Bijandiljum ko Montreal, i najbari diz ki kanadsko oblast Kvebek. Zaedno me phenjaja hem me duje phralencar bariljum ki jekh šuži naselba Rozmon. Amare roditelija vospitingje amen mangipaja, hem sine amen mirno životo.

 Interesirinela man sine i Biblija panda sar tikno. Setinava man, keda sine man 12 berš, uživinava sine te čitinav o Nevo zavet ko kova kerela pe lafi bašo e Isuseskoro životo. Mukhlja mange baro vpečatok leskoro mangipe hem sočuvstvo sprema o javera. Mangava sine me da te ovav sar leste. Ama, sar so nakhela sine o vreme našavgjum adaja želba soske počmingjum te družinav man lošno društvoja.

 Mo dad bašalela sine saksofoni. Osven so dengja mange plo saksofoni, ov kergja but te mangav i muzika. Oj uli mange najvažno ko životo. Sikliljum te bašalav gitara da. Nesave amalencar kergjem rok-grupa hem sine amen nekobor nastapija. Dikhle man nesave pendžarde muzička producentija hem nudingje mange te kerav lencar buti. Potpišingjum dogovor jekhe bare diskografsko firmaja. Mle gilja ule but popularna hem non-stop mukhena len sine ko radio ko Kvebek.

 Mislingjum kaj isi man sa. Sium sine terno hem popularno, zarabotinava sine but pare hem kerava sine adava so mangava. Diveskoro džava sine ki teretana, dava sine intervjua, čhivava sine avtogramija ko ploče hem nastapinava sine ki televizija. Rakjate bašalava sine hem džava sine ko zabave. Adaleske so sium sine popularno sine man baro pritisok taro javera. Te šaj te izdržinav adava pritisok počmingjum te pijav panda sar terno, a pokasno počmingjum te lav droga da. Živinava sine nemoralno životo hem na sekirinava man sine bašo ništo.

 Nesave manuša sine mange ljubomorna adaleske so izgledinava sine sar bahtalo manuš. Ama, hor ki mande osetinava man sine čučo, posebno keda sium sine korkori. Sium sine razočarimo hem voznemirimo. Keda sium sine but popularno, duj taro mle producentija mule tari SIDA. Adava but potresingja man! But mangava sine i muzika, ama odvratno sine mange o način sar živinava sine.

 Iako sium sine uspešno muzičari, svesno sium sine bašo strašna bukja so ovena sine ko sveto. Našti sine te haljovav soske isi doborom nepravde hem soske o Devel na kerela nešto bašo adava. Molinava sine e Devle te del mange odgovor bašo adava. Keda završingjum i turneja, počmingjum palem te čitinav i Biblija. Iako na haliljum pobaro delo taro adava so čitinava sine, sepak haliljum kaj o krajo e svetoskoro mora te ovel but paše.

 Džikote čitinava sine i Biblija, doznajngjum kaj o Isus ki jekh prilika postingja 40 dive ki pustina (Matej 4:1, 2). Mislingjum kaj, ako kerava me da adava o Devel ka otkrinel pe mange, hem adaleske odredingjum mange datum keda te počminav te postinav. Ama, duj kurke angleder te počminav te postinav, duj taro e Jehovaskere svedokija ale ko mlo udar. Odma vikingjum len te khuven andre. Jekhe lendar, kova so vikinela pe sine Žak, dikhljum le pravo ko jakhja hem pučljum le: „Kotar šaj te džana kaj živinaja ko posledna dive akale svetoskere?“ Tegani ov phravgja mange i Biblija hem čitingja mange 2. Timotej 3:1-5. Pučljum len but pučiba, a ola celo vreme dena man sine odgovorija tari Biblija. Sium sine vooduševimo taro lengere logična hem šukar odgovorija. Otkeda posetingje man nekobor puti, haliljum kaj na valjani te postinav.

 Počmingjum redovno te proučinav i Biblija e Svedokoncar. Palo nesavo vreme, čhingjum mle bala hem počmingjum redovno te džav ko sa o sostanokija ki dvorana so sine mange paše. Adathe sarine ljubezno pozdravinena man sine hem kerena sine lafi mancar. Adava sine mange panda jekh dokaz kaj konečno arakhljum o čačipe.

 Normalno, valjani sine te kerav bare promene te šaj te živinav agjaar sar so sikljovava sine tari Biblija. Mora sine te čhinavav te drogirinav man hem poviše te na živinav nemoralno. Isto agjaar, haliljum kaj na sium me glavno ko sveto hem kaj valjani poviše te mislinav e javerenge. Sar samohrano roditeli, mora sine te sikljovav te grižinav man bašo emocionalna hem duhovna potrebe mle duje čhavengere. Otkažingjum man tari mli muzičko kariera hem arakhljum ki jekh fabrika buti so sine pohari platimi.

 Na sine mange lokhe te kerav sa akala promene. Keda rešingjum te mukhav i droga, sine man bari kriza hem nekobor puti palem leljum droga (Rimjanite 7:19, 21-24). Najpharo sine mange te prekininav te živinav nemoralno. Osven adava, i nevi buti sine mange phari, a i plata sine but tikni. Valjani sine mange trin masek te kerav buti hem te lav o pare so lava len sine duje saatenge sar muzičari.

 I molitva pomožingja mange te na otkažinav man te kerav akala bare promene. Haliljum kobor tano važno redovno te čitinav i Biblija. But ohrabringje man nesave bibliska stihija sar, na primer, 2. Korinkjanite 7:1, kova so pottikninela e hristijanen te čistinen sekova melalipe taro pumaro telo hem duho. Javer stiho kova so uveringja man kaj šaj te čhinavav e lošna navikencar tano Filipjanite 4:13 kote so pišinela: „Sa šaj te kerav soske pomožinela mange okova so dela man sila“. O Jehova odgovoringja ko mle molitve hem pomožingja mange te haljovav o biblisko čačipe hem te počminav te živinav sprema leste. Akava pottikningja man te dav lafi kaj ka služinav e Jehovaske celo životo (1. Petrovo 4:1, 2). Krstingjum man ko 1997 berš.

 Sigurno sium kaj ka ovav sine mulo ako ponadari da živinava sine sar poangle. Namesto adava, akana sium čače bahtalo. Mi šukar romni, i Elvi, tani čačutno poklon taro Devel. Sekova masek, odvojnaja baro delo taro amaro vreme te šaj te kera lafi e manušencar baši Biblija. Adava kerela man te ovav but bahtalo hem zadovolno. But sium blagodarno e Jehovaske so angja man ki peste (Jovan 6:44).