1-2. Soske na valjani te obeshrabrine tut ako panda na sian spremno te krstine tut? (Dikh i slika tari naslovno strana.)

 AKO MANGEA te krstine tut tegani čhivgjan tuke jekh but šuži cel. Dali sian spremno akana te krstine tut? Ako mislinea kaj sian spremno hem o starešine odobrinena adava tegani ma adžiker, krstin tut ki sledno prilika. Ako kerea adava adžikerena tut bare bereketija ki služba bašo Jehova.

² A so ako vakerena tuke kaj valjani panda nešto te kere angleder te krstine tut, ili šaj tu korkori sian svesno bašo adava? Tegani ma obeshrabrin tut. Tu šaj te napredujne hem te ispolnine adaja cel, bizi razlika dali sian terno ili phuro.

3. So pučlja o etiopsko službeniko e Filipe, hem savo pučibe šaj te puča amen? (Dela 8:36, 38).

³ Čitin Dela 8:36, 38. Jekh etiopsko službeniko pučlja e Filipe: „So čhinavela man te krstinav man?“ Akava Etiopjani mangela sine te krstinel pe, ama dali sine čače spremno baši asavki važno odluka?

4. Sar o Etiopjani sikavgja kaj mangela te džanel nešto poviše?

⁴ O Etiopjani gelo ko Erusalim te obožavinel e Devle (Dela 8:27). Znači najverojatno ov sine jekh prozeliti kova so prifatingja i evrejsko religija. Sigurno ov doznajngja bašo Jehova taro Hebrejska sveta spisija. Sepak manglja te doznajnel poviše. Ustvari, so kerela sine akava  Etiopjani keda o Filip arakhlja le? Ov čitinela sine o svitok taro Isaija (Dela 8:28). Ko akava svitok sine hor bibliska čačipa. Ov na sine zadovolno te sikljovel samo nekobor osnovna bukja, nego manglja te doznajnel nešto poviše.

5. Sar o Etiopjani primeningja adava so siklilo?

⁵ Akava etiopjani služinela sine sar važno službeniko e caricake tari Etiopija hem „sine odgovorno upro celo lakoro barvalipe“ (Dela 8:27). Znači iako sine but zafatimo hem sine le but odgovornostija, sepak odvojngja vreme te obožavinel e Jehova. Ov na manglja samo te džanel o čačipe, nego postapingja sprema adava so džanlja. Adaleske patujngja čak tari Etiopija dži ko Erusalim te šaj ko hrami te obožavinel e Jehova. Sigurno bašo akava drumo valjangja leske but vreme hem pare, ama keda kerela pe sine lafi bašo Jehova ov sine spremno te kerel sa.

6-7. Sar o Etiopjani bajrarela sine plo mangipe sprema o Jehova?

⁶ O Etiopjani doznajngja taro Filip nesave neve važna čačipa, sar soj kaj o Isus tano o Mesija (Dela 8:34, 35). Adava so doznajngja so o Isus kergja baši leste sigurno but pogodingja le. So kergja odkeda doznajngja adala bukja? Ov šaj sine te ačhol sar so sine, jekh evrejsko prozeliti so o javera poštujnena sine. Namesto adava, ov poviše manglja e Jehova hem leskere Čhave. Adava pottikningja le te anel i najvažno odluka ko plo životo — te krstinel pe hem te ovel sledbeniko e Isuseskoro. O Filip dikhlja kaj akava manuš sine spremno, hem adaleske krstingja le.

⁷ Ako džaja palo primer e Etiopjaneskoro, šaj te ove spremno krstibaske. Tegani tu da šaj te vakere „so čhinavela man te krstinav man?“ Akana te dikha sar šaj tu da te kere o ista bukja so kerela sine o Etiopjani: Ov ponadari da sikljola sine bašo Jehova, postapinela sine sprema adava so sikljovela hem bajrarela sine plo mangipe sprema o Devel.

8. Sprema Jovan 17:3, so valjani te kere?

⁸ Čitin Jovan 17:3. Dali akala lafija e Isuseskere pottikninena tut te proučine i Biblija? Bute dženen pottikningje. Ama dali akala lafija pottikninena amen ponadari da te sikljova? Oja. Nikogaš nane te čhinava „šukar te pendžara... e jekhe čačutne Devle“ (Prop. 3:11). Ki celi večnost ka prodolžina te sikljova baši leste. So poviše sikljovaja, doborom popaše ka ova e Jehovaja (Ps. 73:28).

9. So valjani te kera otkeda siklilem o osnovna bibliska čačipa?

 ⁹ Džangjola pe, te šaj te sikljova bašo Jehova valjani te počmina e ednostavna bukjencar. Ko plo pismo dži ko Evreija, o apostol Pavle bašo ednostavna sikljojba vakergja kaj tane „osnovna bukja“. Ov na manglja te vakerel kaj o „osnovna sikljojba“ nane važna, namesto adava sporedingja len thudea kova so hraninela jekhe bebe (Evr. 5:12; 6:1). Ama, isto agjaar pottikningja sa e hristijanen te napredujnen hem te sikljoven o pohor čačipa taro e Devleskoro Lafi. Dali barili tli želba bašo pohor bibliska čačipa? Dali mangea ponadari da te napredujne hem te sikljove bašo Jehova hem baši leskiri namera?

10. Soske nesave dženenge tano pharo te proučinen?

¹⁰ Sepak, bute dženenge tano pharo te proučinen. Sar tano tuja? Dali ki škola sian sine šukar učeniko? Dali uživinea sine te učine, ili mislinea kaj na ovela tut čitibaske lila? Ako oja, tegani na sian korkori o Jehova šaj te pomožinel tut. Ov tano sovršeno hem o Najšukar Učiteli so postojnela.

11. Sar o Jehova sikavela kaj tano o „Najbaro Učiteli“?

¹¹ I Biblija vakerela kaj o Jehova tano amaro Najbaro Učiteli (Isa. 30:20, 21). Ov tano Učiteli kova soj strplivo, ljubezno hem haljovela amen. Ov rodela o šukar ko ple učenikija (Ps. 130:3). Nikogaš na očekujnela amendar poviše taro adava so šaj te kera. Ma bistre, o Jehova tano adava so stvoringja i godi koja soj but čudesno (Ps. 139:14). Bijame siem želbaja te sikljova. Amaro Stvoriteli mangela ki celi večnost te sikljova hem te uživina ko adava. Adaleske mudro tano panda akana te razvina želba bašo bibliska čačipa (1. Pet. 2:2). Čhiv tuke celija so šaj te ispolnine len, hem redovno čitin hem proučin i Biblija (Is. Nav. 1:8). O Jehova ka pomožinel tut sa poviše te uživine ko čitibe hem ko sikljojbe baši leste.

12. Soske valjani te proučina e Isuseskoro životo hem služba?

¹² Redovno odvojn tuke vreme te razmisline bašo e Isuseskoro životo hem služba. Ako mangaja te služina e Jehovaske but tano važno ko sa te dža palo e Isuseskoro primer, posebno ko akala phare vremija (1. Pet. 2:21). O Isus jasno vakergja ple učenikonge kaj ka ovel len problemija (Luka 14:27, 28). Ama ov sine uverimo kaj leskere sledbenikija šaj te ačhoven verna, isto sar leste (Jovan 16:33). Proučin e Isuseskoro životo hem čhiv tuke cel te dža palo leskoro primer sekova dive.

13. Bašo so valjani ponadari da te moline e Jehova, hem soske?

¹³ Nane dovolno samo te sikljova nešto, nego adava so sikljovaja valjani te pomožinel amen pošukar te pendžara e Jehova hem te razvina osobine sar soj vera hem mangipe sprema leste (1. Kor. 8:1-3). Džikote prodolžinea te sikljove, molin e Jehova te del tut pobari vera (Luka 17:5). Ov spremno ka odgovorinel ko asavke molitve. I čačutni vera koja so temelinela pe ko točno pendžaribe e Devle ka pomožinel tuke te napredujne (Jak. 2:26).

14. Sar o apostol Petar istakningja kobor tano važno te postapina sprema adava so sikljovaja? (Dikh hem i slika.)

¹⁴ O apostol Petar istakningja kobor tano važno e Hristoseskere sledbenikija ponadari da te primeninen adava so sikljovena. Ov spomningja o biblisko izveštaj  bašo Noe. O Jehova vakergja e Noeske kaj ko adava vreme ka uništinel e lošna manušen potopea. Adava so o Noe hem leskiri familija džanle kaj ka ovel Potop na sine dovolno te šaj te oven zaštitime. Primetin kaj o Petar kergja lafi bašo vreme angleder o Potop „džikote gradinela pe sine i arka“ (1. Pet. 3:20). O Noe hem leskiri familija postapingje sprema adava so siklile taro Devel agjaar so gradingje i arka — jekh baro brodi (Evr. 11:7). Tegani o Petar sporedingja adava so kergja o Noe e krstibaja, ov pišingja: „O krstibe, soj pretstavimo adalea, akana spasinela tumen da“ (1. Pet. 3:21). Ki nesavi smisla adava so kerea te šaj te krstine tut šaj te sporedinel pe adalea so beršencar kergje o Noe hem leskiri familija te gradinen i arka. So valjani te kere te šaj te spremine tut bašo krstibe?

15. So sikavela kaj čače kainaja amen?

¹⁵ Jekh taro prva bukja so mora te kera len tano taro vilo te kaina amen bašo amare grevija (Dela 2:37, 38). Ako čače kainaja amen, tegani čače šaj te kera promene. Dali čhinavgjan te kere o bukja so na mangela o Jehova sar soj te živinel pe nemoralno, te pušinel pe ili te koristinel pe vulgarna lafija? (1. Kor. 6:9, 10; 2. Kor. 7:1; Ef. 4:29). Ako panda na uspejngjan ko adava, tegani prodolžin te trudine tut te kere adala promene. Ker lafi okolea so proučinela tuja ili rode pomoš hem vodstvo taro starešine. Ako sian terno hem živinea tle roditelencar, rode lendar pomoš te šaj te čhinave e lošna navikencar kola so šaj sprečinena tut te krstine tut.

16. Soj tano vklučimo ki jekh šukar duhovno rutina?

¹⁶ Isto agjaar važno tano te ovel tut šukar duhovno rutina. Ko adava tano vklučimo te ove prisutno ko sostanokija hem te učestvujne ki lende (Evr. 10:24, 25). Ako dobingjan i prednost te dža ki služba, tegani ker adava redovno. So poviše ka propovedine, doborom poviše ka uživine ki služba (2. Tim. 4:5). Ako sian terno hem živinea tle roditelencar puč tut: „Dali mle roditelija mora sekogaš te vakeren mange kaj valjani te džav ko sostanokija ili ki služba? Ili me korkori kerava adava?“  Adalea so tu korkori kerea akala bukja sikavea kaj isi tut vera ko Jehova, kaj mangea le hem kaj sian blagodarno bašo bukja so dengja tut. Akala tane poklonija so šaj te da len e Jehovaske (2. Pet. 3:11; Evr. 13:15). Keda spremno daja bizo nekoj te terinel amen, adava radujnkerela e Jehova. (Sporedin 2. Korinkjanite 9:7.) Keraja akava soske siem radosna keda daja amaro najšukar e Jehovaske.

17-18. Koja osobina ka pomožinel tuke te napredujne te šaj te krstine tut, hem sar ka pomožinel tut? (Izreki 3:3-6).

¹⁷ Džikote napredujnea te krstine tut ka oven tut problemija. Nesave šaj te asan tuke baši tli vera hem šaj čak te protivinen pe tuke (2. Tim. 3:12). Šaj trudinea tut te čhinave nesave lošno navikaja, ama ponekogaš perea ko iskušenie palem te kere adava. Ili šaj sian razočarimo soske našti te ispolnine tli cel. So ka pomožinel tuke te istrajne? Jekh važno osobina — o mangipe sprema o Jehova.

¹⁸ Tlo mangipe sprema o Jehova tani jekh but šuži osobina. Adava tano o najšukar so šaj te ovel tut. (Čitin Izreki 3:3-6.) O baro mangipe sprema o Devel ka pomožinel tuke te ikljove ko krajo e problemencar. I Biblija but puti kerela lafi bašo e Jehovaskoro verno mangipe sprema ple sluge. Adava so e Jehova isi le verno mangipe značinela kaj nikogaš nane te mukhel ple slugen ili te čhinavel te mangel len (Ps. 100:5). Tu sian kerdo sprema e Devleskoro liko (1. Moj. 1:26). Sar šaj te sikave asavko mangipe?

19. Sar šaj te bajrare tli blagodarnost bašo adava so kergja tuke o Jehova? (Galatite 2:20).

¹⁹ Prvo ov blagodarno (1. Sol. 5:18). Sekova dive puč tut: „Sar o Jehova sikavgja kaj mangela man?“ Palo adava ma bistre ki molitva te blagodarine tut e Jehovaske hem spomnin konkretna bukja so kergja tuke. Dikh ko bukja so kergja len o Jehova taro mangipe sar nešto so kergja tuke lično, baš sar so kergja o apostol Pavle. (Čitin Galatite 2:20.) Puč tut: „Dali me da mangava te sikavav leske kaj mangava le?“ Tlo mangipe sprema o Jehova ka pomožinel tuke uspešno te istrajne keda isi tut iskušenija hem problemija. Adava ka pottikninel tut te ovel tut šukar duhovno  rutina hem sekova dive te sikave tle Dadeske kaj mangea le.

20. So mora te kere te šaj te de lafi e Jehovaske, hem kobor tani važno adaja odluka?

²⁰ Sar nakhela o vreme, tlo mangipe sprema o Jehova ka pottikninel tut te vakere jekh posebno molitva — te de lafi e Jehovaske kaj ka služine leske. Ma bistre, keda ka kere akava ka ovel tut jekh but šuži nadež, šaj te pripadine e Jehovaske ki celi večnost. Keda dea zavet e Jehovaske, tu dea lafi kaj ka služine leske hem ko šukar hem ko lošno. Akava zavet dela pe samo jekh puti. Akaja tani čače seriozno odluka. Razmislin bašo akava: Ka ane but odluke ko tlo životo, nesave lendar ka oven but šukar, ama nijekh nane te ovel pošukar tari adaja te de lafi e Jehovaske kaj ka služine leske celo životo (Ps. 50:14). O Satana ka mangel te šudrarel tut taro Jehova te šaj te na ačhove leske verno. Nikogaš ma dozvolin o Satana te pobedinel! (Jov 27:5). Tlo mangipe sprema o Jehova ka pomožinel tut te ikere tlo zavet hem te ove sa popaše tle nebesno Dadea.

21. Soske šaj te vakera kaj o krstibe nane krajo nego samo početok?

²¹ Otkeda dengjan zavet e Jehovaske, ker lafi e starešinencar taro tlo sobranie bašo sledno važno čekori so valjani te kere. Ama nikogaš ma bistre, o krstibe nane krajo nego samo početok. Početok kova so phravela tuke drumo te služine e Jehovaske ki celi večnost. Adaleske panda akana bajrar tlo mangipe sprema o Jehova. Čhiv tuke celija so ka pomožinen tuke sekova dive te bajrare tlo mangipe sprema leste, a o mangipe ka pottikninel tut te krstine tut. Adava ka ovel but šužo dive. Ama o krstibe tano samo početok. Adaleske tlo mangipe sprema o Jehova hem leskoro Čhavo neka bajrol ki celi večnost!