1. Со ащи те пучес тут, кана изучинес давкха лил?

БИСКАЙ изучингян давкха лил, ахалилян бут истинес тари Библия. Десаве лендар си е Девлескоро обещание те дел амен вечно животос, и истина далкхеске со ачшол аменца кана мерас тай и надежда, кай ка овел възкресение. (Еклисиаст 9:5; Лука 23:43; Йоан 5:28, 29; Откровение 21:3, 4) Сигурно вече авес ко събрания е Йеховаскере Свидетеленгере тай верувинес, кай он служинен е Девлеске, сарто ов мангел. (Йоан 13:35)  Тай може би започнингян те барярес то амалипе е Йеховаса тай даже решингян те служинес леске. Адалкхеске ащи те пучес тут „Акана со требе те керав, за те служинав е Девлеске?“

2. Соске о етиопцос мангляс те покръстинел пес?

² Далкхе въпросиеске мислингяс йекх мануш тари Етиопия, ковато живингяс, кана о Исусес уло ки пхув. Хари палал е Исусескоро възкресение, йекх лескере ученикиендар, о Филип, проповедингяс далкхе манушеске. О Филип докажингяс леске, кай о Исусес си о Месия. Давкха со ахалило о етиопцос зомкха бут докоснингяс лес, кай ов веднага пхенгяс: „Дикх, атхе иси пани, со спиринел ман те покръстинав ман?“ (Деяния 8:26–36)

3. а) Сави заповед диняс пе ученикиен о Исусес? б) Сар требе те керел пес о покръстване?

³ И Библия ясно сикавел, кай ако мангес те служинес е Йеховаске, требе те покръстинес тут. О Исусес пхенгяс пе ученикиенге: „Керен ученикиен саворе народовиендар, като покръстинен лен.“ (Матей 28:19) О Исусес диняс амен примери, кана ов–да покръстисайло. Ов кергяс давкха чрез пълно потапяне андо пани, а на уло само пръскиме паниеса. (Матей 3:16) Авдиес–да, кана йекх християни покръстинел пес, требе те керел давкха чрез пълно потапяне андо пани.

4. Со сикавес англал саворенде, кана покръстинес тут?

⁴ Кана покръстинес тут сикавес англал саворенде, кай наистина мангес те овес е Девлескоро амал тай те служинес леске. (Псалм 40:7, 8) Тогава ащи те пучес тут: „Со требе те керав, ако мангав те покръстинав ман?“

5. а) Со требе те керес, англал те покръстинес тут? б) Соске си важно те жас ко събрания е Йеховаскере Свидетеленгере?

⁵ Англал те покръстинес тут, требе те сикльовес по– бут е Йеховаске тай е Исусеске, за те пенжарес лен. Вече започнингян те керес давкха, като изучинес и Библия. (Четине Йоан 17:3.) Ама давкха нанай достатъчно. И Библия пхенел, кай требе те овел тут „точно познание“ далкхеске со мангел о Дел. (Колосяни 1:9) О събрания е Йеховаскере Свидетеленгере ка помагинен туке те ачшос по–лачшо амал е Йеховаса. Аке соске си важно те жас редовно ко събрания. (Евреи 10:24, 25)

6. Саве букя тари Библия требе те жанес, англал те покръстинес тут?

⁶ О Йехова на очаквинел те жанес всичко со сикавел и Библия, англал те покръстинес тут. Ов на очаквинелас о етиопцос–да те жанел всичко, англал те покръстинел пес. (Деяния 8:30, 31) Даже ка продължинас те сикльовас е Девлеске вечно. (Еклисиаст 3:11) Ама за те покръстинес тут требе те жанес тай те приеминес о основна букя тари Библия. (Евреи 5:12)

7. Сар помагингяс туке давкха, кай изучинес и Библия?

⁷ И Библия пхенел: „Би вяракоро нащи те овес угодно е Девлеске.“ (Евреи 11:6) Аке соске требе те овел тут вяра, англал те покръстинес тут. И Библия пхенел, кай десаве мануша тари пурани диз Коринт шунде со сикавенас е Исусескере ученикя тай ашал далкхеске „верувинде тай уле покръстиме“. (Деяния 18:8) Давкха кай изучинес и Библия помагингяс туке–да те овел тут вяра анде Девлескере обещания тай далкхесте, кай е Исусескери жертва ащи те спасинел амен тари безех тай таро мериба. (Исус Навиев 23:14; Деяния 4:12; 2 Тимотей 3:16, 17)

8. Со ка традел тут те пхенес околенге давкха со сиклилян?

⁸ Като сикльовес по–бут тари Библия тай дикхес сар давкха керел то животос по–шукар, тери вяра ка  барьол. Давкха ка традел тут те мангес те пхенес околенге давкха со сикльовес. (Йеремия 20:9; 2 Коринтяни 4:13) Ама каске те пхенес?

9, 10. а) Каса ащи те започнинес те хоратинес далкхеске со сиклилян тари Библия? б) Со требе те керес, ако мангес те проповединес е пхраленца тай е пхениенца таро сбори?

⁹ Сигурно ка мангес те пхенес давкха со сикльовес те енданиенге, те амаленге, те комшидоненге или те колегиенге. Давкха си шукар, ама винаги требе те хоратинес любезно тай дехимнаса. Като накхел време, ка ащи те започнинес те проповединес е пхраленца тай е пхениенца. Кана синян готово далкхеске, ащи те хоратинес е Свидетелеса, колеса изучинес и Библия, тай те пхенес леске, кай мангес те участвинес анди проповедно служба заедно е пхраленца тай е пхениенца таро сбори. Ако ов–да мислинел, кай синян готово тай ако живинес според далкхесте со сиклилян тари Библия, тогава заедно леса ка хоратинен до старейшиниенца таро сбори.

¹⁰ За соске ка хоратинен ленца? О старейшиня ка хоратинен туса, за те дикхен дали ахальовес о основна букя тари Библия тай верувинес ленде, дали живинес ачука, сарто пхенел и Библия тай дали наистина мангес те овес йекх таре Йеховаскере Свидетеля. Ма бистер, кай о старейшиня грижинен пес саворенге таро сбори тай ка грижинен пес туке–да, адалкхеске ма дара те хоратинес ленца. (Деяния 20:28; 1 Петър 5:2, 3) Палал и среща е старейшиниенца, он ка пхенен туке дали ащи те започнинес те проповединес е пхраленца тай е пхениенца.

11. Соске си зомкха важно те керес променес, англал те започнинес те проповединес е пхраленца тай е пхениенца таро сбори?

¹¹ О старейшиня ащи те пхенен туке, кай требе те керес панда променес, англал те започнинес те проповединес е пхраленца тай е пхениенца. Соске си зомкха  важно те керес далкха променес? Соскето, кана хоратинас околенца е Девлеске, аме пхиравас е Йеховаскоро алав, тай за те керас давкха, амаро животос требе те анел леске слава. (1 Коринтяни 6:9, 10; Галатяни 5:19–21)

12. Соске саворе мануша требе те разкаинен пес?

¹² Англал те покръстинес тут, требе те керес авер–да варесо. О апостол Петър пхенгяс: „Адалкхеске разкаинен тумен тай иринен тумен, за те овен премахниме тумаре безеха.“ (Деяния 3:19) Со означинел те разкаинес тут? Давкха означинел те овес пишмани е кханиле букиенге, колато кергян. Например ако кергян неморална букя, требе те разкаинес тут далкхеске. Даже ако те целоне животосте кергян со ащи, за те керес со си правилно, пак требе те разкаинес тут, соскето саворе синям безехале тай требе те молинас е Девлес те простинел аменге. (Римляни 3:23; 5:12)

13. Со означинел те „иринес тут“?

¹³ Ресел ли само те овес пишмани далкхеске со кергян? На–а. О Петрес пхенгяс, кай требе също те „иринес тут“. Давкха означинел те отчшиес о кханиле букя тай те започнинес те керес давкха со си правилно. Представине туке, кай цидес те жас десаве тханесте, колесте на улян нисар жи акана. Като накхел хари време, ахальовес, кай грешингян о дром. Со ка керес? Сигурно ка спиринес, ка иринес тут тай ка цидес ко правилно дром. Савка варесо ащи те ачшол, бискай изучинес и Библия. Ащи те ахальовес, кай требе те променинес десаве букя тере животосте. Ов готово те „иринес тут“, ковато означинел те променинес тут, тай те започнинес те керес давкха со си правилно.

14. Сар ащи те отдес тут е Йеховаске?

¹⁴ Авер важно варесо, ковато требе те керес, англал те покръстинес тут, си те отдес тут е Йеховаске. Кана отдес тут е Йеховаске, пхенес йекх молитва, колате обещинес те служинес само леске тай лескери воля те овел о най–важно варесо тере животосте. (Второзаконие 6:15)

15, 16. Со традел манушес те отдел пес е Девлеске?

¹⁵ Давкха те обещинес те служинес само е Йеховаске, си подобно далкхеса те обещинес те овес те целоне животосте е манушеса, колес дехес. Представине туке, кай йекх чшаво пхирел йекхе чшаяса. Бискай запенжарел пес по–лачшес ласа, ов започнинел те дехел ла тай мангел те пранденел лаке. Давкха си сериозно решение, ама о чшаво мангел те керел давкха, соскето дехел е чшая.

¹⁶ Бискай сикльовес е Йеховаске, то дехиба кариг лесте барьол тай мангес те дес о най–лачшо тутар, за те служинес леске. Давкха ка традел тут те пхенес йекх молитва, колате ка обещинес е Йеховаске, кай ка служинес леске. И Библия пхенел, кай секой, ковато мангел те пхирел палал о Исусес, требе те „откажинел пес пестар“. (Марко 8:34) Давкха означинел, кай о най–важно тере животосте требе те овел те шунес е Йеховас. Давкха со мангел о Йехова, требе те овел по–важно далкхестар со мангес ту. (Четине 1 Петър 4:2.)

17. Соске десаве мануша на отден пес е Йеховаске?

¹⁷ Десаве мануша на отден пес е Йеховаске, соскето даран, кай нанай те ащи те изпълнинен по обещание те служинен леске. Он на манген те дукхавен е Йеховас  или ащи те мислинен, кай ако на отден пес е Девлеске, ов нанай те родел ленге сметка далкхеске со керен.

18. Со ка помагинел туке те на мукес и дар, кай ка дукхавес е Йеховас, те спиринел тут?

¹⁸ То дехиба кариг о Йехова ка помагинел туке те на мукес и дар, кай ка дукхавес лес, те спиринел тут. Ашал далкхеске кай дехес е Девлес, ка дес всичко тутар, за те керес давкха со обещингян леске. (Еклисиаст 5:4; Колосяни 1:10) Нанай те дикхьол туке зомкха пхаро те керес давкха со мангел о Йехова. О апостол Йоан пишингяс: „Давкха означинел о дехиба кариг о Дел — те керас давкха со мангел амендар, а давкха со мангел амендар нанай пхаро.“ (1 Йоан 5:3)

19. Соске на требе те дарас те отдес тут е Йеховаске?

¹⁹ Нанай нужда те овес съвършено, за те отдес тут е Йеховаске. Ов нисар на мангел амендар варесо, ковато нащи те керас. (Псалм 103:14) Ов ка помагинел туке те керес давкха со си правилно. (Исаия 41:10) Мук тут е Йеховаске андо васта те целоне илеса тай „ов ка изправинел те дрома”. (Притчи 3:5, 6)

20. Со требе те керес, ако вече отдинян тут е Девлеске?

²⁰ Мислинес ли, кай синян готово те отдес тут е Йеховаске? Ако вече отдинян тут е Йеховаске, акана ащи те керес и следващо стъпка. Требе те покръстинес тут.

21, 22. Сар ащи те сикавес англал саворенде, кай верувинес ко Йехова тай мангес те служинес леске?

²¹ Пхен йекхеске таро старейшиня тере сбориестар, кай вече отдинян тут е Йеховаске тай мангес те покръстинес тут. Палал далкхесте десаве таро  старейшиня ка обсъдинен туса о основна букя тари Библия. Ако он си съгласна, кай синян готово те покръстинес тут, ка пхенен туке, кай ащи те керес давкха ко следващо конгреси е Йеховаскере Свидетеленгоро. Ко конгреси ка овел проповед далкхеске со означинел о покръстване. О пхрал, ковато ка керел дайкха проповед, ка задел дуй въпрося далкхенге, колато ка покръстинен пес. Кана отговоринес  далкхе въпросиенде, ка сикавес англал саворенде, кай верувинес ко Йехова тай мангес те служинес леске. (Римляни 10:10)

²² Палал далкхесте ка овес покръстиме. Давкха ка ачшол чрез пълно потапяне андо пани. О покръстване  ка сикавел саворенге, кай отдинян тут е Йеховаске тай вече синян йекх таре Йеховаскере Свидетеля.

23. Со означинел те овес покръстиме „андо алав е Дадескоро, е Чшавескоро тай е святоне духоскоро“?

²³ О Исусес пхенгяс, кай лескере ученикя ка овен покръстиме „андо алав е Дадескоро, е Чшавескоро тай е святоне духоскоро“. (Четине Матей 28:19.) Со означинел давкха? Давкха означинел, кай приеминес е Йеховаскери власт тай ахальовес сар о Дел използвинел е Исусес, за те керел пи воля тай сар използвинел по свято духос, за те керел давкха со мангел. (Псалм 83:18; Матей 28:18; Галатяни 5:22, 23; 2 Петър 1:21)

24, 25. а) Со означинел о покръстване? б) Со ка раздикхас ко последно шеро?

²⁴ О покръстване означинел варесо бут важно. Кана дес андо пани, давкха означинел, кай все едно мулян, или муклян то пурано животос. Кана икльос таро пани, все едно започнинес нево животос, за те керес е Девлескери воля. Давкха сикавел, кай вече ка служинес е Йеховаске. Ма бистер, кай на отдинян тут десаве манушеске, организацияке или букяке. Отдинян то животос е Йеховаске.

²⁵ Торо отдаване ка помагинел туке те барярес то амалипе е Девлеса. (Псалм 25:14) Давкха на означинел, кай мануш ка овел спасиме само ашал далкхеске кай си покръстиме. О апостол Павел пишингяс: „Продължинен те ден всичко тумендар, за те овен спасиме.“ (Филипяни 2:12) О покръстване си само о начало. Ама сар ащи те ачшовес паше жи ко Йехова? О последно шеро далкхе лилесте ка отговоринел далкхе въпросиесте.