1, 2. Со требе те пучес тут тай соске давкха си важно?

БИСКАЙ изучинес и Библия, ахалилян, кай бут мануша пхенен, кай служинен е Девлеске, ама сикавен или керен букя, колато ов мразинел. (2 Коринтяни 6:17) Аке соске о Йехова пхенел аменге, кай требе те икльовас таро „Баро Вавилон“, ковато означинел те икльовас тари хохавни религия. (Откровение 18:2, 4) Со ка керес ту? Секо йекх амендар требе те решинел со ка керел тай те пучел пес: „Мангав ли те служинав е Девлеске, сарто ов мангел или мангав те продължинав те служинав леске, сарто свикнингьом?“

² Ако вече иклилян десаве хохавне кхангерятар, давкха си шукар. Ама ащи те овен празникя тай традициес тари хохавни религия, колато панда дехес тай мангел пес туке те керес лен. Нека те дикхас кола си десаве лендар тай палал далкхесте ка дикхас со мислинел о Йехова далкхе букиенге тай соске си важно аме–да те мислинас сар лесте.

3. а) Соске десаве манушенге си пхаро те спиринен те използвинен иконес, за те поклонинен пес е Девлеске? б) Со пхенел и Библия далкхеске те използвинен пес иконес андо поклонение?

³ Десаве мануша бут бреша използвинен иконес, за те поклонинен пес е Девлеске пуменде. Ако ту–да керес давкха, ащи те дикхьол туке странно или даже погрешно те поклонинес тут е Девлеске без те използвинес иконес. Ама де тут годи, кай о Йехова сикавел амен сар те поклонинас амен леске. И Библия ясно сикавел,  кай ов на мангел те използвинас иконес, за те поклонинас амен леске. (Четине Изход 20:4, 5; Псалм 115:4–8; Исаия 42:8; 1 Йоан 5:21)

4. а) Соске на требе те поклонинас амен амаре енданиенге, колато муле? б) Соске о Йехова пхенгяс пе народоске те на опитинен пес те хоратинен е муленца?

⁴ Десаве мануша използвинен бут време тай силес те керен десаве букя, за те овен угодна пере енданиенге, колато муле. Даже ащи те поклонинен пес ленге. Ама ахалилям, кай о муле нащи те помагинен аменге, нито те керен аменге кханилипе. Он на живинен декхате авретхе. Те опитинас амен те хоратинас е муленца си опасно, соскето даже кана дикхьол, кай хоратинас ленца, давкха авел таро демоня. Адалкхеске о Йехова пхенгяс е израилтяниенге те на опитинен пес те хоратинен е муленца тай те на керен саве–да те овен букя, колато авен таро демоня. (Второзаконие 18:10–12; дикх и 26 тай и 31 бележка ко крайос далкхе лилесте)

5. Со ка помагинел туке те спиринес те използвинес иконес, кана поклонинес тут е Девлеске тай те спиринес те поклонинес тут е муленге?

⁵ Со ащи те помагинел туке те спиринес те използвинес иконес, кана поклонинес тут е Девлеске или те спиринес те поклонинес тут е муленге? Требе те четинес и Библия тай те мислинес сериозно сар чувствинел пес о Йехова далкхе букиендар. Леске он си „отвратителна“, или бут грозна. (Второзаконие 27:15) Молине тут секо диес е Йеховаске те помагинел туке те мислинес сар лесте тай те служинес леске, сарто ов мангел. (Исаия 55:9) Ащи те овес сигурно, кай о Йехова ка дел тут сила, за те отчшиес саворе букя, колато авен тари хохавни религия.

6. Соске о мануша избиринде те празнувинен е Исусескоро бияниба ко 25 декември?

⁶ И Коледа си йекх таро най–баре празникя андо  цело светос тай бут мануша мислинен, кай лате празнувинел пес е Исусескоро бияниба. Ама и истина си, кай и Коледа авел тари хохавни религия. Йекх научно лил пхенел, кай ко 25 декември о римляня, колато на уле християня, празнувиненас о диес, кана о кхам бияндило. О поповя мангенас по–бут далкхе манушендар те ачшон християня, адалкхеске решинде те празнувинен е Исусескоро бияниба ко 25 декември, въпреки кай о Исусес на бияндило тогава. (Лука 2:8–12) Е Исусескере ученикя на празнувиненас и Коледа. Йекх лил пхенел, кай ко първа 200 бреша палал о бияниба е Исусескоро, „никхой на жанелас точно кана бияндило ов тай само хари мануша интересувиненас пес далкхестар“. (Sacred Origins of Profound Things) О мануша започнинде те празнувинен и Коледа декхате 300 бреша палал о време, кана о Исусес уло ки пхув.

7. Соске о истинска християня на празнувинен и Коледа?

⁷ Бут мануша жанен, кай и Коледа тай всичко со керен о мануша лате, сарто например и традиция те киден пес пе амаленца тай пе енданиенца, те хан маро заедно тай те ден подаръкя йекх аверес, авел тари хохавни религия. Например сине време, кана анди Англия тай десаве тханенде анди Америка уло забраниме те празнувинел пес и Коледа, ашал далкхеске кай си нехристиянско празники. Саворе, колато празнувиненас ла, требелас те овен накажиме. Ама хари по хари о мануша пак започнинде те празнувинен и Коледа. Соске о истинска християня на празнувинен и Коледа? Соскето манген те овен угодна е Девлеске всичконасте.

8, 9. Соске о първа християня на празнувиненас рожденденя?

⁸ Авер празники, ковато бут мануша дехен те празнувинен, си о рожденден. Требе ли о християня те празнувинен рожденденя? Анди Библия пишинел, кай  само десаве мануша, колато на служиненас е Йеховаске, празнувинде рожденденя. (Битие 40:20; Марко 6:21) О мануша празнувиненас рожденденя, за те отден слава е хохавне девленге. Аке соске о първа християня „верувиненас, кай давкха те празнувинел пес декхаскоро рожденден, си езическо празники“. (The World Book Encyclopedia)

⁹ Андо пуране диеса о римляня тай о гъркя верувиненас, кай о диес, колесте мануш биянгьол, си о рожденден десаве девлескоро. Йекх духос, колес сине връзка далкхе девлеса, уло отхе, кана биянгьолас о мануш. О езичникя верувиненас, кай давкха духос ка пазинел е манушес, бискай си живдо, ако ов празнувинел о рожденден.

10. Соске авдиес–да о християня на требе те празнувинен рожденденя?

¹⁰ Мислинес ли, кай о Йехова приеминел о празникя, колато авен тари хохавни религия? (Исаия 65:11, 12) На–а, на приеминел лен. Адалкхеске на празнувинас рожденденя или авер празникя, колато авен тари хохавни религия.

11. Соске десаве мануша празнувинен о празникя? Со требе те овел о най–важно туке?

¹¹ Десаве мануша жанен, кай и Коледа тай авер празникя авен тари хохавни религия, ама продължинен те празнувинен лен. Он мислинен, кай о празникя си шукар възможност те киден пес пе енданиенца. Дали ту–да мислинес чука? Нанай погрешно те мангес те овес те енданиенца. О Йехова кергяс о семейство тай мангел те овас близка амаре енданиенца. (Ефесяни 3:14, 15) Ама давкха те овас близка е Йеховаса требе те овел по–важно аменге далкхестар те дехинкярас амен амаре енданиенге, като празнувинас хохавне празникя.  Адалкхеске о апостол Павел пхенгяс: „Стараинен тумен те ахальовен со харешинел е Господариеске.“ (Ефесяни 5:10)

12. Соске о Йехова на приеминел десаве празникя?

¹² Бут мануша мислинен, кай нанай важно катар авен о празникя, ама о Йехова на мислинел чука. Ов на приеминел о празникя, колато авен тари хохавни религия или отден слава манушенге или държавенге. Например андо Египет о мануша керенас бут празникя пере хохавне девленге. Кана о израилтяня иклиле таро Египет, керде йекх далкхе празникиендар тай пхенде, кай си „празники е Йеховаске“. Ама о Йехова накажингяс лен далкхеске. (Изход 32:2–10) Сарто пхенгяс о пророки Исаия, на требе те „долас нищо мелало!“ (Четине Исаия 52:11.)

13. Саве въпрося ащи те авен те гогяте, кана решинес те спиринес те празнувинес?

¹³ Кана решинес те спиринес те празнувинес, ащи те авен те гогяте бут въпрося. Например: „Со требе те керав, ако ме колегя пучен ман соске на празнувинав и Коледа ленца? Со требе те керав, ако декхой дел ман коледно подаръки? Со требе те керав, ако мо ром или ми ромни мангел те празнувинав десаво празники? Сар ащи те помагинав ме чшавенге те на хан холи, ашал далкхеске кай на керас ленгере рожденденя или авер празникя?“

14, 15. Со ащи те керес, кана декхой поздравинел тут десаве празникиеске или дел тут подаръки?

¹⁴ Салке ситуациенде требе те мислинес внимателно со те пхенес или со те керес. Например ако о мануша пхенен туке „Бахтало нево бреш!“, нанай нужда те керес тут, кай на шунгян. Ащи те пхенес: „Благодаринав туке“. Ако декхой мангел те ахальовел по–бут, ащи те  пхенес леске соске на празнувинес. Ама винаги требе те овес любезно тай внимателно, тай те сикавес уважение. И Библия пхенел: „Нека тумаре думес винаги те овен шукар, подправиме лонеса. Чука ка жанен сар те отговоринен секаске.“ (Колосяни 4:6) Ащи те пхенес, кай дехес те кидес тут околенца тай те ден подаръкя йекх аверес, ама на мангес те керес давкха ко празникя.

¹⁵ Со требе те керес, ако декхой дел тут подаръки? И Библия на пхенел аменге секо йекх варесо, ковато ащи или нащи те керас, а пхенел, кай требе те пазинас амари съвест шужи. (1 Тимотей 1:18, 19) О мануш, ковато дел тут подаръки, ащи те на жанел, кай на празнувинес. Или ащи те пхенел: „Жанав, кай на празнувинес, ама мангав те дав тут давкха подаръки.“ Салке ситуациенде ащи те решинес дали ка лес о подаръки или на–а. Ама со–да те решинес, дикх те пазинес ти съвест шужи. На мангас те керас варесо, ковато ка аравел амаро амалипе е Йеховаса.

16. Со требе те керес, ако то семейство мангел те овес ленца ко празникя?

¹⁶ Со ка керес, ако то семейство мангел те празнувинел? На требе те дес тут ленца. Ма бистер, кай он ащи коркоре те решинен со ка керен. Ов любезно ленца тай уважине ленгере решения, сарто мангес он–да те уважинен тере. (Четине Матей 7:12.) Ама ако то семейство мангел те овес ленца ко празникя, со требе те керес? Англал те решинес со те керес, молине тут е Йеховаске те помагинел туке те лес о правилно решение. Помислине далкхеске со мислинел о Дел е празникиеске тай изучине библейска тай авер лила, за те ахальовес катар авел о празники. Ма бистер, кай мангес винаги те лошанкярес е Йеховас, далкхеса со керес.

17. Со ащи те керес, за те помагинес те чшавенге те на къскандинен, кана окола празнувинен?

 ¹⁷ Со ащи те керес, за те на овел пхаро те чшавенге, кана дикхен околен те празнувинен? Подекхана ащи те керес варесо специално ленге. Също ащи те керес ленге изненада, като дес лен подаръкя. Ама о най–шукар подаръки, ковато ащи те дес те чшавен, си те овес ленца тай те дехес лен.

18. Соске требе те жас ко събрания е Йеховаскере Свидетеленгере?

¹⁸ За те овас угодна е Йеховаске, требе те отчшияс сарто и хохавни религия, ачука о традициес тай о празникя–да, колато авен латар. Освен далкхесте требе те служинас е Девлеске, сарто ов мангел. Сар те керас давкха? Йекх варесо си те жас редовно ко събрания е Йеховаскере Свидетеленгере. (Четине Евреи 10:24, 25.) О събрания си бут важна, за те служинас е Девлеске, сарто ов мангел. (Псалм 22:22; 122:1) Кана кидас амен заедно амаре пхраленца тай пхениенца, ащи те насърчинас амен йекх аверес. (Римляни 1:12)

19. Соске си важно те хоратинес околенге далкхеске со сиклилян тари Библия?

¹⁹ Авер варесо, ковато требе те керес, за те служинес е Девлеске, сарто ов мангел, си те хоратинес околенге далкхеске со сиклилян тари Библия. Буте манушенге си пхаро ашал е кханиле букиенге, колато ачшон андо светос. Даже ащи пенжарес десаве манушен, колато чувствинен пес чука. Пхен ленге сави шукар надежда иси тут далкхеске со ка ачшол андо бъдеще. Кана жас ко събрания тай пхенес околенге сави си и истина тари Библия, ка дикхес, кай вече на мангес те овес анди хохавни религия тай те керес о традициес, колато авен латар. Ащи те овес сигурно, кай ка овес щастливо тай кай о Йехова бут ка благословинел тере усилия, кана решинес те служинес, сарто ов мангел. (Малахия 3:10)