Vakerela pe kaj amal tano „nekoj soj paše e javereja hem sikavela leske poštovanje hem mangipe“. Na primer, o David hem o Jonatan sine but paše amala, otkeda o David mudargja e Golijate (1Sa 18:1). E soldujen sine len osobine kola so kerena sine te mangen te oven amala jekh jekhea. Adaleske, šukar amala tane okola so šukar pendžarena pe. Te šaj te pendžare šukar e javeren valjani vreme hem trudo. Sepak, ko socijalna mreže, o manuša šaj te oven nekasaja „amala“ samo ako mečinena jekh klik. Adaleske so o manuša ko internet šaj točno te planirinen so ka vakeren hem šaj te kontrolirinen savo mislenje e javeren ka ovel baši lende, lokho tano te garaven koj tane čače ola. Adaleske šukar tano te pazina kas prifatinaja te oven amare amala ko socijalna mreže. Ma dara te odbine ili te na prifatine nesave nepoznato manuše so mangela te ovel tuja amal hem te misline kaj adalea šaj te povredine leskere čuvstvija. Adaleske so isi opasnost, nesave odlučingje te na koristinen socijalna mreže. Ama, ako odlučingjan te koristine socijalna mreže, so valjani te ovel tut ki godi?

DIKH O KLIPI PAMETNO KORISTIN O SOCIJALNA MREŽE, A PALO ADAVA ODGOVORIN KO AKALA PUČIBA:

• Bašo so valjani te razmisline angleder te čhive komentarija ili slike?

• Soske valjani šukar te birine tle onlajn amalen?

• Soske valjani te ograničine kobor vreme ka nakhave ko socijalna mreže? (Ef 5:15, 16)