Nesave manušenge valjani but vreme te šaj te sikljon nešto taro ple lošna iskustvija ko životo. Me sium sine asavko. Me bijandiljum hem bariljum ki Barselona, i dujto najbari diz ki Španija. Mli familija živinela sine ko jekh delo tari Barselona so vikinela pe Somorostro, than so sine uzo plaže hem sine pendžardo palo kriminal hem droga.

 Mle roditelen sine len enja čhave, a me sium sine o najbaro. Adaleske so siem sine but čorole, mo dad bičhalgja man te kerav buti ko jekh tenisko klubi so sine amenge paše. Adathe khedava sine o topke. Sine man deš berš hem kerava sine po deš saatija buti ko dive. Adaleske, našti džava sine ki škola sar o javera čhave ko mle berša. Ko 14 berš počmingjum te kerav buti ki jekh rabotilnica bašo metalija.

 Ko 1975 berš vikingje man ki voeno služba, koja so sine zadolžitelno ki Španija. Mangljum te probinav neve bukja ko životo, adaleske prijavingjum man te služinav ki Špansko legija e strancongiri ki Melilja, špansko teritorija ki Severno Afrika. Ko adava periodi, khuvgjum hor ko sveto e drogakoro hem e alkoholeskoro.

 Otkeda mukhljum i Špansko legija, irangjum man ki Barselona hem kergjum banda. Čoraja sine sa so ka resa, a o čordikane bukja bikinaja len sine te šaj te ovel amen pare baši droga. Počmingjum te lav LSD hem amfetaminija, hem glavna bukja ko mlo životo sine o seks, o alkohol hem o komari. Asavko životo kerela man sine te ovav but nasilno. Mancar sekogaš phiravava sine čhurik, tikno tover, hem mačeta hem na razmislinava sine dali te koristinav len ako valjanena mange.

 Jekh puti amari banda čorgja vrda hem sledinela sine amen i policija. Sine sar ko filmi. Vozingjem o vrda skoro 30 kilometrija, hem tegani i policija počmingja te pukajnel ki amende. Ko krajo, adava so vozinela sine khuvgja o vrda hem tegani sarine našlem. Normalno, keda mo dad doznajngja bašo adava, paldingja man kheraldan.

 O naredna pandž berš i ulica sine mlo kher. Sovava sine ko vlezija, ko kamionija, ko klupe hem ko grobija. Kratko vreme živingjum ki peštera da. Mange o životo na sine le smisla, adaleske sine mange sajekh dali sium dživdo ili mulo. Džikote sium sine drogirimo, čhinava man sine ko vasta. Panda isi man belegija.

 Sine man 28 berš keda mi daj rodingja man hem vikingja man te iranav man khere. Soglasingjum man hem vetingjum lake kaj ka sredinav mlo životo. Ama, valjani sine mange vreme te šaj te ispolninav mlo vetuvanje.

 Jekh dive, ko amaro udar ale duj Jehovaskere svedokija. Džikote šunava sine so isi len te vakeren mange, mo dad andraldan vikinela sine mange te phandav lenge o udar anglo muj. Nikogaš na mangljum nekoj te naredinel mange, adaleske na šungjum le. Nudingje mange trin tikne lila hem me celo vilea leljum len. Pučljum len kote khedena pe hem palo nekobor dive geljum angli lengiri sala.

 Najviše so mukhlja mange vpečatok sine adava so sarine sine uredno uravde. Različno lendar, man sine man bare bala, mli brada na sine sredimi hem sine man phiravde šeja. Dikhjola sine kaj na sine man lencar ništo zaedničko, adaleske ačhiljum avrijal. Iznenadingjum man keda adathe dikhljum e Huane, jekh purano amal tari mli banda, uravdo ko odelo. Pokasno doznajngjum kaj ulo e Jehovaskoro svedoko angleder jekh berš. Adava so dikhljum leste dengja man hrabrost te khuvav ko sostanok. Taro adava momenti mlo životo počmingja te meninel pe.

 Prifatingjum te proučinav i Biblija hem sigate haliljum kaj, ako mangava o Devel te prifatinel man, valjani te meninav man agjaar so nane te ovav nasilno hem nane te živinav nemoralno. Ama, na sine lokhe te keren pe akala promene. Te šaj te ugodinav e Jehovaske, valjani sine te meninav o način sar razmislinava hem te ovav nevo manuš (Rimjanite 12:2). E Devleskiri milost but pogodingja man. Iako kergjum but greške ko životo, osetingjum kaj o Devel dela man dujto šansa. Adava so sikliljum le bašo Devel, o Jehova, khuvgja mange ko vilo. Haliljum kaj postojnela Stvoriteli kova so grižinela pe mange (1. Petrovo 5:6, 7).

 Akava pottikningja man te počminav te kerav promene. Na primer, džikote proučinava sine, keda reslem ki tema bašo pušibe, vakergjum mange: „Ako o Jehova mangela te ovav čisto ko sekova pogled, tegani valjani te čhinavav e cigarencar!“ (2. Korinkjanite 7:1). Hem agjaar o cigare završingje ki kanta.

 Isto agjaar, valjani sine te čhinavav te koristinav hem te bikinav droga. Bašo akava valjangja mange poviše vreme hem sila. Džanava sine kaj ako mangava te kerav adava, valjani te čhinavav sa o kontaktija mle purane amalencar. Lengoro vlijanie na mukhela man sine duhovno te napredujnav. Sar so nakhela sine o vreme, barili mli doverba ko Jehova hem ko phralja taro sobranie. Prvo puti ko životo osetingjum so značinela nekoj te mangel tut hem te ovel zainteresirimo tuke sar ličnost. Palo nekobor masekija konečno oslobodingjum man tari droga hem uljum nevo manuš, a adava pomožingja mange te ovav ko šukar odnos e Devlea (Efešanite 4:24). Ko avgust 1985 berš krstingjum man hem uljum e Jehovaskoro svedoko.

 I Biblija meningja mlo životo ko pošukar. Pomožingja mange te čhinavav e lošna navikencar so uništinena sine mlo sastipe hem dostoinstvo. Poviše taro 30 manuša taro adala so družinava man sine lencar mule terne tari SIDA ili taro javera nasvalipa soj povrzime e drogaja. Te na primeninav sine o bibliska načelija, sigurno ka završinav sine sar lende.

 Ni na mislingjum kaj jekh dive namesto čhurika hem tovera mancar ka phiravav i Biblija te šaj te pomožinav e manušenge. Akana, zaedno mle romnjaja nakhava but vreme te šaj te sikava e javeren bašo Devel.

 Mle roditelija nikogaš na ule e Jehovaskere svedokija, ama sine bahtale so i Biblija pomožingja mange te kerav promene ko životo. Mo dad čak braninela sine e Jehovaskere svedokon anglo ple kolege. Sine svesno kaj mli vera meningja man ko pošukar. Mi daj često džanela sine te vakerel kaj valjani sine porano te počminav te proučinav i Biblija. Soglasinava man laja!

 O životo sikavgja man kaj nane nisavi smisla te rode zadovolstvo ki droga hem ko javera lošna navike. Čačutno zadovolstvo arakhava akana, džikote sikavava e javeren bašo e Devleskoro Lafi kova so spasingja mlo životo.