar so daja amendar sa te propovedina hem te poučina e javeren hem agjaar so ačhovaja džangavde džikote adžikeraja o Jehova te anel o krajo akale svetoskoro. Ako primeninaja o sovet taro Evreite 6:11, 12, ka ikera amen cvrsto ki amari vera dži ko krajo e svetoskoro. (Čitin.)

16. So siem odlučna te kera?

¹⁶ O Jehova više odredingja dive hem saati keda ka anel o krajo e Satanaskere svetoske. Keda ka avel adava dive o Jehova sigurno ka ispolninel sa o proroštvija soj tane pišime ko leskoro Lafi. Ama ponekogaš šaj te mislina amenge kaj o krajo tano panda dur. Sepak, e Jehovaskoro dive „nane te kasninel“ (Avak. 2:3). Adaleske, te ova odlučna ponadari da te dikha ko Jehova agjaar so spremno ka adžikera e Devle so ka spasinel amen (Mih. 7:7).