11 ШЕРО
Соске иси зомкха бут страдания?
1, 2. Со пучен бут мануша?
ЗЕМЕТРЕСЕНИЕ унищожинел йекх диз. Въоръжено мануш чорел таро мануша тай мударел лен. Йекх дай мерел, соскето сине ла ракос тай ашал далкхеске лакере панч чшаве ачшовен чороре.
2 Кана ачшон салка бедствия или трагедиес, бут мануша пучен „Соске?“ Он пучен соске иси зомкха бут омраза тай страдания андо светос. Дали ту–да декхана пучлян тут давкха?
3, 4. а) Со пучляс о Авакум? б) Сар отговорингяс леске о Йехова?
3 Тари Библия сикльовас, кай мануша, колен сине бари вяра андо Дел, пученас о също. Например о пророки Авакум пучляс е Йеховас: „Соске традес ман те дикхав о кханилипе тай соске дикхес о дукха? Соске англал манде иси чориба тай насилие, соске ачшон чингара тай соске иси раздоря?“ (Авакум 1:3)
4 Андо Авакум 2:2, 3 четинас сар о Дел отговорингяс е Авакумиеске тай о обещание, ковато диняс, те оправинел о букя. О Йехова бут дехел е манушен. И Библия пхенел: „Ов дикхел туменге.“ (1 Петър 5:7) Даже о Дел мразинел давкха, кай иси страдания по–бут амендар. (Исаия 55:8, 9) Тогава нека те хоратинас далкхеске соске иси зомкха бут страдания андо светос.
СОСКЕ ИСИ ЗОМКХА БУТ СТРАДАНИЯ?
5. Со пхенен бут пасторя тай поповя е страданиенге? Со сикавел и Библия?
5 Кана о мануша страдинен, о пасторя тай о поповя често пхенен, кай сайка си е Девлескери воля. Десаве мануша пхенен, кай всичко со ачшол е манушеса, даже о кханиле–да букя, си пишиме таро Дел тай нисар нащи те ахальовас соске ачшол давкха. Авер пхенен, кай о мануша мерен, за те ащи те овен е Девлеса ко небес. Например, кана йекх чшаво мерел, десаве мануша пхенен, кай о Дел лиляс лес, соскето требелас леске панда йекх ангели ко небес. Ама давкха нанай верно. О Йехова нисар на керел те ачшон кханиле букя. И Библия пхенел: „Нащи о истинско Дел те керел кханилипе тай о Всемогъщо те овел несправедливо!“ (Йов 34:10)
6. Соске бут мануша пхенен, кай о Дел си виновно саворе кханиле букиенге андо светос?
6 Бут мануша пхенен, кай о Дел си виновно саворе кханиле букиенге андо светос, соскето мислинен, кай ов управлинел о светос. Ама сарто ахалилям андо 3 шеро, о истинско владетели далкхе светоскоро си о Бенг.
7, 8. Соске иси зомкха бут страдания андо светос?
7 И Библия пхенел, кай „о цело светос си е Кханилеске андо васта“. (1 Йоан 5:19) О владетели далкхе светоскоро, о Бенг, си кханило тай жестоко. Ов „хохавел о цело светос“. (Откровение 12:9) Бут мануша керен сар лесте. Дайкха си само йекх причина, кай андо светос иси зомкха бут хохайбе, омраза тай жестокост.
8 Иси авер–да причинес андо светос те овен зомкха бут страдания. Ашал далкхеске кай о Адам тай и Ева ухтиниле мамуй о Дел, ленгере чшаве бияндиле безехале. Ашал е безехаке, десаве мануша причининен страдания околенге. Он манген те овен варесо по–бут околендар. Адалкхеске марен пес, керен войни тай тормозинен околен. (Еклисиаст 4:1; 8:9) Подекхана о мануша страдинен, соскето „о време тай о непредвидено случай“ ресел лен. (Еклисиаст 9:11) Кана он си ко погрешно тхан, ко погрешно моменти, ащи те ачшол десаво кханилипе или инциденти.
9. Соске ащи те овас сигурна, кай е Йеховас иси сериозно причина те домукел о страдания те продължинен?
9 О страдания нисар нанай таро Йехова. Ов нанай виновно, кай иси войни, престъпления тай кай о мануша керен кханилипе околенге. О Дел на керел бедствия, сарто земетресения, ураганя тай наводнения. Ащи те пучес тут: „Ако о Йехова си о най–зорало анди вселена, соске домукел те ачшон салка кханиле букя?“ Жанас, кай о Дел бут дехел амен, адалкхеске требе те овел лес сериозно причина те домукел о страдания те продължинен. (1 Йоан 4:8)
СОСКЕ О ДЕЛ ДОМУКЕЛ О СТРАДАНИЯ
10. Сар о Бенг ухтинило мамуй о Йехова?
10 Анди Едемско градина о Бенг хохавгяс е Адамиес тай е Ева. Ов пхенгяс, кай о Дел си кханило владетели тай гаравел варесо лачшо таро Адам тай тари Ева. О Бенг мангляс те верувинен, кай ов ащи те овел по–лачшо владетели таро Йехова тай кай нанай лен нужда таро Дел. (Битие 3:2–5; дикх и 27 бележка ко крайос далкхе лилесте.)
11. Саве въпросиесте требе те отговоринас?
11 О Адам тай и Ева на шунде е Йеховас тай ухтиниле мамуй лесте. Он мислинде, кай сине лен право те решинен коркоре со си лачшипе тай со си кханилипе. Сар о Йехова ащине те сикавел, кай далкха, колато ухтиниле мамуй лесте, грешинде тай кай ов жанел со си о най–лачшо аменге?
12, 13. а) Соске о Йехова на мударгяс веднага далкхен, колато ухтиниле мамуй лесте? б) Соске о Йехова домукляс о Бенг те овел далкхе светоскоро владетели тай о мануша те управлинен пес коркоре?
12 О Йехова на мударгяс веднага е Адамиес тай е Ева. Ов мукляс те овен лен чшаве. Палал далкхесте о Йехова диняс е Адамиескере тай е Евакере чшавен и възможност те избиринен кой те овел ленгоро владетели. О Йехова мангелас и пхув те пхерьол съвършеноне манушенца тай давкха ка ачшол, со–да те керел о Бенг, за те пречинел. (Битие 1:28; Исаия 55:10, 11)
13 Кана о Бенг ухтинило мамуй о Йехова, милионя ангеля дикхенас. (Йов 38:7; Даниил 7:10) О Йехова диняс е Бенгес време те докажинел дали давкха со пхенгяс против лесте си верно. Ов диняс време е манушен–да те вазден пере правителства, далкхе светосте, колесте управлинел о Бенг, за те сикавен дали ка оправинен пес би е Девлескоро.
14. Со ачшило ясно, кана накхло време?
14 Бут бреша о мануша пробинде те управлинен пес коркоре, ама провалисайле. Давкха докажингяс, кай о Бенг си хохавно. О мануша нуждаинен пес таре Девлескери помощ. О пророки Йеремия уло право, кана пхенгяс: „О, Йехова, жанав, кай е манушескоро дром нанай лескере вастенде. Даже мануш нащи те решинел кате те жал.“ (Йеремия 10:23)
СОСКЕ О ЙЕХОВА ЖАРЕЛ ЗОМКХА БУТ ВРЕМЕ?
15, 16. а) Соске о Йехова домукел о страдания те продължинен зомкха бут време? б) Соске о Йехова на оправинел о проблемя, колато керел о Бенг?
15 Соске о Йехова домукел о страдания те продължинен зомкха бут време? Соске на махнинел о кханиле букя? Требелас те накхел време, за те ачшол ясно, кай е Бенгескоро управление провалисайло. О мануша пробинде различна управления, ама нито йекх лендар на успеингяс. Въпреки кай иси лен напредъки анди наука тай анди технология, нисар жи акана на сине зомкха бут несправедливост, чорипе, престъпления тай войни. Нащи те управлинас амен успешно би е Девлескоро.
16 О Йехова на оправинел о проблемя, колато керел о Бенг, соскето чука ка помагинелас леске те управлинел. Ама о Дел нисар нанай те керел савка варесо. Ако керелас давкха, о мануша ка верувиненас, кай ащи те управлинен пес коркоре успешно. Ама давкха си хохайбе тай о Йехова нанай те участвинел далкхесте. Ов нисар на хохавел. (Евреи 6:18)
17, 18. Со ка керел о Йехова, за те оправинел саворе кханиле букя, колато кергяс о Бенг?
17 Ащи ли о Йехова те оправинел саворе кханиле букя, колато ангяс е Бенгескоро тай е манушенгоро бунти? Ва. Е Девлеске всичко си възможно. О Йехова жанел кана саворе въпрося, колато але таре Бенгескоро бунти, ка получинен пълно отговори. Палал далкхесте ка керел и пхув рай, сарто мангелас андо начало. Саворе, колато си андо „миморя“, ка овен възкресиме. (Йоан 5:28, 29) О мануша нисар нанай те насвальовен или те мерен. О Исусес ка оправинел саворе кханиле букя, колато кергяс о Бенг. О Йехова ка използвинел е Исусес, „за те унищожинел е Бенгескере букя“. (1 Йоан 3:8) Благодарна синям, кай жикана авел давкха време, о Йехова си търпеливо аменца, за те ащи те пенжарас лес тай те избиринас лес те овел амаро Владетели. (Четине 2 Петър 3:9, 10.) Даже кана страдинас, ов помагинел аменге те издържинас. (Йоан 4:23; четине 1 Коринтяни 10:13)
18 О Йехова на традел амен зорле те избиринас лес те овел амаро Владетели. Ов диняс е манушен подаръки — и свободно воля. Нека те дикхас со означинел аменге давкха скъпоценно подаръки.
САР КА ИЗПОЛЗВИНЕС И СВОБОДНО ВОЛЯ?
19. Саво шукар подаръки диняс амен о Йехова? Соске требе те овас благодарна далкхе подаръкиеске?
19 И свободно воля, давкха шукар подаръки таро Йехова, керел амен бут различна таро животна. Е животнонен иси инстинкти — он нащи те решинен коркоре со те керен. Ама аме ащи те избиринас сар те живинас тай дали мангас те лошанкярас е Йеховас. (Притчи 30:24–28) На синям сар машинес–да, колато керен само давкха, колеске си керде. Иси амен и свобода те решинас саве те овас, саве амала те овен амен тай со те керас амаре животоса. О Йехова мангел те лошанас е животоске.
20, 21. Кова си о най–лачшо решение, ковато ащи те лес акана?
20 О Йехова мангел те дехас лес. (Матей 22:37, 38) Ов си сар йекх дад, ковато лошанел, кана лескоро чшаво пхенел леске „дехав тут“ вогиестар, а ма соскето декхой традел лес те керел давкха. О Йехова диняс амен и свобода те решинас дали ка служинас леске или на–а. О Бенг, о Адам тай и Ева избиринде те отчшиен е Йеховас. Сар ту ка използвинес то подаръки, и свободно воля?
21 Използвине ти свободно воля те служинес е Йеховаске. Иси милионя мануша, колато решинде те лошанкярен е Девлес тай те отчшиен е Бенгес. (Притчи 27:11) Со ащи те керес акана, за те овес анде Девлескоро нево светос, кана о Дел ка премахнинел саворе страдания? Ко следващо шеро ка отговоринас далкхе въпросиесте.
