Sekova berš, but neaktivna phralja hem phenja avena ki Spomen-svečenost. Ola počmingje te prastan ki trka e životoskiri, ama taro različna pričine ola umoringje pe, nesave taro adala pričine objasnime tane ki brošura Vrati se kaj Jehova (Ev 12:1). Ama, o neaktivna panda tane važna e Jehovaske adaleske so ov kingja len ple Čhaveskere ratea (De 20:28; 1Pe 1:18, 19). Sar šaj amen te pomožina lenge te iranen pe ko sobranie?

O starešine rodena hem mangena te pomožinen lenge isto sar jekh grižlivo pastiri so rodela e bakhre kova so našavdilo (Lk 15:4-7). Akava sikavela kobor o Jehova mangipaja grižinela pe adalenge soj neaktivna (Ere 23:3, 4). Sarine amen šaj te pomožina len, a na samo o starešine. Adava so ka ova ljubezna hem sočuvstvitelna lencar ka radujnel e Jehova hem ka ova nagradime (Iz 19:17; De 20:35). Adaleske razmislin kas šaj te ohrabrine, hem ker adava kobor so šaj posigate!

MUKH O VIDEOKLIPI OHRABRIN ADALEN SOJ NEAKTIVNA HEM RAZMISLIN BAŠO AKALA PUČIBA:

• So kergja i Abi otkeda dikhlja jekhe phenja so na pendžarela la sine?

• Soske valjani te kera lafi e starešinencar ako mangaja te pomožina nekaske soj neaktivno?

• Sar spremingja pe i Abi angleder te džal dujto puti ki Laura?

• Sar i Abi sikavgja upornost, strplivost hem mangipe džikote trudinela pe sine te ohrabrinel e Laura?

• So šaj te sikljova tari sporedba so vakergja o Isus ko Luka 15:8-10?

• Save bereketija sine keda sarine trudingje pe te pomožinen e Laurake?