Tlo bračno partneri vakerela ili kerela nešto so but holjankerela tut. Iako trudinea tut te garave i holi, ov osetinela kaj nešto nane ko redo hem počminela te ispitinel tut. Adava panda poviše holjankerela tut. Sar te kontrolirine tli holi ko asavke situacie?

•  So valjani te džane

•  So šaj te kere

•   Ako sikavea holi adava šaj te uništinel tlo sastipe. O istražuvanja sikavena kaj ako na kontrolirinela pe i holi, tegani šaj te bajrol o rizik te ovel tut učo pritisok, nasvalipe ko srce, depresija hem digestivna problemija. I holi isto agjaar šaj te kerel te na sove, te ove preterano sekirimo, te oven tut problemija ki koža hem te anel dži ko mozočen udar. I Biblija isi la šukar pričine keda vakerela: „Ma nervirin tut soske adava anela samo lošnipe“ (Psalm 37:8).

•   Ako ikerea i holi ki tute, adava isto agjaar šaj te ovel štetno. I holi so khedela la nekoj ki peste šaj te ličinel sar jekh nasvalipe so hala andral. Na primer, asavke manuša šaj te oven cinična hem sekogaš te kritikujnen. Asavke manušencar tano pharo te živinel pe hem adava šaj lošno te vlijajnel ko brako.

•   Razmislin bašo šukar osobine so isi tle bračno partnere. Brojn trin osobine so ceninea ko tlo bračno partneri. Javer puti keda ka holjane tle bračno partnereske setin tut ko akala osobine. Adava šaj te pomožinel tuke te kontrolirine tli holi.

   Biblisko načelo: „Oven blagodarna!“ (Kološanite 3:15).

•    Oven spremna te prostinen. Prvo, trudin tut te haljove sar dikhela tlo bračno partneri ko bukja. Adava ka pomožinel tuke te ove sočuvstvitelno (1. Petrovo 3:8). Palo adava puč tut: „Dali isi man doborom bari pričina te holjanav so našti te prostinav?“

   Biblisko načelo: „O haljojbe čhinavela i holi e manušeskiri, hem ka anel leske čest ako nakhela preku e javereskiri greška“ (Izreki 19:11).

•    Ov ljubezno hem taktično keda vakerea sar osetinea tut. Vaker sar tu osetinea tut. Na primer, namesto te vakere: „Čače na sian obzirno. Valjangjan te javine tut mange hem te vakere kaj sian“. Pošukar ka ovel te vakere: „Sekiringjum man soske sine kasno hem na džanljum dali sa i šukar“. Ako bašo tle čuvstvija kerea lafi ko ljubezno način, adava ka pomožinel tuke te kontrolirine tli holi.

   Biblisko načelo: „Tumaro lafi sekogaš te ovel ljubezno“ (Kološanite 4:6).

•    Šun šukar. Otkeda tu ka vakere sar osetinea tut, adžiker tlo bračno partneri da te vakerel so mislinela. Ma čhinav le. Keda ka završinel, povtorin adava so vakergja te šaj te dikhe dali šukar haliljan le. Adava so šukar ka šune le ka pomožinel tuke te kontrolirine tli holi.

   Biblisko načelo: „Sekova manuš valjani te ovel spremno te šunel, a pohari te kerel lafi, hem sigate te na holjanel“ (Jakov 1:19).