So vakerena but džene: E Jehovaskere svedokija na džana ko doktori hem na prifatinena medicinsko pomoš.

 Čačipe: Amen mangaja te dobina i najšukar medicinsko pomoš amenge hem amare familijake. Keda isi amen problemija e sastipaja, rodaja pomoš taro doktorija kola so isi len iskustvo te koristinen metode kote so na koristinela pe rat hem kola so kerena operacie bizi transfuzija. Avdive, i medicina but napredujngja. O metode kote so na koristinela pe rat kola soj razvime te šaj te pomožinel pe e pacientenge kola soj e Jehovaskere svedokija akana uspešno koristinena pe bašo javera da manuša. Ko but phuvja, sekova pacienti isi le pravo te odbinel te priminel rat preku transfuzija hem adalea te izbeginel nasvalipa kova so prenesinela pe preku rat, negativno reakcija ko imunološko sistem, manušikani greška hem javer.

 So vakerena but džene: E Jehovaskere svedokija mislinena kaj lengiri vera ka pomožinel len te sasljon.

 Čačipe: Amen na sasljaraja ni amen ni e javeren preku amari vera.

 So vakerena but džene: O metode bizo rat tane but skupa.

 Čačipe: O trošakija bašo metode bizo rat tane potikne taro trošakija so koristinena pe baši transfuzija. a

 So vakerena but džene: Sekova berš, but džene taro e Jehovaskere svedokija, maškaro kola isi čhave, merena adaleske so na priminena rat.

 Čačipe: Nane nisavi osnova bašo akava so vakerela pe. O hirurgija redovno kerena složena operacie sar soj, operacija ko vilo, ortopedska operacie hem transplantacija e organenge bizo te koristinel pe rat. b O pacientija so na priminena rat, maškaro kola isi čhave da, obično sasljona sar o javera pacientija so primingje rat, a ko nesave slučaija posigate lendar. c Nikoj našti sigurno te vakerel kaj nesavo pacienti ka merel samo adaleske so odbingja te priminel rat ili ka živinel samo adaleske so primingja rat.

 Na priminaja rat taro religiozna pričine, a na taro medicinska pričine. Hem ko Purano hem ko Nevo zavet i Biblija dela jasno zapoved sa e manušenge te na priminen rat (1. Mojseeva 9:4; 3. Mojseeva 17:10; 5. Mojseeva 12:23; Dela 15:28, 29). Isto agjaar, anglo Devel o rat tano sveto hem pretstavinela o životo (3. Mojseeva 17:14). Znači, na priminaja rat adaleske so mangaja te šuna e Devle, a isto agjaar, soske poštujnaja le sar amaro Dad so dela amen o životo.

 Poangle, but stručnjakija mislinena sine kaj i medicina bizo rat tani opasno hem kaj te odbinel pe transfuzija tano isto sar te mudare tut korkori. Ama, ko posledna berša ola meningja plo mislenje. Na primer, ko 2004 berš ki jekh statija objavimi ko medicinsko spisanie pišinela sine kaj „but metode soj tane koristime bašo e Jehovaskere svedokija ki idnina ka oven voobičaena ki medicina“. d Ko spisanie Heart, Lung and Circulation ko 2010 berš pišinela sine kaj „o metode baši operacija bizo rat na valjani te koristinen pe samo e Jehovaskere svedokonge, nego e javere manušenge da“.

 Milja doktorija ko celo sveto koristinena razna metode kolencar so čhinavena te našavel pe rat, a adava pomožinela lenge te keren složena operacie bizo rat. Asavke metode kerena pe čak ko phuvja soj ko razvoj. But javera pacientija so nane e Jehovaskere svedokija birinena te na priminen rat.