1, 2. а) Кана йекх подаръки си ценно туке? б) Соске е Исусескери жертва си е Девлескоро най–баро подаръки?

САВО си о най–шукар подаръки, ковато дине тут декхана? Йекх подаръки нанай нужда те овел скъпо, за те овел туке ценно. Кана йекх подаръки лошанкярел тут или си варесо, ковато наистина требел туке, ту синян благодарно леске.

² Саворе букиендар, колато диняс амен о Дел, иси йекх подаръки, ковато требел аменге най–бут. Давкха си е Девлескоро най–баро подаръки е манушенге. Далкхе шерестар ка ахальовас, кай о Йехова бичшалгяс пе Чшавес, е Исусес, за те ащи аме те живинас вечно. (Четине Матей 20:28.) Кана бичшалгяс е Исусес ки пхув те дел по животос аменге, о Йехова сикавгяс, кай наистина дехел амен.

3. Соске мерен о мануша?

³ Чрез и жертва е Исусескери, или о откупи, о Йехова освободинел е манушен тари безех тай таро мериба. (Ефесяни 1:7) За те ахальовас соске сине необходимо о откупи, требе те жанас со ачшило ко пуране бреша анди Едемско градина. О първа мануша, о Адам тай и Ева, керде безех тай адалкхеске муле. Аме–да мерас, соскето синям ленгере чшаве  тай наследингям и безех лендар. (Дикх и 9 бележка ко крайос далкхе лилесте.)

4. Кова уло о Адам тай со сине лес?

⁴ Кана о Йехова кергяс е първоне манушес, е Адамиес, диняс лес варесо бут ценно. Ов диняс е Адамиес съвършено манушикано животос. Лес сине съвършено годи тай съвършено телос. Ов нисар нанаяс те насвальовел, те пхурьол тай те мерел. Ашал далкхеске кай о Йехова кергяс е Адамиес, ов уло сар лескоро дад. (Лука 3:38) О Йехова често хоратинелас леса. О Дел ясно пхенгяс е Адамиеске со мангел лестар тай диняс лес шукар бути, която анелас леске лошали. (Битие 1:28–30; 2:16, 17)

5. Со означинел давкха, ковато пхенел и Библия, кай о Адам сине кердо „те препел упрал о Дел“?

⁵ О Адам сине кердо „те препел упрал о Дел“. (Битие 1:27) О Йехова диняс лес качества сар перенде, сарто дехиба, мъдрост, справедливост тай зоралипе. Ов диняс е Адамиес и свобода те решинел коркоро со те керел пере животосте. О Адам на сине кердо сар роботи. О Дел кергяс лес те ащи те решинел коркоро дали ка керел лачшипе или кханилипе. Ако о Адам избиринелас те шунел е Девлес, ка живинелас вечно андо рай.

6. Со нашалгяс о Адам, кана на шунгяс е Девлес? Со означинел давкха аменге?

⁶ Ашал далкхеске кай на шунгяс е Девлес, о Адам уло осъдиме те мерел, тай чука измукляс саворе ценна букя, колато сине лес. Ов нашалгяс поро специално амалипе е Йеховаса, по съвършено животос тай по райско кхер, и Едемско градина. (Битие 3:17–19) О Адам тай и Ева избиринде те на шунен е Девлес тай вече ленге на сине нисави надежда. Ашал далкхеске со кергяс о Адам, „и безех диняс андо светос, тай чрез лате о мериба, тай чука о мериба ало  упрал саворенде, соскето саворе керде безех“. (Римляни 5:12) Кана кергяс безех, о Адам „бикингяс“ пес тай амен сар робя е безехаке тай е меримнаске. (Римляни 7:14) Иси ли надежда аменге? Ва, иси.

7, 8. Со си о откупи?

⁷ Со си о откупи? О откупи ащи те означинел дуй букя. О първо си и цена, която требе те платингьол, за те овел освободиме декхой или те кинел пес варесо обратно. О второ си и цена, която требе те платингьол, кана декхой нашалел или аравел варесо.

⁸ Нито йекх мануш нащине те платинел, за те поправинел и бари вреда тай те махнинел о мериба, ковато ангяс о Адам упрал аменде, кана кергяс безех. Ама о Йехова диняс о откупи, за те освободинел амен тари безех тай таро мериба. Нека те ахальовас по–бут е откупиеске тай далкхеске сави полза иси амен лестар.

9. Сар ащине те овел платиме о откупи?

⁹ Нито йекх амендар нащи те платинел о откупи е съвършеноне животоске, ковато нашалгяс о Адам. Соске? Соскето саворе синям несъвършена. (Псалм 49:7, 8) О откупи требелас те овел съвършено манушикано животос. Аке соске леске пхенел пес „съответстващо откупи“. (1 Тимотей 2:6) О животос, ковато ка овелас диндо, требелас те овел савка, савото уло о животос, ковато нашалгяс о Адам.

10. Сар о Йехова диняс о откупи?

¹⁰ Сар о Йехова диняс о откупи? О Йехова бичшалгяс пе дехиме Чшавес ки пхув. Ов кергяс далкхе Чшавес, е Исусес, англал те керел саворе авер букя. (1 Йоан 4:9, 10) О Исусес уло готово те мукел пе Дадес тай по кхер, о небес. (Филипяни 2:7) О Йехова пречшивгяс е Исусескоро животос таро небес ки  пхув тай о Исусес бияндило сар съвършено, бибезехало мануш. (Лука 1:35)

11. Сар ащине йекх мануш те дел откупи саворе манушенге?

¹¹ Ашал далкхеске кай о първо мануш, о Адам, на шунгяс е Йеховас, саворе мануша измукле и възможност те овел лен съвършено животос. Ащине ли декхой авер те спасинел е Адамиескере чшавен таро мериба? Ва. (Четине Римляни 5:19.) О Исусес, ковато нисар на кергяс безех, диняс по съвършено животос сар откупи. (1 Коринтяни 15:45) Лескоро съвършено животос ащине те спасинел саворе чшавен е Адамиескере таро мериба. (1 Коринтяни 15:21, 22)

12. Соске требелас те страдинел зомкха бут о Исусес?

¹² И Библия сикавел кизом бут мъчисайло о Исусес англал те мерел. Марде лес камшикиеса, ковинде лес каштесте тай мударде лес бавно тай мъчително. (Йоан 19:1, 16–18, 30) Соске требелас те страдинел зомкха бут о Исусес? Соскето о Бенг пхенгяс, кай нито йекх мануш нанай те ачшовел верно е Йеховаске, кана иси лес пхаре изпитания. О Исусес сикавгяс ясно, кай йекх съвършено мануш ащи те ачшовел верно е Девлеске, даже кана си леске бут пхаро. Представине туке кизом бут гордеинелас пес о Йехова е Исусеса! (Притчи 27:11; дикх и 15 бележка ко крайос далкхе лилесте.)

13. Сар уло платиме о откупи?

¹³ Сар уло платиме о откупи? Презал о 33 бреш, ко 14 диес таро еврейско масек нисан, е Исусескере душманя мударде лес. (Евреи 10:10) Кана накхле трин диеса, о Йехова възкресингяс лес тай диняс лес духовно телос. Палал далкхесте о Исусес ирисайло ко небес. Отхе заачшило англал пе Дадесте тай платингяс амаре безехенге. О Йехова приемингяс е Исусескоро животос сар откупи аменге. (Евреи 9:24) Ачука о Исусес  освободингяс амен тари безех тай таро мериба. (Четине Римляни 3:23, 24.)

14, 15. Со требе те керас, за те овен простиме амаре безеха?

¹⁴ Панда авдиес дикхас и полза, която анел аменге е Девлескоро най–баро подаръки. Нека те дикхас сави полза иси амен акана тай сави полза ка овел амен андо бъдеще.

¹⁵ Прошка е безехенге. Нанай винаги локо те керас со си правилно. Аме керас грешкес тай подекхана пхенас тай керас кханиле букя. (Колосяни 1:13, 14) Сар ащи те получинас прошка? Требе искрено те съжалинас далкхеске со кергям тай смирено те молинас е Йеховас те простинел аменге. Палал далкхесте ащи те овас сигурна, кай амаре безеха си простиме. (1 Йоан 1:8, 9)

16. Со требе те керас, за те овел амен шужи съвест англал о Дел?

¹⁶ Шужи съвест англал о Дел. Кана жанас, кай кергям варесо кханило, амаро ило дукхал амен, чувствинас амен виновна тай лажас те иринас амен кариг о Дел. Ама на требе те откажинас амен. Ако молинас е Йеховас те простинел аменге, ащи те овас сигурна, кай ов ка шунел амен тай ка простинел аменге. (Евреи 9:13, 14) О Йехова мангел те споделинас леса саворе амаре проблемя тай слабоскя. (Евреи 4:14–16) Като керас давкха, о баро пхарипе, ковато пхиравас ашал амаре безехенге, ка перел тай нанай те лажас те иринас амен кариг о Йехова.

17. Саве благословиес ащи те овен амен, ашал далкхеске кай о Исусес муло аменге?

¹⁷ Надежда те живинас вечно. „И заплата е безехаке си мериба, а е Девлескоро подаръки си вечно животос чрез о Исус Христос, амаро Господари.“ (Римляни 6:23) Ашал далкхеске кай о Исусес муло  аменге, ащи те живинас вечно тай те овел амен съвършено састипе. (Откровение 21:3, 4) Ама со требе те керас, за те овен амен далкха благословиес?

18. Катар ахальовас, кай о Йехова дехел амен?

¹⁸ Мислине далкхеске, кизом бут лошанес, кана декхой дел тут шукар подаръки. О откупи си о най–баро подаръки, ковато диняс амен о Йехова тай требе те овас бут благодарна далкхеске. Андо Йоан 3:16 пхенел пес, кай „о Дел зомкха бут дехингяс о светос, кай диняс пе единородноне Чшавес“. Ва, о Йехова дехел амен зомкха бут, кай диняс пе дехиме Чшавес, е Исусес, аменге. О Исусес–да дехел амен, соскето уло готово те мерел аменге. (Йоан 15:13) О откупи си баро подаръки, ковато сикавел туке ясно, кай о Йехова тай о Исусес наистина дехен тут. (Галатяни 2:20)

19, 20. а) Сар ащи те ачшос е Йеховаскоро амал? б) Сар ащи те сикавес, кай ценинес е Исусескери жертва?

¹⁹ Щом вече ахалилян кизом бут дехел тут о Йехова, сар ащи те ачшос лескоро амал? Нанай локо те дехес декхас, колес на пенжарес. Андо Йоан 17:3 пхенел пес, кай ащи те пенжарас е Йеховас. Кана керес давкха, торо дехиба кариг лесте ка барьол, ка мангес те лошанкярес лес тай ка ачшос лескоро амал. Адалкхеске продължине те сикльовес е Йеховаске, като изучинес и Библия. (1 Йоан 5:3)

²⁰ Сикав, кай ценинес е Исусескери жертва. И Библия пхенел, кай „давкха, ковато верувинел ко Чшаво, иси лес вечно животос“. (Йоан 3:36) Сар ащи те сикавас, кай верувинас лесте? Като керас давкха со сикавгяс о Исусес. (Йоан 13:15) Нанай достатъчно те пхенас, кай верувинас ко Исусес. За те сикавас, кай ценинас е Исусескери жертва, требе те керас  букя, колато докажинен, кай иси амен вяра. Андо Яков 2:26 четинас: „И вяра без дела си мули.“

21, 22. а) Соске требе те жас ко Възпоменание е Исусескере меримнаске секо бреш? б) Со ка дикхас андо 6 тай о 7 шеро?

²¹ Жа ко Възпоменание е Исусескере меримнаске. Ки рат англал те мерел, о Исусес пхенгяс, кай требе те керас възпоменание лескере меримнаске. Керас давкха секо бреш тай леске пхенел пес Възпоменание или „Господно вечеря“. (1 Коринтяни 11:20; Матей 26:26–28) О Исусес мангел те дас амен годи далкхеске, кай ов диняс по съвършено животос сар откупи аменге. Ов пхенгяс: „Керен давкха сар възпоменание манге.“ (Четине Лука 22:19.) Кана жас ко Възпоменание, сикавес, кай дес тут годи е Исусескере жертваке тай далкхеске кизом бут дехен тут о Йехова тай о Исусес. (Дикх и 16 бележка ко крайос далкхе лилесте.)

²² О откупи си о най–баро подаръки, ковато ащине те получинас декхана. (2 Коринтяни 9:14, 15) Давкха ценно подаръки ка анел полза даже буте манушенге, колато вече муле. Андо 6 тай о 7 шеро ка дикхас сар си възможно давкха.