O Isus šaj sine te svedočinel neformalno jekhe Samarjankake soske prvo počmingja razgovor laja. Sar šaj amen da te sikljova te počmina razgovor manušencar so na pendžaraja len?

• Ov ljubezno hem ker lafi e manušencar. Iako o Isus sine umorno, ov počmingja te kerel lafi e Samarjankaja agjaar so rodingja latar te del le pani. Tu da šaj te počmine razgovor adalea so ka pozdravine le ljubezno, hem palo adava šaj te spomnine nešto bašo vreme ili bašo nesavo nastan so ulo. Ma bistre, kaj prvo mangea samo te počmine razgovor, adaleske ker lafi bašo nešto so mislinea kaj ka interesinel e manuše. Ako ov nane spremno bašo razgovor, na našavea ništo. Šaj te probine te kere lafi nesave javere manušea. Molin e Jehova te del tut hrabrost (Ne 2:4; De 4:29).

• Ov spremno te vakere nešto bašo šukar haberi, ama ma sigjar. Mukh o razgovor te razvinel pe prirodno. Ako sian napadno, o manuš šaj ma te osetinel pe šukar hem ma te mangel te kerel poviše lafi. Ma razočarin tut ako na uspejngjan te svedočine leske. Ako daraja te svedočine neformalno, probin te počmine razgovor bizo te ovel tut cel te svedočine. [Mukh o prvo videoklipi hem diskutirinen baši leste.]

• Trudin tut korkori te kere prilika te svedočine agjaar so ka spomnine nesavi interesno buti kolate sian uverimo. Akava šaj te bajrarel o interes e manušeskoro hem te pottikninel le te pučel nešto. O Isus vakergja nekobor interesna bukja so pottikningje e Samarjanka te pučel le pučiba. Vsušnost, keda počmingja te kerel lafi bašo šukar haberi, ov samo odgovorinela sine ko lakere pučiba. [Mukh o dujto videoklipi hem diskutirinen baši leste, hem palo adava ker isto e trito videoklipea da.]