1-2. (a) Sar o Jehova dikhela upro okola kola grešinena hem na mangena te kajinen pe? (b) So o Jehova nadini pe so on ka ćeren?

 O JEHOVA nane popustljivo hem mrzini o greh (Ps. 5:4-6). Ov ađićeri amendar te poštujina olese pravedna merilija kola tane ko oleso Lafi. Naravno, ov tano svesno so amen hijam nesavršena hem so našti savršeno te šuna le (Ps. 130:3, 4). Ama, ko isto vreme, ov na ka tolerišini okolen kolenđe „o bizaslužimo šukaripe [. . .] tano izgovor aso lošna buća kola ćerena bizi lađ“ (Jud. 4). Ki Biblija pisini so odola manuša ka oven uništime ko Armagedon, ko Devleso maribe (2. Petr. 3:7; Otkr. 16:16).

² Ama, o Jehova na mangela nijekh te merel. Sar so dikhljam ko okola člankija, i Biblija jasno phenela so o Jehova mangela „sare te pokajinen pe“ (2. Petr. 3:9). Sar o Jehova, hem o starešine tane strpljiva đi trudinena pe te pomožinen okolenđe kola ćerđe greh te kajinen pe hem palem te oven paše e Jehovaja. Ama, na mangena sare te prihvatinen olengi pomoć (Is. 6:9). Iako o starešine trudinena pe te pomožinen lenđe, disave hem ponodri ćerena odova soj tano pogrešno. So o starešine tegani valjani te ćeren?

 „CIDEN TUMENDAR OKOLE KOVA GREŠINI“

3. (a) So i Biblija phenela te ćerel pe okolencar kola na kajinena pe? (b) Sose šaj te phena so odija osoba kokri birinđa te na ovel više deo andi skupština?

³ Ked i osoba koja ćerđa greh na kajini pe, o starešine nane aver so te ćeren nego te šunen o uputstvo andi 1. Korinćanima 5:13, kuri pisini: „Ciden tumendar okole kova grešini.“ Odija osoba đanela so ako na kajini pe, više našti te ovel deo andi skupština. Odolese šaj te phena so oj kokri birinđa odova hem akana ćedela odova so sejinđa (Gal. 6:7). O starešine nekobor putija pokušinđe te pomožinen laće te kajini pe, ama oj na prihvatinđa olengi pomoć (2. Kralj. 17:12-15). Olake postupkija mothovena so na mangela te živini premalo Jehovase pravedna merilija (Pon. zak. 30:19, 20).

4. Sose ko sastanko čitini pe o obaveštenje soj tano neko cidimo andi skupština?

⁴ Ked i osoba koja ćerela greh na kajini pe hem odolese anela pe odluka te ovel cidimi andi skupština, ko sastanko čitini pe o obaveštenje so oj više nane e Jehovaso svedoko. a I svrha ando odova obaveštenje nane te ponizini pe odija osoba, već te šaj avera ki skupština te ićeren pe ki smernica ando Devleso Lafi te ćhinaven te družinen pe olaja, čak hem te na han olaja (1. Kor. 5:9-11). Isi šukar razlogija sose o Jehova dinđa akija zapovest. O apostol Pavle pisinđa: „Hari kvasco ušljari sa o humer“ (1. Kor. 5:6). Ked o grešniko kova na kajini pe na bi cidela pe andi skupština, avera bi šaj te mislinen so nane odobor važno te ićeren pe ko Jehovase pravedna merilija (Posl. 13:20; 1. Kor. 15:33).

5. Sar valjani te dikha upro okova kova više nane deo andi skupština hem sose?

⁵ Sar amen valjani te dikha upro okova kova tano cidimo skupština? Iako na ka družina amen oleja, upro leste na ka dikha sar našaldo slučaj već sar našaldo bakro. Sose? Odolese so o bakro kova našaldilo šaj palem te irini pe ko stado. Na valjani te bistra so okova kova tano cidimo skupština predajinđa po životi e Jehovase. Samo so nažalost trenutno na živini premalo obećanje kova dinđa e Jehovase hem sebepi odova tano ki opasnost (Jezek. 18:31). Ama, sa đi o Jehova mothovi milosrđe, isi nada so ov ka irini pe e Jehovase. Sar o starešine mothovena so isi len nada ko odova?

SAR O STAREŠINE POMOŽINENA OKOLENĐE KOLA TANE CIDIME ANDI SKUPŠTINA?

6. So o starešine ka ćeren te šaj te pomožinen nekase koj tano cidimo andi skupština?

⁶ Ako neko tano cidimo andi skupština, da li o starešine hem ponodri ka trudinen pe te pomožinen lese te irini pe e Jehovase? Naravno. Ked o odbor ando starešine phenela nekase soj tano cidimo andi skupština, on ka phenen lese hem so valjani te ćerel te šaj te irini pe. Ama, on ćerena hem pana diso. Ko but slučaja, on ka phenen lese so bi mangena te vaćeren oleja palem palo nekobor masek te dikhen da li meninđa po stav. Ako mangela palem te vaćeri e starešinencar, on tegani ka podstakninen le te kajini pe. Čak hem ako tegani na  dićhona o promene koro leste, o starešine palo disavo vreme palem ka vaćeren oleja hem ka podstakninen le te kajini pe.

7. Sar o starešine oponašinena e Jehovasi saosećajnost ked neko tano cidimo andi skupština? (Jeremija 3:12)

⁷ O starešine trudinena pe te oponašinen e Jehova hem te mothoven saosećajnost premalo okola kola tane cidime andi skupština. Na primer, ko purano vreme o Jehova na ađićerđa oleso tvrdoglavo narodo te ćerel o prvo korako. Umesto odova, ov bićhalđa pe prorokonen te pomožinen lenđe, čak angleder te kajinen pe. Ko dujto članko dikhljam so o Jehova phenđa e Osijase te oprostini pe romnjaće hem te irini la, iako tegani pana ćerđa ozbiljno greh. Odoleja o Jehova sikavđa pe narodo kobor tano saosećajno (Os. 3:1; Mal. 3:7). Isto ađahar, hem o starešine ćaće mangena okova so grešinđa te irini pe ki skupština hem olakšinena lese te ćerel odova. (Čitin Jeremija 3:12.)

8. Sar e Isuseso poređenje pomožini amen pana pošukar te haljova kobor tano o Jehova milosrdno? (Luka 15:7)

⁸ Setin tut sar reagujinđa o dad ando Isuseso poređenje ked oleso našaldo ćhavo irinđa pe ćhere. Ked dikhlja le, ov „prastandoj đelo anglo leste, zagrlinđa le hem ćumudinđa le“ (Luka 15:20). O dad na ađićerđa oleso ćhavo te molini le te oprostini lese. Umesto odova, ov prastandilo ko po ćhavo odolese so manglja le. O starešine trudinena te mothoven slično stav premalo okola so aćhavđe o ćaćipe. On mangena odova našaldo bakro „te irini pe“ ćhere (Luka 15:22-24, 32). Ked o grešniko irini pe, o Jehova, o Isus, o anđelija hem celo skupština but radujinena pe. (Čitin Luka 15:7.)

9. So o Jehova podstaknini okolen so grešinđe te ćeren?

⁹ Ando odova so đi akana razmotrinđam, jasno dikhaja so o Jehova na mangela okola so na kajinena pe te aćhon ki skupština. Ama, na irini lenđe po dumo nego mangela te irinen pe. Ked o manuša kajinena pe, dikh sar o Jehova osetini pe. Ko Osija 14:4 pisini: „Me ka saćarav len te na oven maje više neverna. Ka mangav len ando vilo, sose više na holjanava upro lende.“ Akava tano šukar podsetnik e starešinenđe so valjani hem on sar o Jehova pažljivo te pratinen da li i osoba mothovi disave znakija so kajini pe. Isto ađahar, akala lafija uverinena okolen kola aćhavđe e Jehova so ov mangela len hem so mangela te irinen pe.

10-11. Sar o starešine pomožinena okolenđe kola angleder hine cidime andi skupština?

¹⁰ Sar o starešine ka pomožinen okolenđe kola angleder nekobor berš hine cidime andi skupština? Disave olendar šaj više na ćerena odova greh sebepi kova tane cidime. A disave čak ni na setinena pe sose hine cidime. Bizo obzir kobor vreme nakhlja, o starešine ka trudinen pe te arakhen hem te posetinen asavke osoben. Tegani, on čak šaj ka molinen pe olencar hem ka podstakninen len te irinen pe. Naravno, ako jekh osoba but berš nane deo andi skupština, sigurno tani duhovno but slabo. Odolese, ako phenela so mangela te irini pe, o starešine šaj te organizujinen neko te proučini olaja, čak iako pana na irinđa pe. On ka birinen kasa odija osoba ka proučini.

 ¹¹ O starešine trudinena pe te oven saosećajna sar o Jehova. Odolese, on ka trudinen pe te arakhen sa okolen so aćhavđe e Jehova hem ka phene lenđe so pana isi len prilika te irinen pe e Jehovase. Ked jekh grešniko mothovi so meninđa pe, ov šaj te ovel irimo ki skupština (2. Kor. 2:6-8).

12. (a) Ko kola situacije o starešine valjani posebno te oven oprezna? (b) Sose na valjani te mislina so e Jehovaso milosrđe našti te ućhari nesave grehija? (Dikh i fusnota.)

¹² Ko disave situacije o starešine valjani te oven posebno oprezna angleder te irinen nekas ki skupština. Na primer, ako neko zlostavinđa e ćhaven ili tano  otpadniko ili ćerđa plan te rumini po brak, o starešine valjani te oven sigurna so odija osoba ćaće kajini pe (Mal. 2:14; 2. Tim. 3:6). On valjani te zaštitinen e phralen hem e phenjen ki skupština. Ama, amen valjani te haljova so o Jehova ka primini jekhe grešniko kova kajini pe hem na ćerela više odova soj tano lošno. Iako o starešine ka oven but oprezna okolencar kola okrutno ponašinđe pe premalo avera, on na valjani te mislinen so o Jehova niked na ka mothovi lenđe po milosrđe (1. Petr. 2:10). b

SO I SKUPŠTINA ŠAJ TE ĆEREL?

13. Sar valjani te ponašina amen premalo okola soj tane ukorime, a sar premalo okola soj tane cidime andi skupština?

¹³ Sar so vaćerđam ko prethodno članko, podijekh puti ki skupština čitini pe o obaveštenje so neko tano ukorimo. Tegani, amen šaj hem ponodri te družina amen oleja, odolese so ov pokajinđa pe hem više na ćerela greh (1. Tim. 5:20). Ov tano pana deo andi skupština hem valjani lese ohrabrenje sar sarinenđe amenđe (Jevr. 10:24, 25). Ama, i situacija tani averćhane ako tano neko cidimo andi skupština. Ki Biblija pisini te ćhinava te družina amen oleja hem čak phenela: „Asavkeja ni ma han“ (1. Kor. 5:11).

14. So disave ka odlučinen te ćeren ked vaćeri pe ando okola soj tane cidime andi skupština (Dikh i slika.)

¹⁴ Ama, da li odova značini so amen na valjani te ovel amen nisavo kontakt e osobaja koja tani cidimi andi skupština? Na. Naravno, amen na ka družina amen olaja. Ama, ako odija osoba tani neko andi amari familija ja hijam le paše olaja, tegani svako hrišćanin premali pi savest koja tani oblikujimi premalo biblijake načelija ka odlučini da li ka vićini la te avel ko sastankija. Ama, sar valjani te ponašina amen olaja ako avela ko sastanak? Angleder, na pozdravinđam amen olaja. Akana svako hrišćanin premali pi savest koja tani oblikujimi premalo biblijake načelija, valjani te anel odluka so ka ćerel. Disave šaj ka odlučinen te pozdravinen  pe odola osobaja. Ama, na ka vaćera but olaja niti ka družina amen olaja.

15. Ando kola manuša vaćeri pe ki 2. Jovanova 9-11? (Dikh o okvir „ Da li o Jovan hem o Pavle vaćerđe ando isto greh?“)

¹⁵ Disave šaj te pućen pe: „Na li i Biblija phenela so ako jekh hrišćanin pozdravini odola osoba, ov učestvujini ko lošna buća kola ćerela?“ (Čitin 2. Jovanova 9-11.) O kontekst ando akala stihija vaćeri ando otpadnikija hem ando okola kola averen ćhivena te ćeren odova aso so i Biblija phenela soj tano pogrešno (Otkr. 2:20). Odolese, o starešine na ka posetinen asavke manušen. Naravno, odova na značini so asavke manuša niked na ka kajinen pe. Ama, đi odova na desini pe, amen na ka pozdravina len hem na ka vićina len te aven ko sastanak.

OVEN SAOSEĆAJNA HEM MILOSRDNA SAR O JEHOVA

16-17. (a) So o Jehova mangela te ćeren okola so ćerđe ozbiljno greh? (Jezekilj 18:32) (b) Ko kova način o starešine sarađujinena e Jehovaja?

¹⁶ So sikljiljam ko akala panđ člankija? O Jehova na mangela nijekh manuš te ovel uništimo. (Čitin Jezekilj 18:32.) Ov mangela okola kola ćerđe ozbiljno greh te pomirinen pe oleja (2. Kor. 5:20). Odolese, ov uvek podstakninđa pe slugen kola aćhavđe le te kajinen pe hem te irinen pe olese. O starešine isi len čast te sarađujinen e Jehovaja ađahar so pomožinena okolenđe kola ćerđe ozbiljno greh te kajinen pe (Rimlj. 2:4; 1. Kor. 3:9).

¹⁷ Zamislin kobor bari radost tani ko nebo ked neko irini pe e Jehovase! Amaro nebesko Dad, o Jehova, svako puti tano but bahtalo ked neko ando našalde bakre irini pe ki skupština. Amaro mangipe premalo Jehova ovela pobaro đi razmislinaja andi olesi saosećajnost, ando oleso milosrđe hem šukaripe (Luka 1:78).