1, 2. Според туте соске и молитва си зомкха специално подаръки тай соске требе те жанас со пхенел и Библия е молитваке?

КАНА мислинас кизом си бари и цело вселена, и пхув дикхьол бут цикни. Кана о Йехова дикхел и пхув, о мануша саворе народовиендар дикхьон леске сар цикокори капка пани. (Псалм 115:15; Исаия 40:15) Въпреки кай синям зомкха цикне, андо Псалм 145:18, 19 пишинел: „О Йехова си паше жи саворенде, колато роден лес, жи саворенде, колато роден лес вогиестар. Ов ка изпълнинел о желание далкхенгоро, колато даран лестар, ка шунел ленгоро гласос, кана роден помощ лестар, тай ка спасинел лен.“ Сави шукар привилегия иси амен! О Йехова, о всемогъщо Създатели, мангел те овел паше жи аменде тай те шунел амаре молитвес. Ва, и молитва си бари привилегия тай специално подаръки, ковато о Йехова диняс секоне йекхес амендар.

² Ама о Йехова ка шунел амен само ако молинас амен, сарто мангел ов. Сар ащи те керас давкха? Нека те дикхас со пхенел и Библия е молитваке.

3. Соске требе те молинес тут е Йеховаске?

³ О Йехова мангел те хоратинес леске, като молинес тут. Катар жанас давкха? Четине Филипяни 4:6, 7. Помислине кизом си любещо давкха, кай о Създатели, ковато кергяс и цело вселена, интересувинел пес тутар тай мангел те пхенес леске сар чувствинес тут тай саве холя иси тут.

4. Сар давкха те молинес тут редовно е Йеховаске ка керел то амалипе леса по–зорало?

 ⁴ И молитва помагинел аменге те овас лачше амала е Йеховаса. Кана о амала пхенен йекх авереске за соске мислинен, саве холя иси лен тай сар чувствинен пес, ачшон по–близка. Чука ачшол, кана молинас амен е Йеховаске. Чрез и Библия ов пхенел туке сар мислинел, сар чувствинел пес тай со ка керел андо бъдеще. Ащи редовно те хоратинес леске тай те пхенес леске всичко со си те илесте. Кана керес давкха, то амалипе е Йеховаса ка ачшол са по–зорало. (Яков 4:8)

5. Катар жанас, кай о Йехова на шунел саворе молитвес?

⁵ Дали о Йехова шунел саворе молитвес? На–а. Ко диеса, кана живинелас о пророки Исаия, о Йехова пхенгяс е израилтяниенге: „Пхенен манге бут молитвес, ама на мангав те шунав тумен — тумаре васта си пхерде ратеса.“ (Исаия 1:15) Ако на синям внимателна, ащи те  керас букя, колато о Йехова мразинел, тай ашал далкхеске ов те на шунел амаре молитвес.

6. Соске и вяра си зомкха важно? Сар сикавес, кай иси тут вяра?

⁶ Ако мангас о Йехова те шунел амаре молитвес, требе те верувинас лесте. (Марко 11:24) О апостол Павел пхенгяс: „Би вяракоро нащи те овес угодно е Девлеске, соскето давкха, ковато иринел пес кариг о Дел, требе те верувинел, кай иси Дел тай кай ов възнаградинел далкхен, колато роден лес целоне вогиеса.“ (Евреи 11:6) Ама нанай достатъчно само те пхенас, кай верувинас. Требе те сикавас ясно, кай иси амен вяра, като синям послушна е Йеховаске секо диес. (Четине Яков 2:26.)

7. а) Соске требе те овас смирена тай те сикавас уважение, кана молинас амен е Йеховаске? б) Сар ащи те сикавас, кай синям искрена, кана молинас амен?

⁷ Кана молинас амен е Йеховаске, требе те овас смирена тай те сикавас уважение. Соске? Ако требе те хоратинас десаве манушеса, ковато си тхагар или президенти, ка сикавас уважение кариг лесте. Щом о Йехова си о Всемогъщо Дел, на требе ли те сикавас панда по–баро уважение тай смирение, кана хоратинас леске? (Битие 17:1; Псалм 138:6) Също требе те овас искрена тай те молинас амен е Йеховаске вогиестар, а ма те пхенас йекх тай съща думес секо дром. (Матей 6:7, 8)

8. Кана молинас амен варесоске, со авер требе те керас?

⁸ Кана молинас амен варесоске, палал далкхесте требе те керас всичко со зависинел амендар, за те ачшол давкха, колеске молисайлям. Например ако молинас амен е Йеховаске те дел амен о букя, колендар нуждаинас амен секо диес, на требе те овас мързелива тай те жарас ов те дел амен всичко на готово, въпреки кай ащи те керас бути далкхеске. Требе те овас букярне тай те приеминас секо бути, която ащи те керас. (Матей 6:11; 2 Солунци 3:10) Или ако молинас амен е Йеховаске те помагинел аменге те спиринас те керас варесо погрешно,  требе те нашас таро ситуациес, колато ащи те изкушинен амен. (Колосяни 3:5) Нека те дикхас десаве букя, колато бут мануша пучен пес е молитваке.

9. Каске требе те молинас амен? Со сикльовас е молитваке таро Йоан 14:6?

⁹ Каске требе те молинас амен? О Исусес сикавгяс пе ученикиен те молинен пес пере небесноне Дадеске. (Матей 6:9) Ов също пхенгяс: „Ме синьом о дром, и истина тай о животос. Никхой на авел паш о Дад освен чрез манде.“ (Йоан 14:6) Адалкхеске требе те молинас амен само е Йеховаске тай те керас давкха е Исусескере алавесте. Со означинел те молинас амен е Исусескере алавесте? За те шунел о Йехова амаре молитвес, требе те уважинас и специално позиция, която ов диняс е Исусес. Сарто сиклилям, о Исусес ало ки пхув, за те спасинел амен тари безех тай таро мериба. (Йоан 3:16; Римляни 5:12) О Йехова кергяс е Исусес Първосвещеники тай Съдияс. (Йоан 5:22; Евреи 6:20)

10. Иси ли правилно начини те заачшовас, кана молинас амен е Йеховаске? Обяснине.

¹⁰ Иси ли правилно начини те заачшовас, кана молинас амен? На–а, о Йехова на пхенел аменге, кай кана молинас амен, требе те перас кочиенде, те бешас или те тергьовас. И Библия сикавел, кай секо йекх начини те заачшовас, кана хоратинас е Йеховаске, си приемливо, ако далкхеса сикавас уважение кариг лесте. (1 Летописи 17:16; Неемия 8:6; Даниил 6:10; Марко 11:25) Е Йеховаске нанай важно сар заачшовас, кана молинас амен леске. Важно си те хоратинас леске илестар. Ащи те молинас амен на глас или наум, кате–да те овас тай кана–да те овел, презал о диес или презал и рат. Кана молинас амен е Йеховаске, ащи те овас сигурна, кай ов шунел амен, даже ако никхой авер на шунел амен. (Неемия 2:1–6)

11. За соске ащи те хоратинас е Йеховаске?

 ¹¹ За соске ащи те молинас амен? Ащи те молинас амен саворе букиенге, колато си угодна е Йеховаске. И Библия пхенел: „Со–да те мангас според лескери воля, ов шунел амен.“ (1 Йоан 5:14) Ащи ли те молинас амен далкхеске, состар нуждаинас амен тай сар чувствинас амен? Ва. Кана молинас амен е Йеховаске, требе те овел все едно хоратинас лачше амалеса. Ащи те пхенас е Йеховаске всичко со си амаре гогяте тай амаре илесте. (Псалм 62:8) Ащи те молинас лес те дел амен по свято духос, за те помагинел аменге те керас давкха со си правилно. (Лука 11:13) Също ащи те молинас лес те дел амен мъдрост, за те лас лачше решения тай те керел амен зорале, за те издържинас, кана си аменге пхаро. (Яков 1:5) Требе те молинас е Йеховас те простинел амаре безеха. (Ефесяни 1:3, 7) Също требе те молинас амен е Йеховаске ма само аменге, а околенге–да, сарто например амаре енданиенге тай амаре пхраленге тай пхениенге таро сбори. (Деяния 12:5; Колосяни 4:12)

12. Со требе те овел о най–важно амаре молитвенде?

¹² Со требе те овел о най–важно амаре молитвенде? О Йехова тай давкха со мангел ов. Требе те благодаринас леске вогиестар саворе букиенге, колато кергяс аменге. (1 Летописи 29:10–13) Жанас давкха, соскето кана о Исусес уло ки пхув, сикавгяс пе ученикиен сар те молинен пес. (Четине Матей 6:9–13.) Ов пхенгяс, кай най–наангле требе те молинен пес те светинел пес е Девлескоро алав. Давкха означинел саворе те ахальовен, кай лескоро алав си свято. Палал далкхесте о Исусес сикавгяс, кай требе те молинас амен те авел е Девлескоро Тхагарипе тай те ачшол е Йеховаскери воля ки цело пхув. Сарто сикавгяс о Исусес, първо требе те молинас амен далкхе важноне букиенге тай палал далкхесте ащи те пхенас саве си амаре нуждес. Кана о Йехова  тай лескери воля си ко първо тхан амаре молитвенде, сикавас со си о най–важно аменге.

13. Кизом дълга требе те овен амаре молитвес?

¹³ Кизом дълга требе те овен амаре молитвес? И Библия на пхенел нищо далкхеске. Амаре молитвес ащи те овен кратка или дълга, според далкхесте сави си и ситуация. Например ащи те пхенас кратко молитва англал те хас маро, а по–дълго молитва, кана благодаринас е Йеховаске или кана пхенас леске саве холя  иси амен. (1 Царе 1:12, 15) На мангас те пхенас дълга молитвес само за те ангярас амен англал околенде, сарто керенас десаве мануша е Исусескере диесенде. (Лука 20:46, 47) Салке молитвенца мануш нащи дехинкярел пес е Йеховаске. Леске си важно те молинас амен вогиестар.

14. Кизом често требе те молинас амен тай со ахальовас е Йеховаске далкхестар?

¹⁴ Кизом често требе те молинас амен? О Йехова пхенел аменге те хоратинас леске редовно. Анди Библия пишинел, кай требе те „молинас амен постоянно“. Също пишинел те „на спиринас те молинас амен“. (Матей 26:41; Римляни 12:12; 1 Солунци 5:17) О Йехова винаги си готово те шунел амен. Секо диес ащи те благодаринас леске, кай дехел амен тай си щедро кариг аменде. Също ащи те молинас лес те ръководинел амен  тай те дел амен сила тай утеха. Ако наистина ценинас и привилегия те молинас амен е Йеховаске, ка използвинас секо йекх възможност, за те хоратинас леске.

15. Соске требе те пхенас „амин“ ко крайос ки молитва?

¹⁵ Соске пхенас „амин“ ко крайос ки молитва? И дума „амин“ означинел „верно си“ или „чука те овел“. Ачука сикавас, кай давкха со пхенгям ки молитва сине вогиестар, ковато означинел, кай синям искрена. (Псалм 41:13) И Библия сикавел, кай кана декхой авер молинел пес тай аме шунас, си шукар те пхенас „амин“, наум или на глас, за те сикавас, кай синям съгласна лескере молитваса. (1 Летописи 16:36; 1 Коринтяни 14:16)

16. Дали о Йехова наистина отговоринел амаре молитвенде? Обяснине.

¹⁶ Дали о Йехова наистина отговоринел амаре молитвенде? Ва. И Библия пхенел, кай ов си „давкха, ковато шунел о молитвес“. (Псалм 65:2) О Йехова шунел о искрена молитвес, колато пхенен милионя мануша тай керел различна букя, за те отговоринел ленге.

17. Сар о Йехова използвинел е ангелен тай пе служителен ки пхув, за те отговоринел амаре молитвенде?

¹⁷ О Йехова използвинел е ангелен тай пе служителен ки пхув, за те отговоринел амаре молитвенде. (Евреи 1:13, 14) Иси бут примеря манушендар, колато молинде е Девлес те помагинел ленге те ахальовен и Библия тай хари палал далкхесте йекх таре Йеховаскере Свидетеля гело паш ленде. И Библия сикавел, кай о ангеля помагинен „и лачши новина“ те овел проповедиме ки цело пхув. (Четине Откровение 14:6.) Също бут амендар молисайлям е Йеховаске десаве проблемиеске или варесоске, колестар сине амен нужда тай йекх пхрал или йекх пхен таро сбори диняс  амен и помощ, която требелас аменге. (Притчи 12:25; Яков 2:16)

18. Сар о Йехова използвинел по свято духос тай и Библия, за те отговоринел амаре молитвенде?

¹⁸ О Йехова използвинел по свято духос, за те отговоринел амаре молитвенде. Кана молинас амен те помагинел аменге десаве проблемиеске, ов ащи те използвинел по свято духос, за те ръководинел амен тай те дел амен сила. (2 Коринтяни 4:7) О Йехова използвинел и Библия–да, за те отговоринел амаре молитвенде тай те помагинел аменге те лас лачше решения. Кана четинас и Библия, ащи те аракхас стиховя, колато ка помагинен аменге. О Йехова ащи те керел чука, кай кана декхой дел отговори ко събрание, те пхенел точно давкха, ковато требел аменге или йекх старейшина таро сбори ащи те пхенел аменге варесо тари Библия. (Галатяни 6:1)

19. Соске ащи те дикхьол, кай о Йехова на отговорингяс амаре молитвенде?

¹⁹ Подекхана ащи те пучас амен: „Соске о Йехова панда на отговорингяс мере молитвенде?“ Ма бистер, кай ов жанел кана тай сар те отговоринел аменге. Ов жанел состар нуждаинас амен. Подекхана ка требе те продължинас те молинас амен варесоске, за те сикавас, кай искрено мангас давкха тай кай наистина верувинас ко Дел. (Лука 11:5–10) Често о Йехова на отговоринел аменге чука, сарто очаквинас. Например ащи те молинас амен десаве проблемиеске тай о Йехова те на премахнинел лес, а те дел амен сила, за те издържинас. (Четине Филипяни 4:13.)

20. Соске требе те молинас амен е Йеховаске често?

²⁰ Саво баро подаръки си давкха те молинас амен е Йеховаске! Ащи те овас сигурна, кай ов шунел амен. (Псалм 145:18) Кизом по–често молинас амен е Йеховаске вогиестар, зомкха по–зорало ка ачшол амаро амалипе леса.