O Vodečko telo tano tikni grupa zrela hristijanja kola so dena upatstvija e Jehovaskere svedokonge ko celo sveto. Isi le duj zadače:

•   Ov nadgledinela o spremibe e publikaciengoro, e sostanokongoro hem e razna školengoro kola so temelinena pe ki Biblija (Luka 12:42).

•   Grižinela pe bašo megjunarodno delo e Jehovaskere svedokongoro agjaar so organizirinela i služba propovedibaske hem nadgledinela sar koristinena pe o dobrovolna prilogija.

 O Vodečko telo džala palo primer e apostolengoro hem e starešinengoro taro prvo veko ko Erusalim. Ola anena sine važna odluke so koristinena sine celo sobranieske (Dela 15:2). Isto sar adala verna murša, o členija taro Vodečko telo nane vodačija amare organizacijakere. Ola rodena vodstvo ki Biblija, džandor kaj o Jehova čhivgja e Isuse te ovel poglavari e sobranieskoro (1. Korinkjanite 11:3; Efešanite 5:23).

 O členija ko Vodečko telo tane: Gejdž Fligl, Gerit Leš, Dejvid Splejn, Kenet Kuk, Mark Sanderson, Semjuel Herd, Stiven Let, Džefri Vinder hem Džefri Džekson. Ola služinena ko glavno sedište ko Vorvik (Njujork, SAD).

 O Vodečko telo kergja šov odborija kola so nadgledinena različna aktivnostija, hem sekova členi taro Vodečko telo služinela ko jekh ili poviše odborija.

•   Odbor e koordinatorengoro: Nadgledinela pravna pučiba hem pomožinela keda isi prirodna katastrofe. Isto agjaar, reagirinela keda e Jehovaskere svedokija tane progonime baši pli vera hem keda isi javera itna slučaija so vlijajnena upro e Jehovaskere svedokija.

•   Odbor bašo personal: Nadgledinela o aktivnostija soj povrzime e betelska slugencar.

•   Odbor so nadgledinela o pečatibe: Nadgledinela o pečatibe hem o ingaribe biblisko literatura. Grižinela pe hem bašo gradibe objektija sar soj amare dvorane, o preveduvačka kancelarie hem o podružnice.

•   Odbor službake: Nadgledinela o propovedibe o „šukar haberi bašo e Devleskoro Carstvo“ (Matej 24:14).

•   Odbor sikajbaske: Tano odgovorno bašo duhovna pouke so dobinaja len preku o sostanokija, o škole hem o audio hem video materijalija.

•   Odbor pišibaske: Nadgledinela o spremibe duhovna pouke so dobinaja len ko pečatimo oblik hem ki amari internet-stranica. Isto agjaar, nadgledinela o prevedibe akale materijaleskoro ko celo sveto.

 Osven so služinena ko akala odborija, o členija taro Vodečko telo khedena pe sekova kurko te šaj te keren lafi bašo potrebe e organizacijakere. Ko akala sostanokija, ola kerena lafi bašo adava so vakerela i Biblija baši nesavi buti, mukhena o sveti duh te vodinel len hem sekogaš trudinena pe te anen odluka kolaja so sarine soglasinena pe (Dela 15:25).

 Ola tane odgovorna hristijanja kola so pomožinena ko odborija taro Vodečko telo (1. Korinkjanite 4:2). Isi len iskustvo ko bukja kola so nadgledinela o odbor koleste so služinena. Sekova kurko tane prisutna ko sostanokija so ikerela lengoro odbor. Iako ola na anena o odluke, dena korisna sovetija hem informacie, kerena adava so sine odlučimo hem redovno proverinena o rezultatija taro adala odluke. O Vodečko telo isto agjaar ponekogaš dela len zadača te posetinen e phralen hem phenjen ko različna thana taro sveto ili te ikeren govorija ko nastanija sar soj o godišna sostanokija ili ko diplomiribe ko Gilead.