Zamislin tuke kaj živinea ki Galileja ko vreme e Isuseskoro. Aljan ko Erusalim te slavine o Prazniko e senicengoro. I diz tani pherdi manušencar so ale taro dur thana bašo akava prazniko. Tu mangea te de žrtva e Jehovaske. Adaleske leljan tuja buzni, hem džaja dži ko hrami taro tesna ulice kola soj pherde manušencar. Keda resea, ko hrami isi but javera da manuša kola so isto agjaar adžikerena te den žrtva. Konečno, alo tlo redo te de i buzni e sveštenikonge. Ko adava momenti setinea tut kaj to phral, kova so šaj tano negde adathe ili ki diz, isi le nešto protiv tute. O Isus objasningja so valjani te kere. (Čitin Matej 5:24.) Sar šaj tu hem to phral soj tuke holjamo te oven ko mir sar so vakergja o Isus? Ki ramka soj tele, obeležin o točna odgovorija.

TU VALJANI...

• te kere lafi tle phralea samo ako mislinea kaj isi le šukar pričina te ovel tuke holjamo

• te trudine tut te isprajne tle phrale ako dikhea kaj tano but čuvstvitelno ili vakerela kaj tu da sian krivo bašo problemi

• te šune šukar tle phrale džikote vakerela tuke sar osetinela pe, pa čak ako na haljovea le šukar, iskreno izvinin tut bašo adava so osetinela pe agjaar ili bašo adava so povredingjan le nenamerno

OV VALJANI...

• te rodel o javera taro sobranie te poddržinen le agjaar so ka vakerel lenge kobor grešingjan leske

• te kritikujnel tut, te vakerel sekova detali tari tli greška, hem te rodel te priznajne kaj sian krivo

• te dikhel i poniznost hem i hrabrost so aljan ki leste te phene tli greška, hem te prostinel tuke taro vilo

Iako avdive na daja životinska žrtve, sprema o lafija e Isuseskere, sar amaro odnos e phralencar vlijajnela upri amari služba bašo Jehova?