Živinaja ko sveto kote so o šukar tano lošno, a o lošno tano šukar (Isa 5:20). Žalno tano so nesave manuša kerena bukja so mrzinela o Jehova, sar na primer, na ponašinena pe sar so valjani e manušencar taro isto pol. Nesave součenikija ili nekoj javer šaj ka mangen te čhiven tle čhave te postapinel sar lende. Sar šaj te pomožine tle čhaveske ispravno te postapinel ko asavke situacie?

Angleder spremin tle čhave agjaar so ka sikave le bašo e Jehovaskere merilija (3Mo 18:3). Postepeno, sprema leskere berša, vaker leske so vakerela i Biblija bašo seksualna odnosija (5Mo 6:7). Puč tut: „Dali pomožingjum mle čhaveske te haljovel kova tano o ispravno hem neispravno način te sikavel pe mangipe sprema leste, kobor tano važno te uravel pe pristojno hem kobor tano važno o javera te poštujnen leskiri privatnost? Ka džanel li mlo čhavo so te kerel ako nekoj mangela te sikavel leske pornografija ili ako nekoj rodela lestar te kerel nešto so na mangela o Jehova?“ Ako angleder vakerea tle čhavenge adava so valjani te džanen, ka zaštitine len taro but problemija (Iz 27:12; Pro 7:12). Adalea so ka kere tle čhavencar lafi baši akaja tema, ka sikave lenge kaj mangea len but hem kaj dikhea len sar skapoceno nasledstvo taro Jehova (Ps 127:3).

DIKH O VIDEOKLIPI KER TUKE KHER SO KA IZDRŽINEL SA — ARAKH TLE ČHAVEN TARO „ADAVA SOJ LOŠNO“, A PALO ADAVA ODGOVORIN KO AKALA PUČIBA:

• Soske nesave roditelenge nane lokho te keren lafi pumare čhavencar bašo seksualna odnosija?

• Soske o roditelija valjani te opomeninen pumare čhaven hem te vospitinen len agjaar sar so vakerela o Jehova? (Ef 6:4).

• Kola bukja tari e Jehovaskiri organizacija šaj te koristinen o roditelija te šaj te keren lafi pumare čhavencar bašo seksualna odnosija? (w19.05 12, ramka).

• Soske valjani redovno te komunicirine tle čhavencar panda angleder te pojavinen pe problemija?