1. Кой диняс амен животос?

О ЙЕХОВА „си о живдо Дел“. (Йеремия 10:10) Ов си амаро Създатели тай диняс амен животос. И Библия пхенел: „Tу кергян саворе букя тай всичко ачшило тай сине кердо, соскето ту манглян давкха.“ (Откровение 4:11) О Йехова мангляс те овел амен животос. О животос си ценно подаръки лестар. (Четине Псалм 36:9.)

2. Со требе те керас, за те овел амен шукар животос?

² О Йехова дел амен о букя–да, колато требен аменге, за те овас живде, сарто о хабе тай о пани. (Деяния 17:28) Ама ов на мангел само те овас живде, а те лошанас е животоске. (Деяния 14:15–17) За те овел амен шукар животос, требе те спазвинас е Девлескере заповегя. (Исаия 48:17, 18)

3. Со кергяс о Йехова, кана о Каин мударгяс е Авелес?

³ И Библия сикавел амен, кай амаро тай околенгоро животос си бут ценно е Йеховаске. Например кана е Адамиескоро тай е Евакоро чшаво, о Каин, бут холянгяс пе по–цикне пхралеске, е Авелеске, о Йехова пхенгяс е Каинеске те икерел пи холи. Ама о Каин на шунгяс лес тай зомкха бут нерверисайло, кай „нападингяс пе пхралес, е Авелес, тай мударгяс лес“. (Битие 4:3–8) О Йехова накажингяс е Каинес, ашал далкхеске кай мударгяс е Авелес. (Битие 4:9–11) Далкхестар ахальовас, кай си опасно те нерверинас амен тай те мразинас декхас, соскето давкха ащи те керел  амен кханиле тай жестока. Салке манушес нанай те овел вечно животос. (Четине 1 Йоан 3:15.) За те овас угодна е Йеховаске, требе те сикльовас те дехас саворе манушен. (1 Йоан 3:11, 12)

4. Сар йекх таро заповегя, колато диняс о Дел е израилтяниен, сикавел со мислинел о Дел е животоске?

⁴ Бут бреша палал о мериба е Авелескоро, о Йехова сикавгяс, кай ценинел о животос, кана диняс е Моисейес о Деш заповегя. Йекх лендар си: „Ма мудар.“ (Второзаконие 5:17) Ако мануш нарочно мударелас декхас, требелас ов–да те овел мудардо.

5. Со мислинел о Дел далкхеске те керел пес аборти?

⁵ Со мислинел о Дел далкхеске те керел пес аборти? Е Йеховаске о животос е чшавескоро си ценно, даже бискай о чшаво си андо воги е даякоро. Андо Закони, ковато о Йехова диняс е израилтяниен, пхенелас пес, кай ако декхой чалавел кхамне жувля тай далкхестар лакоро чшаво мерел, давкха мануш требе те овел мудардо. (Четине Изход 21:22, 23; Псалм 127:3) Давкха сикавел, кай о аборти си погрешно. (Дикх и 28 бележка ко крайос далкхе лилесте.)

6, 7. Сар сикавас е Йеховаске, кай ценинас о животос?

⁶ Сар ащи те сикавас е Йеховаске, кай ценинас сарто амаро, чука околенгоро–да животос? Като на керас варесо, ковато ка овел опасно амаре или околенгере животоске. Адалкхеске нанай те пушинас или те дрогиринас амен, соскето далкхестар ка насвальовас тай даже ащи те мерас.

⁷ Амаро телос тай амаро животос си таро Дел тай требе те използвинас лен, сарто мангел ов. Адалкхеске требе те отчшияс о кханиле букя. Ако на пазинас амен далкхе букиендар, ка овас мелале е Девлескере якхенде. (Римляни 6:19; 12:1; 2 Коринтяни 7:1) Нащи те служинас е Йеховаске, ако на ценинас  о животос, ковато диняс амен ов. Даже те овел аменге бут пхаро те чшинавас о кханиле навикя, ако дас всичко амендар те керас давкха, ашал далкхеске кай ценинас о животос, о Йехова ка помагинел аменге.

8. Со требе те керас, за те на овел десави опасност амаре или околенгере животоске?

⁸ Ахалилям, кай о животос си ценно подаръки. Е Йеховас иси доверие аменде, кай ка дас о най–лачшо амендар нисар те на керас варесо опасно амаре или околенгере животоске. Керас давкха, кана традас внимателно и лека кола, о мотори или авер варесо. Също отчшияс о спортовя, коленде иси насилие. (Псалм 11:5) Освен далкхесте керас всичко со ащи, за те на овел десави опасност амаре кхересте. О Йехова диняс е израилтяниен и заповед: „Кана керес нево кхер, требе те керес ограда турял о покриви, за те на анес кръвно вина те кхереске, ако декхой перел лестар.“ (Второзаконие 22:8)

9. Со на требе те керас е животноненца?

⁹ Даже давкха со керас е животноненца си важно е Йеховаске. Ов позволинел аменге те мударас животнонен хамнаске тай шехиенге или ако он си опасна амаре животоске. (Битие 3:21; 9:3; Изход 21:28) Ама на требе те мъчинас животнонен или те мударас лен само соскето чука манглям. (Притчи 12:10)

10. Катар жанас, кай о рат представинел о животос?

¹⁰ О рат си свято е Йеховаске, соскето о рат представинел о животос. Кана о Каин мударгяс е Авелес, о Йехова пхенгяс леске: „Те пхралескоро рат пищинел кариг манде тари пхув.“ (Битие 4:10) Е Авелескоро рат все едно сине лескоро животос тай о Йехова накажингяс е Каинес, ашал далкхеске кай мударгяс е Авелес. Палал о потопи анде Нойескере диеса,  о Йехова панда йекхвар сикавгяс, кай о рат представинел о животос. О Йехова позволингяс е Нойеске тай лескере семействоске те хан е животноненгоро мас. Ов пхенгяс: „Ащи те хан саворе животнонен, колато пхирен ки пхув. Дав тумен саворен, сарто диньом тумен о зелена растения.“ Ама о Йехова пхенгяс йекх варесо те на хан: „Само ма хан о мас е животнонескоро заедно лескере животоса, тоест лескере ратеса.“ (Битие 1:29; 9:3, 4, бележка телал и линия)

11. Сави заповед диняс о Дел е израилтяниен е ратеске?

¹¹ Декхате 800 бреша палал о време, кана о Йехова пхенгяс е Нойеске те на хан рат, ов пак пхенгяс пе народоске: „Ако декхой таро израилтяня или декхой околе народовиендар, ковато живинел машкар туменде, жал на лов тай долел животнонес или чириклес, колес ащи те хал, нека чшорел лескоро рат тай нека учшарел лес пхувяса.“ Палал далкхесте пхенгяс: „Ма хан о рат.“ (Левит 17:13, 14) Ачука о Йехова пак сикавгяс, кай мангел лескоро народос те ахальовел, кай о рат си свято. Он ащине те хан мас, а на требелас те хан о рат. Кана мударенас животнонес хамнаске, требелас те чшорен лескоро рат ки пхув.

12. Саво си о рат е християниенге?

¹² Десаве бреша палал о мериба е Исусескоро, о апостоля тай о старейшиня таро християнско сбори андо Йерусалим кидисайле те решинен сави част таро Закони, ковато диняс о Дел е израилтяниен, важинел е християниенге–да. (Четине Деяния 15:28, 29; 21:25) О Йехова помагингяс ленге те ахальовен, кай о рат панда сине ценно леске тай кай он–да требелас те продължинен те приеминен лес сар варесо свято. О първа християня нащине те хан или те пиен рат, нито те хан мас, колескоро рат на тхавдинило. Ако керенас давкха, ка овелас зомкха кханило, кизом  си о идолопоклонство тай и неморалност. Дали давкха променисайло авдиес? О Йехова панда мангел о рат те овел свято аменге. Адалкхеске авдиес–да о истинска християня на хан тай на пиен рат.

13. Соске о християня на приеминен кръвопреливане?

¹³ Дали давкха означинел, кай о християня на приеминен кръвопреливане? Ва. О Йехова диняс амен и заповед те на хас, нито те пияс рат. Ако о лекари пхенел туке те на пиес ракия, дали ка марес туке инжекция ракияса? Нанай те керес давкха! Ачука и заповед те на хас тай те на пияс рат означинел, кай нанай те приеминас кръвопреливане–да. (Дикх и 29 бележка ко крайос далкхе лилесте.)

14, 15. Со мислинен о християня е животоске? Ка керен ли варесо, ковато о Йехова на мангел, за те живинен по–бут? Обяснине.

¹⁴ Со ка керас, ако о лекари пхенел аменге, кай ка мерас, ако на приеминас кръвопреливане? Секо йекх амендар требе коркоро те решинел дали ка спазвинел е Девлескери заповед е ратеске. Аме, сар християня, бут ценинас е Девлескоро подаръки, о животос, адалкхеске родас авер начиня те лекувинас амен, за те продължинас те живинас, ама нанай те приеминас кръвопреливане.

¹⁵ Аме керас со ащи, за те овас састе, ама ашал далкхеске кай о рат представинел о животос, ковато си свято е Девлеске, нанай те приеминас кръвопреливане. Аменге си по–важно те шунас е Йеховас, далкхестар те опитинас амен те живинас по–бут, като керас варесо, ковато ов на мангел. О Исусес пхенгяс: „Който мангел те спасинел по животос, ка нашалел лес, а който нашалел по животос ашал манге, ка аракхел лес.“ (Матей 16:25) Мангас те шунас е Йеховас, соскето дехас лес. Ов жанел со си о най–лачшо аменге. О животос си ценно тай свято аменге, сарто си е Йеховаске. (Евреи 11:6)

16. Соске е Девлескере служителя шунен лес?

 ¹⁶ Е Девлескере верна служителя си решиме те спазвинен лескоро закони е ратеске. Он нанай те хан или те пиен рат тай нанай те приеминен рат, за те саскярен пес. * Ама ка приеминен авер лечение, за те спасинен по животос. Он си сигурна, кай давкха, ковато кергяс о рат тай о животос, жанел со си о най–лачшо ленге. Ту верувинес ли далкхесте?

17. Само за соске позволинелас о Йехова те използвинел пес о рат андо Израил?

¹⁷ Андо Закони, ковато о Дел диняс е Моисейес, о Йехова пхенгяс е израилтяниенге: „Е телоскоро животос си андо рат тай ме решингьом о рат те овел е олтариеске, за те овен изкупиме, соскето о рат анел изкупление.“ (Левит 17:11) Кана о израилтяня керенас безеха, ащине те манген прошка таро Йехова, като ден животнонес сар жертва тай пхенен е свещеникиеске те чшорел хари таро рат упрал о олтари андо храми. О Йехова позволинелас е израилтяниенге те използвинен о рат само далкхеске.

18. Сави възможност дел амен е Исусескери жертва?

¹⁸ Кана ало ки пхув, о Исусес отменингяс о закони е жертвенге, като диняс по животос, или по рат, за те овен простиме амаре безеха. (Матей 20:28; Евреи 10:1) Е Исусескоро животос уло зомкха ценно, кай ашал лескере жертваке, о Йехова ащине те дел саворе манушен и възможност те живинен вечно. (Йоан 3:16; Евреи 9:11, 12; 1 Петър 1:18, 19)

19. Со требе те керас, за те овас шуже „саворе манушенгере ратестар“?

 ¹⁹ Благодарна синям е Йеховаске, соскето амаро животос си шукар подаръки лестар! Мангас те пхенас е манушенге, кай ако иси лен вяра ко Исусес, ащи те живинен вечно. Аме дехас е манушен тай ка дас всичко амендар те сикавас лен сар те получинен животос. (Езекиил 3:17–21) Тогава, сар о апостол Павел, аме–да ка ащи те пхенас: „Шужо синьом саворе манушенгере ратестар, соскето на спирингьом те хоратинав туменге далкхеске со мангел те керел о Дел.“ (Деяния 20:26, 27) Аме сикавас, кай ценинас о рат тай о животос, кана хоратинас околенге е Йеховаске тай далкхеске кизом си ценно о животос леске.