34. ČLANKO PROUČIBASE
ĐILI 107 Te mothova mangipe sar o Devel
Sar o starešine mothovena mangipe hem milosrđe premalo okola so grešinena?
O Devel ko po šukaripe mangela te pomožini tut te ave đi o pokajanje (RIMLJ. 2:4)
SO KA SIKLJOVA?
Ka dikha sar o starešine pomožinena okolenđe kola ćerđe ozbiljno greh.
1. So šaj te desini pe palo odova so neko ćerđa ozbiljno greh?
KO PRETHODNO članko dikhljam so ćerđa o apostol Pavle ked jekh phral ando Korint ćerđa ozbiljno greh. Odova phral na kajinđa pe hem odolese valjanđa te cidel pe andi skupština. Ama, sar so o vodećo stih mothovi, disave kola ćerđe ozbiljno greh prihvatinđe i pomoć koja dobinđe, haljilje so ćerđe hem pokajinđe pe (Rimlj. 2:4). Sar šaj o starešine te pomožinen nekase te kajini pe?
2-3. So valjani te ćera ako đanaja so jekh objavitelj ćerđa ozbiljno greh hem sose?
2 Ako o starešine na đanena so i osoba ćerđa ozbiljno greh, on našti te pomožinen la. Odolese, so valjani te ćera ako đanaja so jekh objavitelj ćerđa ozbiljno greh? Valjani te podstaknina le te đal ko starešine te rodel pomoć (Is. 1:18; Dela 20:28; 1. Petr. 5:2).
3 Ama, so ako o objavitelj kova grešinđa na mangela te vaćeri e starešinencar? Tegani, amen valjani te đa ko starešine te phena lenđe te šaj te pomožinen lese. Odova tano šukar te ćera sose na mangaja te našala le. Ako odova objavitelj na menini pe, ov pana pobuter ka rumini po amalipe e Jehovaja. Isto ađahar, šaj te lađaćeri i skupština. Odolese, iako šaj te ovel amenđe pharo, amen đaja ko starešine sose mangaja e Jehova hem amare phrale ili phenja (Ps. 27:14).
SAR O STAREŠINE POMOŽINENA OKOLENĐE KOLA ĆERĐE OZBILJNO GREH?
4. Kova cilj isi len o starešine ked vaćerena nekasa ko ćerđa ozbiljno greh?
4 Ked neko ćerela ozbiljno greh, o starešinstvo birini trine starešinen kola ka služinen sar odbor ando starešine. a Odola phralja valjani te oven skromna hem ponizna. Đi trudinena pe te pomožinen odole objaviteljese, on đanena so našti te ćhiven le ki sila te menini pe (Pon. zak. 30:19). On tane svesna so na ka kajinen pe sare sar o David (2. Sam. 12:13). Disave olendar šaj na ka mangen te šunen e Jehovaso savet (Post. 4:6-8). Ama, e starešinengo cilj tano te pomožinen odole objaviteljese te kajini pe. Ko kola načelija ićerena pe ked valjani te vaćeren oleja?
5. Save valjani te oven o starešine ked vaćerena nekasa ko ćerđa ozbiljno greh? (2. Timoteju 2:24-26; dikh i slika.)
5 O starešine upro okova so ćerđa ozbiljno greh dikhena sar upro našaldo bakro kova tano pana dragoceno e Jehovase (Luka 15:4, 6). Odova ka dićhol ko olenge lafija, ko olengo stav hem ponašanje ked ka vaćeren odola osobaja. Ko nisavo način na ka oven gruba niti odova razgovor ka ovel samo formalno. Umesto odova, on ka mothoven o osobine andi 2. Timoteju 2:24-26. (Čitin.) Celo vreme ka oven ljubazna, šukar hem blaga odolese so mangena te resen đi olako vilo.
Sar o pastirija ko purano vreme ađahar o starešine trudinena pe te arakhen e našalde bakre hem te pomožinen le (Dikh o 5. odlomko)
6. Sar o starešine šaj te pripreminen po vilo angleder so ka vaćeren nekasa ko grešinđa?
6 O starešine pripreminena po vilo. On trudinena pe premali odija osoba te ponašinen pe sar o Jehova hem na bistrena e Pavlese lafija: „O Devel ko po šukaripe mangela te pomožini tut te ave đi o pokajanje.“ (Čitin Rimljanima 2:4.) Isto ađahar, na valjani te bistren so on tane pastirija kola tane odgovorna anglo Hrist hem kola sar oleste valjani te brininen pe andi skupština (Is. 11:3, 4; Mat. 18:18-20). Angleder so ka vaćeren odola osobaja, o odbor ka molini pe e Jehovase te pomožini len te anen la đi o pokajanje. On ki Biblija hem ko amare publikacije ka istražinen hem ka molinen pe aso odova ispravno te dikhen ki celo situacija. Ka trudinen pe te haljon odola osoba hem so ćhivđa la te ćerel ozbiljno greh (Posl. 20:5).
7-8. Sar šaj o starešine sar o Jehova te oven strpljiva premali osoba koja grešinđa?
7 O starešine oponašinena e Jehovaso strpljenje. On razmislinena ando odova sar o Jehova angleder postupinđa okolencar kola ćerđe ozbiljno greh. Na primer, o Jehova strpljivo vaćerđa e Kaineja, upozorinđa le so šaj te desini pe ako na menini pe. Ama, phenđa lese so šaj te ovel blagoslovimo ako ka šunel le (Post. 4:6, 7). Ked o kralj David ćerđa greh, o Jehova bićhalđa e proroko e Natane te ukorini le hem ov koristinđa jekh poređenje kova but pogodinđa le (2. Sam. 12:1-7). Svako puti ked o Izraelcija na šunđe e Jehova, ov bićhalđa lenđe pe prorokonen (Jer. 7:24, 25). Ov na ađićerđa oleso narodo te kajini pe, pa tegani te pomožini lese. Umesto odova, đi on pana grešinđe, ov podstakninđa len te kajinen pe.
8 O starešine sledinena e Jehovaso primer ked trudinena pe te pomožinen okolenđe so ćerđe ozbiljno greh. Sar so pisini ki 2. Timoteju 4:2, valjani te oven but strpljiva premalo lende. Znači, valjani te oven staložena hem hari pohari te pomožinen e osobaće kokri te haljol so aso olako šukaripe tano te ćerel odova soj tano ispravno. Ako bi on našalena po strpljenje hem ovena gruba premalo late, i osoba šaj na ka mangel te šunel olengo savet hem šaj na ka mangel te kajini pe.
9-10. Sar šaj o starešine te pomožinen e osobaće koja grešinđa te haljol so ćerđa?
9 O starešine trudinena pe te haljon so anđa đi odova neko te ćerel greh. Na primer, da li odija osoba ulji duhovno slabo odolese so na hine la lično proučavanje hem na đelji ki služba? Da li ćhinavđa redovno te molini pe? Da li ćhinavđa te borini pe protiv o pogrešna želje? Kasa družinđa pe? Savi zabava birinđa? Sar odola odluke utičinđe upro olako razmišljanje hem želje? Da li haljola sar olako Dad, o Jehova, osetini pe sebepi odova so ćerđa?
10 O starešine šaj te pućen e osoba disave pućiba kola ka pomožinen la te razmislini so slabonćerđa olako amalipe e Jehovaja hem anđa la đi o greh. On odova ka ćeren ko jekh ljubazno način hem na ka pućen la ando olake privatna buća kola na valjani te đanen (Posl. 20:5). Isto ađahar, šaj te koristinen disavo poređenje te šaj te pomožinen la te razmislini ando odova so ćerđa hem te haljol sose tano odova pogrešno, sar so o Natan ćerđa e Davideja. Šaj već o prvo puti ked ka vaćeren olaja, olaće ka ovel žao sebepi odova so ćerđa, a šaj čak hem ka kajini pe.
11. Sar o Isus ponašinđa pe okolencar so grešinđe?
11 O starešine trudinena pe te oponašinen e Isuse. Ked vaćerđa e Savleja ando Tarsis, o Isus pućlja le: „Savle, Savle, sose progonineja man?“ Ađahar pomožinđa le te haljol so odova so ćerela tano pogrešno (Dela 9:3-6). A andi „romni, i Jezavelja“ phenđa: „Dinđum la vreme te kajini pe“ (Otkr. 2:20, 21).
12-13. Sar šaj o starešine te den vreme e osobaće te kajini pe? (Dikh i slika.)
12 Odolese so oponašinena e Isuse, o starešine na ka anen sigate zaključak so i osoba na mangela te kajini pe. Disave šaj ka kajinen pe pana o prvo puti ked o odbor ka vaćeri olencar, ama disavenđe šaj ka valjani poviše vreme. Odolese, o starešine šaj ka organizujinen te vaćeren e osobaja nekobor putija. Šaj palo odova so o prvo puti ka vaćeren olaja, ka počmini ozbiljno te razmislini ando odova so phenđe laće. Oj šaj ka ponizini pe hem ka rodel e Jehovastar te oprostini laće (Ps. 32:5; 38:18). Odolese, aver puti ked ka vaćeren olaja šaj ka ovel la averćhane stav nego o prvo puti.
13 Te šaj te pomožinen e osobaće te kajini pe, o starešine trudinena pe te oven saosećajna hem te mothoven mangipe. On molinena pe e Jehovase te blagoslovini olengo trud hem nadinena pe so i osoba ka ovel svesno so ćerđa hem ka kajini pe (2. Tim. 2:25, 26).
O starešine šaj te vaćeren e osobaja koja ćerđa greh pobuter ando jekh puti te šaj te den la vreme te kajini pe (Dikh o 12. odlomko)
14. Ko pomožini e osobaće te kajini pe hem sose odova phenaja?
14 Amen ka ova but bahtale ako i osoba koja grešinđa kajini pe (Luka 15:7, 10). Iako o starešine dinđe sa pestar te pomožinen odola osobaće, ko u stvari pomožinđa laće te menini pe? Setin tut so o apostol Pavle pisinđa: „Šaj o Devel ka del len te pokajinen pe“ (2. Tim. 2:25). O Jehova, a na disavo manuš, pomožinđa odola osobaće te menini po način sar razmislini hem po stav. O Pavle phenđa kola šukar buća ovena palo odova so i osoba kajini pe. Odija osoba šaj pošukar ka haljol o ćaćipe, ka ovel svesno so ćerđa hem ka cidel pe ando Bengese zamke (2. Tim. 2:26).
15. Sar o starešine hem ponodri šaj te pomožinen e osobaće koja kajini pe?
15 Ked i osoba kajini pe, o odbor ka organizujini pastirska posete te šaj te pomožinen laće hem ponodri te borini pe protiv e Satanase zamke hem te ćerel odova soj tano ispravno (Jevr. 12:12, 13). Naravno, o starešine na ka vaćeren averenđe o detaljija ando odova so odija osoba ćerđa. Ama, so i skupština šaj ka valjani te đanel?
„OKOLEN SO ĆERENA GREH UKORIN ANGLO SARINENDE“
16. Upro kaste odnosinena pe o lafija „anglo sarinende“ kola pominena pe ki 1. Timoteju 5:20?
16 Čitin 1. Timoteju 5:20. O Pavle pisinđa e Timotejese, kova tegani služinđa sar starešina, te ukorini „anglo sarinende okolen so grešinđe“. Da li o Pavle mislinđa so valjani te ukorini len angli celo skupština? Na obavezno. Ov mislinđa so podijekh puti odova valjani te ćerel pe samo anglo nekobor đene kola šaj đanena aso odova greh. Odola šaj te oven o manuša kola dikhlje odova ili okola kolenđe i osoba vaćerđa so ćerđa odova greh. O starešine šaj te phenen samo odole manušenđe so vaćerđe e osobaja hem so ćerđe sa so šaj te pomožinen la.
17. Ked ki skupština ko obaveštenje vaćeri pe soj tano neko ukorimo hem sose?
17 Podijekh puti, but đene ki skupština već đanena so i osoba ćerđa ozbiljno greh ili verovatno ka saznajinen odova. Tegani o lafija „anglo sarinende“ odnosinena pe upri celo skupština. Odolese, jekh starešina angli celo skupština ko obaveštenje ka vaćeri so odova phral ili phen tane ukorime. Sose? O Pavle phenđa so odova tano „sar upozorenje averenđe“ te na ćeren hem on ozbiljno greh.
18. So ćerena o starešine ako jekh krstimi nepunoletno osoba ćerđa ozbiljno greh? (Dikh i slika.)
18 So ćerena o starešine ako jekh krstimi nepunoletno osoba ćerđa ozbiljno greh? O starešinstvo ka organizujini duj starešine te vaćeren olaja hem olake roditeljencar b kola tane Jehovase svedokija. O starešine ka pućen e roditeljen so ćerđe te šaj te pomožinen pe ćhavese te kajini pe. Ako o ćhavo šunela pe roditeljengo savet hem menini pe, tegani odola duj starešine šaj te odlučinen so na valjani te preduzminen nisave dodatna mere. On tane svesna so o Jehova e roditeljenđe dinđa odgovornost te sikaven pe ćhaven (Pon. zak. 6:6, 7; Posl. 6:20; 22:6; Ef. 6:2-4). Palo odova, disavo puti o starešine ka vaćeren e roditeljencar te dikhen sar đala lenđe. Ama, so ako odova ćhavo na mangela te menini pe? Tegani, o odbor ka vaćeri oleja hem olese roditeljencar kola tane Svedokija.
Ako jekh nepunoletno osoba ćerđa greh, duj starešine ka vaćeren olaja hem olake roditeljencar kola tane Svedokija (Dikh o 18. odlomko)
„O JEHOVA TANO BUT SAMILOSNO HEM MILOSRDNO“
19. Sar o starešine šaj te oponašinen e Jehova ked vaćerena nekasa ko ćerđa ozbiljno greh?
19 O starešine isi len odgovornost anglo Jehova te zaštitinen i skupština ando okola so na mangena te ićeren pe ko olese zapovestija (1. Kor. 5:7). On isto mangena te pomožinen e osobaće koja grešinđa te kajini pe. Đi pomožinena la, on nadinena pe so oj ka menini pe. Sose? Odolese so mangena te oponašinen e Jehova kova tano „but samilosno hem milosrdno“ (Jak. 5:11). Asavko stav mothovđa hem o apostol Jovan. Ov pisinđa: „Me ćhave, akava pisinava tumenđe te ne bi ćerena greh. Ama ako neko hem ćerela greh, ko amaro Dad isi amen pomoćniko – o Isus Hrist, o pravedniko“ (1. Jov. 2:1).
20. Sostar ka vaćera ko aver članko?
20 Nažalost, podijekh puti jekh hrišćanin kova ćerđa disavo ozbiljno greh na mangela te kajini pe. Tegani, ov više našti te ovel deo andi skupština. So onda o starešine ćerena? Odolestar ka vaćera ko aver članko.
ĐILI 103 O pastirija tane poklon kotar Devel
a Angleder, akava odbor vićinđa pe disciplinsko odbor. Ama, odolese so i disciplina tani samo jekh deo ando odova so o starešine ćerena ko odova odbor, više na ka koristina odova izraz. Umesto odova, ka koristina o izraz odbor ando starešine.
b Sa so hine phendo aso roditeljija odnosini pe hem upro zakonska starateljija, a hem upro okola so umesto o roditeljija brininena pe andi nepunoletno osoba.
