4 ШЕРО
Кова си о Исус Христос?
1, 2. а) Ащи ли те пхенес, кай пенжарес десаве известноне манушес, ако само жанес лескоро алав? Обяснине. б) Со мислинен о мануша е Исусеске?
АНДО светос иси бут известна мануша. Ащи те жанес сар пхенел пес десаво известно мануш. Ама давкха, кай жанес лескоро алав, на означинел, кай наистина пенжарес лес или кай жанес всичко леске.
2 Може би шунгян е Исусеске, въпреки кай ов живингяс ки пхув англал декхате 2000 бреша. Ама по–бут таро мануша на жанен саво мануш уло о Исусес. Десаве пхенен, кай ов уло йекх лачшо мануш, авер пхенен, кай уло пророки, а авер верувинен, кай ов си о Дел. Ту со мислинес? (Дикх и 12 бележка ко крайос далкхе лилесте.)
3. Соске си важно те пенжарес е Йеховас тай е Исусес?
3 Бут си важно те жанес и истина е Исусеске. Соске? И Библия пхенел аменге: „За те овел лен вечно животос, требе те пенжарен тут, ковато синян о единствено истинско Дел, тай далкхес, колес ту бичшалгян, е Исусес.“ (Йоан 17:3) Ва, ако жанес и истина е Йеховаске тай е Исусеске, ащи те живинес вечно андо рай ки пхув. (Йоан 14:6) Също, давкха те пенжарес е Исусес ка помагинел туке авдиес–да, соскето ов си о най–лачшо примери далкхеске сар те живинас тай сар те икерас амен околенца. (Йоан 13:34, 35) Андо 1 шеро ахалилям и истина е Девлеске. Акана ка дикхас со сикавел и Библия е Исусеске.
АРАКХЛЯМ Е МЕСИЯС!
4. Со означинен о думес „Месия“ тай „Христос“?
4 Бут бреша англал те биянгьол о Исусес, о Йехова пхенгяс анди Библия, кай ка бичшалелас е Месияс, или е Христос. И дума „Месия“ авел тари еврейско чшиб, а и дума „Христос“ авел тари гръцко чшиб. О дуй–да думес означинен, кай о Дел ка избиринелас е Месияс тай ка делас лес специално бути. О Месия ка керел те ачшон саворе букя, колато обещингяс о Дел. Ама англал те биянгьол о Исусес, бут мануша пученас пес: „Кова ка овел о Месия?“
5. Дали е Исусескере ученикя верувиненас, кай о Исусес си о Месия?
5 Е Исусескере ученикя уле сигурна, кай о Исусес уло о Месия. (Йоан 1:41) Например о Симон Петър пхенгяс е Исусеске: „Ту синян о Христос.“ (Матей 16:16) Сар ащи те овас сигурна, кай о Исусес си о Месия?
6. Сар помагингяс о Йехова е искреноне манушенге те ахальовен кова си о Месия?
6 Бут време англал те биянгьол о Исусес, е Девлескере пророкя пишинде бут букя, колато ка помагиненас е манушенге те аракхен е Месияс. Сар ка ачшолас давкха? Представине туке, кай требе те жас ки автогара те жарес декхас, колес нисар на дикхлян. Ако декхой пхенел туке точно сар дикхьол давкха мануш, ка ащи те аракхес лес. Ачука, чрез пере пророкиенде, о Йехова пхенгяс аменге со ка керелас о Месия тай со ка ачшолас леса. Далкхестар, кай саворе далкха букя ачшиле, о искрена мануша ахальовен, кай о Исусес си о Месия.
7. Саве си дуй таро предскажиме букя, колато сикавен, кай о Исусес си о Месия?
7 Нека те дикхас дуй таро букя, колато предскажингяс о Йехова. Йекх лендар уло пишиме 700 бреша англал те биянгьол о Исусес. О пророки Михей пхенгяс, кай о Месия ка биянгьол йекхе цикне дизате, о Витлеем. (Михей 5:2) Точно отхе бияндило о Исусес! (Матей 2:1, 3–9) О второ си пишиме таро пророки Даниил. Ов пишингяс, кай о Месия ка авелас презал о 29 бреш. (Даниил 9:25) Далкха си само дуй таро предскажиме букя, колато сикавен ясно, кай о Исусес си о Месия. (Дикх и 13 бележка ко крайос далкхе лилесте.)
Кана покръстисайло, о Исусес ачшило о Месия или о Христос
8, 9. Со ачшило, кана покръстисайло о Исусес, тай сар давкха сикавел, кай ов си о Месия?
8 О Йехова сикавгяс бут ясно, кай о Исусес си о Месия. О Дел пхенгяс, кай о Йоан Кръстител ка дикхел знаки, колестар ка ахальовел кова си о Месия. Кана о Исусес гело ко Йоанес те кръстинел пес ки лен Йордан презал о 29 бреш, о Йоанес дикхляс давкха знаки. И Библия пхенел аменге со ачшило: „Кана уло покръстиме, о Исусес веднага иклило таро пани, тай аке, о небес путердило тай о Йоанес дикхляс е Девлескоро духос те ухльол сар куши тай те авел упрал о Исусес. Тай таро небес шундило гласос, ковато пхенгяс: ’Кавка си мо любимо Чшаво, колес одобринав.‘“ (Матей 3:16, 17) Кана о Йоанес дикхляс о знаки тай шунгяс е Девлескере хоратес, ахалило, кай о Исусес си о Месия. (Йоан 1:32–34) Околе диесесте, кана о Йехова помажингяс е Исусес пере духоса, ов ачшило о Месия. О Дел избирингяс лес, те овел Водачи тай Тхагар. (Исаия 55:4)
9 О пророчества тари Библия, о знаки, ковато диняс о Йехова тай давкха со пхенгяс, кана о Исусес покръстисайло, сикавен, кай о Исусес си о Месия. Ама катар ало о Исусес, тай саво уло ов? Нека те дикхас со пхенел и Библия далкхеске.
КАТАР АЛО О ИСУСЕС?
10. Со сикавел и Библия е Исусескере животоске англал те авел ки пхув?
10 И Библия сикавел, кай о Исусес живингяс бут време ко небес англал те авел ки пхув. О Михей пхенгяс, кай о Месия уло „таро пуране диеса“. (Михей 5:2) О Исусес–да бут дром пхенгяс, кай живингяс ко небес англал те биянгьол сар мануш. (Четине Йоан 3:13; 6:38, 62; 17:4, 5.) Даже англал те авел ки пхув, е Исусес сине бут близко амалипе е Йеховаса.
11. Соске о Исусес си зомкха специално е Йеховаске?
11 О Исусес си бут специално е Йеховаске. Соске? Соскето о Дел кергяс лес англал те керел саворе авер букя. Адалкхеске е Исусеске пхенел пес, кай си о „първородно всичконастар, со уло кердо“. * (Колосяни 1:15) О Исусес си бут специално е Йеховаске ашал далкхеске–да, кай само ов си кердо директно лестар. Адалкхеске леске пхенел пес, кай си о „единородно Чшаво“. (Йоан 3:16) Също, о Йехова използвингяс само е Исусес, за те керел саворе авер букя. (Колосяни 1:16) Тай само е Исусеске пхенел пес „о Слово“, соскето чрез лесте о Йехова хоратинелас е ангеленге тай е манушенге, тай пхенелас ленге со те керен. (Йоан 1:14)
12. Катар жанас, кай о Исусес нанай о Дел?
12 Десаве мануша верувинен, кай о Исусес си о Дел. Ама и Библия на сикавел давкха. И Библия пхенел, кай о Исусес уло кердо таро Дел. Давкха означинел, кай е Исусес иси начало. Ама е Йеховас, ковато кергяс саворе букя, нанай начало. (Псалм 90:2) Е Девлескоро Чшаво, о Исусес, нисар на мислингяс те лел е Девлескоро тхан. И Библия сикавел ясно, кай о Дад си по–баро таро Чшаво. (Четине Йоан 14:28; 1 Коринтяни 11:3.) Само о Йехова си „о Всемогъщо Дел“. (Битие 17:1) Ов си о най–баро тай о най–зорало саворендар. (Дикх и 14 бележка ко крайос далкхе лилесте.)
13. Соске и Библия пхенел, кай о Исусес си „е Девлескоро образи“?
13 О Йехова тай лескоро Чшаво, о Исусес, керенас бути заедно милиаргя бреша англал те овен керде о небес тай и пхув. Сигурно бут дехенас пес йекх аверес! (Йоан 3:35; 14:31) О Исусес зомкха бут дикхелас те овел сар пе дадесте, кай и Библия пхенел, кай ов си „е Девлескоро образи“. Давкха означинел, кай ов точно препел упрал о Дел. (Колосяни 1:15)
14. Сар е Йеховаскоро любимо Чшаво бияндило сар мануш?
14 Е Йеховаскоро любимо Чшаво уло готово те мукел о небес тай те биянгьол ки пхув сар мануш. Сар ачшило давкха? О Йехова кергяс чудо, кана пречшивгяс пе Чшавескоро животос таро небес, йекхе чшаякере вогиесте, която пхенелас пес Мария. Адалкхеске е Исусес на сине манушикано дад. Ачука, и Мария биянгяс съвършеноне чшавес тай тховгяс лескоро алав Исус. (Лука 1:30–35)
САВО УЛО О ИСУСЕС?
15. Сар те пенжарес по–лачшес е Йеховас?
15 Ащи те сикльовес бут букя е Исусеске, лескере животоске тай далкхеске саво си ов, кана четинес е Библиякере лила Матей, Марко, Лука тай Йоан. Далкха лила пхенен пес Евангелия. Давкха со четинес ленде ка помагинел туке те пенжарес по–лачшес е Йеховас–да, соскето о Исусес си точно сар пе Дадесте. Аке соске о Исусес пхенгяс: „Давкха, ковато дикхляс ман, дикхляс ме Дадес–да.“ (Йоан 14:9)
16. Со сикавелас о Исусес? Катар авенас лескере учения?
16 Бут мануша пхененас е Исусеске „Учители“. (Йоан 1:38; 13:13) Йекх таро най–важна букя, колато сикавелас ов, сине „и лачши новина е Тхагарипнаске“. Со си о Тхагарипе? Ов си е Девлескоро правителство, ковато ка управлинел таро небес упрал и цело пхув тай ка анел благословиес е манушенге, колато шунен е Девлес. (Матей 4:23) Всичко со сикавелас о Исусес авелас таро Йехова. О Исусес пхенгяс: „Давкха со сикавав нанай мандар, а авел далкхестар, ковато бичшалгяс ман.“ (Йоан 7:16) О Исусес жанелас, кай о Йехова мангел о мануша те шунен и лачши новина, кай е Девлескоро Тхагарипе ка управлинел упрал и пхув.
17. Кате сикавелас о Исусес е манушен? Соске делас всичко пестар, за те сикавел околен?
17 Кате сикавелас о Исусес е манушен? Секоне тханесте, кате сине мануша. Ов сикавелас е манушен ленгере кхеренде, ко гава тай ко диза, ко храми тай ко пазаря–да. О Исусес на жарелас о мануша те авен паш лесте. Бут дром ов жалас паш ленде. (Марко 6:56; Лука 19:5, 6) О Исусес уло бут букярно тай делас всичко пестар, за те сикавел е манушен. Соске? Соскето жанелас, кай давкха мангел о Дел лестар тай ов винаги шунелас пе Дадес. (Йоан 8:28, 29) О Исусес сикавелас е манушен ашал далкхеске–да, кай жалинелас лен. (Четине Матей 9:35, 36.) Ов дикхелас, кай о религиозна водачя на сикавенас и истина е Девлеске тай лескере Тхагарипнаске. Адалкхеске мангелас те помагинел кизом ащи по–буте манушенге те шунен и лачши новина.
18. Кола качества е Исусескере дехес?
18 О Исусес дехелас е манушен тай дикхелас ленге. Ов икерелас пес шукар е манушенца, адалкхеске о мануша на ханас холи те хоратинен леса. Даже о чшаве–да дехенас те овен турял лесте. (Марко 10:13–16) О Исусес винаги уло справедливо. Ов мразинелас и корупция тай и несправедливост. (Матей 21:12, 13) Кана о Исусес уло ки пхув, е жувлиен на сине дума тай често о мруша на икеренас пес лачшес ленца. Ама о Исусес винаги уважинелас е жувлиен тай икерелас пес шукар ленца. (Йоан 4:9, 27) О Исусес наистина уло смирено. Например йекхвар тховгяс пе апостоленгере пире. Дайкха сине бути, която керенас о робя. (Йоан 13:2–5, 12–17)
О Исусес проповединелас секоне тханесте, кате сине мануша
19. Саво примери сикавел, кай о Исусес жанелас со наистина требел е манушенге тай кай мангелас те помагинел ленге?
19 О Исусес жанелас со требелас е манушенге тай мангелас те помагинел ленге. Давкха дикхьолас ясно, кана саскярелас е манушен е Девлескере зоралипнаса. (Матей 14:14) Например йекх мануш, колес сине проказа, ало паш о Исусес тай пхенгяс: „Ако ту мангес, ащи те керес ман шужо.“ Кана о Исусес дикхляс и дукх тай и мъка е манушескери, лескоро воги чшиндило. Ов жалингяс лес тай мангляс те помагинел леске. О Исусес ваздингяс по вас, докоснингяс е манушес тай пхенгяс леске: „Мангав! Ов шужо.“ Тогава о насвало мануш састило! (Марко 1:40–42) Ащи ли те представинес туке сар чувствисайло давкха мануш?
ВИНАГИ ВЕРНО ПЕ ДАДЕСКЕ
20, 21. Сар о Исусес диняс о най–лачшо примери далкхеске винаги те шунас е Девлес?
20 О Исусес си о най–лачшо примери далкхеске винаги те шунас е Девлес. Со–да те ачшолас или со–да те керенас леске о душманя, ов уло верно пе Дадеске. Например о Исусес на кергяс безех, кана о Бенг изкушингяс лес. (Матей 4:1–11) Кана лескере енданя на верувинде, кай ов си о Месия тай пхенде, кай „ов денилило“, о Исусес продължингяс те керел давкха со мангел о Дел. (Марко 3:21) Кана лескере душманя керенас леске кханиле букя, о Исусес ачшило верно е Девлеске тай нисар на ирингяс ленге кханилипнаса. (1 Петър 2:21–23)
21 Даже кана мъчително мударде лес, о Исусес ачшило верно е Йеховаске. (Четине Филипяни 2:8.) Представине туке кизом пхаро сине леске презал о диес англал те мерел. Ов уло пханло, хохавне свидетеля пхенде, кай хоратинел кханиле букя е Девлеске, осъдинде лес нечестна съдиядес, о народос асанас леске тай о войникя мъчинде лес тай ковинде лес каштесте. Англал те мерел пищингяс: „Вече ачшило!“ (Йоан 19:30) Трин диеса палал о мериба е Исусескоро, о Йехова възкресингяс лес тай диняс лес духовно телос. (1 Петър 3:18) Десаве курке палал далкхесте, о Исусес ирисайло ко небес, „бешло е Девлеске ки десно риг“ тай жаргяс о Дел те керел лес Тхагар. (Евреи 10:12, 13)
22. Со ащи те овел амен ашал далкхеске, кай о Исусес ачшило верно пе Дадеске?
22 Ашал далкхеске, кай о Исусес ачшило верно пе Дадеске, аме ащи те живинас вечно андо рай ки пхув, точно сарто мангелас о Дел таро начало. Андо следващо шеро ка дикхас сар е Исусескоро мериба ащи те анел аменге вечно животос.
^ абз. 11 Е Йеховаске пхенел пес Дад, соскето ов си о Създатели. (Исаия 64:8) Е Исусеске пхенел пес е Девлескоро Чшаво, соскето о Йехова кергяс лес. Е ангеленге тай е Адамиеске–да пхенел пес, кай си е Девлескере чшаве. (Йов 1:6; Лука 3:38)
