1. Ko so pottikninela o Jehova ple slugen? (Dikh hem i slika.)

 KASTAR šaj te roda uteha hem vodstvo? Amen džanaja kaj šaj te roda akala bukja taro Jehova ki molitva. O Jehova pottikninela amen te kera baš adava. Ov mangela te molina amen sekogaš (1. Sol. 5:17). Amen šaj slobodno te molina amen leske hem te roda leskoro vodstvo baši sekoja situacija ko amaro životo (Izr. 3:5, 6). Adaleske so ov tano darežlivo amen šaj te molina amen e Jehovaske kobor so mangaja.

2. So ka dikha ki akaja statija?

² Amen but ceninaja adava so šaj te molina amen. Sepak, adaleske so siem but zafatime šaj te ovel amenge pharo te arakha vreme te molina amen. Isto agjaar, šaj halilem kaj valjani te podobrina amare molitve. Ama na siem mukhle korkori, blagodarna siem so ki Biblija šaj te arakha pottik hem vodstvo baši molitva. Ki akaja statija ka dikha sar šaj te odvojna amenge vreme baši molitva agjaar so ka dža palo primer e Isuseskoro. Isto agjaar ka dikha sar šaj te podobrina amare molitve agjaar so ki lende ka vklučina pandž važna bukja.

3. So halilo o Isus baši molitva?

³ O Isus halilo kaj amare molitve tane but važna e Jehovaske. But vreme angleder te avel ki phuv, ov dikhlja sar leskoro Dad odgovorinela ko molitve e verna muršengere hem džuvlengere. Na primer, o Isus sine ple Dadea keda ov odgovoringja ko iskrena molitve e Anakere, e Davideskere,  e Ilijaskere hem panda bute verna slugengere (1. Sam. 1:10, 11, 20; 1. Car. 19:4-6; Ps. 32:5). Adaleske na iznenadinela amen adava so o Isus pottikningja ple učenikon te molinen pe često hem te ovel len doverba kaj o Jehova ka šunel len (Mat. 7:7-11).

4. So sikljovaja taro Isus baši molitva?

⁴ Adalea so molingja pe e Jehovaske, o Isus dengja šukar primer ple sledbenikonge. Džikote trajnela sine leskiri služba, o Isus but puti molinela pe sine. Ov valjani sine te odvojnel peske vreme baši molitva soske sine but zafatimo hem retko sine korkori (Mar. 6:31, 45, 46). Adaleske uštela sine rano sabajle te šaj te ovel le vreme korkori te molinel pe e Jehovaske (Mar. 1:35). Najhari ki jekh prilika, ov molingja pe celo rat angleder te anel važno odluka (Luka 6:12, 13). Hem i rat angleder te merel, o Isus but puti molingja pe te šaj te završinel o najpharo delo tari pli zadača ki phuv (Mat. 26:39, 42, 44).

5. Sar šaj te dža palo primer e Isuseskoro keda molinaja amen?

⁵ E Isuseskoro primer sikavela amenge kaj bizi razlika kobor siem zafatime, amen valjani te odvojna amenge vreme baši molitva. Isto sar o Isus, amen da šaj ka valjani te ušta rano sabajle ili te ačhova hari pokasno rakjate te šaj te molina amen. Ako keraja agjaar, ka sikava e Jehovaske kaj ceninaja akava skapoceno poklon. Jekh phen so vikinela pe Lin setinela pe kobor sine blagodarno keda prvo puti doznajngja kaj isi amen čest te molina amen. Oj vakerela: „Keda haliljum kaj šaj te kerav lafi e Jehovaske ko bilo savo vreme, adava pomožingja man te dikhav ki leste sar mlo paše amal hem te ovel man želba te kerav mle molitve pošukar“. Sigurno but džene amendar mislinena isto. Akana te dikha pandž važna bukja bašo kola so šaj te molina amen.

6. Sprema Otkrovenie 4:10, 11, so zaslužinela o Jehova?

⁶ Falin e Jehova. Ki jekh vizija, o apostol Jovan dikhlja 24 starešine ko nebo so obožavinena e Jehova. Ola falingje e Devle hem vakergje kaj ov zaslužinela i slava, i čest hem i mokj. (Čitin Otkrovenie 4:10, 11.) Isto agjaar, e verna angelen da  isi len but pričine te falinen e Jehova. Ola tane lea ko nebo hem pendžarena le but šukar. Taro bukja so kerela len o Jehova, ola šaj te dikhen save osobine isi le. E Jehovaskere postapke pottikninela len te falinen le (Jov 38:4-7).

7. Bašo so šaj te falina e Jehova?

⁷ Amen da valjani te falina e Jehova ko amare molitve. Šaj te kera adava agjaar so ka vakera leske so mangaja hem so ceninaja ki leste. Džikote čitinaja hem proučinaja i Biblija, valjani te trudina amen te arakha e Jehovaskere osobine kola so posebno privlečinena amen ki leste (Jov 37:23; Rim. 11:33). Tegani, vaker adava e Jehovaske ki molitva. Isto agjaar, šaj te falina e Jehova bašo adava so pomožinela amenge hem sa amare phralenge hem phenjenge. Ov na čhinavela te grižinel pe amenge hem te zaštitinel amen (1. Sam. 1:27; 2:1, 2).

8. Kola tane nesave taro but bukja baši kolende so šaj te blagodarina amen e Jehovaske? (1. Solunjanite 5:18).

⁸ Blagodarin tut e Jehovaske. Isi amen but pričine soske šaj te blagodarina amen e Jehovaske ki molitva. (Čitin 1. Solunjanite 5:18.) Šaj te blagodarina amen leske baši sekoja šukar buti so isi amen, ustvari sekova šukar poklon avela lestar (Jak. 1:17). Na primer, šaj te sikava amaro cenenje e Jehovaske baši amari šuži phuv hem bašo čudesna bukja so kergja len. Isto agjaar, šaj te vakera leske kobor siem blagodarna bašo amaro životo, amari familija, amare amala hem i nadež so isi amen. Hem šaj te blagodarina e Jehovaske bašo adava so šaj te ova lea amala.

9. Soske šaj ka valjani te bajrara amari blagodarnost bašo Jehova?

⁹ Šaj ka valjani but te trudina amen te razmislina taro kola pričine amen lično valjani te ova blagodarna e Jehovaske. Živinaja ko sveto kote so o manuša ni hari nane blagodarna. But puti o manuša koncentririnena pe ko adava so mangena te ovel len, namesto ko adava so više isi len. Ako mukhaja asavko stavi te vlijajnel upri amende tegani ka molina amen e Jehovaske samo keda ka valjani te roda lestar nešto. Te šaj te na slučinel pe adava valjani te prodolžina te bajrara hem te sikava amaro cenenje bašo sa so kerela amenge o Jehova (Luka 6:45).

10. Sar i blagodarnost pomožingja jekhe phenjake te istrajnel? (Dikh hem i slika.)

¹⁰ Ako siem blagodarna, adava ka pomožinel amen te istrajna keda isi amen pharipa. Te dikha jekh iskustvo tari Kijung-suk so arakhljola ki Stražarsko kula taro 15 januari 2015 berš. Lake arakhle rako kova so sigate širinela pe. Oj vakerela: „Akava nasvalipe but peravgja man. Osetingjum man sar te phene našavgjum sa hem but darava sine“. So pomožingja lake te ikljol ko krajo akale situacijaja? Oj vakerela kaj sekoja rat angleder te sovel uklela sine ko tavani hem glasno molinela pe sine e Jehovaske  hem vakerela sine pandž bukja baši kolende so sine blagodarno adava dive. Adava pomožingja la te smirinel pe hem pottikningja la te vakerel leske kobor but mangela le. Oj ki pli koža osetingja kobor o Jehova poddržinela ple verna slugen keda isi len nesave pharipa. Hem oj halili kaj amen isi amen poviše blagoslovija ko amaro životo namesto problemija. Isto sar akaja phen amen da isi amen but pričine te blagodarina amen e Jehovaske čak ako ko momenti nakhaja taro nesavo pharipe. Adava so ka sikava amari blagodarnost ki molitva šaj te pomožinel amen te istrajna hem te ačhova smirime.

11. Soske e Isuseskere učenikonge valjangja hrabrost otkeda o Isus irangja pe ko nebo?

¹¹ Rode taro Jehova hrabrost baši služba. Kratko angleder te iranel pe ko nebo, o Isus potsetingja ple učenikon baši zadača so dengja len, te svedočinen bašo leskoro anav „ko celo Erusalim, ki celo Judeja hem Samarija hem ko najdur thana ki phuv“ (Dela 1:8; Luka 24:46-48). Kratko palo adava o evrejska verska vodačija astargje e Petare hem e Jovane hem ingargje len ko sudsko sovet. Ola vakergje akale verna muršenge te čhinaven te propovedinen hem čak zakaningje pe lenge (Dela 4:18, 21). Sar reagiringje o Petar hem o Jovan?

12. Sprema Dela 4:29, 31, so kergje o učenikija?

¹² Keda zakaningje pe lenge o evrejska verska vodačija, o Petar hem o Jovan vakergje: „Sudinen korkori dali tano pravedno anglo Devel te šuna tumen, a na e Devle. Amen našti te na kera lafi bašo adava so dikhlem hem šungjem“ (Dela 4:19, 20). Keda o Petar hem o Jovan sine oslobodime, o učenikija molingje pe e Jehovaske bašo adava ponadari da te keren leskiri volja. Ola vakergje: „Pomožin tle slugenge ponadari da hrabro te vakeren tlo lafi“. O Jehova odgovoringja ki akaja iskreno molitva. (Čitin Dela 4:29, 31.)

13. So šaj te sikljova taro phral Džin-hjuk?

¹³ Amen da šaj te dža palo primer e apostolengoro agjaar so ponadari da ka propovedina, čak keda o vlastija vakerena amenge kaj mora te čhinava. Te dikha o primer e phraleskoro Džin-hjuk kova so sine phanlo adaleske so odbingja te džal ki vojska. Ko zatvor leskiri zadača sine te ingarel hajbaske hem javera bukja nesave zatvorenikonge so sine ki samica. Ov šaj sine te kerel lencar lafi samo bašo adava so valjani lenge, a bašo javera bukja, sar na primer baši Biblija, na smejnela sine te kerel lencar lafi. Ov molingja pe te ovel hrabro hem taktično te šaj te kerel lafi bašo čačipe ki sekoja prilika so ka ovel le (Dela 5:29). Ov vakerela: „O Jehova odgovoringja ko mle molitve agjaar so dengja man hrabrost hem mudrost te počminav but bibliska kursija anglo lengere kjelie, kola so trajnena sine po pandž minutija. A akšameske pišinava sine pismija kola so dava sine e zatvorenikonge o javer dive“. Amen da šaj te ova sigurna kaj o Jehova ka pomožinel amen te kera amari služba. Isto sar o Džin-hjuk, šaj te molina amen baši hrabrost hem mudrost.

14. So šaj te pomožinel amen keda isi amen problemija? (Psalm 37:3, 5.)

¹⁴ Rode pomoš taro Jehova te šaj te ikljove ko krajo e problemencar. But džene amendar cidena muke adaleske so isi len nesavo nasvalipe ili emocionalno problemi, mulo lendar nekoj so mangena le, problemija ki familija, progonstvo ili nešto javer. A i pandemija hem o vojne  kergje te ovel amenge panda popharo te ikljova ko krajo akale bukjencar. Ama ma bistre, tu šaj te vakere e Jehovaske sa so pašljola tuke ko vilo. Objasnin leske tli situacija sar so bi vakerea jekhe paše amaleske hem ov uverimo kaj o Jehova „ka pomožinel tut“. (Čitin Psalm 37:3, 5.)

15. Sar i molitva šaj te pomožinel amen te istrajna ko nevolje? Vaker primer.

¹⁵ I molitva šaj te pomožinel amen „te istrajna ko nevolje“ (Rim. 12:12). O Jehova džanela taro so nakhena leskere sluge hem „šunela keda rodena le“ (Ps. 145:18, 19). I Kristi, jekh pionerka so isi la 29 berš, uveringja pe ko akava. La taro jekh puti počmingja te ovel la pharo nasvalipe hem adaleske peli ki bari depresija. Pokasno doznajngja kaj lakiri daj dobingja nasvalipe kolestar so šaj merela pe. I Kristi vakerela: „But molinava man sine e Jehovaske te del man sila koja so sine mange potrebno te šaj te nakhavav sekova dive. Trudinava man sine te ovel man šukar duhovno rutina agjaar so džava sine ko sostanokija hem ikerava sine mli lično studija“. Oj ponadari vakerela: „I molitva pomožingja man te nakhav taro akala phare vremija. Adava so džanava sine kaj o Jehova tano sekogaš uzi mande but utešingja man. Iako mlo sastipe na ulo odma pošukar, sepak o Jehova odgovoringja ko mle molitve agjaar so dengja man andruno mir“. Nikogaš ma te bistra kaj „o Jehova džanela sar te spasinel taro iskušenie e manušen so služinena samo leske“ (2. Pet. 2:9).

16. Soske valjani amenge e Jehovaskiri pomoš te šaj te borina amen protiv o iskušenie?

¹⁶ Rode pomoš taro Jehova te šaj te na pere ko iskušenie. Adaleske so siem nesovršena amen mora postojano te borina amen te šaj te na kera nešto soj pogrešno. O Satana kerela sa te šaj adaja borba te ovel kobor so šaj pophari. Jekh način sar probinela te pherel amari godi tano agjaar so koristinela i nemoralno zabava. Asavki zabava šaj te pherel amari godi rumime mislencar  — misle kola so šaj te meljaren amari andruni ličnost hem šaj te ingaren amen dži ko seriozno grevo (Mar. 7:21-23; Jak. 1:14, 15).

17. So valjani te kera otkeda ka molina amen baši pomoš te šaj te na pera ko iskušenie? (Dikh hem i slika.)

¹⁷ Valjani amenge e Jehovaskiri pomoš te šaj te borina amen protiv o iskušenie te kera adava soj pogrešno. O Isus ki pli najpendžardi molitva spomningja akala lafija: „Ma mukh te pera ko iskušenie, nego spasin amen taro lošno“ (Mat. 6:13). O Jehova mangela te pomožinel amenge, ama amen mora te roda lestar adava. Isto agjaar mora te postapina sprema amare molitve. Valjani te izbegina te čitina hem te šuna pogrešna bukja kola soj popularna ko e Satanaskoro sveto (Ps. 97:10). Valjani te phera amari godi šukar mislencar agjaar so ka čitina hem ka proučina i Biblija. Javer buti so ka pomožinel amenge te zaštitina amare misle tani ako džaja ko sostanokija hem ki služba. A o Jehova vetinela amenge kaj nane te dozvolinel te ova iskušime poviše taro adava so šaj te izdržina (1. Kor. 10:12, 13).

18. Keda kerela pe lafi baši molitva, so valjani sarine te kera?

¹⁸ Sekova jekh amendar valjani te molinel pe sar nikogaš angleder te šaj te ačhovel verno e Jehovaske ko akala phare posledna dive. Odvojn tuke vreme sekova dive te moline tut taro vilo. O Jehova mangela te phrave leske tlo vilo ki molitva (Ps. 62:8). Falin e Jehova hem blagodarin leske bašo sa so kerela. Rode lestar pomoš te ove hrabro ki služba. Molin le te pomožinel tut te istrajne bilo savo problemi hem te na pere ko iskušenie kova so šaj isi tut. Ma dozvolin nikoj ili ništo te čhinavel tut redovno te moline tut e Jehovaske. Ama, sar o Jehova odgovorinela ko amare molitve? O odgovor taro akava važno pučibe ka dikha le ki sledno statija.