Bijando sium ko San Huan Čankalaito, tikni diz ki država Čiapas (Meksiko). Amen siem taro narodo Čol, kova so avela taro Mai. Mle roditelen sine len 12 čhave, a me sium o pandžto. Keda siem sine tikne, me hem mle phralja hem phenja proučinaja sine i Biblija e Jehovaskere svedokoncar. Ama, adava so sikliljum na ikerava le sine ko mlo životo.

 Ko 13 berš me više drogirinava man sine hem čorava sine. Ko adala berša geljum mange kheraldan. Džava sine taro than ko javer than. Ko 16 berš, počmingjum te kerav buti ki jekh plantaža marihuanaja. Adari kergjum buti okolu jekh berš. Jekh rat, džikote prenesinaja sine brodea bare količine marihuana, siem sine napadime taro členija taro javer narkokartel kola so sine len but oružje pea. Ola počmingje te pukajnen ki amende. Edvaj uspejngjum te spasinav man. Palo adava, našljum ko SAD.

 Adari ponadari da bikinava sine droga hem zaglavingjum panda poviše. Ko 19 berš astargje man hem phanle man ko zatvor bašo čoribe hem bašo adava so probingjum te mudarav nekas. Ko zatvor khuvgjum ki jekh banda hem ponadari da ponašinava man sine nasilno. Adaleske sium sine prefrlimo ko zatvor kote so sine but baro obezbeduvanje, ko Luisburg (Pensilvanija, SAD).

 Ko zatvor ko Luisburg uljum panda pološno. Adaleske so sine man tetovaže tari banda kolate so sium sine, o členija tari isto banda ko akava zatvor sigate prifatingje man. Sar so nakhela sine o vreme, ovava sine sa poagresivno hem marava man sine but e javerencar. Jekh puti učestvujngjum keda margje pe o bande ko zatvorsko dvoro. O maribe sine but opasno, segde letinena sine bejzbol palke hem tegija. Te šaj te čhinaven amen, o stražarija frdingje solzavec. Bašo akava so slučingja pe, sium sine premestimo ko jekh posebno oddel bašo opasna zatvorenikija. Sium sine sar tempirimi bomba hem but akošava sine. Na sine mange nisavo problemi te marav nekas, pa čak uživinava sine ko adava. Mli sovest ni najhari na mučinela man sine bašo mle postapke.

 Ko oddel bašo opasna zatvorenikija, pobaro delo taro dive valjani sine te ovav ki kjelija. Te šaj posigate te nakhel mange o vreme počmingjum te čitinav i Biblija. Jekh puti, jekh taro čuvarija dengja man o lil Tu šaj zasekogaš te živine ko raj ki Phuv. * Džikote čitinava sine akava lil, setingjum man ko bukja so sikliljum len sar čhavo džikote proučinava sine i Biblija e Jehovaskere svedokoncar. Počmingjum te razmislinav bašo adava kobor rumindiljum adaleske so sium sine nasilno. Razmislingjum baši mli familija da. Duj taro mle phenja ule e Jehovaskere svedokija. Ko jekh momenti mislingjum mange: „Ola ka živinen zasekogaš“. Palo adava vakergjum mange: „A soske me da te na živinav zasekogaš?“ Taro adava momenti sium sine rešimo te meninav man.

 Sepak, džanava sine kaj korkori našti kerava adala promene. Adaleske, prvo ki molitva molingjum e Jehova te pomožinel mange. Palo adava, pišingjum pismo dži ki podružnica e Jehovaskere svedokongiri ko SAD hem rodingjum biblisko kursi. I podružnica grižingja pe o phralja tari adaja okolina te kontaktirinen mancar. Ko adava periodi sine mange dozvolimo samo te oven man posete tari mli familija. Adaleske so našti sine te posetinel man, jekh Svedoko kova so živinela sine paše počmingja te bičhalel mange ohrabruvačka pismija hem biblisko literatura. Akava kergja te šaj te ovav panda poodlučno te meninav man.

 Jekh važno čekori so kergjum sine so ikliljum tari banda kolate sium sine členi beršencar. O vodači e bandakoro isto agjaar sine ko oddel bašo opasna zatvorenikija. Jekh puti keda sine amen slobodna aktivnostija ko zatvor, vakergjum leske kaj mangava te ovav e Jehovaskoro svedoko. Sium sine iznenadimo keda vakergja mange: „Ako čače mangea te ove e Jehovaskoro svedoko, nane problemi. Na mangava te ovel man buti e Devlea. Ama ako akava tuke samo izgovor te šaj te ikljove tari banda, tegani džanea so adžikerela tut“.

 O naredna duj berša, o manuša so kerena sine buti ko zatvor dikhle kaj me meninava man hem počmingje javer čhane te ponašinen pe mancar. Na primer, keda džava sine te nangjovav na čhivena mange sine poviše lisice. Jekh stražari ohrabringja man te na čhinavav te kerav promene. Ustvari, o odgovorna ko zatvor odlučingje o posledno berš tari mli kazna te nakhavav le ko jekh kampi bašo zatvorenikija kote so na sine but obezbeduvanje, hem adava kampi sine paše uzo zatvor. Ko 2004 berš, otkeda nakhljum 10 berš ko zatvor, sium sine oslobodimo hem ingardo zatvorsko avtobusea ko Meksiko.

 Keda resljum ko Meksiko, odma rodingjum i dvorana e Jehovaskere svedokongiri. Ko prvo sostanok keda geljum sium sine uravdo ko zatvorska šeja — adala sine edinstvena pristojna šeja so sine man. Iako sium sine agjaar uravdo, e Jehovaskere svedokija dodžakergje man šukar. Keda dikhljum lengoro mangipe, mislingjum mange kaj akala mora te oven o čačutne hristijanja (Jovan 13:35). Ko sostanok, o starešine grižingje pe nekoj te proučinel mancar i Biblija. Palo jekh berš, ko 3 septemvri 2005 berš, krstingjum man hem uljum e Jehovaskoro svedoko.

 Ko januari 2007 berš, počmingjum te odvojnav 70 saatija ko masek te sikavav e javeren baši Biblija. Ko 2011 berš, sium sine ki Biblisko škola bašo biženime phralja (akana vikinela pe Škola bašo polnovremena objavitelija). Akaja škola but pomožingja mange te šaj pošukar te završinav mle odgovornostija ko sobranie.

 Ko 2013 berš, ženingjum man jekhe phenjaja so vikinela pe Pilar. Keda vakerava lake bašo adava savo manuš sium sine angleder, pharo lake te verujnel ko adava. Nikogaš poviše na irangjum man ko purano način sar živinava sine mlo životo. Me hem mli romni siem uverime kaj adava so meningjum man korendan tano dokaz baši bari mokj so isi la i Biblija te meninel nekaskoro životo (Rimjanite 12:2).

 Mislinava kaj o lafija e Isuseskere soj tane pišime ko Luka 19:10 važinena mange. Adari pišinela kaj ov alo te arakhel hem te spasinel okova soj našavdo. Poviše na osetinava man čučo hem našavdo, hem poviše na sium opasno bašo manuša ki mli okolina. Adaleske so i Biblija pomožingja mange, akana šaj te ovel man čačutni smisla ko životo, šukar amalipe e javerencar hem, najvažno taro sa, amalipe mle Stvoritelea, e Jehovaja.