Amen sar e Jehovaskere svedokija, trudinaja amen te ikera adava so sikavela sine o Isus hem te služina e Devleske sar so kergje o apostolija. Ki akaja statija kratko ka objasnina amare osnovna veruvanja.

1.   Devel. Amen obožavinaja e edinstveno čačutne Devle, kova soj Semokjno hem so kergja sa. Leskoro anav tano Jehova (Psalm 83:18; Otkrovenie 4:11). Leske služinena sine o Avraam, o Mojsej hem o Isus (2. Mojseeva 3:6; 32:11; Jovan 20:17).

2.   Biblija. Amen dikhaja ki Biblija sar lil kova so avela taro Devel dendo sa e manušenge (Jovan 17:17; 2. Timotej 3:16). Amare veruvanja temelinaja len ko sa o 66 lila so isi ki late, kola soj delo taro „Purano zavet“ hem taro „Nevo zavet“. Bašo akava o profesori Džejson Bedun vakergja kaj e Jehovaskere svedokija temelinena „ple veruvanja hem ple postapke samo ko adava so pišinela ki Biblija, bizo angleder te pretpostavinen peske kaj adava pišinela ki late“. a

    Amen prifatinaja celi Biblija, ama adava na značinela kaj sekova lafi valjani te haljova le doslovno. Haljovaja kaj nesave delija ki Biblija tane pišime ko simbolično način hem kaj na valjani doslovno te haljova len (Otkrovenie 1:1).

3.   Isus. Amen ikeraja adava so sikavgja o Isus, džaja palo leskoro primer hem poštujnaja le sar amaro spasiteli hem sar e Devleskoro Čhavo (Matej 20:28; Dela 5:31). Znači, amen siem hristijanja (Dela 11:26). Ama, tari Biblija sikljovaja kaj o Isus nane Semokjno Devel hem kaj nane biblisko osnova te verujna ko Trojstvo (Jovan 14:28).

4.   E Devleskoro Carstvo. Adaja tani čačutni vlada soj tani ko nebo, a na ko vile e hristijanengere. Ov ka zameninel sa o manušikane vlade hem ka kerel te ispolninel pe e Devleskiri namera ki Phuv (Daniel 2:44; Matej 6:9, 10). Adava ka ovel but sigate, soske o bibliska proroštvija sikavena kaj živinaja ko „posledna dive“ (2. Timotej 3:1-5; Matej 24:3-14).

    O Isus tano Cari ko e Devleskoro Carstvo ko nebo. Ov počmingja te vladinel ko 1914 berš (Otkrovenie 11:15).

5.   Spasibe. Preku i otkupno žrtva e Isuseskiri oslobodime siem taro grevo hem taro meribe (Matej 20:28; Dela 4:12). Te šaj o manuša te oven len korist tari akaja otkupno žrtva nane dovolno samo te verujnen ko Isus nego valjani te keren promene ko plo životo hem te krstinen pe (Matej 28:19, 20; Jovan 3:16; Dela 3:19, 20). I vera sikavela pe postapkencar (Jakov 2:24, 26). Ama adava na značinela kaj amen zaslužinaja o spasenie. Adava i dokaz bašo e Devleskoro šukaripe so na zaslužinaja le (Galatite 2:16, 21).

6.   Nebo. O Jehova o Devel, o Isus Hristos hem o verna angelija tane ko nebo b (Psalm 103:19-21; Dela 7:55). Samo jekh tikno broj taro manuša — 144.000 — ka oven voskresnime te živinen ko nebo te šaj te vladinen e Isusea ko e Devleskoro Carstvo (Daniel 7:27; 2. Timotej 2:12; Otkrovenie 5:9, 10; 14:1, 3).

7.   Phuv. O Devel kergja i phuv te šaj o manuša večno te živinen ki late (Psalm 104:5; 115:16; Propovednik 1:4). O Devel e poslušno manušenge ka del sovršeno sastipe hem večno životo ko raj ki Phuv (Psalm 37:11, 34).

8.   Lošnipe hem muke. O lošnipe hem o muke pojavingje pe keda jekh angeli buningja pe protiv o Devel (Jovan 8:44). Adava angeli, kova so ulo protiv o Devel hem palo adava sine leske dende anava „Satana“ hem „Beng“, ubedingja e prvo manušen te oven tari leskiri strana hem adava angja bare posledice sa e manušenge (1. Mojseeva 3:1-6; Rimjanite 5:12). Te šaj te del pe odgovor ko sporna pučiba, o Devel mukhlja te ovel lošnipe hem muke, ama ov nane te mukhel ola zasekogaš te trajnen.

9.   Meribe. O manuša so merena više na postojnena (Psalm 146:4; Propovednik 9:5, 10). Ola na mučinena pe ko pekol.

    O Devel ka voskresninel bute manušen so mule (Dela 24:15). Ama okola so palo plo voskresenie ka odbinen te ikeren pe ko e Devleskere merilija, ka oven uništime zasekogaš, bizi nadež palem te voskresninen (Otkrovenie 20:14, 15).

10.   Familija. Amen ikeraja amen ko e Devleskoro merilo kaj o brako valjani te ovel zaednica maškar jekh murš hem jekh džuvli. Edinstveno pričina bašo razvod tani i preljuba (Matej 19:4-9). Uverime siem kaj i mudrost tari Biblija pomožinela te šaj o familie te oven uspešna (Efešanite 5:22—6:1).

11.   Amaro obožavibe. Na koristinaja krsto, ikone hem kipija (5. Mojseeva 4:15-19; 1. Jovanovo 5:21). E Devle obožavinaja le ko akava način:

    •   Molinaja amen e Devleske (Filipjanite 4:6).

    •   Čitinaja hem proučinaja i Biblija (Psalm 1:1-3).

    •   Razmislinaja bašo adava so sikljovaja tari Biblija (Psalm 77:12).

    •   Khedaja amen te molina amen zaedno, te proučina i Biblija, te giljava, te kera lafi bašo adava ko so verujnaja, hem te ohrabrina amen amare phralencar hem e javerencar (Kološanite 3:16; Evreite 10:23-25).

    •   Propovedinaja „o šukar haberi bašo carstvo“ (Matej 24:14).

    •   Pomožinaja adalenge kaske so valjani pomoš (Jakov 2:14-17).

    •   Gradinaja hem održinaja amare dvorane hem isto agjaar javera da objektija kola so koristinena pe te šaj te propovedinel pe panda poviše o šukar haberi tari Biblija (Psalm 127:1).

    •   Pomožinaja keda isi prirodna katastrofe (Dela 11:27-30).

12.   Amari organizacija. Organizirime siem ko sobranija, hem sekova sobranie tano nadgledimo taro nekobor starešine. Ama, akala starešine nane sveštenikija hem na priminena plata baši buti so kerena la (Matej 10:8; 23:8). Na daja desetok hem na khedaja prilogija ko amare sostanokija (2. Korinkjanite 9:7). Sa amare aktivnostija finansirinena pe dobrovolna prilogoncar.

     O Vodečko telo tani tikni grupa taro zrela hristijanja kola so kerena buti ko amaro glavno sedište. Ola dena upatstvija e Jehovaskere svedokonge ko celo sveto (Matej 24:45).

13.   Jekhipe. O bukja kolende so verujnaja tane ista ko celo sveto (1. Korinkjanite 1:10). Maškar amende na delinaja amen ko socijalna, rasna, etnička hem ko klasna grupe (Dela 10:34, 35; Jakov 2:4). Adava so siem ko jekhipe na značinela kaj nane amen amaro lično mislenje ili izbor. Sekova Svedoko odlučinela korkori peske, sprema pli sovest koja tani oblikujmi sprema o bibliska merilija (Rimjanite 14:1-4; Evreite 5:14).

14.   Amaro ponašibe. Trudinaja amen sa so keraja te ovel taro mangipe sprema o javera (Jovan 13:34, 35). Na keraja adava so na mangela o Devel. Sar na primer, na priminaja rat soske adalea zloupotrebinaja o rat (Dela 15:28, 29; Galatite 5:19-21). Amen siem mirno narodo hem na učestvujnaja ko vojne (Matej 5:9; Isaija 2:4). Poštujnaja i vlada kote so živinaja hem ikeraja amen ko lakere zakonija sa džikote na džana protiv e Devleskere zakonija (Matej 22:21; Dela 5:29).

15.   Amare odnosija e javerencar. O Isus dengja zapoved: „Mang te pašutne sar korkori tut“. Isto agjaar vakergja kaj o hristijanja „nane delo taro akava sveto“ (Matej 22:39; Jovan 17:16). Adaleske trudinaja amen „te kera šukaripe sarinenge“, ama na mešinaja amen ko politička bukja hem na siem povrzime javere religiencar (Galatite 6:10; 2. Korinkjanite 6:14). Ama, poštujnaja e javerengoro izbor bašo akala bukja (Rimjanite 14:12).

 Ako isi tut javera da pučiba bašo adava ko so verujnena e Jehovaskere svedokija, šaj te čitine baši amende ki amari internet-strana, pišin dži ki jekh taro amare podružnice, ava ko amare sostanokija ili lično ker lafi jekhe Jehovaskere svedokoja.