Bariljum ki diz Tampere (Finska), jekh tikno hem mirno than pherdo zelenilo. Mle roditelija na sine but religiozna, ama ceninena sine o obrazovanie hem o šukar manirija. Mi daj tani Germanka, adaleske keda sium sine tikno ponekogaš džava sine ki mi baba hem ko mo papo kola so živinena sine ki Zapadno Germanija.

 Panda sar tikno zamangljum o sport. Učestvujnava sine ko različna sportija, ama keda sine man okolu 14 berš, rešingjum te posvetinav man ko tenis. Ko 16 berš ko dive sine man duj dži ko trin treningija — duj puti profesionalno trenerea, a ko akšami trenerinava sine korkori. Sium sine vooduševimo taro tenis. Akava sport sine mange baro predizvik baši mli mentalno hem fizičko izdržlivost. Iako mangava sine te družinav man me amalencar hem ponekogaš te ikljova te pija po jekh pivo, ama nikogaš na matiljum hem na drogiringjum man. Ko mlo životo najvažno sine mange o tenis.

 Keda sine man 17 berš, počmingjum te učestvujnav ko ATP turnirija. * Otkeda pobedingjum ko nekobor turnirija, uljum pendžardo ki mli phuv. Ko 22 berš sium sine maškar o 50 najšukar teniserija ko sveto.

 Beršencar patujnava sine ko različna phuvja hem khelava sine profesionalno tenis. Dikhljum but šuže thana, ama uljum hem svesno bašo but bare svetska problemija, sar soj o kriminal, i droga hem zagadimi okolina. Na primer, keda sium sine ko SAD, vakergje amenge te na dža ko nesave delija taro nesave dizja adaleske so isi but baro kriminal. Sa adava but voznemiringja man. Osven adava, iako kerava sine nešto so but mangava, sepak osetinava sine man but čučo.

 Mi džuvli, i Sana, počmingja te proučinel i Biblija e Jehovaskere svedokoncar. Sine mange hari smešno adava so oj interesinela pe sine baši religija, ama na sine man ništo protiv adava so proučinela sine. Lelem amen ko 1990 berš, hem jekh berš palo adava oj krstingja pe sar e Jehovaskoro svedoko. Na dikhava man sine sar religiozno manuš, ama verujnava sine kaj isi Devel. Setinava man sar mi baba tari Germanija but puti čitinela sine i Biblija, pa čak sikavgja man te molinav man.

 Jekh dive, me hem i Sana siem sine ko gostija ko jekh bračno pari e Jehovaskere svedokija. O rom, o Kari, sikavgja mange jekh biblisko proroštvo bašo „posledna dive“ (2. Timotej 3:1-5). Adava mukhlja mange baro vpečatok adaleske so haliljum soske ovena doborom lošna bukja ko sveto. Adava dive na kergjem poviše lafi baši religija. Ama, ottegani počmingjem te kera lafi lea baši Biblija, hem sa so doznajngjum sine le smisla. Adaleske so sium sine but zafatimo hem but puti patujnava sine, našti sine redovno te dikha amen, ama o Kari na otkažinela pe sine. Ko pučiba so pučava le sine džikote proučinaja sine i Biblija, ov odgovorinela mange sine preku pismija. Dikhljum kaj ki Biblija isi logična odgovorija bašo važna pučiba ko životo, hem hari po hari počmingjum te haljovav koja tani lakiri glavno tema — kaj o Devel ka ispolninel pli namera preku plo Carstvo. Adava so doznajngjum e Devleskoro anav, Jehova, hem adava so haliljum kaj kergja but baši amende, mukhlja mange baro vpečatok (Psalm 83:18). Najviše vooduševingja man i otkupno žrtva — oj nane dendi samo bašo nesave tehnička ili pravna pričine, nego laja o Devel sikavgja kobor baro mangipe isi le sprema amende (Jovan 3:16). Sikliljum isto agjaar kaj šaj te ovav paše amal e Devlea hem kaj šaj te živinav zasekogaš ko raj ki Phuv (Jakov 4:8). Počmingjum te pučav man: „Sar šaj te sikavav kaj ceninava adava so kergja o Devel baši mande?“

 But razmislingjum bašo mlo životo. Tari Biblija sikliljum kaj o najbaro bahtalipe ko životo avela taro adava keda daja, hem sine man želba te vakerav e javerenge bašo adava ko so verujnava (Dela 20:35). Adaleske so profesionalno sportujnava sine hem učestvujnava sine ko but turnirija, na sium sine khere okolu 200 dive ko berš. Ki mli familija sa vrtinela pe sine okolu mande — mle treningija, mli rutina, mli kariera. Sine mange jasno kaj valjani nešto te meninav.

 Džanljum kaj but džene nane te haljoven man ako mukhava mli uspešno kariera taro religiozna pričine. Ama, i možnost pošukar te pendžarav e Jehova hem te dobinav večno životo sine but povredno tari bilo savi javer nagrada so šaj sine te osvojnav la ko teniska natprevarija, hem adaleske na sine mange pharo te odlučinav man so te kerav. Odlučingjum te na sekirinav man so ka vakeren o javera — i odluka sine mli. Keda sium sine ko pritisok, but pomožingja mange o stiho taro Psalm 118:6: „O Jehova tano ki mli strana; nane te darav. So šaj te kerel mange manuš?“

 Baš ko adava periodi, dobingjum jekh but primamlivo ponuda taro sponzorija — te kerav dogovor kova so ka kerel beršencar profesionalno te khelav tenis bizo te mislinav ništoske. Ama, adava na peravgja man pišmani tari mli odluka. Odbingjum i ponuda, hem palo nesavo vreme čhinavgjum te učestvujnav ko ATP turnirija. Ponadari da proučinava sine i Biblija hem krstingjum man sar e Jehovaskoro svedoko ko 2 juli 1994 berš.

 Ki mli situacija na valjani sine te ovel nesavi tragedija te šaj te počminav te razmislinav bašo Devel, ni palem, sium sine manuš so rodela sine o čačipe. Mislinava sine kaj isi man šužo životo hem kaj nane fer te rodav nešto poviše. Sepak, izgledinela sine kaj o biblisko čačipe adžikergja te arakhav le. Bizo te očekujnav doznajngjum kaj o životo isi le pobari smisla, hem mlo životo doborom ulo pošukar so našti sine ni te zamislinav mange. Amari familija nikogaš na sine doborom paše hem zorali sar akana. Hem but sium bahtalo so mle trin čhave sledinena mlo primer — ama na sar sportisti, nego sar hristijani.

 Panda mangava te khelav tenis. Beršencar zarabotinava sine agjaar so kerava sine buti soj povrzimi tenisea, na primer, kerava sine buti sar treneri hem ki uprava ko jekh tenisko centar. Sepak, o sport nane mange više najvažno ko životo. Angleder sekova kurko trenirinava sine saatencar te šaj te ovav pošukar teniseri, te ovav šampioni. Ama akana, sekova kurko nakhava poviše saatija ko adava te pomožinav e manušenge te doznajnen hem te ikeren pe ko merilija e Biblijakere so meningje mlo životo. Avdive sium but bahtalo so mlo amalipe e Jehovaja mange ko prvo than hem adaleske šaj e javerenge da te vakerav baši mli nadež baši pošukar idnina (1. Timotej 6:19).