Sar Jehovaskere svedokija, trudinaja amen te kera pozorali amari familija, a pomožinaja e javerenge da ko adava. Poštujnaja e Devle kova so kergja i familija (1. Mojseeva 2:21-24; Efešanite 3:14, 15). Ki Biblija, ov dengja načelija kola pomožingje e manušenge taro celo sveto te ovel len stabilno hem bahtalo brako.

 Trudinaja amen ko sa te šuna o bibliska sovetija, kola so pomožinena amen te ova pošukar roma, romnja hem roditelija (Izreki 31:10-31; Efešanite 5:22-6:4; 1. Timotej 5:8). I mudrost so isi ki Biblija pomožinela čak ko familie kote so nane sarine ki isto religija (1. Petrovo 3:1, 2). Ake so vakerena nesave so nane Jehovaskere svedokija, a kaskoro bračno partneri ulo Svedoko:

•   „O prva šov berš ko brako nakhle amenge ko raspravie hem ki nervoza. Ama, otkeda i Iveti uli e Jehovaskoro svedoko uli poljubezno hem postrplivo. Adava kergja te spasina amaro brako“ (Klauir taro Brazil).

•   „But sium sine protiv keda mo rom počmingja te proučinel e Jehovaskere svedokoncar soske mislinava sine kaj ola rasturinena o familija. Ama, dikhljum ustvari kaj i Biblija but pomožingja amenge ko brako“ (Agnes tari Zambija).

 Keda propovedinaja, sikavaja e manušenge kaj i mudrost tari Biblija šaj te pomožinel lenge:

•   mudro te birinen bračno partneri

•   te izdržinen o prvo berš ko brako

•   te nakhen šukar pe bračno partnereskere roditelencar

•   te džanen sar te trošinen o pare

•   te na raspravinen pe

•   te sikljoven te prostinen

•   te vospitinen e čhaven

 Ponekogaš oja. Na primer, sprema jekh izveštaj taro 1998 berš e istražuvačko kompanijakoro Sofres, ko sekova bišto brako kote so jekh taro bračno partnerija ulo e Jehovaskoro svedoko alo dži ko seriozna problemija.

 O Isus prorokujngja kaj okola so ka živinen sprema leskere sikljojba ka oven len pritisok tari familija (Matej 10:32-36). Sprema o istoričari Vil Djurant, ko Rimsko Carstvo „o hristijanja sine obvinime kaj rasturinena o familie“, a a o ista obvinenija dobinena nesave taro Jehovaskere svedokija avdive. Dali adava značinela kaj o Svedokija tane pričina bašo problemija ko familie?

 Bašo obvinenija kaj e Jehovaskere svedokija rasturinena o familie, o Evropsko sudo bašo manušikane pravija angja presuda kolate so vakerela pe kaj but puti i pričina bašo raspravie tani adaja so o členija tari familija so nane Svedokija na mangena „te prifatinen hem te poštujnen o pravo so isi e javeren ki familija te birinen ko so ka verujnen“. O sudo isto agjaar vakerela: „Akava slučinela pe ko sa o brakija kote so o javer bračno partneri nane ki isto religija, a adava slučinela pe e Jehovaskere svedokoncar da“. b Ama, čak keda o javera maltretirinena len baši lengiri religija, e Jehovaskere svedokija trudinena pe te primeninen o biblisko sovet: „Nikaske ma iranen lošnipaja... Kobor so šaj, ako adava zavisinela tumendar, oven ko mir sa e manušencar“ (Rimjanite 12:17, 18).

 O Svedokija šunena o biblisko sovet te khuven ko brako „samo ko Gospodari“, javere lafencar nekasaja so isi le isto veruvanje (1. Korinkjanite 7:39). Akaja zapoved tani hem biblisko hem praktično. Na primer, ki jekh statija taro 2010 berš, so iklili ko spisanie Journal of Marriage and Family pišingja kaj „o bračna partnerija soj ki isto religija hem isi len o ista običaija hem veruvanja“ obično isi len postabilno brako. c

 Ama, e Jehovaskere svedokija ko nisavo slučaj na ohrabrinena okolen soj ki lengiri religija te mukhen pumare bračno partnere ako nane Svedoko. I Biblija vakerela: „Ako nesavo phral isi le romni so na verujnela, a oj mangela te živinel lea, ma te mukhel la, a isto agjaar i romni kaskoro so rom nane verniko, hem ov mangela te živinel laja, ma te mukhel pe rome“ (1. Korinkjanite 7:12, 13). E Jehovaskere svedokija šunena akaja zapoved.